se alii talavou o loo faitauina tusitusiga paia

Mauaina o le Malamalama Faaleagaga

O le Atua o le Punavai o Upumoni Uma

1. Ua silafia e le Atua mea uma, ma o le punavai o upumoni uma. Ona o lo tatou Tama Faalelagi e alofa ia i tatou ma e finagalo ia tatou alualu i luma ia avea e pei o Ia, ua Ia uunaia i tatou e “saili i le aoaoina, e ala lava lea i le suesue ma le faatuatua foi” (Mataupu Faavae ma Feagaiga 88:118). I la tatou sailiga mo le upumoni, e mafai ona tatou talitonu atoatoa ia te Ia, faalagolago i Lona atamai, Lona alofa, ma Lona mana e aoaoina ma faamanuiaina i tatou. Ua folafola mai e le Atua e faaalia i o tatou mafaufau ma loto le upumoni e ala mai i le Agaga Paia pe afai tatou te sailia o Ia ma le filiga.

2. Ina ia fesoasoani ia i tatou, ua aoaoina i tatou e le Tama Faalelagi i auala e maua ai le malamalama faaleagaga. Ua Ia faatuina tulaga e tatau ona tatou mulimuli ai ina ia maua lena malamalama. O Lana mamanu paia faauuina e manaomia ina ia iai so tatou manaoga faamaoni ia iloa le upumoni ma ua naunau e ola e tusa ai ma mea ua Ia faaalia mai. O lo tatou manao faamaoni o le a taitaia i tatou i le sailia o le upumoni e ala i le tatalo ma se suesuega maelega o le afioga a le Atua.

3. O nisi taimi atonu tatou te mauaina ai ni faamatalaga fou poo le iai o ni fesili e faatatau i le aoaoga faavae, faiga masani, po o le talafaasolopito o le Ekalesia e foliga e faigata ona malamalama i ai.

   O le faia o fesili ma sailiili mo tali o se vaega taua o la tatou taumafaiga e aoao le upumoni. O nisi o fesili e oo mai i o tatou mafaufau atonu o se uunaiga a le Agaga Paia. O fesili musuia e tatau ona mafaufau i ai o ni meaalofa mai le Atua e saunia ai avanoa mo i tatou e faateleina ai lo tatou malamalama ma faamalosia ai lo tatou mautinoa o loo finagalo le Alii e aoaoina i tatou. Po o le a lava le mafuaaga o a tatou fesili, ua faamanuiaina i tatou i le tomai e mafaufau ma fuafua ai ma maua le uunaiga a le Alii e faalauteleina o tatou mafaufau ma faalolotoina lo tatou malamalama. O le uiga faaalia ma le manaoga tatou te faia ai fesili ma sailia tali o le a aafia tele ai lava lo tatou tomai e aoao ai e ala i le Agaga Paia.

4. O mataupu faavae nei e tolu e mafai ona taialaina i tatou ao tatou saili e aoao mai ma malamalama i upumoni e faavavau ma foia fesili po o faafitauli:

   • Faatino i le faatuatua.

   • Iloilo manatu ma fesili faatasi ma se vaaiga e faavavau.

   • Saili le malamalama atili e ala i punaoa mamana ua filifilia.

Mataupu faaavae 1: Faatino i le Faatuatua

5. Tatou te faatino le faatuatua pe a tatou filifili e talitonu i le Atua ma liliu muamua atu ia te Ia e ala i le tatalo faamaoni, se suesuega o Ana aoaoga, ma le usiusitai i Ana poloaiga.

