Seminelí
Molomona 7: “[Ko] ha Tuʻunga ʻo e Fiefia ʻa ia ʻOku ʻIkai Hano Ngataʻanga”

“Molomona 7: ʻKo ha Tuʻunga ʻo e Fiefia ʻa ia ʻOku ʻIkai Hano Ngataʻanga,’” Tohi ʻa Molomoná - Tohi Lēsoni ʻa e Tokotaha Akó (2024)

“Molomona 7,” Tohi ʻa Molomoná - Tohi Lēsoni ʻa e Tokotaha Akó

Molomona 7

“[Ko] ha Tuʻunga ʻo e Fiefia ʻa ia ʻOku ʻIkai Hano Ngataʻanga”

ʻĪmisi
Molomona

Fakakaukauloto ki he ongo naʻe maʻu ʻe Molomona ʻi heʻene mamata tonu ki he mamahi mo e fakaʻauha naʻe tupunga ʻi he ngaahi tau fakaʻosi ʻa e kau Nīfaí mo e kau Leimaná. Kimuʻa pea mole ʻa e moʻui ʻa Molomoná ʻi he taú, naʻá ne fakaʻosi ʻene ngaahi tohí ʻaki ʻene akonaki fekauʻaki mo Sīsū Kalaisi pea mo e fiefia taʻengata ʻoku fakatatali mai kiate kinautolu ʻoku muimui kiate Iá. ʻE lava ke tokoni atu ʻa e lēsoni ko ʻení ke ke muimui kia Sīsū Kalaisi pea teuteu ke nofo mo e ʻOtuá ʻi he fiefia taʻengata.

Ko e moʻui ʻa Molomoná

Fai ʻa e kiʻi sivi ko ʻení ke ke sio ai ki he meʻa ʻokú ke manatuʻi fekauʻaki mo e palōfita ko Molomoná.

ʻOku maʻu ʻa e ngaahi talí ʻi he fakaʻosinga ʻo e lēsoní.

  1. Naʻe fakamatalaʻi fēfē ʻa Molomona ʻi heʻene kei talavoú? (Vakai, Molomona 1:2.)

    1. Ko ha tokotaha toʻo meʻatau ia ʻi he kau tau ʻa e kau Nīfaí

    2. Naʻá ne ilifia

    3. Naʻá ne mata poto

  2. Ko e hā ʻa e meʻa naʻe aʻusia ʻe Molomona ʻi hono taʻu 15? (Vakai, Molomona 1:15.)

    1. Naʻe ʻaʻahi ʻa e ʻEikí kiate ia

    2. Naʻe fakaului heʻene malangá ha laungeau

    3. Naʻá ne lavea ʻi he taú

  3. ʻOku fakafuofua ko e hā e lahi ʻo e Tohi ʻa Molomoná naʻe hiki pe fakanounouʻi ʻe Molomoná?

    1. 1/2

    2. 2/3

    3. 3/4

Naʻe maʻu ʻe Molomona ʻa e fatongia ke fakanounouʻi, tohi, mo fakatolonga ʻa e folofola toputapu ʻoku tau ʻilo he taimí ni ko e Tohi ʻa Molomoná. ʻI he fakaʻosinga ‘o e moʻui ʻa Molomoná, naʻá ne mamata tonu mo kau ʻi ha tau lahi ʻi he vahaʻa ʻo e kau Nīfaí mo e kau Leimaná. Naʻe iku pē ʻo mole ʻa e moʻui ʻa Molomoná ʻi he tau ko ʻení (vakai, Molomona 8:3). Kimuʻa pea ʻave ʻe Molomona ʻa e ngaahi lekooti toputapú ki hono foha ko Molonaí, naʻá ne hiki ʻene pōpoaki fakaʻosi ki he kau laukonga ʻo e Tohi ʻa Molomoná ʻi he kahaʻú.

  • ʻI hoʻo fakakaukau ki he moʻui, aʻusia, mo e fakamoʻoni ʻa Molomoná, ʻokú ke pehē ko e hā ha meʻa te ne hiki ʻi heʻene pōpoaki fakaʻosi ki he kau laukonga ʻo e Tohi ʻa Molomoná ʻi he kahaʻú? Ko e hā hono ʻuhingá?

ʻI hoʻo ako ʻa e Molomona 7, vakai ki he founga ʻe ala mahuʻingamālie ai ʻa e pōpoaki ʻa Molomoná ʻo ʻikai ngata pē ki he kakai ʻi he lotolotonga ʻo ha tau ka ki he kakai ʻi ha faʻahinga tūkunga pē ʻo e moʻuí.

Ko e meʻa ʻoku fiemaʻu ʻe Molomona ke tau ʻiló

Lau ʻa e Molomona 7:2–7. Fakaʻilongaʻi ʻi hoʻo folofolá pe lisi ʻi hoʻo tohinoá ʻa e ngaahi meʻa naʻe fiemaʻu ʻe Molomona ke ʻilo ʻe he kau laukongá. Tokanga makehe ki he meʻa naʻe akoʻi ʻe Molomona fekauʻaki mo Sīsū Kalaisi ʻi he veesi 5–7.

