“ʻAlamā 18: Ko e Ngāue mo e Akoʻi ʻe ʻĀmoni ʻa e Tuʻi ko Lamōnaí,” Tohi ʻa Molomoná - Tohi Lēsoni ʻa e Tokotaha Akó (2024)
“ʻAlamā 18,” Tohi ʻa Molomoná - Tohi Lēsoni ʻa e Tokotaha Akó
ʻAlamā 18
Ko e Ngāue mo e Akoʻi ʻe ʻĀmoni ʻa e Tuʻi ko Lamōnaí
ʻOku ʻikai ke tau ʻiloʻi ʻa e ʻuhinga ne fuʻu mahuʻingaʻia ai ʻa e Tuʻi ko Lamōnaí ʻia ʻĀmoni he fuofua taimi ne na fetaulaki aí. Mahalo pē ko e loto-vilitaki ʻa ʻĀmoni ke ngāué pe ko e maama ʻa Kalaisi naʻe hāsino meiate iá, pe ko ʻene hoko ko e foha ʻo e Tuʻi ko Mōsaiá. Neongo pe ko e hā ʻa e ʻuhinga ki he makehe ʻa ʻĀmoni ʻi heʻena fuofua fetaulakí, ka naʻe ongo moʻoni kia Lamōnai ʻa e faivelenga ʻa ʻĀmoni kiate ia ʻi he ʻaho ʻe tolu hono hokó. Koeʻuhí ko e meʻa naʻá ne ongoʻí, naʻe loto-fiemālie ʻa Lamōnai ke tui ki he ngaahi lea kotoa pē ʻa ʻĀmoní. ʻOku fakataumuʻa ʻa e lēsoni ko ʻení ke tokoni ke ke ʻiloʻi ha ngaahi founga ke tokoniʻi ai ʻa e niʻihi kehé ke nau ofi ange ki he ʻOtuá ʻo fakafou ʻi hoʻo ʻofa mo e tokoni faka-Kalaisí.
Malanga ʻaki ʻa e ongoongoleleí
Naʻe akoʻi ʻe Palesiteni Tieta F. ʻUkitofa, ʻi heʻene kei ʻi he Kau Palesitenisī ʻUluakí ʻo pehē:
Ko e taha ʻo e ngaahi malanga maʻongoʻonga taha kuo fai kau ki he ngāue fakafaifekaú ko e foʻi fakakaukau mahinongofua ko ʻeni naʻe lea ʻaki ʻe Sangato Falanisisi ʻo ʻĀsisí: “Malanga ʻaki e ongoongoleleí he taimi kotoa pē, pea ka ʻaonga, fakaʻaongaʻi ha ngaahi lea.” (Dieter F. Uchtdorf, “Ko e Tatali ʻi he Hala ki Tāmasikusí,” Ensign pe Liahona, Mē 2011, 77)
-
Te tau lava fēfē ʻo malangaʻi ʻa e ongoongoleleí taʻe ngāue ʻaki ha ngaahi lea?
-
Ko e hā ʻoku hoko ai ia ko ha founga mālohi ke malanga aí?
Ko Sīsū Kalaisi ʻa e sīpinga haohaoa ʻo hono akoʻi ʻo e ongoongoleleí.
-
Te ke lava nai ʻo fakakaukau ki ha ngaahi talanoa ʻo hano tokoniʻi ʻe Sīsū ʻa e niʻihi kehé ke ako fekauʻaki mo e Tamai Hēvaní ʻo aʻu ki he ngaahi taimi naʻe siʻi ai Haʻane leá?
