“Atamai i Aoaoga Faavae: 2 Nifae 26:33: ‘Ua Tutusa Tagata Uma i le Atua,’” Tusi Lesona a Tagata o le Vasega o le Tusi a Mamona (2024)
“Atamai i Aoaoga Faavae: 2 Nifae 26:33,” Tusi Lesona a Tagata o le Vasega o le Tusi a Mamona
Atamai i Aoaoga Faavae: 2 Nifae 26: 33
“Ua Tutusa Tagata Uma i le Atua”
I lau suesuega o le 2 Nifae 26, ua e aoao ai e faapea “ua tutusa tagata uma i le Atua” (fuaiupu 33) ma ua valaaulia e le Atua Ana fanau uma e o mai ia te Ia. O lenei lesona e mafai ona fesoasoani ia te oe e tauloto le mau o le atamai i aoaoga faavae ma le fasifuaitau autu o le mau mo le 2 Nifae 26:33, faamatala le aoaoga faavae, ma faaaoga mataupu faavae o le mauaina o le malamalama faaleagaga i tulaga moni o le olaga.
Faamatala ma tauloto
Faitau le 2 Nifae 26:33 ma toe faamanatu le aoaoga faavae na e aoaoina i le lesona talu ai ua tutusa tagata uma i le Atua.
-
O a ni tulaga e mafai ona fesoasoani ai le aoaoga faavae i lenei fuaiupu? Faamatala pe faapefea.
Tusi le mau faasino ma le fasifuaitau autu o le mau mo le 2 Nifae 26:33, “Ua tutusa tagata uma i le Atua,” i lau api faamaumau mo suesuega. Toe fai le mau faasino ma le fasifuaitau autu o le mau mo ni nai taimi (leotele pe tusitusia) seia oo ina e manatuaina.
Faataitai le faaaogaina
Toe faamanatu le mataupu faavae o le mauaina o le malamalama faaleagaga o loo aoaoina i le parakalafa 5–12 o le vaega o le “Mauaina o le Malamalama Faaleagaga” i le Pepa Autu o le Atamai i Aoaoga Faavae (2022).
O le tala lenei, na sii mai le tusiga “I Will Take It in Faith” saunia e Elizabeth Maki (history.ChurchofJesusChrist.org), e faatatau i se alii sa aafia i le tapulaa o le perisitua. Ina ia aoao e uiga i le tapulaa o le perisitua, tagai i le ulutala o le Folafolaga Aloaia 2 i le faaiuga o le Mataupu Faavae ma Feagaiga.
A o e faitau i le tala a Uso Rickford, vaavaai mo faamaoniga patino o mataupu faavae taitasi o le mauaina o le malamalama faaleagaga i lana malaga.
Tala a Geroge Rickford
Tusi Lesona a le Faiaoga o le Tusi a Mamona—Atamai i Aoaoga Faavae: 2 Nifae 26:33: “Ua Tutusa Tagata Uma i le Atua”
I le 1969, na fetaui ai George Rickford, o se talavou matua e nofo i Leicester, Egelani, ma faifeautalai mai Le Ekalesia a Iesu Keriso o le Au Paia o Aso e Gata Ai. Na teena i le taimi muamua e George le la savali, ae na iu lava ina amata ona latou feiloai ma faifeautalai. Ina ua mavae le tolu masina o suesuega filigā, na ala ae George i se tasi taeao ma se talitonuga maumaututu e moni le Ekalesia.
Na naunau George e faasoa atu lana molimau fou i faifeautalai. Ae na te lei faasoa atu, sa ta’u atu e faifeautalai ia te ia o le a le agavaa o ia e maua le perisitua o se tagata o le Ekalesia ona o lona tupuaga fefiloi, lea e aofia ai tuaa e tupuga mai tagata uli Aferika.
I se tasi aso, sa talanoa ai George ma se uo mamae e uiga i ona aafiaga ma faifeautalai ma amata ona aoaoina lana uo e uiga i le Perofeta o Iosefa Samita. Na ia manatuaina, “A o ou faamatala atu lena tala, na segia a’u ma suia faafuase’i lagona ma sa ou matuai fiafia.”