ʻĪmisi
fakaʻilonga, lekooti

  1. Tali ʻa e ongo fehuʻi ko ‘ení:

    • ʻOkú ke pehē ko e hā e ʻuhinga naʻe ongoʻi ai ʻe Molomona ko ha ngaahi moʻoni mahuʻinga ʻeni ke tau ʻiloʻí?

    • Ko e fē ʻi he ngaahi moʻoni ko ʻení ʻoku mahuʻingamālie taha kiate koe fakafoʻituituí? Ko e hā hono ʻuhingá?

    • Ko e hā ʻoku mahuʻinga ai ke ʻilo “ʻoku mou ʻo e fale ʻo ʻIsilelí” (Molomona 7:2)?

Mahalo kuó ke fakatokangaʻi ko e taimi naʻe ʻātakaiʻi ai ʻa Molomona ʻe he faiangahalá mo e taú, naʻá ne hanga ki he Toetuʻú mo e huhuʻi ʻa Sīsū Kalaisí. Naʻá ne akoʻi ʻe lava ke fakamolemoleʻi ʻetau ngaahi angahalá koeʻuhí ko Sīsū Kalaisi pea tau mateuteu ai ke nofo mo e ʻOtuá ʻi ha tuʻunga ʻo e fiefia (vakai, Molomona 7:7).

  • Ko e hā ha ngaahi pole pe ivi tākiekina kovi ʻokú ne ʻākilotoa koe?

  • ʻOku hoko fēfē ʻa e ʻilo ki he Fakalelei ʻa Sīsū Kalaisí pea mo e ivi malava ke maʻu ʻa e fiefia taʻengatá ko ha maʻuʻanga ʻo e ʻamanaki lelei mo e mālohi ʻi hoʻo moʻuí he taimi ní?

Ko hono liliu ʻo e ʻiló ki he ngāué

ʻE lava ke hoko ʻa hono ʻilo te tau lava ʻo nofo mo e ʻOtuá ʻi he fiefia taʻengatá ke tau maʻu ai ha ʻamanaki lelei lahi. Ke tokoniʻi kitautolu ke tau aʻusia ʻa e fiefia ko ʻení, naʻe poupouʻi kitautolu ʻe Molomona ke tau liliu ʻa e ʻiló ke hoko ko ha ngāue. ʻOku fakahaaʻi ʻeni ʻi heʻene fakaʻaongaʻi ʻa e foʻi lea “ko ia” ʻi he veesi 8.

Hiki ʻi hoʻo tohinoa akó ʻa e fakamatala taʻe kakato ko ʻení: “Te u lava ʻo nofo mo e ʻOtuá ʻi he tuʻunga ʻo e fiefia ʻi heʻeku …”

Lau ʻa e Molomona 7:8–10 pea fakakakato ʻa e fakamatalá ʻaki haʻo tohi ha ngaahi ngāue ʻe tolu pe lahi ange ʻoku fakaafeʻi mai ʻe Molomona ke tau fakahoko. Fakatokangaʻi ange ʻoku ʻuhinga ʻa e “meʻá ni” ʻi he veesi 9 ki he Tohi ʻa Molomoná pea ʻoku ʻuhinga ʻa e “ki ai” ki he Tohi Tapú.

ʻĪmisi
fakaʻilonga, lekooti

  1. Fili ha ngāue ʻe ua pea tali ʻa e ongo fehuʻi ko ʻení:

    • Ko e hā ha ngaahi founga te tau lava ai ʻo fakaʻaongaʻi ʻa e ngaahi ngāue ko ʻení?

    • ʻE teuteuʻi fēfē kitautolu ʻe he ngaahi ngāue ko ʻení ke tau maʻu ʻa e fiefia kuo talaʻofa mai ʻo fakafou ʻia Sīsū Kalaisí?

Fakakaukau ki he founga ʻokú ke ngāueʻi ai ʻa e faleʻi ʻa Molomoná. Vakai ki he meʻafua ko ʻení pea fakafuofuaʻi koe ʻi he kulupu takitaha (1 = ʻikai ʻaupito; 5 = maʻu pē).

ʻĪmisi
fakafuofua e 1 ki he 5 ki he fakamatala takitaha

Fili ha taha ʻo e ngaahi fakaafe ʻa Molomoná ʻokú ke ongoʻi ʻe lava ʻo tokoni atu ke ke fekumi ki he fiefia ʻoku maʻu ʻo fakafou ʻia Sīsū Kalaisí. Fili ʻa e meʻa te ke lava ʻo fai ke ngāueʻi ai ʻa e fakaafe ko iá mo e founga ʻe lava ke ne tokoniʻi ai koe ke ke tokanga taha ki he Fakamoʻuí.

Ngaahi tali ki he sivi tali fehuʻí: 1) f; 2) a; 3) e (Ngaahi Lea ʻa Molomona–Molomona 7 mo e Molonai 7–9)