Ngaahi Naunau Fakafeʻiloakí

Ko e Palani ʻo e Fakamoʻuí

Palani ʻa e Tamai Hēvaní ki Heʻene Fānaú

Ko e Fakataha Alēlea Lahí

ʻI heʻetau fononga fakamatelié, ʻoku faʻa ʻohake ha ngaahi fehuʻi fekauʻaki mo e taumuʻa mo e ʻuhinga ʻo e moʻuí: Naʻá ku haʻú mei fē? Ko e hā ʻoku ou ʻi heni aí? Ko ‘eku ʻalú ki fē? ʻE lava ke tokoni hono ʻiloʻi e tali ki he ngaahi fehuʻi ko ʻení ke tataki ho fonongá ‘i he ngaahi faingataʻa ʻo e moʻuí pea mo nofo maʻu ʻi he hala ʻo e fuakava ʻa e ʻEikí. ʻE lava ke tokoni atu ʻa e lēsoni ko ʻení ke mahino kiate koe peá ke ongoʻi ʻa e mahuʻinga ʻo e palani ʻa e Tamai Hēvaní.

Ko e Taumuʻa ʻo e Seminelí mo e ʻInisititiuti Fakalotú. Manatuʻi ko “ʻetau taumuʻá ke tokoni ke mahino mo falala ʻa e toʻutupú mo e kakai lalahi kei talavoú ki he ngaahi akonaki mo e Fakalelei ʻa Sīsū Kalaisí, fakafeʻungaʻi kinautolu ke maʻu ʻa e ngaahi tāpuaki ʻo e temipalé, pea teuteuʻi kinautolu, honau fāmilí mo e niʻihi kehé ki he moʻui taʻengata mo ʻenau Tamai Hēvaní” (Ko Hono Akoʻi mo Ako ʻo e Ongoongoleleí: Ko ha Tohi Tuʻutuʻuni maʻá e Kau Faiako mo e Kau Taki ʻi he Seminelí mo e ʻInisititiuti Fakalotú [2012], x, ChurchofJesusChrist.org)

fakaʻilonga, fakahinohino fakafaiako

Teuteu ʻa e tokotaha akó: Fakaafeʻi e kau akó ke nau fakakaukau ki ha meʻa ʻoku nau ongoʻi he ʻikai ke nau lava ʻo moʻui taʻe maʻu ia pea mateuteu ke fakamatalaʻi hono ʻuhingá. Te nau lava foki ʻo ʻomi ia pe ko hano fakatātā ki he kalasí, kapau ʻoku feʻunga.

Ngaahi ʻEkitivitī Ako ʻOku Ala Fakahokó

Palani ʻa e Tamai Hēvaní

fakaʻilonga, fakahinohino fakafaiako

Ke tokoni ki he kau mēmipa ʻo e kalasí ke nau feakoʻakí, fakakaukau ke fakaafeʻi e kau akó ke vahevahe ʻenau tali ki he fehuʻi ʻi laló. ʻE ala tokoni ki he kau akó ke nau fakahaaʻi ʻa e meʻa naʻa nau fakakaukau ki aí pe vahevahe hano fakatātā. Fakapapauʻi ke fakaʻaiʻai ha ʻātakai lelei mo fakaʻapaʻapa fekauʻaki mo e ngaahi meʻa mahuʻinga ʻi he moʻui ʻa e kau akó.

• Ko e hā ha ʻilo ʻokú ke pehē he ʻikai te ke lava ʻo moʻui taʻe maʻu ia? Ko e hā hono ʻuhingá?

‘I he folofolá mo e fakahā fakaonopōní, ‘oku tau maʻu ai ha ʻilo ki he moʻui ʻi he maama fakalaumālié, ko e Fakalelei ʻa e Fakamoʻuí, moʻui ‘i he hili ʻa e maté, pea mo e ngaahi ʻelemēniti lahi kehe ʻo ʻetau moʻui taʻengatá. ʻE faingataʻa ke ʻikai moʻui ʻaki e ʻilo ko ʻení. Toʻo ha taimi ke ke fakakaukau ai ki he meʻa ʻokú ke ʻiloʻi fekauʻaki mo e palani ʻa e Tamai Hēvaní. Fakalaulauloto pe naʻe mei fēfē nai hoʻo moʻuí ka ne ʻikai ke ke ʻiloʻi ia.