O le aafiaga na toe faamautuina ai le molimau a George, ae o ona atugaluga e uiga i le tapulaa o le perisitua na tumau pea. A o ia tatalo mo se malamalama atili, na oo mai lenei savali ia te ia: “E te le tau malamalama i mea uma e uiga i la’u talalelei ae e te lei tuuto atu oe lava i ai. Aisea e te le faaalia ai lou faatuatua e ala i le talia o mea ua e faalogo i ai ma tuu mai mea o totoe i o’u lima?”
I le faamafanafanaina ai e le savali, na tali atu ma le agaga tatalo George, “Ioe, Le Alii e, o le a ou faia. O le a ou talia ma le faatuatua. Ma le isi mea, faafetai, faafetai lava.” I le lua masina mulimuli ane, na papatiso ai George ma avea ma se tagata faamaoni o le Ekalesia.
I le 1975, i le tolu tausaga a o lei oo i le faaaliga e uiga i le perisitua, sa faaalia ai e George lona talitonuga i se Atua amiotonu, ma tusia ai faapea sa ia taliaina le tapulaa “i le faatuatua, e aunoa ma se faatuai.” Sa ia faaopoopo mai, “Ou te faafetai lava ona ua toe i ai le perisitua a le Alii i luga o le fogaeleele, ma ona faamanuiaga uma, pule, ma tiutetauave. E le afaina ia te a’u po o ai o i ai ma o ai e le o i ai, ae matua sili atu le auala o faaaogaina ai.”
I le 1978 na iloa ai e George le faaaliga na tuuina atu ai le perisitua i alii agavaa uma (tagai Folafolaga Aloaia 2).
“Ina ua foi atu George i le fale, sa la talanoa ma June [lana avā] i le po atoa i le uiga o le talafou mo lo latou aiga. Sa mataina le suiga. I le taeao na sosoo ai, na faauuina ai George Rickford o se ositaulaga i le Perisitua Arona. I le lua masina mulimuli ane, sa faauuina ai o ia o se Fitugafulu, ma sa avea ma sui sinia o le korama a Fitugafulu o le siteki. Ma i le lua masina mulimuli ane, na faamauina ai George ma June Rickford i le Malumalu o Lonetona Egelani, faatasi ma le la fanau e toafa” (“I Will Take It in Faith”).
© 2023 Puletaofia e le Intellectual Reserve, Inc. Ua taofia aia tatau uma.
-
O le a sou manatu o a ni lagona na oo ia George ina ua ia faalogo e le agavaa o ia e maua le perisitua?
-
Tali fesili nei:
Faatino i le faatuatua
-
O a ni auala na galue ai Uso Rickford i le faatuatua? Na faapefea ona fesoasoani lenei mea ia te ia?
Iloilo manatu faavae ma fesili faatasi ma se vaaiga e faavavau.
-
Na faapefea e le tali a le Tama Faalelagi i le tatalo a Uso Rickford ona fesoasoani ia te ia e vaai ai i lona tulaga mai se vaaiga e faavavau? Na faapefea ona fesoasoani lenei mea ia Uso Rickford e mulimuli ai i le Alii?
Saili le malamalama atili e ala i punaoa paia ua atofaina
-
O a ni auala na avea ai le Agaga Paia ma se punavai paia ua atofaina e fesoasoani ai ia Uso Rickford?
-
O a isi punaoa paia ua atofaina i o tatou aso e ono fesoasoani i se tasi o i ai ni fesili e uiga i le tapulaa o le perisitua? E mafai faapefea e le Folafolaga Aloaia 2 ma le 2 Nifae 26:33 ia ona fesoasoani ia i latou?
Mo ni faamatalaga faaopopo e fesoasoani ai i fesili e uiga i le tapulaa o le perisitua, tagai i le vaega “Tuu i le Faitalia: O e Manao e Aoao Atili?” i le faaiuga o le lesona lenei.