Helaman 3; 6

“Sa Ingon Kita Makakita”

Mormon namalandong samtang nagsulat

Handurawa nga maghimo og usa ka sulat aron sa pagtabang sa mga tawo kinsa mabuhi gatosan ka mga tuig sa umaabot. Ang propeta nga si Mormon mao gayod kana ang gibuhat. Samtang iyang gipamubo ang kasaysayan sa mga Nephite ug gikulit kini sa bulawan nga mga palid, usahay iyang gitudlo ang importante nga mga kamatuoran gamit ang mga pamahayag sama sa “sa ingon kita makakita.” Ang mga kamatuoran nga iyang gipatugbaw [highlighted] makatabang kanato sa mga hagit nga atong giatubang karon. Kini nga leksiyon makatabang kanimo sa pag-ila sa mga kamatuoran gikan sa mga kasulatan ug sa pag-analisar kon sa unsang paagi kana nga mga kamatuoran makaapekto sa imong kinabuhi.

Usa ka giya sa pagpakabuhi

• Kon hangyoon ka nga magsulat og usa ka giya sa pagpakabuhi sa eskwelahan [school survival guide] alang sa mga nagpangedaron og 12- ug 13-anyos, unsa ang imong ilakip?

Basaha kon unsa ang gisulti ni Presidente Russell M. Nelson mahitungod sa usa ka giya sa pagpakabuhi alang sa imong kinabuhi:

Presidente Russell M. Nelson

Ang mga propeta sa [Basahon ni Mormon], nga nadasig sa Ginoo, nakakita sa atong panahon ug mipili sa doktrina ug mga kamatuoran nga labing makatabang nato. Ang Basahon ni Mormon mao ang atong ulahing adlaw nga giya sa pagpakabuhi. (Russell M. Nelson, “Hangupon ang Umaabot uban sa Hugot nga Pagtuo,” Liahona, Nob. 2020, 75)

• Sa unsang paagi ang doktrina ug mga kamatuoran nga imong nakaplagan diha sa mga kasulatan nakatabang kanimo nga mabuhi sa espirituhanong paagi? Makahunahuna ka ba ug bisan unsang bag-ohay lang nga mga pananglitan?

Samtang magtuon ka sa Helaman 3 ug sa Helaman 6, makabaton ka og kahigayonan sa pagbansay sa pag-ila sa doktrina ug mga baroganan gikan sa mga kasulatan. Makatabang kini kanimo nga makabaton og mas makahuloganon nga pagtuon sa kasulatan ug magdala kanimo ug sa imong pamilya nga mas maduol ngadto kang Kristo.

“Sa ingon kita makakita …”

Taliwala sa tanan nga panagbingkil nga narekord sa Helaman 1–6, adunay temporaryo nga mga gutlo sa kalinaw. Diha sa Helaman 3, daghang liboan ang nabunyagan ngadto sa Simbahan, ug ang Simbahan miuswag. Diha sa Helaman 6, human sa pagkakabig sa daghang mga Lamanite, ang mga Nephite ug ang mga Lamanite nagpuyo nga nagkahiusa samtang ang duha ka mga grupo mibalik ngadto sa Ginoo. Sa duha niini nga mga kapitulo, si Mormon mihunong sa iyang pagsaysay sa kasaysayan sa mga Nephite aron ipatugbaw [highlight] ang mahinungdanon nga doktrina ug mga baroganan sa kamatuoran. Gihimo niya kini pinaagi sa paggamit sa pamahayag nga “sa ingon kita makakita.”

Basaha ang Helaman 3:27–30; 6:34–36 aron sa pag-ila sa mga pamahayag sa kamatuoran nga “sa ingon kita makakita”. Ikonsiderar ang pagmarka niadtong mga kamatuoran diha sa imong mga kasulatan ug irekord kini sa imong kaugalingong mga pulong diha sa imong journal sa pagtuon.

Sunod, pagpili og usa sa mga kamatuoran nga imong nakaplagan, ug ilista ang pipila sa espirituhanong mga kapeligro, mga hagit, o mga pag-atake sa hugot nga pagtuo nga kini nga kamatuoran makatabang kanimo sa pagpakabuhi. Pananglitan, kon imong gamiton ang kamatuoran nga kon kita mopili sa atong kabubut-on nga motuo sa mga pulong sa Ginoo, diha Iyang ibubo ang Espiritu ngari kanato (tan-awa sa Helaman 6:36), mahimo nimong ilista ang mga kapeligro sama sa panginahanglan og pamatuod sa siyensiya sa dili pa kita motuo sa mga kasulatan, motuo sa mga eksperto sa kalibotan labaw pa kay sa pagtuo sa mga propeta, o mosalig sa lohika [logic] labaw pa kaysa espirituhanong mga impresyon.

Hinumdomi ang pamahayag ni Presidente Nelson gikan sa sinugdanan niini nga leksiyon mahitungod sa Basahon ni Mormon isip atong giya sa pagpakabuhi sa ulahing mga adlaw.