ʻI hoʻo ako he ʻaho ní, fekumi ki he takaua ʻa e Laumālie Māʻoniʻoní ke tokoniʻi koe ke ke ako lahi ange fekauʻaki mo e palani ʻofa ʻa e Tamai Hēvaní ki he ʻEne fānaú.

Palani ʻa e Tamai Hēvaní ʻi he Tohi ʻa Molomoná

fakaʻilonga, fakahinohino fakafaiako

‘E ala tokoni ke hiki ‘a e ngaahi fehuʻi ko ʻení mo e ngaahi meʻa ‘oku fakatātā ‘akí ʻi he palakipoé. Ko ha founga ʻe taha ko hono hiki ʻa e fehuʻi takitaha ʻi ha laʻipepa mavahe pea tuku takai ʻa e ngaahi laʻipepá ʻi he lokí. Fakaafeʻi e kau akó ke nau lue takai ʻi he lokí, kumi e ngaahi fehuʻí, pea fekumi leva ʻi he folofolá ʻa e tali ki he ngaahi fehuʻí. ʻE toe malava ke hiki ʻe he kau akó ʻa e ngaahi tali ʻoku nau maʻú ʻi he laʻipepá.

ʻOku akoʻi ʻe he Tohi ʻa Molomoná ha meʻa lahi fekauʻaki mo e palani ʻa e Tamai Hēvaní. Naʻe fakahā ‘e Palesiteni Lāsolo M. Nalesoni: “ʻOku ou fakamoʻoni ko e Tohi ʻa Molomoná ko e folofola moʻoni ia ʻa e ʻOtuá. ʻOku ʻi ai e ngaahi tali ki he ngaahi fehuʻi mālohi taha ʻo e moʻuí” (Russell M. Nelson, “Ko e Tohi ʻa Molomoná: Ne Mei Fēfē Nai Hoʻo Moʻuí Ka Ne ʻIkai Ia?,” Ensign pe Liahona, Nōvema 2017, 62). Ko ha ngaahi fehuʻi ʻeni ʻe niʻihi ʻoku ‘omi ‘a e talí ʻe he Tohi ʻa Molomoná. Fili ha potufolofola ʻe ua pe lahi ange pea lau ʻa e potufolofola ʻoku tokoni ki hono tali ʻa e fehuʻí.

• Ko e hā ‘oku akoʻi mai ‘e he Tohi ʻa Molomoná fekauʻaki mo e moʻui kimuʻa ‘i he maama fakamatelié? (ʻAlamā 12:25, 30; ʻoku ʻuhinga ʻa e kupuʻi lea “‘ai ‘a e tuʻunga ʻo e māmaní” ki he moʻui ʻi he maama fakamatelié.)

• Ko e hā e fatongia ʻo Sīsū Kalaisi ʻi he palani ‘a e Tamai Hēvaní? (ʻAlamā 22:12–14)

• Ko e hā e taumuʻa ʻo e moʻuí? (ʻAlamā 34:32–33)

• Ko e hā e meʻa ʻoku hoko ʻi heʻetau maté? (ʻAlamā 40:11–14, 21–23)

• Ko e hā ‘e hoko ‘i he ʻikai ke ʻi ai e Fakalelei ʻa Sīsū Kalaisí? (2 Nīfai 9:6–11)

fakaʻilonga, fakahinohino fakafaiako

Fakaafeʻi ha kau ako ke nau vahevahe e ngaahi tali ne nau maʻú ki he ngaahi fehuʻi ko ʻení. ʻE lava foki ke fakaafeʻi e kau akó ke nau fai ha ngaahi fehuʻi fekauʻaki mo e ngaahi veesi ne nau laú pē ki he palani ʻa e Tamai Hēvaní. Te nau lava ʻo fakaʻaongaʻi ʻa e fakamatala ʻi he Ngaahi Tefito ʻo e Ongoongoleleí ko e “Palani ʻo e Fakamoʻuí” ke mahino ʻa e ngaahi potufolofolá pea kumi e tali ki heʻenau ngaahi fehuʻí.

