Ana Iteraniba te Aono
Ana Rongorongo te Tia Kamaiu Ibukiu
I a tia ni korakai n rinanon te raraoma n te iango i nanon itiua te ririki ngkai ao I a tia n namakina au Tia Kamaiu bwa e mena ma ngai i nanon toauan te kawai. E kaungaa nanou i nanon kawaiu ni kamarurungaki, ao n teimatoa ni boutokaai n au bong aika kangaanga. E aki katukai n akea karauan nanou, ao a mwaiti au taneiai ae I kona n tibwai bwa I kanga ni kaniiaki Nakoina.
E riki te bwai ae kakaawaki nakoiu i nanon au moan ririki ni kaea te tieminari. Ti kamatebwaia ana Boki Moomon ao e rangi ni kangaanga kanoan te ririki anne irou n au tai ni mwananga ma rotakin marurungin au iango. Ma I teimatoa ni kona ni karaoa nanon te kouru are e anganai au tia reirei ni wareka Ana Boki Moomon ni karokoa banena (bon te moan tai karaoakina). Warekakina kanga ai aron te oota ibuakon te reimaurua n te rongonitong, ao n te tairiki teuana I a roko n te 3 Nibwaai 13:31–34. E taetae Iesu nakoia Nibwaite, n taku:
“Mangaia are tai katabei ami iango, ni kangai, Teraa ngkai kanara? ke , Teraa ngkai nimara? ke Ti na karabanira n tera?
“Bwa Tamami are i Karawa e atai bwaai aika kam kannanoi ni kabane.
“Ma ko na ukoukora moa uean te Atua ao ana raoiroi, ao a na bane ni karaoaki bwaai aikai nakoimi.
“Tai tabeakina te ingabong, bwa te ingabong e na bon tabeakinna i bon irouna.”
E roko irou te Tamnei ngke I wareki kiibu aikai, ni kaota te koroboki n au tareboon—katurua tanena, korea te rain i aana, n tuangai, aio bon ibukim bwa ko na ongo—ao I namakina te mano, ai aron ae I anganaki te burangketi, n ongo te taeka ae kanga e nako mai iroun te Tia Kamaiu ni bon taetae ni kaineti nakoiu. E uti kuniu ni katoa tai are I wareki kiibu akanne ibukina bwa a bon rangi ni korakora ongoraeakinaia.
Man koroboki aika tabu akanne, I ataia ae Tamara are i Karawa e atai ni kabane baike I raraomaeakin. E ataia n te tai anne ae I korakai ni katoa bong, ao E ataia raoi bwa tera ae I kainnanoia n ongo n namakina te rau. Kanga ai aekakin te kabanea ni mwakoro n te takakaro n te bwai ni kamwaninga n te kanimnim are e a bwanin raoi, ao man te tai anne, I rineia n ukora abanuean Karawa ni kakorakoraai, n aron are e kabwarabwaraa Kristo, ni kabwanina te taamnei. I karaoa ae I kona n Ururingnga n taainako, ao e a rikirake au koaua teutana i mwiin teutana man te tai anne.
Ni kaotaa raoi, e aki bua korakain au iango. I aki karekea te kakai ni kamarurungaki n te tai ae waekoa—e a bebete aron kamarurungau ngkai, ma ae e bon reitinako. Ma man amoan amou ma te Tia Kamaiu, E kabebetea tinebun are I a tia n uouotia. I tokanikai. Aikai ni kabane a bon riki iroun Iesu Kristo, ao I teimatoa ni kekeiaki nakon abanuean te Atua. Warekan kiibu akanne bon te tai ae onoti ni bitakin maiu—I kaokai Nakoina ao n ukoukoria, n ataia bwa bwaai ni kabane ake I raraomaeakin a na bane n nakoraoi n te bong teuana.