1. Kompletoha ang mosunod:

   Sa usa ka piraso sa papel isulat ang “Unsaon sa pagpakabuhi …” ug taposa ang pamahayag gamit ang usa sa mga kapeligro, mga hagit, o mga pag-atake nga imong gilista. Sama pananglit, kon gigamit nimo ang kaganenang naila nga kamatuoran, mahimo nimong isulat, “Unsaon sa pagpakabuhi sa pag-atake sa espirituhanong impresyon.” Gamita ang kamatuoran nga imong gipili aron sa paghimo og usa ka panid nga giya sa pagpakabuhi. Ipasabot diha sa mga drowing o sa mga pulong kon sa unsang paagi kini nga kamatuoran makatabang sa usa ka tin-edyer nga mabuhi sa espirituhanong paagi. Ilakip ang labing menos duha sa mosunod nga mga ideya diha sa imong giya sa pagpakabuhi:

   • Ngano nga kini nga kamatuoran makatabang sa usa ka tawo nga mabuhi sa espirituhanong paagi sa kalisdanan nga imong gilista

   • Ubang mga kasulatan nga may kalabotan niini nga kamatuoran o makatabang sa kalisod nga imong gilista

   • Sa unsang paagi nga kining kamatuoran magdala kanimo o sa uban ngadto kang Jesukristo o makatabang kanimo nga makadawat sa Iyang kusog

   • Unsa ang mahitabo sa mga tawo kon kini nga kamatuoran dili masayran o dili masunod

   • Sa unsang paagi mausab ang kalibotan kon ang tanan mopili sa pagpuyo niini nga kamatuoran

Opsiyonal: Gustong Makakat-on Pa og Dugang?

Helaman 3:27–28. Nakigbisog ko sa hilabahin. Ang ganghaan ba sa langit abli gayod alang kanako?

Si Elder J. Devn Cornish sa Seventy mitudlo:

Elder J. Devn Cornish:

Ang atong mga miyembro kanunayng mangutana, “Igo ba ang akong kamaayo isip tawo?” o “Makasulod ba gyod ko sa celestial nga gingharian?” Siyempre, walay matawag nga “igo ang kamaayo.” Walay usa nato nga mahimong “makakuha” o “angayan” sa atong kaluwasan, apan normal lang nga maghunahuna kita kon madawat ba kita sa Ginoo, nga maoy akong pagsabot niini nga mga pangutana. …

… Ang Dios sa langit dili usa ka walay pagbati nga referee nga mangita og rason nga mapagawas kita sa dula. Siya ang atong hingpit nga mahigugmaong Amahan, nga nangandoy labaw sa tanan nga ang tanan Niyang mga anak makauli ug makapuyo uban Kaniya isip mga pamilya sa kahangtoran. Tinud-anay Siyang mihatag sa Iyang Bugtong Anak aron dili kita malaglag apan makabaton og kinabuhing walay kataposan! [tan-awa sa Juan 3:16]. Palihog tuo, ug palihog pagkuha og paglaom ug kahupayan gikan niining mahangtorong kamatuoran. Gusto sa atong Langitnong Amahan nga makasulod kita didto! Kana ang Iyang buhat ug ang Iyang himaya (tan-awa sa Moises 1:39).

Walay usa nato nga mahimong “igo ang kamaayo,” gawas kon pinaagi sa maayong mga buhat ug kaluoy ni Jesukristo [tan-awa sa 2 Nephi 2:6–8], apan tungod kay ang Dios nagtahod sa atong kabubut-on, dili usab kita maluwas kon wala ang atong paningkamot. (J. Devn Cornish, “Igo Ba Ang Akong Kamaayo? Makasulod Ba Ko Didto?,” Liahona, Nob. 2016, 32–33)

Helaman 6:35–36. Unsa ang gipasabot nga ang Espiritu sa Ginoo misugod sa pagbiya?

Si Elder David A. Bednar sa Korum sa Napulog Duha ka Apostoles mitudlo nga ang atong mga pagpili ug mga binuhatan modala kanato sa pagpalayo gikan sa Espiritu Santo:

Elder David A. Bednar

Tungod kay ang gisaad nga panalangin [sa bunyag ug sakramento] mao nga kita unta sa kanunay makabaton sa Iyang Espiritu uban kanato, angay kitang magtagad ug makat-on sa mga pagpili ug mga impluwensiya nga makabulag kanato sa Balaang Espiritu.

Ang sumbanan klaro. Kon adunay butang nga atong mahunahuna, makita, madungog, o mabuhat nato nga makapalayo sa Espiritu Santo, niana moundang kita sa paghunahuna, pagtan-aw, pagpaminaw, o pagbuhat sa mao nga butang. Kon kanang butang gituyo aron sa paglingaw, pananglitan, makapabulag kanato sa Balaang Espiritu, sigurado kana nga matang sa kalingawan dili para kanato. Tungod kay ang Espiritu dili makapuyo nianang bulgar, bastos, o dili ligdong, klaro nga ang ingon nga mga butang dili gayod para kanato. Tungod kay atong gibugaw ang Espiritu sa Ginoo kon kita mohimo og mga kalihokan nga nahibaloan nato nga dili angay, nan ang ingon nga mga butang dili gayod para kanato. (David A. Bednar, “Nga Kita Unta sa Kanunay Makabaton sa Iyang Espiritu uban Kanato,” Liahona, Mayo 2006, 30)