Fakataukei Fakatokāteliné: ʻEta 12:27

Ko Hono Ikunaʻi Hotau Ngaahi Vaivaí

finemui ʻokú ne fakafefeka hono uouá

ʻI hoʻo ako ʻa e ʻEta 12:23–27, naʻá ke ako ai kapau ʻoku tau loto-fakatōkilalo mo tui ki he ʻEikí, te Ne lava ʻo liliu hotau ngaahi vaivaí ko ha ngaahi mālohinga. ʻE lava ke tokoni ʻa e lēsoni ko ʻení ke ke ako maʻuloto ʻa e fakamoʻoni fakafolofola fakataukei fakatokāteliné mo e kupuʻi lea folofola mahuʻinga ki he ʻEta 12:27, fakamatalaʻi ʻa e tokāteliné, pea fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.

Fakamatalaʻi mo e ako maʻuloto

ʻOua ʻe toe sio ki he ʻEta 12:27, kae vakai pe te ke lava ʻo fakafonu ʻa e ngaahi konga ʻoku pulia ʻi he sētesi ko ʻení ʻo fakatefito ʻi he ngaahi akonaki ʻa e ʻEikí kia Molonaí:

• Kapau te u , , mo , ʻe liliu ʻe Sīsū Kalaisi ʻa e ngaahi meʻa vaivaí ko ha mālohinga kiate au.

• ʻOkú ke pehē ko e hā ʻa e meʻa ʻe mahuʻinga ke manatuʻi ʻe ha taha fekauʻaki mo e sētesi ko ʻení?

Ke tokoni ke ke ako maʻuloto fakatouʻosi ʻa e fakamoʻoni fakafolofolá mo e kupuʻi lea mahuʻinga ʻi he folofolá, toe vakaiʻi tuʻo lahi kinaua pea feinga ke hiki maʻuloto kinaua ʻi hoʻo tohinoa akó.

ʻEta 12:27: “Kapau ʻe haʻu kiate au ʻa e tangatá … te u liliu ʻa e ngaahi meʻa vaivaí ko e mālohi kiate kinautolu.”

Fakafehoanaki ʻa e meʻa naʻá ke hiki mei hoʻo manatú mo e fakamoʻoni fakafolofola mo e kupuʻi lea mahuʻinga ʻi ʻolungá, pea fai ha ngaahi fakatonutonu ʻoku fiemaʻu. ʻAhiʻahi hiki tuʻo tolu pe fā ʻa e fakamoʻoni fakafolofolá mo e kupuʻi lea mahuʻinga ʻi he folofolá pe toutou fakahoko ia kae ʻoua kuó ke lava ʻo tohi maʻuloto kinaua.

Akoako hono fakaʻaongaʻí

Feinga ke fakamanatuʻi ʻa e ngaahi tefitoʻi moʻoni ʻe tolu ʻo hono maʻu ʻo e ʻilo fakalaumālié, pea tohi kinautolu ʻi hoʻo tohinoa akó. Kapau ʻe lava, fakakau ai ha kiʻi fakamatala nounou ʻo e tefitoʻi moʻoni takitaha. ʻO ka fiemaʻu, toe fakamanatu ʻa e ngaahi tefitoʻi moʻoni ko ʻení ʻi he palakalafi 5–12 ʻo e konga “Ko Hono Maʻu ʻo e ʻIlo Fakalaumālié” ʻo e Fakamatala ki he ʻElito ʻo e Fakataukei Fakatokāteliné (2023).

1. Fakakakato ʻa e ʻekitivitī ko ʻení:

• Lisi ʻi hoʻo tohinoa akó ha ngaahi vaivai te ne ala fakatupu ha ongoʻi taʻemalava pe taʻefeʻunga ʻa ha toʻu tupu.

• Fili ha taha ʻo e ngaahi vaivaiʻanga ko ʻeni ʻokú ke ongoʻi ʻoku angamaheni ki ha toʻu tupu tokolahi, pea lekooti ʻa e founga ʻe lava ke fakaʻaongaʻi ai ʻe ha toʻu tupu ʻa e ngaahi tefitoʻi moʻoni ʻo hono maʻu ʻo e ʻilo fakalaumālié ke ikunaʻi ʻaki ʻa e vaivai ko ʻení.

