Seminare
2 Nifae 31:1–13: “Mulimuli i le Faataitaiga a le Alo o le Atua Soifua”

“2 Nifae 31:1–13: ‘Mulimuli i le Faataitaiga a le Alo o le Atua Soifua, ’” Tusi Lesona a Tagata o le Vasega o le Tusi a Mamona (2024)

“2 Nifae 31:1–13,” Tusi Lesona a Tagata o le Vasega o le Tusi a Mamona

2 Nifae 31:1–13

“Mulimuli i le Faataitaiga a le Alo o le Atua Soifua”

Ata
Ioane o loo papatisoina ia Iesu Keriso

O a nisi o auala e mafai ona tatou mulimuli ai i le faataitaiga a le Faaola? Na aoao mai Nifae o le mulimuli ia Iesu Keriso e ala i le papatisoina ma le mauaina o le Agaga Paia sa taua mo le faaolaina i le malo o le Atua. O lenei lesona e mafai ona fesoasoani e te malamalama atili ai ma faamatala ai le taua o le papatisoga ma faamanuiaga e maua mai ai.

Mulimuli ia Iesu Keriso e ala i le papatisoina

Mafaufau faapea ua feiloai lau uo o Ada ma faifeautalai o le Ekalesia ma o loo matua fiafia lava i le aafiaga. O loo ia faitauina le Tusi a Mamona ma fiafia i mea o loo ia aoaoina. Na valaaulia talu ai nei o ia e faifeautalai ina ia papatisoina. O le aso na sosoo ma le valaaulia, ua faamatala atu ai e Ada ia te oe ma fai atu, “Ou te fia papatiso, ae ou te mafaufau foi pe aisea e afaina tele ai pe a ou taumafai e na ona avea ma se tagata lelei. O le a le mea e sili ona taua e uiga i le papatisoga?”

  • Pe e te lagona ea e mafai ona e taliina le fesili a Ada i se auala e fesoasoani ai ia te ia ia malamalama i le taua o le papatisoga? Aisea pe aisea foi e leai ai?

A o e suesue i le aso, saili mo upumoni e fesoasoani ia oe e malamalama atili ai e uiga i le Faaola ma pe aisea e taua tele ai le mulimuli i Lana faataitaiga o le papatisoga. Mafaufau loloto pe na faapefea ona aafia ai lou olaga ma i latou e te iloa. I le faaiuga o le lesona, o le a e maua se avanoa e tali atu ai i le fesili taua a Ada.

A o latalata atili atu Nifae i le faaiuga o ana tusitusiga i luga o papatusi laiti, sa ia manao e talanoa e uiga “i le aoaoga faavae a Keriso.” Mafaufau e faailoga lenei fasifuaitau i le 2 Nifae 31:2 ma le 2 Nifae 31:21.

O le papatisoga o se vaega taua o le aoaoga faavae a Keriso.

  • O le a se mea ua e iloa e uiga i le papatisoga o le Faaola?

Afai e aoga le iloiloina o le papatisoga o le Faaola, mafaufau e fai se tasi o mea nei:

  • Faitau le Mataio 3:13–17.

  • Matamata le “O Le Papatisoga o Iesu” (2:54), o loo maua i le ChurchofJesusChrist.org.

  • Matamata i tamaiti o faamatala mai le papatisoga o le Faaola i le “Papatisoga” mai le faailotaimi 0:00 i le 1:13, o loo maua i le ChurchofJesusChrist.org.

Sa leai se agasala a Iesu Keriso, peitai sa papatisoina lava o Ia. Faitau le 2 Nifae 31:5–11 ma vaavaai pe aisea na papatisoina ai le Faaola ma mea ua tatou aoaoina e uiga ia te Ia.

  • O le a se mea sa e mauaina?

  • O le a sou manatu i le uiga o le mulimuli i le Faaola “ma le faamoemoega atoa o le loto, [ma aunoa ma le] faa’ole’ole” (2 Nifae 31:13)?

  • O a faamanuiaga e tuuina mai e le Tama Faalelagi ia i latou o e mulimuli ma le faamaoni i le faataitaiga a le Faaola o le papatisoga?

  • Ua faapefea ona faamanuiaina oe e le mafutaga a le Agaga Paia i lou olaga?

  • O a nisi malamalamaaga na e mauaina?

  • O le a se mea e tulagaese ia te oe mai le fuaiupu e 5?

  • O le a le mea na molimau mai ai Iesu, pe ua folafola, o le a Ia faia e ala i le papatisoina? (tagai 2 Nifae 31:7).

  • O a ni mea o aoao mai e nei fuaiupu ia te oe e uiga i lagona o le Faaola i poloaiga a le Tama ma faapea foi ia i tatou?

  • O le a se mea ua e iloa e uiga ia Iesu Keriso o le a uunaia ai oe e mulimuli i Lana faataitaiga?

Afai e te manao e vaai i lesona na aoaoina e tamaiti mai le papatisoga o le Faaola, mafaufau e matamata le vitio “Papatisoga” mai le faailotaimi 1:13 i le 3:13, o loo maua i le ChurchofJesusChrist.org.

Sa faaauau ona molimau atu Nifae i lana talafaamaumau e uiga i faamanuiaga o le mulimuli i le faataitaiga a le Faaola o le papatisoga. Ina ia fesoasoani ia te oe ia iloa nei faamanuiaga, faitau le 2 Nifae 31:12–13, 17. Mo nisi malamalamaaga faaopoopo e uiga i le papatisoga, mafaufau e suesue nisi o mea nei: Ioane 3:3, 5; Galuega 2:38; Alema 7:14; 3 Nifae 11:33–34, 37.

Ata
aikona, faamaumau

  1. Faamae‘a le gaoioiga lenei:

    E faavae i mea ua e aoaoina, tusi se parakalafa ia Ada. Fesoasoani ia malamalama o ia i le papatisoga ma pe aisea e ono manao ai e mulimuli i le faataitaiga a le Faaola ma papatisoina e pei o Ia. Ia aofia ai mea nei:

  • ia le itiiti ifo ma le lua ni mau e te manatu o le a fesoasoani ia te ia

  • auala e mafai ai e le papatisoga ona tatou latalata atili atu ai i le Tama Faalelagi ma lo tatou Faaola

  • ou manatu patino, aafiaga, po o le molimau e uiga i le papatisoga ma le mafutaga a le Agaga Paia

Ina ia faaiuina lenei lesona, mafaufau e uiga i mea sa e suesueina i le asō. O le a sou lagona e uiga i lou papatisoga? O le a se mea e mafai ona e faia e mulimuli ai i le faataitaiga a le Faaola? E mafai faapefea ona e fesoasoani i isi ia mulimuli i le faataitaiga a le Faaola ma ia papatisoina? Mafaufau e tusi ou manatu i lau api talaaga mo suesuega.