• Ko e hā e ngaahi moʻoni pe tokāteline naʻá ke ʻiloʻi mei he ngaahi veesi naʻá ke laú?

• Ko e hā ha ngaahi foʻi lea pe kupuʻi lea ʻi he ngaahi vēsí ʻokú ne akoʻi ʻa e moʻoni pe tokāteline naʻá ke ʻiloʻí?

  fakaʻilonga, fakahinohino fakafaiakó

  Fakakaukau ke hiki ʻa e ngaahi moʻoni mo e tokāteline ʻoku ʻilo ʻe he kau akó ʻi he palakipoé. ‘E ala ʻiloʻi ʻe he kau akó ha ngaahi moʻoni kehekehe, hangē ko e Fakalelei ʻa Sīsū Kalaisí, ʻe lava ke huhuʻi kitautolu mei he Hingá.

• Ko e fē ʻi he ngaahi akonaki fekauʻaki mo e palani ʻa e Tamai Hēvaní ʻokú ke houngaʻia taha aí? Ko e hā hono ʻuhingá?

fakaʻilonga, fakahinohino fakafaiakó

ʻE ala tokoni ki he kau akó ke nau akoako hono fakamatalaʻi tautau toko ua pe fakakulupu e palani ʻa e Tamai Hēvaní. Tānaki atu ki hono fakamatalaʻi ʻo e palaní, fakaafeʻi e kau akó ke vahevahe ʻa e founga te ne lava ai ʻo tākiekina ʻenau moʻuí.

Palani ʻa e Tamai Hēvaní mo ʻeku moʻuí

fakaʻilonga, fakahinohino fakafaiakó

Tokoni ki he kau akó ke nau fevahevaheʻaki ki he lelei ‘o ‘enau moʻuí, ‘i he ‘enau ‘iloʻi ‘a e palani ʻa e Tamai Hēvaní. Te ke ala fakakaukauʻi hono ngaueʻaki e lea ko ʻeni ʻa Palesiteni M. Russell Ballard mo ha niʻihi ʻo e ngaahi fehuʻi ko ʻení.

Naʻe fakamatala ‘e Palesiteni M. Russell Ballard ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e malava ke faitokonia ‘etau moʻuí ‘i he‘etau mahinoʻi ‘a e palani fakamoʻui ʻa e Tamai Hēvaní.  

Palesiteni M. Lāsolo Pālati

Ko kitautolu kakai matelié ʻoku fakangatangata pē ‘etau vakai ki he moʻuí mei he fakakaukau taʻengatá. Ka ʻokapau te tau ʻiloʻi pea mo mahino ʻa e palani ʻa e Tamai Hēvaní, te tau ʻiloʻi ai ko e taha ʻo e ngaahi founga tefito ʻoku ʻahiʻahiʻi ai kitautolú ko e fehangahangai mo e faingataʻá. …

