« នីហ្វៃទី២ ២៧ ៖ ‹ ការមួយយ៉ាងអស្ចារ្យ ហើយចម្លែក › » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« នីហ្វៃទី២ ២៧ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
នីហ្វៃទី២ ២៧
« ការមួយយ៉ាងអស្ចារ្យ ហើយចម្លែក »
សូមគិតអំពីព្រឹត្តិការណ៍ដែលអ្នកនឹងចាត់ទុកថាអស្ចារ្យ និងរបៀបដែលព្រឹត្តិការណ៍ទាំងនេះបានជះឥទ្ធិពលដល់អ្នក និងអ្នកដែលនៅជុំវិញអ្នក ។ ព្រះយេស៊ូវគ្រីស្ទបានសន្យាថានឹងធ្វើកិច្ចការដ៏អស្ចារ្យនៃការស្ដារដំណឹងល្អរបស់ទ្រង់ឡើងវិញ រួមទាំងព្រះគម្ពីរមរមន មកផែនដីនៅថ្ងៃចុងក្រោយ ។ មេរៀននេះអាចជួយអ្នកឲ្យទទួលអារម្មណ៍ដឹងគុណកាន់តែខ្លាំងចំពោះព្រះអម្ចាស់សម្រាប់ការស្ដារព្រះគម្ពីរមរមនមកលើផែនដីវិញ ។
អ្វីមួយដែលអស្ចារ្យ
សូមគិតអំពីមនុស្សម្នាក់ដែលបានធ្វើអ្វីអស្ចារ្យសម្រាប់អ្នក ឬសម្រាប់នរណាម្នាក់ដែលអ្នកស្គាល់ ។
-
តើបុគ្គលនេះបានធ្វើអ្វី ?
-
តើអ្នកមានអារម្មណ៍យ៉ាងណាចំពោះបុគ្គលដែលបានធ្វើបែបនេះ ? ហេតុអ្វី ?
នៅក្នុង នីហ្វៃទី២ ២៧ ព្រះអម្ចាស់បានថ្លែងទីបន្ទាល់អំពីអ្វីមួយដ៏អស្ចារ្យ ដែលទ្រង់នឹងធ្វើដើម្បីជួយយើងឆ្លងកាត់អំពើទុច្ចរិត និងការក្បត់សាសនានៅថ្ងៃចុងក្រោយ ។ ពេលអ្នកសិក្សា សូមសញ្ជឹងគិតពីរបៀបអំពីអ្វីដែលអ្នករៀនជះឥទ្ធិពលលើអារម្មណ៍របស់អ្នកអំពីព្រះអម្ចាស់ ។
សូមអាន នីហ្វៃទី២ ២៧:២៥–២៦ ដោយរកមើលអ្វីដែលព្រះអម្ចាស់បានសន្យាថា ទ្រង់នឹងធ្វើ ។
ប្រធាន រ័សុល អិម ណិលសុន បានថ្លែងថា « កិច្ចការដ៏អស្ចារ្យនេះនឹងរួមបញ្ចូលការចេញមកនៃព្រះគម្ពីរមរមន និងការស្ដារឡើងវិញនៃដំណឹងល្អ » ( « Scriptural Witnesses » Ensign ឬ Liahona ខែ វិច្ឆិកា ឆ្នាំ ២០០៧ ទំព័រ ៤៦ ) ។
សេចក្តីពិតមួយដែលយើងអាចរៀនពីការព្យាករណ៍នេះគឺថា ព្រះអម្ចាស់បានធ្វើការមួយយ៉ាងអស្ចារ្យ ហើយចម្លែកតាមរយៈការចេញមកនៃព្រះគម្ពីរមរមន និងការស្ដារឡើងវិញនៃដំណឹងល្អរបស់ទ្រង់ ។
-
តើអ្នកដឹងអ្វីខ្លះអំពីព្រះគម្ពីរមរមន និងដំណឹងល្អដែលបានស្ដារឡើងវិញដែលអាចនឹងធ្វើឲ្យអ្នកចាត់ទុកវាថា « អស្ចារ្យ » ?