• Ko e founga ʻe taha ke fai ai ʻení ko hano lisi ʻa e ngaahi tefitoʻi moʻoni takitaha ʻo hono maʻu ʻo e ʻilo fakalaumālié ʻi hoʻo tohinoa akó ʻi lalo ʻi he vaivaiʻanga naʻá ke fili ke ke fakatefito aí. Te ke lava leva ʻo lisi ʻi lalo ʻi he tefitoʻi moʻoni takitaha ʻa e founga ʻe lava ke fakaʻaongaʻi ai ia ki he vaivaiʻangá, pe ko hoʻo lekooti ha ngaahi fehuʻi ʻe ala fai ʻe ha taha fekauʻaki mo e tefitoʻi moʻoní.

Hangē ko ʻení, kapau te ke fili ha vaivaiʻanga pe hohaʻa hangē ko e “ʻOku fakamoleki ʻe he toʻu tupú ha taimi lahi fau ʻi heʻenau telefoní,” ʻe lava ke hā peheni ʻa e meʻa te ke tohi ʻi hoʻo tohinoá:

ʻOku fakamoleki ʻe he toʻu tupú ha taimi lahi fau ʻi heʻenau telefoní

Ngāue ʻi he Tuí

• Mahalo ʻe lava ʻa kinautolu ʻoku fefaʻuhi mo e meʻa ko ʻení ʻo lotua ha tokoni kae tautautefito ki he palopalemá ni. Kimuʻa pea nau lotú, te nau lava ʻo fakalaulauloto ki he tokoni te nau ala fiemaʻu ki he ʻaho ko iá. Mahalo te nau lava ʻo lotu kimuʻa pea nau toki fakaʻaongaʻi ʻenau telefoní.

• Kuo foaki mai ʻe he ʻOtuá ʻa e tekinolosiá ke tāpuekina ʻetau moʻuí mo tokoniʻi kitautolu mo e niʻihi kehé ke tau ofi ange kiate Ia; te tau lava fēfē ke fakaʻaongaʻi ia ʻi he founga ko ʻeni?

• ʻEta 12:27: Te tau lava fēfē ʻo fakahaaʻi ki he ʻEikí ʻoku tau loto-fakatōkilalo, falala kiate Ia, pea mo fiemaʻu ʻEne tokoní ke fakalakalaka ʻi he meʻá ni?

Fakakaukau ʻoku Taʻengatá

• Kapau he ʻikai ikunaʻi ʻeni ʻe ha taha, te ne uesia fēfē honau ngaahi vā fetuʻutaki ʻi he kahaʻú, ngāué, ʻitānití, mo e alā meʻa peheé?

• Ko e hā ha meʻa ʻoku ou ʻilo fekauʻaki mo e ʻOtuá mo ʻEne ngaahi tuʻunga moʻuí? Ko e hā ʻoku mahuʻinga ai kiate Ia ʻetau fakaʻaongaʻi ʻa e tekinolosiá?

Ngaahi Maʻuʻanga Tokoni kuo Fokotuʻu Fakalangí

• ʻOku ou ʻilo kuo lea ʻaki ʻeni ʻe heʻeku pīsopé, pea ʻoku ou manatu ki heʻene talanoa kau ki ha ngaahi meʻa kuó ne fai. Te u ʻeke ange pe ko e hā ʻa e ngaahi maʻuʻanga tokoni kuó ne fakaʻaongaʻí pea mo e meʻa kuó ne tokoniʻi iá.

Ko ʻene ʻosí pē pea toe fakakakato ʻa e ʻekitivitī kimuʻá. ʻI hoʻo toe fakahoko iá, nofotaha ʻi he vaivai ʻokú ke fiemaʻu tokoni aí. He ʻikai kole atu ke ke vahevahe ʻeni mo e niʻihi kehé.