Iloilo Lou Aoaoina 2

1 Nifae 16–2 Nifae 25

tagata o loo tilotilo i o latou lava ata lafoia

O lenei lesona ua faamoemoe e fesoasoani ia te oe e iloilo ai le tuputupu ae ua e oo i ai i le taimi o au suesuega o le Tusi a Mamona.

Manatunatu i le aoaoina o le talalelei

Aumai i fafo se fā’ata po o se isi mea e maua ai se ata lafoia ma faaalu sina taimi e tilotilo ai ia te oe lava. Liliu teisi le fā’ata i le itu taumatau ma le itu agavale ma maitau mea o le a le mafai ona e vaai i ai e aunoa ma se fā’ata.

• O a ni itu e lelei ai le i ai o se fā’ata?

• E mafai faapefea e le vaai ia i tatou lava i se fā’ata ona talitutusa ma le mafaufau e uiga, faapea ai ma le iloiloina o lo tatou aoaoina o le talalelei?

E pei lava o le mafai ona e vaai i ou foliga vaaia i fafo, e mafai ona fesoasoani ia te oe i le tele o auala le faaaluina o se taimi e tilotilo ai ma mafaufau i ou aafiaga i le aoaoina o le talalelei. A o e manatunatu i mea ua e aoaoina mai au suesuega i le Tusi a Mamona, e mafai ona fesoasoani le Agaga Paia ia te oe ia iloa lou alualu i luma ma faamamafa vaega mo le faaleleia. O lenei lesona o le a fesoasoani e te manatunatu ai i lou tuputupu ae patino ma aafiaga mai le suesueina o le Tusi a Mamona.

Manatunatu i le alualu i luma faaleagaga

Manatunatu i uunaiga ma lagona mai le Agaga Paia atonu na e mauaina i le suesueina o le Tusi a Mamona. E tele auala atonu na fesootai mai ai le Agaga Paia ia te oe. Mo se faataitaiga, atonu na tosina atu lou mafaufau i ni fuaiupu patino ma e lagonaina ai se manao e faailogaina i latou. Atonu na i ai ni ou lagona o le filemu po o le alofa. Atonu na e faitauina ma lagonaina le musuia e faatino [se amioga] i se auala faapitoa pe na mauaina se tali i se fesili sa ia te oe.

aikona, tusifaamaumau

1. Tali ia le itiiti ifo ma le tolu o fesili nei. Atonu e aoga le toe faamanatu o lau api faamaumau mo suesuega e fesoasoani ia te oe e tali ai i fesili.

   • O a tala po o fuaitau mai le Tusi a Mamona ua fesoasoani ia te oe e iloa ai le ala e fesootai mai ai le Tama Faalelagi i Ana fanau?

   • O a ni manatu po o ni lagona na e oo i ai i le seminare po o au suesuega patino i lenei tausaga?

   • O le a se mea ua e faia e sailia ai faaaliga mai le Tama Faalelagi?

   • O le a se mea e mafai ona e faia e sailia ai faaaliga ma saunia ai e iloa faaaliga pe a oo mai?

   • Na faapefea ona e faatinoina uunaiga na e mauaina?

Faamatala le Pau o Atamu ma Eva ma le Togiola a Iesu Keriso.

Ua tuua e Atamu ma Eva le Faatoaga o Etena

Ua aafia tagata uma i le Pau o Atamu ma Eva. Ua aoao mai le Tusi a Mamona e uiga i nei aafiaga ma le ala e togiolaina ai i tatou e le Faaola mai le Pau. O le gaoioiga lenei e mafai ona fesoasoani ia te oe e faataitai ai le faamalamalamaina o le Pau o Atamu ma Eva ma le Togiola a Iesu Keriso.

Vaai faalemafaufau o oe o se faifeautalai ma o loo oulua sauniuni ma lau soa e aoao atu se tasi e uiga i le Pau. Ua oulua filifili e tatau i se tasi o oulua ona aoao atu e uiga i le Pau ma ona aafiaga i tagata ae o le isi e tatau ona aoao atu e uiga i le auala e fesoasoani ai le Faaola ia i tatou e faatoilalo aafiaga o le Pau.

Filifili se tasi o autu e lua ua oulua fuafua ma lau soa e aoao atu.

Faaaoga mau e fesoasoani ia te oulua e faamalamalama ai le autu na lua filifilia. E ono fesoasoani le toe faamanatu o le 2 Nifae 2:17–27; 9:6–12; 10:23–25, faamatalaga i lau api faamaumau mo suesuega, po o le “Pau o Atamu ma Eva” i Autu o le Talalelei (topics.ChurchofJesusChrist.org) e fesoasoani ai ia te oe e sauni e faasoa atu.

A uma ona e faia, mafaufau e faasoa atu lau faamalamalamaga i se isi tagata. Mo se faataitaiga, o se tagata o le aiga, uo, po o se taitai o le Ekalesia.

aikona, tusifaamaumau

2. Tusifaamaumau lau faamalamalamaga o le autu na e filifilia.

O o’u lagona e uiga ia Iesu Keriso

O loo molimau le Tusi a Mamonae uiga ia Iesu Keriso. Manatunatu i mea ua e aoaoina pe suesueina e uiga i le Faaola. Toe faamanatu mataupu ua e suesueina, e pei o le 1 Nifae 19, 2 Nifae 9, ma le 2 Nifae 25. E mafai foi ona e vaavaai mo fuaitau na e makaina. Atonu e aoga le toe faamanatu o mea na e tusia i lau api faamaumau mo suesuega, aemaise lava tusiga o loo i ai ou lagona e uiga ia te Ia.

aikona, tusifaamaumau

3. Faamaea mea nei: Ia aofia ai mea na e faia po o se faamalamalamaga puupuu o lena mea.

   • Tusi se solo po o se tusi i le Faaola e faailoa atu ai ou lagona ia te Ia. Mafaufau e faaaoga upu po o fasifuaitau mai tusitusiga paia po o le faasino atu o fuaitau o mau.

   • Tuufaatasi se lisi o upu e faamatala ai ou lagona e uiga i le Faaola. Ia aofia ai nisi o faamatalaga mai tusitusiga paia. Fatu se ao o upu, pe tusi upu i luga o fasi pepa taitasi ma mafaufau e tautau i totonu o lou potu po o se isi nofoaga o le a e vaai soo i ai.

   • Tusi se ata o se mea e fesoasoani ia te oe e faailoa atu ai ou lagona e uiga i le Faaola.