Molomona 8:27–41; 9:1–6, 27–37

Tohi maʻa Hotau Kuongá

tohi ʻa Molonai ʻi he ʻū lauʻi peletí

Fakakaukauloto ʻokú ke moʻui ʻi he taʻu ʻe laungeau kuohilí ka ʻokú ke ʻiloʻi ʻa e tuʻunga ʻe ʻi ai ʻa e moʻuí ʻi hotau kuongá ni. Naʻe aʻusia ʻeni ʻe Molonai; naʻe fakahā ange ʻe he ʻEikí ʻa hotau kuongá. Naʻe fakamatalaʻi ʻe Molonai ʻa e ngaahi angahala mo e ngaahi ʻulungaanga ʻe angamaheni ʻi he kuonga fakaʻosí. Naʻá Ne fakaafeʻi mai ke tau “tafoki ki he ʻEikí” (Molomona 9:6) pea fai mo ha faleʻi kehe ke tokoniʻi kitautolu ke tau muimui ʻia Sīsū Kalaisi. ʻE lava ke tokoni ʻa e lēsoni ko ʻení ke mahino kiate koe naʻe hiki ʻa e Tohi ʻa Molomoná ke tokoniʻi kitautolu, ʻi he ngaahi ʻaho kimui ní, ke tafoki ki he ʻEikí.

Naʻe tohi ʻa Molonaí kiate kitautolu

Fakakaukauloto naʻá ke moʻui ʻi ha kuonga fuoloa ʻi he kuohilí pea naʻe kole atu ke ke tohi ha pōpoaki ke faʻo ʻi ha puha tukuʻanga koloa fakataimi ke toki fakaava pē ʻi hotau kuongá.

• Ko e hā ha fakatokanga, faleʻi, pe fakalotolahi te ke fai ki ha taha ke tokoniʻi ia ke ne fehangahangai mo e ngaahi faingataʻa ʻo e ʻaho ní?

Kimuʻa pea mālōlō ʻa Molomoná, naʻá ne tuku ki hono foha ko Molonaí ʻa e ʻū lauʻi peleti koulá (vakai, Molomona 8:1). Naʻe fakamatalaʻi ʻe Molonai ha founga ʻe taha naʻe tokoniʻi ai ia ʻe he ʻEikí ke ne ʻiloʻi ʻa e meʻa ke tohi ki he kakai ʻi hotau kuongá. Lau ʻa e Molomona 8:34–35; 9:30, ʻo kumi ʻa e ngaahi founga naʻe tāpuakiʻi ai ʻe he ʻEikí ʻa Molonai ʻi hono fatongia toputapú.

• Ko e hā ʻa e meʻa naʻe fakahā ʻe he ʻEikí kia Molonaí?

• Ko e hā ha ngaahi moʻoni te tau lava ʻo ako mei heni?

Ko ha moʻoni ʻe taha ʻoku tau akó naʻe ueʻi fakalaumālie ʻe Sīsū Kalaisi ʻa e kau palōfita ʻo e Tohi ʻa Molomoná ke nau tohi mo fakakaukau mai ki hotau kuongá.

• ʻE tākiekina fēfē ʻe he ʻilo naʻe mamata ʻa e kau palōfita ʻo e Tohi ʻa Molomoná ki hotau kuongá ʻa e founga ʻoku tau lau ai ʻa e Tohi ʻa Molomoná?

Lau ʻa e lea ko ʻeni ʻa Palesiteni ʻEselā Tafu Penisoní (1899–1994) fekauʻaki mo e kau palōfita ʻo e Tohi ʻa Molomoná:

Palesiteni Ezra Taft Benson

Kapau naʻa nau vakai mai ki hotau ʻahó pea fili ʻa e ngaahi meʻa ko ia ʻe mātuʻaki mahuʻinga taha kiate kitautolú, ʻoku ʻikai nai ko e founga ia ʻoku totonu ke tau ako ai ʻa e Tohi ʻa Molomoná? ʻOku totonu ke tau toutou fehuʻi kiate kitautolu, “Ko e hā hono ʻuhinga naʻe ueʻi hake ai ʻe he ʻEikí ʻa Molomona (pe ko Molonai pe ʻAlamā) ke fakakau atu ʻa e meʻa ko iá heʻene lekōtí? Ko e hā ha lēsoni te u lava ʻo ako mei ai ke tokoni ke u lava ʻo moʻui ʻi he kuongá ni pea mo e toʻu tangatá ni?” (Ezra Taft Benson, “The Book of Mormon—Keystone of Our Religion,” Ensign, Nov. 1986, 6)

Ko hono ʻeke kiate koe ha ngaahi fehuʻi hangē ko e meʻa naʻe fokotuʻu mai ʻe Palesiteni Penisoní ko ha taukei ako folofola lelei ia ʻe lava ʻo tokoni kiate koe ke ke ʻilo ha ʻuhinga mo e fehokotaki lahi ange ʻi hoʻo ako ʻa e Tohi ʻa Molomoná. Mahalo te ke fie fakaʻilongaʻi ʻa e ngaahi fehuʻi ko ʻení ke vakai ki ai ʻi he taimi te ke ako aí.

