Alema 42, Vaega 1

“O Se Atua Ua Atoatoa, Faamasinotonu, ma o se Atua Alofa Mutimutivale Foi”

O loo opoina e Alema le Itiiti lona atalii, o Korianetona

O le ola ai i se lalolagi pa’ū ma la tatou vaaiga faatapulaaina faaletino, e mafai ona faafaigata ai ona malamalama i le natura atoa ma le atoatoa o lo tatou Tama Faalelagi ma Lana fuafuaga. Sa tauivi foi Korianetona ia malamalama i le moni o le faamasinogatonu ma le alofa mutimutivale o le Atua. Na fesoasoani Alema ia te ia e faalautele lana vaaiga i lo tatou Tama Faalelagi alofa ma Lana fuafuaga mo i tatou. O lenei lesona ua faamoemoe e fesoasoani e te malamalama atili ai i le natura o le Tama Faalelagi o se tagata faamasinotonu ma alofa mutimutivale.

O le faamasinogatonu ma le alofa mutimutivale o le Atua

Faitau tulaga faataitai nei:

• O loo faia e Gabe ni filifiliga e solia poloaiga a le Atua. I le taimi muamua sa ia lagonaina sina tausalaina, ae sa tonu ia te ia afai e alofa tele le Tama Faalelagi i Ana fanau, o le a Ia lē faasalaina lava Gabe mo ana agasala.

• Ua i ai Elsie i se tulaga o le faanoanoa ona sa salamo o ia i se agasala sa ia faia, sa ia lagona le faamagaloina, ae ua ia toe sesē foi. E talitonu o ia e leai se faamoemoe mo ia ona ua ia lagona sa ia pelogia le Atua e uiga i lona salamo.

• O le a se mea e ono lē sa’o e uiga i le malamalama o tagata taitoatasi?

E toatele i latou e lē malamalama i le alofa paleni atoatoa o le faamasinogatonu ma le alofa mutimutivale o le Tama Faalelagi ma Iesu Keriso. A o e suesue i le lesona o le aso, mafaufau pe faapefea ona faamanuiaina oe ona o le Atua e faamasinotonu ma alofa mutimutivale.

Na fesoasoani Alema ia Korianetona ia malamalama i le fuafuaga a le Atua

A o faaauau pea ona fefautuaa’i Alema ma Korianetona, sa iloa e Alema e i ai se popolega o lona atalii e uiga i le Atua ma Lana fuafuaga.

Faitau le Alema 42:1 ma vaavaai mo le popolega o Korianetona.

aikona, faamaumau

1. Tali fesili nei:

   • O a nisi o manatu faivavale e ono taitai atu ai se tasi e manatu e lē tonu mo le Atua le faasalaina o tagata agasala?

   • O le a le tulaga matautia o lenei ituaiga o malamalamaaga sesē?

   • O faapefea ona e vaaia ni malamalamaaga sesē faapea i aso nei?

Sa taumafai Alema e fesoasoani ia Korianetona e ala i le faasoa atu ia te ia o se vaaiga lautele atu o le Atua ma Lana fuafuaga. Na ia amata i le faamalamalama atu o le Pa’ū o Atamu ma Eva i le Faatoaga o Etena na aumaia ai le oti faaleagaga (vavaeeseina mai le Atua) ma le oti faaletino (o le oti o le tino faitino) (tagai Alema 42:2–8). Ona ia aoao atu lea o Korianetona i le ala e fesootai ai le Pa’ū i le faamasinogatonu ma le alofa mutimutivale o le Atua.

Faitau le Alema 42:9–12 ma vaavaai mo aafiaga o le Pa’ū.

• O a ni aafiaga o le Pa’ū na e mauaina?

O faauigaga nei o le a fesoasoani e te malamalama atili ai i isi fuaiupu o le a e suesueina.

• Faamasinotonu: “I upu faaletusitusiga paia, o le faamasinogatonu o le tulafono e lē masuia lea e aumaia ai taunuuga mo faatinoga. Ona o le tulafono o le faamasinogatonu, tatou te maua ai faamanuiaga pe a tatou usitai i poloaiga a le Atua. Ua manaomia foi e le tulafono o le faamasinogatonu le tatau ona totogi se sala mo agasala uma tatou te solia” (Autu o le Talalelei, “Faamasinoga Tonu,” topics.ChurchofJesusChrist.org).

• Alofa mutimutivale: “O le alofa mutimutivale o le taulimaina ma le agaalofa o se tagata e sili atu nai lo le mea e tatau ai, ma e mafai ona faia e ala lea i le Togiola a Iesu Keriso” (Autu o le Talalelei, “Alofa Mutimutivale,” topics.ChurchofJesusChrist.org).

Faitau le Alema 42:13–15, vaavaai mo mea na aoao atu e Alema e uiga i le Atua ma Lana fuafuaga.

• O le a se mea ua e aoaoina e uiga i le fuafuaga a le Atua?

• O a upumoni e te aoaoina e uiga i le Atua mai nei fuaiupu?

O se tasi o upumoni o loo aoao mai i nei fuaiupu e faapea, O le Atua e atoatoa, faamasinotonu, ma e alofa mutimutivale.

• Aisea e te manatu ai e taua le iloa o lenei upumoni e uiga i le Atua?

