Atamai i Aoaoga Faavae: 2 Nifae 32: 3

“Ia Taumamafa Fiafia i Afioga a Keriso; aua Faauta, o Afioga a Keriso o le a Ta’u Mai ai ia te Outou Mea Uma e Tatau Ona Outou Faia”

tusitusiga paia ma le apu

I se lesona talu ai, “2 Nifae 32:1–7,” sa e aoaoina ai le taua o le taumamafa fiafia i afioga a Keriso. O lenei lesona e mafai ona fesoasoani ia te oe e tauloto le mau faasino o le atamai i aoaoga faavae ma le fasifuaitau autu o le mau mo le 2 Nifae 32:3, faamatala le aoaoga faavae, ma faaaoga mataupu faavae o le mauaina o le malamalama faaleagaga i tulaga moni o le olaga.

Faamatala ma tauloto

Vaai faalemafaufau faapea ua talosagaina oe e tuuina atu se manatu puupuu i le faigalotu i le seminare e uiga i le taua o le suesueina o tusitusiga paia. Faitau le 2 Nifae 32:3 ma manatua le mataupu faavae pe a tatou taumamafa fiafia i afioga a Iesu Keriso, o le a latou tau mai ia i tatou mea uma e tatau ona tatou faia.

• E mafai faapefea ona e faaaogaina mea sa e aoaoina i le lesona talu ai, ma lou aafiaga patino, e faamalamalama ai le uiga o le “taumamafa fiafia i afioga a Keriso”? (2 Nifae 32:3).

• O le a se eseesega e mafai ona faia e le taumamafa fiafia i afioga a Keriso i le olaga o le autalavou?

Ina ia fesoasoani ia te oe e tauloto ma faaaoga lenei fuaitau, tusi se ata o se laulau ua setiina i luga o se fasipepa. Atonu e talitutusa ma le ata o loo i lalo. E mafai foi ona e tusia ni ata o taumafa po o mau i luga o le ipu. Tusi le fasifuaitau “2 Nifae 32:3—Ia taumamafa fiafia i afioga a Keriso; aua faauta, o afioga a Keriso o le a ta’u mai ai ia te outou mea uma e tatau ona outou faia” i se vaega o lau itulau. Faitau faatele le fasifuaitau lenei seia oo ina e taulotoina. Mafaufau e tuu i luga lau ata tusi i se mea i lou fale po o luga o le pusaaisa lea e mafai ona e faamanatu ai i taimi taitasi e te taumafa ai.

faatulagaga o se nofoaga

Faataitai le faaaogaina

O le malamalama i mataupu faavae o le mauaina o le malamalama faaleagaga o le a fesoasoani ia te oe i le gaoioiga lenei. Faaaoga ni nai minute e toe faamanatu ai mataupu faavae i le parakalafa 5—12 i le vaega o le “Mauaina o le Malamalama Faaleagaga” i le Pepa Autu o le Atamai i Aoaoga Faavae (2022). Filifili se tasi o mataupu faavae e suesue atili ai.

Manatu faapea a uma se lesona seminare e uiga i le taua o le suesue i tusitusiga paia i aso taitasi, ua fai atu lau uo ia te oe, “Ou te iloa o le suesueina o tusitusiga paia o se mea lelei e fai, ae faatasi ai ma mea uma o loo tutupu i lo’u olaga i le taimi nei, e leai so’u taimi, ae maise lava e le o aso uma.”

Iloilo manatu faavae ma fesili ma se vaaiga e faavavau.

aikona, tusifaamaumau

1. Tali fesili nei:

   • O le a se mea e te manao ia iloa e lau uo e uiga ia Iesu Keriso po o le fuafuaga o le faaolataga lea e mafai ona fesoasoani ia i latou e mananao ai e taumafai e taumamafa i Ana afioga i aso uma?

   • E mafai faapefea e le taumamafa e le aunoa i afioga a Keriso ona aafia ai i tatou i le taualumaga o taimi, e oo lava i le faavavau?

Saili le malamalama atili e ala i punaoa mamana ua filifilia

Vaai faalemafaufau faapea a uma ona talanoaina se vaaiga e faavavau, ua fai mai lau uo, “Faafetai. Ua maua sina fesoasoani i lena mea. Ae ou te manatu lava o le a ou tauivi e sue se taimi i aso uma e suesue ai a’u tusitusiga paia.”

aikona, tusifaamaumau

2. Tali fesili nei:

   • O le a sou manatu e faapefea ona fesoasoani le 2 Nifae 32:3 i lau uo?

   • O a mau po o saunoaga mai perofeta e mafai ona fesoasoani i lau uo?

O nisi o faataitaiga e mafai ona aofia ai le Mataupu Faavae ma Feagaiga 26:1 faapea foi ma le saunoaga lenei mai ia Elder Richard G. Scott (1928–2015) o le Korama a Aposetolo e Toasefululua:

Elder Richard G. Scott

Aua nei gauai atu i pepelo a Satani faapea e leai sou taimi e suesue ai i tusitusiga paia. Filifili e faaalu se taimi e suesue ai. O le taumamafa i afioga a le Atua i aso taitasi e sili atu le taua nai lo le moe, a’oga, faigaluega, ata o le tv, taaloga vitio, po o faasalalauga faaagafesootai. Atonu e manaomia ona e reorganize toe faatulagaina mea e ave i ai lau faamuamua ia maua ai se taimi mo le suesueina o le afioga a le Atua. Afai o le tulaga lea, ia fai loa! (Richard G. Scott, “Ia Avea le Faaaogaina o le Faatuatua ma Mea e te Faamuamua,” Ensign po o le Liahona, Nov. 2014, 93)

• E mafai faapefea ona fesoasoani nei aoaoga?

Faatino i le faatuatua

Vaai faalemafaufau faapea e tali lelei atu lau uo i mea sa e faasoaina atu, ae e te iloa o le a latou le faatoilaloina moni o latou popolega seia latou faatinoina i le faatuatua, faalagolago i le Alii.

Faaalu se taimi e mafaufau ai i aafiaga patino na e maua i afioga a Keriso ma mea e te iloa e uiga i le Faaola e ono faaosofia ai lau uo e taumafa i Ana afioga i aso taitasi.

aikona, tusifaamaumau

3. Tali fesili nei:

   • O a ni aafiaga po o se molimau e mafai ona e faasoa atu e mafai ona fesoasoani ai i lau uo e faatino i le faatuatua?

   • O le a se mea ua e aoaoina e te lagona e mafai ona fesoasoani ia te oe e faaleleia ai lau suesuega patino o tusitusiga paia?