kau faifekau tokoni ʻoku nau lau folofola fakataha

Hiki mei he Ngāue Fakafaifekau Malangá

ʻI he taimi ʻoku toe vahe ai koe mei ha misiona ngāue fakafaifekau malanga ki ha misiona ngāue faifekau tokoni, ʻoku ʻikai uesia ʻe he hikí ho uiuiʻi ko ha faifekaú.

Ko e Fefaʻuhi mo e Liliú

• ʻOku hoko e fetongi mei he ngāue fakafaifekau malangá ki he faifekau tokoní ko ha meʻa faingataʻa lahi ki ha kau faifekau tokolahi. Te ke ala foua ha ngahi ongoʻi taʻefiemālie lahi. Ka ke ‘iloʻi fakapapau ʻoku ʻafioʻi ʻe he Fakamoʻuí ho tūkungá. Ko ʻEne ʻofa kiate koé ʻoku haohaoa. ʻOkú Ne kei tokanga mo fiemaʻu pē hoʻo tokoní. ʻOkú Ne fiemaʻu hoʻo tokoní ʻi hono langa Hono puleʻangá kimuʻa pea toki liuaki mai ki he māmaní.

• ʻOku faʻa ongoʻi halaia ʻa e kau faifekau toe vaheʻí. ʻOku nau fakameʻapangoʻia ʻi he ʻikai ke nau lava ʻo [kei nofo ʻi he ngāue fakafaifekau malangá. ʻE lava ke taʻofi kinautolu ʻe he ngaahi ongo ko iá ke ʻoua te nau ongoʻi ʻa e Laumālié. Kapau ‘okú ke ʻi he tūkunga ko ʻení, manatuʻi ʻoku ʻiate koe ʻa e Laumālié. ʻOku ʻikai ha ʻuhinga lelei ia ke ongoʻi halaia ai ʻi he ʻikai fakakakato ha ngāue fakafaifekau malangá. ʻOkú ke fakatou loto fiemālie mo tatau ke ngāue (vakai, Tokāteline mo e Ngaahi Fuakava 64:34).

• ʻE lava ke hoko ʻa e ongoʻi halaiá mei he fetōʻaki fakakemikale ʻi ho ʻutó. Mahalo ko e ngaahi ongo ko ʻení ʻoku ʻikai ko ha nunuʻa ʻo ha angahala. ʻOku mātuʻaki mahuʻinga ke mahino mo ʻiloʻi ʻa e faikehekehé.

ʻOkú ke kei Lavameʻa pē.

Fakakaukau ki he talanoa ʻo Hilamani mo ‘ene kau tau kei talavou ʻe toko 2,060 (vakai, ‘Alama 57:19–27). Na‘e tofanga kotoa ʻa e kau tau ʻe toko 2,060 ʻi ha ngaahi kafo. Ko hanau tokolahi naʻe pongia ʻi he mole ʻo e totó. Naʻe fakaofo ʻenau hao moʻui kotoá. Tatau ai pē pe ko e hā e lahi ʻo e ngaahi kafo naʻa nau takitaha maʻu, ka naʻe ikuna kotoa ʻa e toko 2,060. Naʻa nau loto kotoa ke fakahoko e ngāue ʻo e māʻoniʻoní. Naʻa nau tuitala, talangofua, mo loto-toʻa. Te ke lava ʻo muimui heʻenau sīpingá mo hoko ko ha faifekau tuitala.

ʻE ala kau ʻi he ngaahi kafo ʻi he ngāue fakafaifekau he ʻaho ní ha ngaahi mahaki fakaesino, fakaʻatamai, mo fakaeloto. ʻOku tupu e ngaahi fokoutua ko ʻení mei ha ngaahi tupuʻanga kehekehe. Te ke kei lava pē ke hoko atu mo ikuna. ʻOkú ke loto-ʻaki mo taau pea te ke lava ʻo fakaʻaongaʻi e meʻa ʻokú ke malavá ʻi he ngāue ʻa e ʻOtuá. (Vakai, Tokāteline mo e Ngaahi Fuakava 4.)

“ʻOku tau maʻu kātoa ha meʻa ʻoku ui ko e faingataʻaʻia fakaesino; ko ha niʻihi ʻoku fakatokangaʻi lahi ange ʻi he toengá. Ko e kau faifekau tokoní ko ha niʻihi kinautolu ʻo e kakai fili lahi taha ʻoku ou ʻiloʻi. ‘Oku ou fakamālō lahi ʻi he faingamālie ke hoko ko e faifekau tokoní pea ʻoku ou laukau ke fakahā ki he kakai kehé ko e taha faifekau au.”

ʻEletā Haakinesi

ako ʻa e kau faifekaú

‘I hoʻo hoko atu ʻi hoʻo ngāue foʻoú, manatuʻi ʻa e ngaahi lea fakalaumālie ko ʻeni meia ʻEletā Keuliti W. Kongo: “Te tau lava ʻo maʻu ʻetau moʻuí ʻaki haʻatau tukuange ʻetau moʻuí maʻá e Fakamoʻuí” (“Hoko ‘o Haohaoa ʻia Kalaisi,” Ensign pe Liahona, Siulai 2014, 19). Pea te ke lava ʻo maʻu maʻu pē ha ivi ʻi he talaʻofa ʻa e Fakamoʻuí: “Haʻu kiate au ʻa kimoutolu kotoa pē ʻoku feinga mo mafasiá, pea te u foaki ʻa e fiemālié kiate kimoutolu. He ʻoku faingofua pē ʻeku haʻamongá, pea ʻoku maʻamaʻa ʻeku kavengá” (Mātiu 11:28, 30).

Hokohoko atu ke Tupulaki

Ko ‘eni kuo hiki koe, ʻokú ke toe nofo ai ʻi ʻapi. Feinga ke ‘oua te ke foki ki he ngaahi anga motuʻa ʻo e fakafalala ki he niʻihi kehé. ʻOkú ke kei hoko pē ko e faifekau! Hokohoko atu hono fakatupulaki e ngaahi pōto‘i ʻo e kakai lalahí, hangē ko ʻení:

• Tokanga‘i ho valá ʻaki hono fō, fakamōmoa, mo haiane pē ʻe koe.

• Tokangaʻi hoʻo teuteu fakafoʻituituí. Kaukau fakaʻaho, pea mo fakafōtunga koe ko e fakafofonga ʻo e Fakamoʻuí.

• Ako ke ke feime‘atokoni, fakatau hoʻo koloa meʻakaí, mo fakatokangaʻi e meʻakai ʻokú ke maʻú.

• Fakapapauʻi ʻokú ke fakamālohisino fakaʻaho.

• Ma‘u ha mohe feʻunga ke ke kei moʻui lelei mo tokanga.

• Fakahoko hano ako fakafoʻituitui fakaʻaho e ongoongoleleí mo lotu.

• Fokotuʻu ha ngaahi taumuʻa mo ha fanga kiʻi taumuʻa iiki ʻoku lava ke maaʻusia, pea hiki kinautolu.

“‘Oku ou ʻilo e lahi ʻo e ʻofa ʻa e Tamai Hēvaní ʻiate aú pea ʻoku feʻunga ʻEne tokangá ke Ne tataki au ʻi he hala ʻoku tonu kiate aú. Ko e taimi naʻá ku mavahe ai mei heʻeku ngāue fakafaifekau malangá, ko e meʻa pē naʻá ku ongoʻí ko e fakaʻiseʻisa mo e mamahi, ka ko ʻeni kuó u maʻu ha fiefia ʻi heʻeku fokí.”

ʻEletā Sikoti