O le faamasinogatonu ma le alofa mutimutivale o le Atua

Ua aoao mai Elder D. Todd Christofferson o le Korama a Aposetolo e Toasefululua e uiga i le faamasinogatonu ma le alofa mutimutivale o le Atua:

Elder D. Todd Christofferson

O le faamasinogatonu o se uiga taua leao le Atua. E mafai ona tatou maua le faatuatua i le Atua auā e matuā faatuatuaina lava o Ia. Ua aoaoina i tatou e tusitusiga paia e faapea “E le savali le Atua i ala faapiopio, pe liliu foi o ia i le itu taumatau po o le itu tauagavale, pe ese foi o ia mai le mea na ia fetalai mai ai, o lea o ona ala e sasao, ma o lona ala o se taamilosaga faavavau e tasi” [Mataupu Faavae ma Feagaiga 3:2] ma “E le faailogaina tagata e le Atua” [Galuega 10:34]. Tatou te faalagolago atu i uiga paia o le faamasinogatonu ia maua ai le faatuatua, mautinoa, ma le faamoemoe.

Ae o se taunuuga o le faamasinotonu atoatoa, e i ai isi mea e lē mafai ona fai e le Atua. E le mafai ona tuu i Lona faitalia e laveaiina isi ae faasalaina isi. E “le mafai ona [Ia] vaai i luga o le agasala ma sina tikeri itiiti o le faatagaina.” [Mataupu Faavae ma Feagaiga 1:31]. E lē mafai ona Ia faatagaina le alofa mutimutivale e faoa le faamasinogatonu [tagai Alema 42:25].

O se faamaoniga faatauanau o Lana faamasinogatonu na faavae ai e le Atua le mataupu faavae o le alofa mutimutivale. Ona e faamasinotonu o Ia na ala ai ona Ia faavaeina ni auala e faataunuu ai e le alofa mutimutivale lana matafaioi taua i lo tatou taunuuga e faavavau. (D. Todd Christofferson, “Saoloto e Faavavau, e Galue mo i Latou Lava,” Ensign po o le Liahona, Nov. 2014, 17)

• O le a se mea ua fesoasoani lenei fuaitau ia te oe e malamalama ai e uiga i le Atua?

2. Faamae’a le gaoioiga lenei:

   Manatu faapea e i ai sau uo e tutusa o la popolega ma Korianetona. Ua ia fesili atu ia te oe pe faapefea ona tonu le faasalaina e le Atua o tagata agasala.

   • O le a se mea e mafai ona e ta’u atu i lau uo e fesoasoani ai ia te ia e malamalama i le faamasinogatonu ma le alofa mutimutivale o le Atua? (Ia aofia ai fuaiupu po o fasifuaitau mai le Alema 42:9–15.)

   Faamae’a faamatalaga nei:

   • Ua faamanuiaina a’u i le faamasinogatonu a le Atua ona

   • Ua faamanuiaina a’u e le alofa mutimutivale o le Atua ona

Tuu i le faitalia: O e Manao e Aoao Atili?

E mafai faapefea i se isi auala ona avea le faamasinogatonu ma le alofa mutimutivale o le Atua ma se faamanuiaga ia i tatou?

Na aoao mai Elder D. Todd Christoffferson o le Korama a Aposetolo e Toasefululua:

Elder D. Todd Christofferson

I le mae’a ai o le faamalieina o manaoga o le faamasinogatonu, ua afio ai nei Keriso i le nofoa o le faamasinogatonu; pe atonu tatou te faapea, o Ia o le faamasinotonu, e pei lava foi o Ia o le alofa [tagai 1 Ioane 4:8]. E faapena foi, e lē gata i le avea ai ma “Atua ua atoatoa, faamasinotonu,” O Ia o se Atua atoatoa, alofa mutimutivale [Alema 42:15; tagai foi Mosaea 15:8–9]. O lea, ua faia ai e le Faaola ia tonu mea uma. E lē tumau ni faamasinogalētonu i le olaga faaletino, e oo lava i le oti, auā na Ia toefuatai mai le ola. E leai se manu’a, lē atoatoa, faalataina, po o le sauāina e lē tauia i le iuga ona o Lana faamasinogatonu tupito ma le alofa mutimutivale. (D. Todd Christofferson, “O Le Toetu o Iesu Keriso,” Ensign po o le Liahona, Me 2014, 112)

Na aoao mai Elder Gerrit W. Gong o le Korama o Aposetolo e Toasefululua e faapea:

Elder Gerrit W. Gong

E faafetai ai, ona e mafai ona tatou faatuatuaina le faamasinogatonu atoatoa a le Atua ma le alofa mutimutivale atoatoa e faamasino atoatoa ai o tatou faamoemoega ma faatinoga. (Gerrit W. Gong, “Toe Faalagolago,” Liahona, Nov. 2021, 99)

Na faamatala mai e Elder Richard G. Scott (1928–2015) o le Korama a Aposetolo e Toasefululua:

Elder Richard G. Scott

E mafai ona faamalieina manoga o le faamasinogatonu mo tulafono ua lepetia, e ala i le alofa mutimutivale, lea e maua i lou salamo pea lava pea ma le usitai i poloaiga a le Atua. O lena salamo ma le usiusitai e matuā manaomia lava mo le Togiola ina ia faatino atoa ai lana vavega i lou olaga. E mafai e le Togiola ona totogi uma au aitalafu taitasi i le faamasinogatonu, ma tuuina atu le faamagaloga e ala i le auala o le alofa mutimutivale o lou salamo. E ala i le Togiola e mafai ai ona e ola i se lalolagi lea e faamautinoa ai e le faamasinogatonu faapea o le a tumau pea ia te oe mea sa e ausia ona o lou usiusitai. E ala atu foi i Lona alofa mutimutivale, e mafai ai ona e foia taunuuga o tulafono ua lepetia. (Richard G. Scott, “E Mafai e le Togiola Ona Faamautu Lou Filemu ma le Fiafia,” Ensign po o le Liahona, Nov. 2006, 42)

Mafaufau e matamata le vitiō “O Le a Le Faamasinogatonu ma le Alofa Mutimutivale?” (5:31).