• ʻOkú ke pehē ʻe tupulaki fēfē hoʻo ako folofolá ʻi hono ʻeke ʻo e ngaahi fehuʻi ko ʻení?

Lau ʻa e Molomona 8:27–33 pe Molomona 8:36–41, ʻo kumi ʻa e founga naʻe fakamatalaʻi ʻaki ʻe Molonai ʻa e tuʻunga fakalaumālie ʻo e kakai ʻi hotau kuongá.

• Ko e fē ʻi he ngaahi tūkunga naʻe fakamatalaʻi ʻe Molonaí ʻokú ke mamata ki ai ʻi hotau sosaietí?

• ʻE liliu fēfē ʻe he ngaahi tōʻonga mo e ʻulungaanga ko ʻení ʻetau tui kia Sīsū Kalaisí?

Ngaahi solovaʻanga fakalaumālie ʻi hotau kuongá

Lau ʻa e Molomona 9:6, 27–31, ʻo kumi ʻa e meʻa naʻe ueʻi ʻe he ʻEikí ʻa Molonai ke ne tohí ke tokoniʻi kitautolu ke tau ikunaʻi ʻa e ngaahi tuʻunga fakalaumālie ʻoku ʻikai leleí.

fakaʻilonga, lekooti

1. Tali ha fehuʻi ʻe ua mei he ngaahi fehuʻi ko ʻení:

   • Ko e hā ʻa e meʻa naʻe akoʻi ʻe Molonai ʻe lava ʻo tokoni ke tau ikunaʻi ai ʻa e ngaahi angahala mo e ngaahi tōʻonga fakakaukau ʻoku angamaheni ʻi hotau kuongá?

   • Ko e fē ʻi he ngaahi akonaki ko ʻení ʻe lava ʻo tokoni lelei taha ki he toʻu tupu ʻo e toʻu tangata ko ʻení ke nau falala lahi ange kia Sīsū Kalaisí?

   • Ko e fē ʻi he ngaahi akonaki ko ʻení ʻokú ke pehē ʻe lava ʻo tokoni lahi taha kiate koe he taimi ní? Ko e hā hono ʻuhingá?

Ngaahi akonaki ʻi he Tohi ʻa Molomoná

Naʻe hiki ʻa e Tohi ʻa Molomoná ke tokoniʻi kitautolu ke tau tui mo tafoki kia Sīsū Kalaisi (vakai, 1 Nīfai 6:4; Molomona 7:5; Molonai 10:30, 32).

fakaʻilonga, lekooti

2. Fakakakato ʻeni:

   Kumi ha potufolofola ʻe taha pe lahi ange mei he Tohi ʻa Molomoná ʻokú ne akoʻi fekauʻaki mo Sīsū Kalaisi. Fakamatalaʻi ʻa e founga ʻe lava ke tokoniʻi ai koe ʻe he potufolofolá ke ke tui kia Sīsū Kalaisi pea tafoki kiate Iá (vakai, Molomona 9:6).

   ʻI hoʻo hokohoko atu ke ako ʻa e Tohi ʻa Molomoná, manatuʻi ke ʻeke ha ngaahi fehuʻi hangē ko e meʻa naʻe poupouʻi ʻe Palesiteni Penisoní. Tokanga ki he founga ʻoku tokoni ai hono ʻeke ʻo e ngaahi fehuʻi ko iá ke ke malava ʻo fanongo ki he leʻo ʻo e ʻEikí ʻi hoʻo ako e folofolá.

Fili Pē: Fie Ako Lahi Ange?

Ko hai naʻe tohi ki ai ʻa e Tohi ʻa Molomoná?

Naʻe vahevahe ‘e ʻEletā Keuli E. Sitīvenisoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehe:

ʻEletā Gary E. Stevenson

ʻOku mou ʻiloʻi koā naʻe hiki e Tohi ʻa Molomoná maʻamoutolu—pea mo homou kuongá? Ko e tohí ni ko e taha ia ʻo e ngaahi tāpuaki ʻo e moʻuí ʻi he meʻa ʻoku tau ui ko e kuonga fakakōsipeli ʻo e kakato ʻo e ngaahi kuongá. Neongo naʻe hiki e Tohi ʻa Molomoná ʻe ha kau tangata he kuonga muʻá naʻe ueʻi fakalaumālie—ʻa ia ko e tokolahi ai ko ha kau palōfita—ka naʻe ʻikai ke nau maʻu mo e kakai he kuonga ko iá, ʻa e tohí kakato. ʻOku faingofua pē ke ke maʻu he taimí ni e lekooti toputapu naʻe fakamahuʻingaʻi, tali lelei pea mo fakatolonga ʻe ha kau palōfita, kau taulaʻeiki mo e ngaahi tuʻi! ʻOku mou monūʻia ke pukepuke ʻi homou nimá ʻa hono kakato ʻo e Tohi ʻa Molomoná. Ko e meʻa ʻoku mālié, ko e mamata mai ha taha ʻo e kau palōfita he Tohi ʻa Molomoná, ko Molonai, ki hotau kuongá—ki homou kuongá. Naʻá ne mamata kiate koe ʻi ha vīsone, ʻi he taʻu ʻe laungeau kuohilí! (Gary E. Stevenson, “Tafoki ki he Tohí, Tafoki ki he ʻEikí,” Ensign pe Liahona, Nōvema 2016, 46)

Naʻe fakamatalaʻi fēfē ʻe Molonai ʻa e ngaahi ʻaho fakaʻosí?