ʻI heʻetau tokanga mo moʻui ʻaki e ngaahi tefitoʻi moʻoni ʻo e palani ʻa e Tamai Hēvaní ki heʻetau fiefia taʻengatá, te tau lava ai ʻo fakamavaheʻi kitautolu mei he fai angahala ʻo e māmaní. Kapau ʻoku tau tuʻu maʻu ʻi he mahino totonu ʻoku tau maʻú, ko e hā e ‘uhinga ʻoku tau ʻi he māmaní aí, mo e feituʻu te tau lava ʻo ʻalu ki ai hili ʻa e moʻui fakamatelié ni, he ʻikai lava ke fakamanamanaʻi ʻe Sētane ʻetau fiefiá ʻo fakafou ʻi ha faʻahinga founga pē ʻo e ʻahiʻahí. Kapau ʻoku tau fakapapau ke moʻui ʻaki e palani ʻa e Tamai Hēvaní, te tau fakaʻaongaʻi ‘a e tauʻatāina ke fili ne foaki mai ʻe he ʻOtuá ke fakahoko ʻetau faituʻutuʻuní ʻo makatuʻunga ʻi ha moʻoni kuo fakahā mai, kae ʻikai ko e fakakaukau ʻa e niʻihi kehé pe ko e fakakaukau lolotonga ʻo e māmaní. (M. Russell Ballard, “Answers to Lifeʻs Questions,” Ensign pe Liahona, Mē 1995, 23–24)

• ʻOku anga fēfē hono tākiekina hoʻo moʻuí ʻi hoʻo ʻiloʻi ‘a e palani ʻa e Tamai Hēvaní?

• Ko e hā ha ngaahi tūkunga ʻe niʻihi ʻe kaunga ai ki he ngaahi fili ʻokú ke faí ha ʻilo ki he palani ʻa e Tamai Hēvaní?

• ʻE tokoni fēfē ha ʻilo ki he palani ʻa e Tamai Hēvaní ke liliu e anga hoʻo vakai ki he ngaahi tūkunga mo e ngaahi aʻusia ʻi hoʻo moʻuí?

fakaʻilonga, fakahinohino fakafaiakó

Fakaʻosi e lēsoní ʻaki hano vahevahe hoʻo fakamoʻoni ki he palani ʻa e Tamai Hēvaní mo e founga kuó ne tākiekina ai hoʻo moʻuí.

Fakamatala Fakamahinó mo e Puipuituʻá

ʻOku anga fēfē e hoko ‘a e palani ʻo e fakamoʻuí ko ha fakamoʻoni ia ʻo e ʻofa ʻa e ʻOtuá?

Naʻe akonaki ʻa Palesiteni M. Russell Ballard ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Palesiteni M. Russell Ballard

Naʻe ʻofa pehē ʻa e Tamai Hēvaní ʻiate kitautolu naʻá Ne teuteuʻi ai ʻEne palani ʻo e fakamoʻuí mo ha Fakamoʻui ke fakatefito mei ai. Pea naʻe ʻofa pehē ʻa Sīsū ʻiate kitautolu, ʻi he Fakataha Alēlea lahi ko ia ʻi he Langí, ʻi he fehuʻi ʻe he Tamai Hēvaní, “Ko hai te u fekauʻí?” Naʻe tali ange ʻe Sīsū, ʻa ia naʻe hoko ko e ʻuluaki fānau ʻi he fānau fakalaumālie kotoa ʻa e Tamaí, “Ko au ʻeni, fekauʻi au” [ʻĒpalahame 3:27]. Naʻá Ne pehē ange ki he Tamaí, “ʻE Tamai, ke fai pē ʻa ho finangaló, pea ke ʻoʻou ʻa e lāngilangí ʻo taʻengata” [Mōsese 4:2]. Naʻe loto-fiemālie ʻa Sīsū ke hoko ko hotau Fakamoʻui mo e Huhuʻi kae lava ke tau hoko ʻo hangē ko Kinauá pea toe foki ki Hona ʻaó. (M. Russell Ballard, “ʻOku Lahi Hake Hoʻo ʻOfa Kiate Aú ʻIate Kinautolú ni?,” Ensign pe Liahona, Nōvema 2021, 52)

Ko e hā e ‘uhinga ‘oku ‘i ai ai ‘a e ngaahi faingataʻa ʻi he moʻuí?

