talavou o loo tautala

Faatomuaga i Mau Tauloto Faaleaoaoga Faavae

I le Tusi a Mamona, na aoao e le perofeta o Helamana ona atalii “o luga lava o le papa o lo tatou Togiola, o le Keriso lea, le Alo o le Atua, e ao ina oulua atinae ai lo oulua faavae” (Helamana 5:12). O le fausiaina o se faavae i luga o Iesu Keriso—lea e aofia ai le malamalama, talitonu, ma le ola e tusa ai ma Lana aoaoga faavae—o le a faalolotoina lo tatou liua ma le tautinoga i le avea ai ma Ona soo, puipuia i tatou mai aafiaga o le fili, ma fesoasoani ia i tatou ia faamanuiaina ai olaga o isi.

O se tasi o ala tatou te ausia ai lenei mea o le suesue faatasi lea i tusitusiga paia i le faasologa sao i le vasega. O le isi ala tatou te fausia ai lo tatou faavae i luga o Iesu Keriso ma Lana aoaoga faavae e ala i se taumafaiga e ta’ua o le Atamai i Aoaoga Faavae.

O le Atamai i Aoaoga Faavae e taulai atu i taunuuga e lua:

1. Aoao ma faaaoga mataupu faavae paia mo le mauaina o le malamalama faaleagaga. Ua faaalia mai e le Tama Faalelagi mataupu faavae mo le mauaina o le malamalama faaleagaga. O nei mataupu faavae e aofia ai le faatinoina i le faatuatua, iloiloina o manatu ma fesili i se vaaiga e faavavau, ma le sailia o se malamalama sili atu e ala i punaoa mamana ua filifilia. Tatou te atiina ae le atamai i aoaoga faavae ao tatou faaaogaina nei mataupu faavae i taimi o vasega ma fafo o vasega ma sailia tali i fesili faaleaoaoga faavae, faaletagata lava ia, faaagafesootai ma talafaasolopito i se ala e valaaulia ai le Agaga Paia e faamalosia lo tatou faatuatua i le Tama Faalelagi ma Iesu Keriso.

2. Ia atamai i fuaitau faaleaoaoga faavae ma aoaoga faavae o le talalelei a Iesu Keriso o loo latou aoao atua. O lenei taunuuga e ausia i le:

   1. Iloa o aoaoga faavae o loo aoao atu i fuaitau o mau o le atamai i aoaoga faavae.

   2. Faamatalaina manino le aoaoga faavae i le faaaogaina o fuaitau o mau o aoaoga faavae e o faatasi.

   3. O le mafai ona manatua ma maua ia fuaitau o le atamai i aoaoga faavae ma tauloto o latou fasifuaitau autu.

   4. Faaaogaina o le aoaoga faavae o le talalelei a Iesu Keriso ma mataupu faavae o le mauaina o le malamalama faaleagaga ia tatou filifiliga o aso taitasi ma a tatou tali i faafitauli ma fesili tau i aoaoga faavae, faaletagata lava ia, faaagafesootai, ma talafaasolopito.