3 Nephi 25

Buhat sa Templo ug sa Kasaysayan sa Pamilya

malipayon nga pamilya nga naghimo sa kasaysayan sa pamilya

Nakapasabot ka na ba sukad ngadto sa usa ka tawo kon ngano nga aduna kitay mga templo o kon nganong nagbuhat kita sa kasaysayan sa pamilya? Unsa ka importante ang buhat sa kasaysayan sa pamilya ug sa templo alang kanimo? Samtang nagtudlo sa mga Nephite, si Jesus mikutlo og mensahe nga Iyang orihinal nga gipakigbahin kang Malaquias nga naglakip sa pagbalik ni Elijah ug sa iyang importante nga tahas sa buhat sa templo ug sa kasaysayan sa pamilya. Kini nga leksiyon gituyo aron sa pagtabang kanimo sa pag-apil sa buhat sa kasaysayan sa pamilya ug sa templo.

Imong mga katigulangan

Kopyaha ang mosunod nga tsart sa kasaysayan sa pamilya nganha sa imong journal sa pagtuon, sulati og daghang impormasyon kutob sa imong mahimo.

upat ka henerasyon nga tsart sa pedigree

Pamalandongi kon unsa ang imong nahibaloan ug gibati mahitungod sa kinabuhi sa imong mga minahal, unsa ang gusto nimong mahibaloan, ug unsa ang epekto niini sa imong kinabuhi.

• Nganong importante man nga kita magtinguha sa pagkat-on og dugang mahitungod sa atong mga katigulangan?

• Sa sukdanan nga 1–10 (1 = dili interesado, 10 = interesado kaayo), unsa ka ka interesado nga makaila sa imong mga katigulangan? Sa pag-apil sa buhat sa templo ug sa kasaysayan sa pamilya? Ngano man?

Samtang magtuon ka, pangita og mga panglantaw nga makatabang sa pagdasig kanimo nga mas moapil niini nga buluhaton.

“Sa dili pa moabot ang mahinungdanon ug makalilisang nga adlaw sa Ginoo”

Gamit ang abundang paghulagway ug simbolikanhong mga pulong nga gitala sa propeta sa Daang Tugon nga si Malaquias, si Jesus mitudlo sa mga katawhan sa Amerika mahitungod sa Iyang Ikaduhang Pag-anhi sa yuta ug nanagna mahitungod sa templo ug sa buhat sa kasaysayan sa pamilya.

Basaha ang 3 Nephi 25:1–2, mangita sa unsay gitudlo sa Manluluwas nga mahitabo sa Iyang pagbalik sa yuta. Ang mosunod nga mga kahulogan ug mga interpretasyon sa mga simbolo mahimong mapuslanon.

• Dagami: Mga tuod sa tanom nga nahibilin sa umahan human sa pag-ani nga sunogon sa usa ka mag-uuma

• Mga gamot: Katigulangan

• Mga sanga: Kaliwatan

• Pagpang-ayo diha sa Iyang mga pako: Pagpang-ayo ug pagpanalipod nga gahom sa Ginoo ug sa Iyang Pag-ula

• Mga nati nga baka sa toril: Pagatimanon pag-ayo ang Israel ug pagasangkapan sama sa mga hayop diha sa usa ka toril

• Unsaon nimo sa pagpasabot unsay mahitabo sa Iyang Ikaduhang Pag-anhi sumala niini nga mga bersikulo? Unsa ang mahitabo sa mga daotan?

• Unsa ang imong nakat-onan gikan niini nga mga simbolo mahitungod sa Manluluwas ug sa Iyang mga panalangin niadtong kinsa mosunod Kaniya?

Basaha ang 3 Nephi 25:5–6 ug ikonsiderar ang pagmarka kon unsay buhaton sa Manluluwas sa pagtabang sa mga pamilya sa kalibotan sa wala pa ang Iyang Ikaduhang Pag-anhi. Usa sa mga kahulogan sa pulong nga “mopabalik” mao ang pagabugkoson, o i-seal (tan-awa sa Mga Pagtulon-an sa mga Presidente sa Simbahan: Joseph Smith [2007], 572). Ang mga footnote sa imong mga kasulatan makatabang usab kanimo nga mas makasabot niini nga mga bersikulo.

Kon gusto nimo, ikonsiderar ang pagmarka diin kini nga saad gisubli sa matag usa sa sumbanan nga mga basahon (tan-awa sa Malaquias 4:5–6; Lucas 1:17; Doktrina ug mga Pakigsaad 110:15–16; Joseph Smith—Kasaysayan 1:38–39).

Si Elijah, usa ka karaang propeta, naghupot sa yawe sa gahom sa pagbugkos. Ang gahom sa pagsilyo/pagbugkos naghimo nga balido ngadto sa langit ang mga ordinansa nga gipahigayon pinaagi sa awtoridad sa pagkapari sa yuta (Giya ngadto sa mga Kasulatan, “Bugkos, Pagbugkos,” scriptures.ChurchofJesusChrist.org).

Elijah nagpakita sa templo sa Kirtland

Basaha ang Doktrina ug mga Pakigsaad 110:13–16 aron makahibalo kon unsay nahitabo didto sa Templo sa Kirtland niadtong 1836 nga naglambigit nila ni Elijah, Joseph Smith, ug Oliver Cowdery.

Tungod sa gipahiuli nga gahom sa pagbugkos, kita makahimo og buhat sa templo alang sa atong kaugalingon ug sa atong mga katigulangan nga patay na.

icon, rekord

1. Tubaga ang mosunod nga pangutana:

   • Unsa ang imong nakat-onan gikan sa 3 Nephi 25 ug sa Doktrina ug mga Pakigsaad 110?