Naʻe pehē ʻe Palesiteni Dallin H. Oaks ʻo e Kau Palesitenisī ʻUluakí:

Palesiteni Tāleni H. ʻOakesi

ʻOku tau aʻusia kotoa ha ngaahi fakafepaki kehekehe ʻokú ne siviʻi kitautolu. Ko e niʻihi ʻo e ngaahi siviʻi ko ʻení ko ha ngaahi fakatauele ke fai angahala. Ko e niʻihi ko ha ngaahi faingataʻaʻia fakamatelie ʻoku ʻikai kaunga ki ai e angahala fakatāutahá. ʻOku ʻi ai e niʻihi ʻoku fuʻu lalahi. Pea iiki ha niʻihi. ʻOku hokohoko atu ha niʻihi, pea fakataimi pē ha niʻihi. He ʻikai ke tau hao mei ai. ʻOku fakaʻatā kitautolu ʻe he fehangahangaí pe fakafepakí ke tau fakalakalaka ki he meʻa ʻoku finangalo e Tamai Hēvaní ke tau aʻusiá. (Dallin H. Oaks, “Fehangahangai ʻi he Meʻa Kotoa Pē,” Ensign pe Liahona, Mē 2016, 115–16)

ʻE tokoniʻi fēfē au ʻi he‘eku ʻiloʻi e palani ʻa e Tamai Hēvaní?

 

Ko e hā ‘a e taumuʻa mo e ʻuhinga ʻo e moʻuí?

Naʻe fakamatala ʻe Palesiteni Tāleni H. ʻOakesi ʻo e Kau Palesitenisī ʻUluakí ʻo pehē:

Palesiteni Tāleni H. ʻOakesi

ʻOku lau ki ai e folofolá ko e “palani lahi ʻo e fiefiá,” “ko e palani ʻo e huhuʻí,” pea “ko e palani ʻo e fakamoʻuí” (ʻAlamā 42:8, 11, 5), ko e palani ko iá—ʻa ia ne fakahā ʻi hono Fakafoki Mai ʻo e Ongoongoleleí—ne kamata ia ʻi ha Fakataha Alēlea ʻi he Langí. ʻI heʻetau hoko ko e ngaahi laumālié, ne tau loto ke maʻu e moʻui taʻengata ne fiefia ai ʻetau ongomātuʻa fakalangí. ʻI he tuʻunga ko iá ne tau fakalakalaka ki he tuʻunga te tau lava ʻo aʻu ki ai ʻo ʻikai ha aʻusia fakaesino. Ne palani e ʻOtuá ke fakatupu e māmani ko ʻení, ke maʻu ai e aʻusia ko iá. ʻI he palani ʻo e moʻui fakamatelié, ʻe fakameleʻi kitautolu ʻe he angahalá ʻi heʻetau fepaki mo e ʻahiʻahi ʻoku ʻaonga ki heʻetau tupulaki fakalaumālié. Te tau toe moʻulaloa foki ki he mate fakaesinó. Ne palani ʻetau Tamai Hēvaní ke ʻomai ha Fakamoʻui, ke lava ʻo fakafoki kitautolu mei he maté mo e angahalá. ʻE hanga ʻe Heʻene Toetuʻú ʻo huhuʻi e tokotaha kotoa pē mei he maté, pea totongi ʻe Heʻene feilaulau fakaleleí e meʻa ʻoku fiemaʻu ke fakamaʻa ai e taha kotoa mei he angahalá ʻo makatuʻunga mei ai haʻatau tupulaki. Ko e Fakalelei ʻa Sīsū Kalaisí e uho ʻo e palani ʻa e Tamaí. (Dallin H. Oaks, “Ko e Palani Lahí,” Ensign pe Liahona, Mē 2020, 93)

 