Mahalo te ke manatuʻi ʻi he taimi naʻe kamata ngāue fakafaifekau ai ʻa ʻĀmoni ʻi he lotolotonga ʻo e kakai Leimaná ʻi he fonua ko ʻIsimelí, naʻe ʻikai ke ne kamata akoʻi leva ʻa e ongoongoleleí. Ka naʻá ne palōmesi ki he tuʻí, “Te u hoko ko hoʻo tamaioʻeiki” (ʻAlamā 17:25). Naʻe vahe leva kia ʻĀmoni ke ne tokangaʻi ʻa e fanga sipi ʻa e tuʻí. ʻI he mālohi ʻo e ʻOtuá, naʻá ne maluʻi ʻa e fanga sipí mo e kau tamaioʻeiki kehé mei he kau Leimaná, ʻa ia naʻa nau feinga ke fakamoveteveteʻi ʻa e fanga sipí.
ʻI hoʻo ako ʻa e ʻAlamā 18 he ʻaho ní, tokanga ki he ola ʻo e ngāue faivelenga ʻa ʻĀmoni ki he Tuʻi ko Lamōnaí. Fakakaukau ki ha ngaahi founga te ke lava ai ʻo tokoniʻi e niʻihi kehé ke nau ofi ange ki he ʻOtuá ʻaki haʻo ʻofa mo tokoniʻi kinautolu ʻi ha ngaahi founga faka-Kalaisi.
Ko e ola ʻo e ʻofa mo e ngāue tokoni faka-Kalaisi ʻa ʻĀmoní
Lau ʻa e ʻAlamā 18:1–11, ʻo kumi ki he ola ʻo e ngaahi ngāue ʻa ʻĀmoni ki he Tuʻi ko Lamōnaí. Te mou lava foki ʻo mamata ʻi he “ʻOku Maluʻi ʻe ʻĀmoni ʻa e Tākanga Monumanu ʻa e Tuʻi ko Lamōnaí” mei he taimi 2:57 ki he 5:24 ʻi hoʻo muimui ki ai ʻi hoʻo folofolá. ʻOku maʻu ʻa e foʻi vitioó ni ʻi he ChurchofJesusChrist.org.
-
Ko e hā ʻoku makehe kiate koe fekauʻaki mo e ngaahi ngāue ʻa ʻĀmoni ʻi he ngaahi veesi ko ʻení?
-
Ko e hā ʻa e ola ʻo e ngaahi ngāue ʻa ʻĀmoní ki he tuʻí?
Hili hono teuteuʻi ʻe ʻĀmoni e fanga hoosi mo e saliote ʻa Lamōnaí, naʻá ne haʻu ki he tuʻí ʻo fakatokangaʻi kuo liliu e fofonga ʻo e tuʻí. Naʻe fakafou ʻi he Laumālié ʻa hono ʻiloʻi ʻe ʻĀmoni ʻa e ngaahi fakakaukau ʻa Lamōnaí peá ne ʻiloʻi naʻe ofo ʻa e tuʻí ʻi he founga fakaofo naʻe maluʻi ʻaki ʻe ʻĀmoni ʻa e tākanga monumanu ʻa e tuʻí (vakai ki he ʻAlamā 18:12–19).
Lau ʻa e ʻAlamā 18:20–23, ʻo kumi ʻa e meʻa naʻe fiemaʻu ʻe Lamōnaí. Te mou lava foki ʻo mamata ʻi he “ʻOku Akoʻi ʻe ʻĀmoni ʻa e Tuʻi ko Lamōnaí ʻo fekauʻaki mo e Ongoongolelei ʻo Sīsū Kalaisí” mei he taimi 0:23 ki he 1:56 ʻi hoʻo muimui ki ai ʻi hoʻo folofolá. ʻOku maʻu ʻa e foʻi vitioó ni ʻi he ChurchofJesusChrist.org.
-
ʻOkú ke pehē ko e hā ʻa e fatongia ʻo e ʻofa faka-Kalaisi mo e ngāue tokoni ʻa ʻĀmoní ʻi he loto-fiemālie ʻa e tuʻí ke tui ki he ngaahi lea ʻa ʻĀmoní?
