Jakoba 7

Finoana an’i Jesoa Kristy tsy voahozongozona

soloy

Raha tsapanao fa toa manao fanahy iniana miezaka manozongozona ny finoan’ny mpikamban’ny Fiangonan’ny Mpamonjy ny olona sasany ankehitriny, dia marina ny anao. Tsy zava-baovao izany. Teo anivon’ny Nefita dia nisy lehilahy iray nantsoina hoe Serema “niasa tamim-pahazotoana tokoa […] mba hahazoany mampaniasia ny fon’ny vahoaka” (Jakoba 7:3). Ity lesona ity dia afaka manampy anao hiomana handresy ireo fanamby amin’ny finoanao an’i Jesoa Kristy sy ny filazantsarany.

Miomana amin’ny fanamby entin’ny hoavy

Ny Filoha Russell M. Nelson dia nizara izao manaraka izao momba ny fanamby sarotra izay hatrehintsika:

Filoha Russell M. Nelson

Efa ho avy ny andro sarotra. Mahalana amin’ny hoavy vao ho mora na malaza izany hoe Olomasin’ny Andro Farany mahatoky izany. Hotsapaina daholo isika tsirairay avy. Ny Apôstôly Paoly dia nampitandrina fa amin’ny andro farany, ireo izay manaraka amin’ny zotom-po ny Tompo “dia henjehina” [2 Timoty 3:12]. Izany fanenjehana izany dia mety hahalavo anao amin’ny fahalemena tsy re tsaika, na mandrisika anao ho lasa ohatra sy be risi-po eo amin’ny fiainanao andavanandro. (Russell M. Nelson, “Atreho am-pinoana ny ho avy,” Liahona, mey 2011, 35–36)

• Tamin’ny 2011 no nanao io lahateny io ny Filoha Nelson. Tamin’ny fomba ahoana no efa niainanao na nahitanao ny zavatra nofaritany?

• Inona no antony mety hahatonga ny fijanonana ho mahatoky amin’ny filazantsaran’i Jesoa Kristy naveriny amin’ny laoniny ho vao mainka tsy dia tian’ny olona loatra any aoriana any? Nahoana araka ny eritreritrao no mbola ilaina izany?

• Inona araka ny eritreritrao no antony ilazan’ny Tompo amintsika mialoha ireny fahasarotana ireny?

Saintsaino mandritra ny iray minitra ny tanjaky ny fijoroanao ho vavolombelona momba ny filazantsaran’i Jesoa Kristy amin’izao sy ny fahavononanao hijanona ho mahatoky Aminy ao anatin’ireo andro sarotra izay ho avy. Rehefa mandalina ny Jakoba 7 ianao, dia tadiavo ny fomba nanomanan’i Jakoba ny tenany hijanona ho mahatoky rehefa niezaka nanozongozona ny finoany ny lehilahy ratsy fanahy iray nantsoina hoe Serema.

Nitory teny nanohitra an’i Kristy i Serema

Vakio ny Jakoba 7:1–7. ChurchofJesusChrist.org Tadiavo ny zavatra nampianarin’i Serema nentina niezaka hanozongozonana ny finoan’ny Nefita an’i Kristy.

• Inona no zavatra nampianarin’i Serema mba hanozongozonana ny finoan’ny Nefita?

• Inona avy no fomba sasantsasany mety hitsapan’ny olona ny finoan’ny mpianatr’i Kristy ankehitriny?

Saintsaino raha nahita olona manodidina anao manomboka miahiahy ny finoan’izy ireo an’i Jesoa Kristy sy ny filazantsara naverina tamin’ny laoniny noho ny fitaoman’ny hafa ianao. Efa nahatsikaritra olona mitsapa ny finoanao Azy ve ianao?

Tsy azo nohozongozonina ny finoan’i Jakoba

Vakio ny Jakoba 7:5, 8–12, hitadiavana ny zavatra nanampy an’i Jakoba handà ireo fampianaran’i Serema.

Fitsipika iray azontsika ianarana avy amin’ny andininy 5 ny hoe afaka mandresy ny fanamby mitsapa ny finoantsika an’i Jesoa Kristy isika amin’ny alalan’ny fahatsiarovana zavatra niainana ara-panahy tany aloha izay nanamafy orina ny finoantsika.