Ngaahi ʻEkitivitī Fakalahi ki he Akó

Kamata ʻe taha ki he lēsoní

Kapau ʻe ala lava ‘o maʻu, fakakaukauʻi ke ʻomi ha ongo matasioʻata lanu kehekehe. Fakaafeʻi ha tokotaha ako ke ne ʻahiʻahiʻi e matasioʻatá pea fakamatalaʻi e founga ʻoku tokoni ai ki heʻenau vakaí. ʻE lava leva ke fakaafeʻi kinautolu ke fakakaukau ki he founga ʻe lava ke tākiekina ai ʻe he vakai ki he moʻui mo e palani ʻa e Tamai Hēvaní ʻa e anga ʻo ʻenau fakakaukaú mo e tōʻongá. ʻI he mahino lelei ange kiate kitautolu e palani ʻa e Tamai Hēvaní, ʻoku tau maʻu ai ha fakakaukau mahino ange ki heʻetau moʻui fakamatelié. Ko ha sīpinga ʻe taha ko kinautolu ʻoku nau ʻiloʻi ʻoku ʻi ai e moʻui hili ʻa e maté ʻe lava ke fakafiemālieʻi lahi ange kinautolu ʻi he taimi ʻe mate ai ha taha ʻoku nau ʻofa ai.

Nofotaha ʻi he tefitoʻi fatongia ‘o e palani ‘a e Fakamoʻuí ʻi he palani ʻo e fakamoʻuí

Fakakaukau ke fakaʻaongaʻi ‘a e lea ‘a Palesiteni Tāleni H. ʻOakesi “Ko e Hā Kuo Fai ʻe Hotau Fakamoʻuí Maʻatautolú?” (Liahona,, Mē 2021, 75–77) ke tokoni ke mahino ki he kau akó e founga ʻoku tokoniʻi ai kitautolu ʻe Sīsū Kalaisi ke tau ikunaʻi e ngaahi faingataʻa ʻoku fekauʻaki mo e moʻui fakamatelié. ʻE lava ke fai ʻeni ʻaki hono lau e talanoa kamata ʻo e leá fekauʻaki mo e fefine naʻá ne fehuʻi “Ko e hā kuo fai ʻe [Sīsū] maʻakú?” Vahevahe ʻa e ngaahi konga ʻo e leá ki he kalasí pea fakaafeʻi kinautolu ke nau fekumi ki ha tali ki he fehuʻi ko iá. Fakaafeʻi e kau akó ke nau fakamoʻoni ki he founga ʻoku tākiekina ai ʻe heʻenau ʻiloʻi e ngaahi meʻá ni ʻenau ngaahi ongo ki he Tamai Hēvaní mo Sīsū Kalaisí. ʻE lava foki ke ako ʻe he kau akó ʻa e ngaahi veesi ko ʻení fekauʻaki mo e tuʻunga ʻe ʻi ai ʻa e moʻuí ‘i he kau pe taʻe kau ai hotau Fakamoʻuí.

• Mo Kalaisi: Mōsaia 16:8–11; ʻAlamā 11:42–45; ʻAlamā 12:33–34

• Ka ne taʻeʻoua ʻa Kalaisi: 2 Nīfai 9:6–9; Mōsaia 16:6–7; ʻAlamā 41:10–11; ʻAlamā 42:11–14

Fakatātaaʻi e palani ʻo e fakamoʻuí

Hili e ako ʻa e kau akó fekauʻaki mo e palani ʻa e Tamai Hēvaní, te ke lava ʻo fakaafeʻi kinautolu ke nau faʻu ha fakatātā ke fakamatalaʻi ʻa e palaní mo e fatongia ʻo e Fakamoʻuí ʻi aí. ʻE lava ke fakaʻaongaʻi ʻe he kau akó ʻenau ngaahi fakatātaá ke akoako fakamatalaʻi ki ha kaungā ako e meʻa ʻoku nau ʻilo fekauʻaki mo e palaní. Ko ha sīpinga ʻeni ʻo ha fakatātā.

Palani ʻo e fakamoʻuí

Ko e palani ʻo e fakamoʻuí ʻi ha konga ʻe tolu

Ko e founga ʻe taha ke mahino ai e palani ʻo e fakamoʻuí ko hono vahevahe ia ki ha konga ʻe tolu: maama fakalaumālié, moʻui fakamatelié, mo e hili ʻa e moʻui fakamatelié.    

•  

•    

•    

•