Kini importante nga masabtan nga wala lamang gipahiuli sa Manluluwas ang mga yawe sa pagbugkos, apan pinaagi lamang sa Iyang Pag-ula nga kita ug kadtong anaa sa atong mga pamilya mahimong matubos, maputli, ug makadawat og mahangtorong mga ordinansa ug mga panalangin lakip ang ordinansa sa pagbugkos.

Pamalandongi kon nganong ang buhat sa templo ug kasaysayan sa pamilya importante sa imong kinabuhi. Samtang namalandong ka, mahimo nimong tan-awon ang bidyo nga “The Promised Blessings of Family History 2” (4:04), nga anaa sa ChurchofJesusChrist.org.

icon, rekord

2. Tubaga ang mosunod nga mga pangutana:

   • Unsa nga mga kasinatian ang imong nasinati sa mga templo ug sa kasaysayan sa pamilya?

   • Unsa nga mga panalangin ang imong namatikdan sa imong kinabuhi isip resulta?

Pag-apil sa buhat sa templo ug sa kasaysayan sa pamilya

Aron matabangan ka nga makaapil sa buhat sa templo ug sa kasaysayan sa pamilya, buhata ang usa o duha sa mosunod. Mahimo usab nimong ikonsiderar ang pagbuhat og laing butang nga may kalabotan sa buhat sa templo ug sa kasaysayan sa pamilya nga gibati nimo nga gigiyahan ka sa Espiritu sa pagbuhat.

• Gamit ang imong ChurchofJesusChrist.org nga account, pag-log in sa FamilySearch.org. Susiha ang mga kapanguhaan aron mahibalo bahin sa usa sa imong mga katigulangan. Ikonsiderar ang pagsugod sa “Unsa ang imong gusto aron makasugod na?”

• Pag-text, tawag, o pagtakda og panahon sa pagpakigsulti sa mga ginikanan, mga apohan, o uban pang mga paryente aron makakat-on og dugang mahitungod sa ilang mga kinabuhi, mga kasaysayan, o mga pagkakabig sa ebanghelyo. Ikonsiderar ang paghimo og rekord sa unsay imong nahibaloan.

• Pag-apil sa indexing. Alang sa tabang sa pagsabot kon unsa kini ug unsaon pagsugod, ikonsiderar una ang pagtan-aw sa bidyo nga “FamilySearch Indexing—How it Works” (1:48), anaa sa FamilySearch.org.

• Pangita og mga ngalan sa namatay na nga mga katigulangan nga nanginahanglan sa ordinansa nga ipahigayon sa templo diha sa FamilySearch nga app o sa FamilySearch.org. Ikonsiderar ang pagsugod sa “Unsa ang imong gusto aron makasugod na?”

3. Ipasabot kon unsay imong gibuhat sa pagsugod sa pag-apil sa buhat sa templo ug sa kasaysayan sa pamilya sa imong pagtuon karon. Dayon tubaga ang mosunod nga mga pangutana:

   • Unsa ang imong gibati nga gusto sa Ginoo nga imong buhaton aron makapadayon sa pag-apil sa buhat sa templo ug sa kasaysayan sa pamilya? Unsa nga kalainan ang mahimo niini sa imong kinabuhi?

Samtang nagtinguha ka sa pagpadayon sa pag-apil sa kasaysayan sa pamilya ug sa buhat sa templo, hinumdomi kini nga pamahayag gikan ni Presidente Russell M. Nelson:

Presidente Russell M. Nelson

Bisan kanus-a nga mobuhat kamo og bisan unsa sa pagtabang ni bisan kinsa—sa matag habig sa tabil—nga mopadulong sa paghimo og mga pakigsaad sa Dios ug sa pagdawat sa ilang mahinungdanong mga ordinansa sa bunyag ug templo, nagtabang kamo sa pagpundok sa Israel. (Russell M. Nelson ug Wendy W. Nelson, “Paglaom sa Israel” [tibuok kalibotan nga debosyonal alang sa mga kabatan-onan, Hunyo 3, 2018], ChurchofJesusChrist.org)

Opsiyonal: Gustong Makakat-on Pa og Dugang?

Unsa ang pipila sa mga panalangin sa pag-apil sa buhat sa templo ug sa kasaysayan sa pamilya?

Si Sister Wendy W. Nelson mitudlo:

Sister Wendy W. Nelson

Busa, kon gusto kamo og dugang nga kalipay sa inyong kinabuhi, dugang nga kahulogan, dugang nga mga koneksiyon sa kasingkasing ngadto sa kasingkasing, dugang nga pagputing, kusog, kadasig, dugang sa daghan kaayong nindot nga mga butang, paggahin og panahon sa pagtabang niadtong anaa sa pikas bahin sa paghimo og mga pakigsaad ngadto sa Dios. Ang gahom sa Dios modagayday ngadto sa inyong kinabuhi samtang buhaton ninyo kini. (Wendy W. Nelson, “… My Soul Delighteth in the Covenants of the Lord” [pakigpulong nga gihatag sa Brigham Young University Women ’s Conference, Abr. 30, 2015])

Si Elder Dale G. Renlund sa Korum sa Napulog Duha ka Apostoles mipakigbahin:

Elder Dale G. Renlund

Makaplagan ninyo dili lamang ang panalipod gikan sa tintasyon ug mga kasakit niining kalibotana, apan makaplagan sab ninyo ang personal nga gahom, gahom sa pag-usab, gahom sa paghinulsol, gahom sa pagkat-on, gahom sa pagkahimong balaan, ug gahom nga mobati ang inyong mga kasingkasing sa mga sakop sa inyong pamilya sa pagtudlo sa usag usa ug pag-ayo sa nagkinahanglan og pagkaayo. (Dale G. Renlund, “Family History ug mga Panalangin sa Templo,” Liahona, Pebrero 2017, 39)