ព្រះគម្ពីរមរមន ៖ ការមួយយ៉ាងអស្ចារ្យ ហើយចម្លែក
ភាគច្រើននៃ នីហ្វៃទី២ ២៧ ផ្តោតលើការចេញមកនៃព្រះគម្ពីរមរមន ។ មុននឹងសិក្សាបន្ថែមពីជំពូកនេះ សូមចំណាយពេលបន្តិចដើម្បីសញ្ជឹងគិតពីអារម្មណ៍ផ្ទាល់ខ្លួនរបស់អ្នកអំពីព្រះគម្ពីរមរមន ។ តើវាអស្ចារ្យសម្រាប់អ្នកផ្ទាល់ដែរឬទេ ? ហេតុអ្វីអស្ចារ្យ ឬហេតុអ្វីមិនអស្ចារ្យ ? តើអ្នកមានសំណួរអ្វីខ្លះ ? នៅពេលអ្នកសិក្សា សូមរកមើលការបង្រៀនដែលអាចជួយអ្នកឲ្យឃើញកាន់តែច្បាស់អំពីព្រះគម្ពីរមរមនថាជា « ការមួយយ៉ាងអស្ចារ្យ ហើយចម្លែក » ។
នីហ្វៃបានព្យាករណ៍ថា ព្រះគម្ពីរមរមននឹងចេញមកដើម្បីជួយដោះស្រាយបញ្ហានៅថ្ងៃចុងក្រោយ ( សូមមើល នីហ្វៃទី២ ២៧:៦ ) ។ លោកក៏បានសរសេរដែរថា ព្រះនឹងអនុញ្ញាតឲ្យសាក្សីពីរបីនាក់មើលផ្ទាំងចំណារដែលព្រះគម្ពីរមរមនត្រូវបានបកប្រែ និងដើម្បីថ្លែងទីបន្ទាល់អំពីភាពពិតនៃគម្ពីរនេះទៅកាន់ពិភពលោក ( សូមមើល នីហ្វៃទី២ ២៧:១២–១៤ ) ។ បន្ទាប់មក នីហ្វៃបានចែកចាយការព្យាករណ៍មួយអំពីព័ត៌មានលម្អិតមួយចំនួនទាក់ទងនឹងការបកប្រែព្រះគម្ពីរមរមន ។
សូមចម្លងតារាងខាងក្រោមចូលក្នុងសៀវភៅកំណត់ហេតុការសិក្សារបស់អ្នក ហើយអានខគម្ពីរដែលបានរៀបរាប់ក្នុងជួរឈរទាំងពីរ ។ សូមប្រើតារាងដើម្បីជួយអ្នកឲ្យយល់ពីការព្យាករណ៍ និងការបំពេញតាមការព្យាករណ៍ទាំងនោះ ។
|
ការព្យាករណ៍អំពីអ្វីដែលបុរសម្នាក់នឹងធ្វើ ( នីហ្វៃទី២ ២៧:១៥–១៩ ) |
ឈ្មោះរបស់បុរសដែលបានបំពេញការព្យាករណ៍ ( យ៉ូសែប ស្ម៊ីធ—ប្រវត្តិ ១:៦៣–៦៥ ) | |
|---|---|---|
|
បុរសទីមួយ ( « គ្មានចំណេះ » ) | ||
|
បុរសទីពីរ ( « មនុស្សម្នាក់ទៀត » ) | ||
|
បុរសទីបី ( « មានចំណេះ » ) |
-
ហេតុអ្វីអ្នកគិតថាព្រះអម្ចាស់បានប្រើ យ៉ូសែប ស៊្មីធ ដែលជាមនុស្សគ្មានចំណេះ ដើម្បីបញ្ចេញមកនូវព្រះគម្ពីរមរមន ?
សូមអាន នីហ្វៃទី២ ២៧:២០–២៣ ដោយរកមើលហេតុផលដែលព្រះបានជ្រើសរើសនរណាម្នាក់ដែលគ្មានចំណេះឲ្យបកប្រែព្រះគម្ពីរមរមន ។
-
សូមឆ្លើយសំណួរខាងក្រោមនេះ ៖
-
តើយើងរៀនអ្វីខ្លះអំពីព្រះអម្ចាស់មកពីខគម្ពីរទាំងនេះ ? តើការដឹងរឿងទាំងនេះអំពីទ្រង់អាចជះឥទ្ធិពលដល់អ្នកយ៉ាងដូចម្ដេច ?