Ko ha moʻoni ʻe taha ʻe lava ke tau ako mei he talanoa ko ʻení ʻe lava ke teuteuʻi ʻe he ʻOtuá ʻa e loto ʻo kinautolu ʻoku tau tokoniʻí ke nau maʻu ʻa e ngaahi moʻoni ʻo e ongoongoleleí ʻo fakafou ʻi heʻetau ʻofá mo e tokoni faka-Kalaisí.
-
Tali ‘a e fehuʻi ko ‘ení:
-
Ko e hā ha ngaahi founga te tau lava ai ʻo tokoniʻi e niʻihi kehé ke nau ofi ange ai ki he ʻOtuá ʻo fakafou ʻi heʻetau ʻofá mo e tokoni faka-Kalaisí?
-
Ko e akoʻi ʻe ʻĀmoni ʻa e ngaahi moʻoni ʻo e ongoongoleleí kia Lamōnaí
Lau ʻa e ʻAlamā 18:24–43, ʻo kumi ʻa e meʻa naʻe akoʻi ʻe ʻĀmoni kia Lamōnaí. Te ke lava ʻo hiki ha lisi ʻo e meʻa ʻokú ke maʻú, kae tokanga ki he foʻi lea ko e “fakamatala.” Te mou lava foki ʻo mamata ʻi he foʻi vitiō “ʻOku akoʻi ʻe ʻĀmoni ʻa e Tuʻi ko Lamōnaí ʻo fekauʻaki mo e Ongoongolelei ʻo Sīsū Kalaisí” mei he taimi 1:56 ki he 5:41, ʻoku maʻu ʻi he ChurchofJesusChrist.org, pea muimui ki ai ʻi hoʻomou folofolá.
-
Tali e ngaahi fehuʻi ko ‘ení:
-
Ko e hā ha niʻihi ʻo e ngaahi moʻoni mahuʻinga naʻe tokoni ʻa ʻĀmoni ke mahino kia Lamōnaí?
-
Ko e hā e meʻa naʻe hoko kia Lamōnai koeʻuhí ko e ngaahi moʻoni ko ʻení?
-
Ko e hā ‘oku mahuʻinga ai ke mahino kiate kitautolu he ‘ahó ni ‘a e ngaahi moʻoni ko ‘ení?
-
Neongo naʻe fakakaukau ha tokolahi ʻo e kau Leimaná kuo mate ʻa Lamōnai ʻi heʻene tō ki he kelekelé, ka ʻi he hili iá naʻe tokoni ʻa ʻĀmoni ke mahino kiate kinautolu naʻe “moʻulaloa ʻa e tuʻi ko Lamōnaí ki he māfimafi ʻo e ʻOtuá,” pe “moʻulaloa … ki he mālohi ʻo e ʻOtuá” (ʻAlamā 19:6). Te ke ʻilo lahi ange ki he ului ʻa Lamōnaí ʻi hoʻo ako ʻa e ʻAlamā 19.
Fakaʻaongaʻi e meʻa kuó ke akó
Fakakaukau ki ha taha ʻokú ke ongoʻi te ke lava ʻo tokoniʻi ke ofi ange ki he ʻOtuá ʻo fakafou ʻi he ʻofa mo e tokoni faka-Kalaisí.
-
Tali e ngaahi fehuʻí mei ha meʻa ʻe ua pe lahi ange ʻo e ngaahi meʻa ʻoku fakaʻilongaʻi atu ko ʻení:
-
Te ke tokoniʻi pe fakahaaʻi fēfē ʻa e ʻofa faka-Kalaisí ki he tokotaha ko ʻení?
-
ʻE tokoni fēfē hoʻo ngaahi ngāué ke ofi ange ʻa e tokotahá ni ki he ʻOtuá?
-
Ko e hā ha ngaahi faingataʻa ʻokú ke mamata ki ai te ne lava ʻo fakafeʻātungiaʻi ʻa e tokoni ki he tokotaha ko ʻení ʻi he ʻofa haohaoá? Te ke lava fēfē ke ikunaʻi ʻa e ngaahi faingataʻa ko iá?
-