6. Ao tatou saili e atiina ae lo tatou malamalama ma taulimaina popolega, e taua lo tatou faalagolago i le molimau ua tatou maua ia Iesu Keriso, le Toefuataiina o Lana talalelei, ma aoaoga a Ana perofeta faauuina. Na aoao mai Elder Jeffrey R. Holland o le Korama a Aposetolo e Toasefululua: “A alia’e mai na taimi ma oo mai faafitauli, ma a le vave ona maua se vaifofo, ia taofi mau i mea ua uma ona outou iloa ma tutu malosi seia oo mai se isi malamalama” (“Le Alii e, Ua Ou Faatuatua,,” Liahona, Me 2013, 94). Ua valaaulia i tatou e le Alii lava Ia e “vaai ia te [Ia] i mafaufauga uma; aua le masalosalo, aua le fefefe” (Mataupu Faavae ma Feagaiga 6:36).

7. I taimi pe a tatou le maua vave ni tali i a tatou fesili, e aoga e manatua e ui lava ua faaalia mai e le Tama Faalelagi mea uma e manaomia mo lo tatou faaolataga, Na Te lei faaalia mai upumoni uma. A o faaauau ona tatou saili mo ni tali, e tatau ona tatou ola e ala i le faatuatua—ma talitonu o le a iu ina tatou maua tali tatou te sailia. Ao tatou faamaoni i le upumoni ma le malamalama ua uma ona tatou maua, o le a tatou mauaina atili ai. O tali i a tatou fesili ma tatalo e masani ona oo mai i “lea fuaitau i luga o lea fuaitau, ma lea mataupu i luga o lea mataupu” (2 Nifae 28:30).

Mataupu Faavae 2: Iloilo Manatu ma Fesili ma se Vaaiga e Faavavau

8. Ina ia iloiloina manatu faaleaoaoga faavae, fesili, ma tulaga faaagafesootai ma se vaaiga e faavavau, tatou te mafaufau i ai o ni tusiga o le fuafuaga o le faaolataga ma aoaoga a le Faaola. Tatou te saili le fesoasoani a le Agaga Paia ina ia vaai ai i mea e pei ona silasila i ai le Alii. O lenei mea e faatagaina i tatou e toe faatulaga le fesili (e vaai i le fesili i se isi ala) ma vaai i manatu e tusa ai ma le tulaga faatonuina o le upumoni a le Alii nai lo le taliaina o manatu ma masalosaloga a le lalolagi. E mafai ona tatou faia lenei mea i le faia o fesili e pei “O a mea ua uma ona ou iloa e uiga i le Tama Faalelagi, Lana fuafuaga, ma le ala Na te taulimaina ai Lana fanau?” ma “O a aoaoga o le talalelei e fesootai pe faamaninoina lenei manatu po o le tulaga?”

9. E oo lava i fesili na e fesootai i mea e tutupu i le talafaasolopito atonu e manaomia ona iloiloina ma se vaaiga e faavavau. Ao tatou tumau mausali i lo tatou talitonu i lo tatou Tama Faalelagi ma Lana fuafuaga o le faaolataga, e mafai ona tatou vaai manino atu i popolega. E mafai foi ona fesoasoani fesili faaletalafaasolopito i le tusiga sao o le talafaasolopito e ala i le mafaufau i le aganuu ma amioga o le periota nai lo le faamamafaina o vaaiga ma uiga faaalia o aso nei.

10. E taua le manatua o faamatalaga faasolopito e le tauaveina le mana faaola o feagaiga, sauniga, ma aoaoga faavae. Ina ia tosina ese e faamatalaga e itiiti le taua ae misi ai le vavega ua faaalia mai e le Toefuataiga e pei o le faaaluina o le taimi e faavasega ai se atigipusa o le meaalofa ae le amanaia ai le ofoofogia o le meaalofa lava ia.

Mataupu Faavae 3: Saili le Malamalama Atili e ala i Punaoa Mamana ua Filifilia

11. I le avea ai ma se vaega o le faagasologa filifilia a le Alii mo le mauaina o le malamalama faaleagaga, ua Ia faatuina punaoa e ala mai ai Lona faalia mai o le upumoni ma le taialaina o Lana fanau. O nei punaoa e aofia ai le malamalama o Keriso, le Agaga Paia, tusitusiga paia, matua, ma taitai o le Ekalesia. O le Au Peresitene Sili ma le Korama a Aposetolo e Toasefululua—o perofeta a le Alii i le lalolagi i aso nei—o punaoa taua ia o le upumoni. Ua filifilia e le Alii ma faauuina nei tagata e saunoa atu mo Ia.