Naʻe akonaki ʻa Sisitā Poni L. ʻOsikasoni, naʻe hoko ko e Palesiteni Lahi ʻo e Kau Finemuí, ʻo pehē:

Palesiteni Bonnie L. Oscarson

ʻOku tala ʻe Molonai [kuó ne] sio mai ki hotau kuongá, pea ʻoku kau ai e fetauʻakí, ongoongo ʻo e tau, anga kākaá, fakapoó, kaihaʻá pea mo ha kakai te nau talamai ʻoku ʻikai ha tonu pe hala ia he vakai mai e ʻOtuá. ʻOkú ne fakamatalaʻi ai e kakai fonu hīkisia, ne nau tokanga pē ke tui e ngaahi kofu fakatau mamafá pea nau lumolumaʻi e meʻa fakalotú. ʻOkú ne mamata ki ha kakai ʻoku nau tokanga taha pē ki he ngaahi meʻa ʻo e māmaní, ʻo nau tuku ai ʻa e “masivá, mo e telefuá, mo e mahakí, mo e faingataʻaʻiá ke ʻalu” [Molomona 8:39] pea ʻikai tokangaʻi kinautolu.

ʻOku fai mai ʻe Molonai ha fehuʻi fakatupu fakakaukau kiate kitautolu—ʻoku moʻui he ngaahi kuonga ko ʻení. ʻOkú ne pehē, “Ko e hā ʻoku mou mā ai ke ʻai kiate kimoutolu ʻa e huafa ʻo Kalaisí?” [Molomona 8:38]. ʻOku hanga ʻe he fehuʻí ni ʻo fakamatalaʻi totonu mai ʻa e tuʻunga fakatuʻasino ʻoku ʻi ai hotau māmaní. (Bonnie L. Oscarson, “Kau Fefine ʻo Saione, Tuʻu Hake ʻi he Mālohi,” Ensign pe Liahona, Nōvema 2016, 12)

Ko e hā ʻa e lea fakafonua naʻe hiki ai ʻa e Tohi ʻa Molomoná?

Naʻe fakamatala ʻa Molonai naʻá ne malava ke tohi ʻi he lea fakafonua ʻe ua: Lea faka-Hepelū mo e Lea Faka-ʻIsipite foʻoú. Naʻá ne fakatokangaʻi kapau “naʻe feʻunga hono lahi ʻo ʻemau ngaahi peletí,” naʻá ne mei tohi ʻi he lea faka-Hepeluú; neongo ia, ka naʻe ngāue ʻaki ʻe kinautolu naʻa nau tauhi ʻa e lekōtí ʻa e “lea faka-ʻIsipite foʻoú” koeʻuhí ko e siʻisiʻi ʻa e feituʻu ke tohi aí (Molomona 9:32–33). ʻI muʻa ʻi he Tohi ʻa Molomoná, naʻe fakatou fakahā ʻe Nīfai mo e Tuʻi ko Penisimaní ʻena fakaʻaongaʻi ʻa e lea faka-ʻIsipité. Naʻe pehē ʻe Nīfai naʻá ne tohi ʻi he “lea ʻa e kau ʻIsipité” ʻi he taimi naʻá ne tongitongi ai ʻi he ngaahi peleti īkí (1 Nīfai 1:2).

Neongo ia, ka naʻe fakahaaʻi ʻe Molonai naʻá ne tohi ʻi he “lea faka-ʻIsipite foʻoú” ʻa ia “kuo mau tukufakaholo mai mo liliu …, ʻo fakatatau mo e anga ʻo ʻemau leá” (Molomona 9:32), ʻo fakahaaʻi ai kuo ʻi ai ha ngaahi liliu ʻi he leá ʻi he ngaahi taʻu ʻe lauiafe tupu talu mei he kuonga ʻo Līhaí. ʻE lava ʻe he meʻá ni ʻo fakamatalaʻi ʻa e ʻuhinga naʻe fakaʻosi ʻaki ai ʻe Molonai ʻa ʻene pehē “ʻoku ʻikai foki mo ha kakai kehe ʻoku nau ʻiloʻi ʻemau leá” ka kuo hanga ʻe he ʻOtuá ʻo “teuteuʻi ai ʻa e ngaahi founga ki hono” fakaʻuhingaʻi mo hono liliu ʻo e lekōtí (Molomona 9:34).