Atamai i Aoaoga Faavae: Alema 41:10

“E Le’i Avea Lava Le Amioleaga Ma Fiafia”

atatusi o se alii talavou faanoanoa

I le Alema 41:10, na e aoao ai e faapea “e le’i avea lava le amioleaga ma fiafia.” O lenei lesona e mafai ona fesoasoani ia te oe e tauloto ai mau faasino o le atamai i aoaoga faavae ma le fasifuaitau autu o le mau mo le Alema 41:10, faamatala le aoaoga faavae, ma faaaoga mataupu faavae o le mauaina o le malamalama faaleagaga i tulaga masani o le olaga.

Tauloto ma faamatala

Ina ia fesoasoani ia te oe e tauloto, toe fai le fuaitau autu o le atamai i aoaoga faavae ma mau faasino mo ni taimi se tele, “Alema 41:10 ‘E lei avea lava le amioleaga ma fiafia.’” Taumafai e faaitiitia le tilotilo i ai i taimi taitasi e te toe faia ai. Afai e te manao i se luitau faaopoopo, taumafai e tauloto le fuaitau atoa. E ono fesoasoani le faaaogaina o le polokalama o le Doctrinal Mastery.

aikona, faamaumau

aikona, faamaumau

1. Faamae’a le gaoioiga lenei:

   Mafaufau i se tulaga o le a fesoasoani ai mo se tasi le iloaina o le aoaoga faavae o loo aoao mai i le Alema 41:10. Ona faamatala lea pe mafai faapefea ona fesoasoani le aoaoga faavae i lea tulaga.

Faataitai le faaaogaina

aikona, faamaumau

2. Faamaea le gaoioiga faafetaui lenei:

   Toeiloilo mataupu faavae taitasi nei e tolu o le mauaina o le malamalama faaleagaga i le Pepa Autu o le Atamai i Aoaoga Faavae (2022). Ona faafetaui lea o faamatalaga A–F i le mataupu faavae talafeagai. O mataupu faavae taitasi uma o loo i ai ni faamatalaga se lua e fesootai i ai.

   1. “Faatino i le Faatuatua”

   2. “Iloilo Manatu Faavae ma Fesili ma se Vaaiga e Faavavau”

   3. “Saili le Malamalama Atili e ala i Punaoa Mamana ua Saunia”

   1. “O le Au Peresitene Sili ma le Korama a Aposetolo e Toasefululua—o perofeta a le Alii i le lalolagi i aso nei—o punaoa taua ia o le upumoni.”

   2. “A o tatou saili e atiina a’e lo tatou malamalama ma foia popolega, e taua lo tatou faalagolago i le molimau ua uma ona tatou maua e uiga ia Iesu Keriso.”

   3. “Tatou te mafaufau i [fesili] i le faatatauga o le fuafuaga o le faaolataga ma aoaoga a le Faaola.”

   4. “O le aoaoina ia iloa ma aloese mai punaoa e lē faatuatuaina e mafai ona puipuia ai i tatou mai faamatalaga sesē ma mai ia i latou o e saili e lepeti le faatuatua.”

   5. “Tatou te saili le fesoasoani a le Agaga Paia ina ia vaai ai i mea e pei ona silasila i ai le Alii.”

   6. “A o faaauau ona tatou saili mo ni tali, e tatau ona tatou ola e ala i le faatuatua—ma talitonu o le a i’u lava ina tatou maua tali tatou te sailia.”

O tali e mafai ona maua i le faaiuga o lenei lesona.

Faitau le tulaga faataitai lenei:

O Kalosi, o se tagata o le Ekalesia, o loo tauivi e iloaina le taua o le tausia o poloaiga a le Atua. Na ia fai atu talu ai nei ia te oe, “Ou te iloa le toatele o tagata o ē solia poloaiga ma e foliga mai o loo maoa’e o latou olaga. E mafai faapefea ona e fai mai e tatau ona e tausia poloaiga ina ia maua ai le fiafia?” E mafai ona e vaaia le faamaoni o le fesili a Kalosi ae e te lagona le manaomia o sina taimi e tuufaatasi ai ou manatu e tali atu ai. Ua oulua malilie e talanoa atili e uiga i lana fesili i le aso e sosoo ai.

Faaaoga mea ua e aoaoina ma lagonaina a o suesueina le Alema 41:10 ma mataupu faavae o le mauaina o le malamalama faaleagaga e saunia ai e talanoaina le fesili a Kalosi.

Saili le malamalama atili e ala i punavai paia ua filifilia

1. O tusitusiga paia o ni punavai paia ua filifilia e mafai ona fesoasoani ia i tatou e tali ai a tatou fesili. Faitau le Alema 41:10 ma su’e se tasi pe sili atu o fuaitau o le atamai i aoaoga faavae lea e mafai ona fesoasoani ia te oe e tali atu ai.

2. Mafaufau e uiga i nisi o punavai o le a e valaaulia Kalosi e toeiloilo i ai mo nisi faamatalaga. E mafai foi ona e faamatala atu le mafuaaga e faatuatuaina ai se punavai tau i mataupu faaleagaga.

Iloilo manatu faavae po o fesili faatasi ma se vaaiga e faavavau

O fesili nei e mafai ona fesoasoani ia te oe e faailoa ai manatu faivavale ua talitonu i ai Kalosi:

• O a ni ona manatu faivavale atonu o i ai e uiga i poloaiga po o le fiafia?

• O a aoaoga o le talalelei e fesootai i ai pe tuuina mai ai ni tali i lana fesili?

• O le a se mea e te manatu e manaomia ona iloa e Kalosi e uiga i le Tama Faalelagi, Lana fuafuaga, ma le auala Na te taulimaina ai Lana fanau?

Faatino i le faatuatua

E mafai e Kalosi ona faatino i le faatuatua e ala i le saili ia malamalama atili i poloaiga a le Tama Faalelagi. O le filifili ai e tausi poloaiga a o ia sailia se malamalama sili atu e uiga i lo latou taua o le faatinoina foi lea i le faatuatua. Filifili ia lē itiiti ifo ma le lua ni poloaiga ma faailoa mai pe mafai faapefea e le tausiaina o nā poloaiga ona fesoasoani ia Kalosi ia maua le fiafia pe faapefea foi e le solia o i latou ona taitai atu ai i le faanoanoa. E mafai foi ona e faasoa atu pe faapefea e le tausia o nei poloaiga ona aumaia ai ia te oe le fiafia.

2. Tusi se tali ia Kalosi. Faamatala pe mafai faapefea ona ia mulimuli i mataupu faavae taitasi o le mauaina o le malamalama faaleagaga ma le aoaoga faavae o loo aoao mai i le Alema 41:10 e mauaina ai tali i lana fesili.

O tali i le gaoioiga faafetaui o le (1) E, F; (2) I, U; ma (3) A, O.