12. E mafai foi ona tatou aoao le upumoni e ala i isi punaoa faatuatuaina. Ae ui i lea, o tagata e saili ma le faamaoni i le upumoni e tatau ona faaeteete i punaoa e le mautinoa o faamatalaga. O loo tatou ola i se taimi ua ta’ua e le toatele “ua lelei le mea leaga, ae leaga le mea lelei” (Isaia 5:20). O Satani o le tama o pepelo ma e saili e faasese le upumoni ma tauanau i tatou e liliuese mai le Alii ma Ana auauna filifilia. O le aoao ia iloa ma aloese mai punaoa e le faatuatuaina e mafai ona puipuia i tatou mai faamatalaga sese ma mai ia i latou o e saili e faatamaia le faatuatua. Ao tatou sailia se fesoasoani mai le Agaga Paia ma liliu atu i punavai faalelagi ua filifilia e le Alii mo ni tali ma se taitaiga, e mafai ona faamanuiaina i tatou e filifili i le va o le upumoni ma le sese. E mafai ona tatou faatuatuaina le folafolaga a le Alii e faapea “o le mana foi o le Agaga Paia tou te iloa ai le tonu i mea uma” (Moronae 10:5).

Fesoasoani i Isi ia Maua le Malamalama Faaleagaga

13. Pe a o mai nisi ia i tatou ma fai mai ni fesili pe o sailiili i aoaoga faavae o le Ekalesia, faiga masani, po o le talafaasolopito, pe faapefea ona sili ona tatou fesoasoani ia i latou i la latou sailiga mo le upumoni? O nisi nei o mea e mafai ona tatou fesoasosani ai ia i latou:

14. Faalogo faalelei ma le agaga tatalo. Faalogo ma le totoa ae e te lei tali atu, saili ia manino ma malamalama i le fesili tonu o loo latou fesili ai. Saili ma le manatunatu loloto ia malamalama i le mafuaaga moni o a latou fesili ma o latou lagona ma talitonuga. Tatalo mo le taitaiga e faatatau i le auala e mafai ai ona e fesoasoani sili ia i latou o loo iai ni fesili.

15. Aoao ma molimau atu i upumoni o le talalelei. Faasoa atu aoaoga talafeagai mai tusitusiga paia ma perofeta o aso nei ma le ala ua latou faia ai se eseesega i lou olaga. Fesoasoani ia i latou tou te talanoa e iloilo ma toe faatulaga a latou fesili i le anotusi o le talalelei ma le fuafuaga o le faaolataga.

16. Valaaulia i latou e galulue i le faatuatua. Manatua e finagalo le Alii ia tatou saili i le malamalama faaleagaga mo i tatou lava. E tatau ai ona tatou valaaulia isi e faatino le faatuatua e ala i le tatalo, usiusitai i poloaiga, ma suesue ma le filiga i le afioga a le Atua, e faaaoga ai punaoa mamana ua filifilia, aemaise lava le Tusi a Mamona. Afai e tatau ai, valaaulia i latou e manatua aafiaga na latou oo i ai ina ua latou lagonaina le Agaga Paia ma ia pipii mau i upumoni e faavavau na latou aoaoina seia oo mai se malamalamaaga faaopoopo.

17. Tulitatao. Ofo atu e suesue mo tali, ona tulitatao lea e ala i le faasoa atu o mea na e aoaoina. E mafai foi ona outou suesue faatasi mo tali. Faaali atu le talitonu i le folafolaga a le Alii e saunia faaaliga patino.