• Inona avy ireo zavatra manokana tsaroan’i Jakoba nandritra io fifanandrinana io ka nanampy azy?

• Fa maninona ny fahatsiarovana ny zavatra ara-panahy niainantsika tany aloha tany no mampatanjaka antsika rehefa miatrika fanamby amin’ny finoantsika isika?

Nampianatra toy izao ny Loholona Neil L. Andersen ao amin’ny Kôlejin’ny Apôstôly Roambinifolo:

Loholona Neil L. Andersen

Ankoatra ny fitarihana mitondra fiadanana azontsika avy amin’ny Fanahy Masina, dia indraindray Andriamanitra mankahery manokana antsika tsirairay amin-kery fa hoe mahafantatra antsika Izy sady tia antsika ary mitahy antsika manokana sy mivantana. Avy eo, rehefa tonga ny fotoan-tsarotra dia mampitamberina ireo zavatra niainana ireo ao an-tsaintsika ny Mpamonjy.

Ankamamio ireo fahatsiarovana masinareo. Inoy izy ireny. Soraty izy reny. … Mampanantena anareo aho fa rehefa manaiky an-tsitrapo sy mankamamy tsara ireo zava-nitranga ara-panahy nanamarika anareo teo amin’ny fiainanareo ianareo, dia mbola ho maro dia maro tokoa no ho azonareo. Mahafantatra sy tia anareo ny Ray any An-danitra. (Neil L. Andersen, “Fahatsiarovana ara-panahy nanamarika ny fiainana,” Liahona, mey 2020, 19, 21–22)

Makà fotoana hitadidiana fahatsapana sy zavatra niainana nomen’ Andriamanitra anao mba hanomezan-toky anao fa mahafantatra sy tia anao Izy. Raketo an-tsoratra ao amin’ny diary fandalinanao na ao amin’ny soratra masinao ny sasany amin’izy ireny. Raha mila fanampiana ianao hitadidy ny zava-niainana toy izany, dia mangataha am-bavaka amin’ny Ray any An-danitra mba hanampy anao hahatadidy na hahatsiaro ny sasany izay mbola ho avy. Ho ataony amin’ny fotoanany sy fombany manokana izany.

Azonao atao ny mijery ny horonan-tsary hoe “Fahatsiarovana ara-panahy nanamarika fiainana” manomboka eo amin’ny mari-potoana 13:40 ka hatramin’ny 14:46. Tadiavo ny fomba anehoan’ny fanehoana an-tsary nataon’ny Loholona Andersen izay milaza ny fitadidiantsika ara-panahy dia afaka manazava ny làlana ho antsika sy ho an’ny hafa mandritra ny fotoan-tsarotra. Io horonan-tsary io dia hita ao amin’ny ChurchofJesusChrist.org.

Saintsaino hoe iza no olona fantatrao ka azo hampatanjahina amin’ny alalan’ny fandrensana ny iray amin’ireo zavatra niainanao. Hevero ny hitady fomba iray hizarana izany amin’izy ireo.

Mieritrereta ihany koa olona akaiky sy mpitarika ato amin’ny Fiangonana izay manana finoana sy zavatra niainana afaka manamafy ny anao manokana. Hevero ny hanatona azy ireo mba hahazoana fanampiana.

Famantarana avy amin’ Andriamanitra

Vakio ny Jakoba 7:13–23 mba hahafantarana ny zava-nitranga tamin’i Serema.

1. Valio ny iray amin’ireto fanontaniana manaraka ireto:

   • Inona araka ny eritreritrao no antony niraketan’i Jakoba io tantara io ho an’ny olona amin’izao androntsika izao?

   • Ahoana araka ny eritreritrao no hanasan’ny Ray any An-danitra anao hampihatra ny zavatra nianaranao androany amina toe-javatra iray atrehinao amin’izao fotoana izao?

Tsy voatery atao: Te hianatra misimisy kokoa ve ianao?

Ahoana no ahafahako mamantatra sy mahatsiaro tsara kokoa ireo zavatra niainana ara-panahy?