-
តើការចេញមកនៃព្រះគម្ពីរមរមនជាភស្ដុតាងនៃសេចក្ដីថ្លែងការណ៍របស់ព្រះអម្ចាស់ « យើងអាចធ្វើកិច្ចការរបស់យើងបាន » យ៉ាងដូចម្ដេច ? ( ខទី ២១ ) ។
-
អិមម៉ា ស្ម៊ីធ ( ឆ្នាំ ១៨០៤–១៨៧៩ ) ភរិយារបស់ព្យាការី បានថ្លែងទីបន្ទាល់អំពីជំនួយដ៏ទេវភាពដែលយ៉ូសែបបានទទួលនៅក្នុងការបកប្រែព្រះគម្ពីរមរមនរបស់លោក ៖
យ៉ូសែប ស្ម៊ីធ មិនអាចសរសេរ ឬសរសេរតាមសំបុត្រដែលមានពាក្យពេចន៍ល្អៗ និងពាក់ព័ន្ធគ្នា ហើយទុកឲ្យសរសេរតាមតែម្នាក់ឯងនូវសៀវភៅដូចជាព្រះគម្ពីរមរមននោះទេ ។ ហើយទោះបីជាខ្ញុំជាអ្នកចូលរួមយ៉ាងសកម្មនៅក្នុងឈុតឆាកដែលបានកើតឡើងក៏ដោយ … វាអស្ចារ្យណាស់សម្រាប់ខ្ញុំ « អស្ចារ្យ ហើយចម្លែក » ។ …
ជំនឿខ្ញុំគឺថា ព្រះគម្ពីរមរមនមានប្រភពពិតប្រាកដមកពីព្រះ—ខ្ញុំគ្មានការសង្ស័យសូម្បីតែបន្ដិចសោះឡើយ ។ … សូម្បីតែបុគ្គលដែលបានរៀនសូត្រចេះដឹង ក៏សឹងមិនគួរឲ្យជឿឡើយថា អាចធ្វើការណ៍នេះបាន វារឹតតែមិនអាចទៅរួចដែលបុគ្គលមិនបានរៀនសូត្រដូចជាលោកអាចធ្វើការណ៍នេះបាននោះ ។ ( អិមម៉ា ស្ម៊ីធ នៅក្នុង « Last Testimony of Sister Emma » The Saints’ Herald ថ្ងៃទី ១ ខែ តុលា ឆ្នាំ ១៨៧៩ ទំព័រ ២៩០ )
-
សូមឆ្លើយសំណួរខាងក្រោមនេះយ៉ាងហោចណាស់ឲ្យបានពីរ ៖
-
ដោយផ្អែកលើអ្វីដែលអ្នកបានរៀននៅថ្ងៃនេះ តើការចេញមកនៃព្រះគម្ពីរមរមនជា « ការមួយយ៉ាងអស្ចារ្យ ហើយចម្លែក » យ៉ាងដូចម្ដេច ?
-
តើការដឹងថាព្រះអម្ចាស់បានប្រទានពរដល់យើងជះឥទ្ធិពលលើអារម្មណ៍របស់អ្នកចំពោះទ្រង់យ៉ាងដូចម្ដេច ?
-
តើអ្នក ឬអ្នកដទៃមានបទពិសោធន៍អ្វីខ្លះដែលបង្ហាញថាតើព្រះគម្ពីរមរមនអស្ចារ្យប៉ុនណា ?
-
ដើម្បីមើលឧទាហរណ៍អំពីរបៀបដែលព្រះគម្ពីរមរមនអស្ចារ្យ នោះអ្នកអាចមើល « Solving Life’s Problems with the Book of Mormon » ( ១:០០ ) ឬ « The Book of Mormon: What Would Your Life Be Like without It? » ចាប់ពីនាទីទី ៥:៣៨ ដល់នាទីទី ១១:២៦ ។ វីដេអូទាំងពីរអាចរកបាននៅលើ ChurchofJesusChrist.org ។,
នៅដើមមេរៀន អ្នកត្រូវបានសូមឲ្យគិតអំពីអារម្មណ៍របស់អ្នកអំពីព្រះគម្ពីរមរមន ។ សូមពិចារណាថាតើសេចក្តីពិតណាមួយដែលអ្នកបានសិក្សាថ្ងៃនេះបានជះឥទ្ធិពលដល់ទីបន្ទាល់របស់អ្នកអំពីព្រះគម្ពីរដ៏ពិសិដ្ឋនេះដែរឬទេ ។ នៅក្នុងសៀវភៅកំណត់ហេតុការសិក្សារបស់អ្នក សូមកត់ត្រាគំនិត ឬចំណាប់អារម្មណ៍ទាំងឡាយណាដែលអ្នកបានទទួល ក៏ដូចជាសកម្មភាពនាពេលអនាគតដែលអ្នកត្រូវបានជំរុញឲ្យធ្វើ ។