Ny Filoha Henry B. Eyring ao amin’ny Fiadidiana Voalohany dia nizara momba ny fotoana iray nitarihana azy hirakitra an-tsoratra ao amin’ny diary fandalinany ny fomba nahitany ny tànan’ny Tompo:

Filoha Henry B. Eyring

Nanoratra andalana vitsy aho isan’andro nandritra ny taona maro. … Alohan’ny hanoratako, dia misaintsaina izao fanontaniana izao aho: “Nahita ny tanan’ Andriamanitra nanampy anay na ny zanakay na ny fianakavianay ve aho androany?” Rehefa nanao izany foana aho, dia nanomboka nisy zavatra nitranga. Rehefa nieritreritra ny zava-nitranga nandritra ny tontolo andro aho, dia hitako niharihary ny zavatra nataon’ Andriamanitra tamin’ny iray taminay izay tsy tsikaritro tao anatin’ny fotoana naharepotra ahy nandritra iny andro iny. Rehefa nitranga izany, ary nitranga matetika, dia hitako fa ny fiezahana hahatsiaro dia nahafahan’ Andriamanitra nampiseho tamiko ny zavatra izay nataony. (Henry B. Eyring, “Oh ! souvenez-vous, souvenez-vous,” Liahona, nov. 2007, 67)

Ahoana no ahafahako mahafantatra ireo fampianaran’ireo izay mikatsaka ny hamotika ny finoana an’i Kristy amin’izao androntsika izao?

Nilaza toy izao ny Loholona D. Todd Christofferson ao amin’ny Kôlejin’ny Apôstôly Roambinifolo:

Loholona D. Todd Christofferson

Ny fomban’izao tontolo izao araka ny fantatrareo dia ny anti-Kristy, na ny hoe “tsy mila an’i Kristy.” Izao androntsika izao dia fiverenan’ny tantaran’ny Bokin’i Môrmôna izay nikatsahan’olona manan-kaja fahefana tsy araka ny fahamarinana amin’ny hafa, fankalazana ny fahotana ara-pitondrantena, ary famporisihana ny fangoronan-karena ho anton’ny fisiantsika. Ny filôzôfian’izy ireo dia “manamarina ny fanaovana fahotana kely” [2 Nefia 28:8] ary ny fanaovana fahotana maro mihitsy aza, saingy tsy hahazoana fanavotana avokoa izany rehetra izany. Izany dia tsy tonga raha tsy amin’ny alalan’ny ran’ilay Zanak’ondry. Ny tsara indrindra azon’ireo mpanohana ilay hoe “tsy mila an’i Kristy” na “tsy mila fibebahana” atolotra dia ny filazana tsy marim-pototra fa tsy misy izany heloka izany na raha hoe misy izany dia tsy hisy vokany any amin’ny farany. Tsy hitombona firy izany petra-kevitra izany mandritra ny Fitsarana Farany. (D. Todd Christofferson, “Ny fitiavan’ Andriamanitra,” Liahona, nôv. 2021, 17)

Hevero ny handalina ny andiam-pehezan-teny 12 ao amin’ny fizarana hoe “Mahazo fahalalana ara-panahy” ao amin’ny Tahirin-kevitra fototra ho an’ny fifehezana fotopampianarana (2022).

Ahoana raha tsy hitako izay havaly rehefa misy olona mametraka fanontaniana amin’ny finoako?

Nilaza toy izao ny Loholona Jörg Klebingat ao amin’ny Fitopololahy:

Loholona Jörg Klebingat

Tsarovy fa na ny ankizy iray aza dia afaka ny ho mpiaro an’i Kristy eny ambony kianja filalaovana amin’ny alalan’ny fizarana fijoroana ho vavolombelona tsotra; tsy voatery ho manampahaizana momba ny filazantsara ianao vao afaka ny ho vavolombelon’ny fahamarinana; tsy voatery ho manana ny valiny rehetra ianao; TSY MANINONA ny miteny hoe “tsy fantatro” indraindray. (Jörg Klebingat, “Defending the Faith,” Ensign, Sept. 2017, 53)