Kairaki ni Kamanoaki nakon Te Tabo ae Ti Riai ni Mena Iai,” Riaona, Maati 2024.
Nakomai, Iriirai
Kairaki ni Kamanoaki nakon te Tabo ae Ti Riai ni Mena Iai
E na teimatoa ni buokira te Tia Kamaiu n ara borau n aanga aika a rangi n tamaroa.
Ngke 12 au ririki, a mwaing au utu mai Hong Kong nakon te tabo ae mwaitoro, te winta ae I aki taneiei iai. N te tai ae waekoa, ao I kaoaki nakon au moan rianna n tain te mwaitoro ma ataeinimwaane n au uoote.
N te bong are ti rianna iai, I oneai n kunikai aika a matenten n aron are I taku bwa I riai ni bwainna. Ngke ti a waerakea te kawai n te maunga, I rangi ni kukurei n noori tinoo ake a bwaka n rabuna te tano. E aki rangi n nakoraoi kunikaiu ibukin te kawai ao aron taraan te bong, ma, e rangi ni kangaanga naba irou kawaekoakoaau ni iriiria kaain au kurubu. I tuangiia bwa a na rimoa, bwa ngai na raoniia ake I kakoauaa bwa a ririmwiira.
Ngke I waaki nako n bon au konaa, a moanna ni mara au kau ao au kunikai, ao ni matenten baiu, waeu, ao ubu. E a moanna ni korakora te tinoo n te aro are I aki konaa n noora te kawai. I mwiin nakonakou n aki ataia raoi bwa I nakea, I a kunea bwa I a bua, n ti ngai, ao n aki koaua ngkana iai ae e ataia ae I a bua.
N tabetai i nanon te borau n te maiu, ti na namakina te aki tauraoi, te bua, ao n tio i buki. A na kona n bua kairan ara iango ao ataan te kawai are i mwaaira. E na taraa n ae arora ni keiaki ni waaki rake, e a tara n raroa riki te tabo are ti na nako iai. E kona ni kaoti te un, ao e nang roko te nano ni bwarannnao.
Bwa ti na tauraoi nakon taai aika a na roko, iai mwaakan te Tia Kamaiu ni kairii kawaira, tabekira ngkana ti bwaka (taraa Taian Areru 37:23–24), ao ni motika rawara (taraa Mataio 11:28), kamaiuira (taraa Itaia 53:5; Aramwa 15:8; Reirei ao Berita aika Tabu 42:48), e kamatoai nanora (see Reirei ao Berita aika Tabu 121:45), ao te rau (see Motiaea 4:3; Aramwa 38:8; Reirei ao Berita aika Tabu 19:23). “Kaaniai ao N na kaaningkami; botumwaaka n ukoukorai ao kam na kuneai” (Reirei ao Berita aika Tabu 88:63). Te kawai ae tawe e kona n aki oota n taainako, ma ti kona n iriira te Tia Kamaiu ma te onimaki bwa e aonga toki ma te tamaroa ara borau ao n tokanikai ibukina E kairiira ni kamanoira nakon te tabo are ti riai ni mena iai.
Ti kona n taainako n taraa Iesu Kristo ibukina bwa Iesu Kristo bon “te kawai, ao te koaua, ao te maiu” (Ioane 14:6).
Te Kawai ae Eti ibukin Ara Borau
N ara kamatebwai n ana Boki Moomon n te ririki aei, ti tia n iriira Riaai ao ana utu n aia borau nakon te aba ni berita. Iangoia bwa tera are a tia n tokanikai i nanon aia tai ni borau ana utu Riaai:
-
a ngareakinaki ibukin kakoauaaia ao iriirakiia burabeti
-
kabuaan te mwengaraoi nakon te rereua ae aki ataaki arona
-
te mwananga n akea te kamataata n te raroa, te tia, ao maanna
-
te baki, rawawata, aoraki ao te mate
-
beeku aika a kangaanga, n tabetai akea ataakin oin bukiia, ao e na kanga ni karoaki bwa e na tia
-
kangaanga, rimwiin waaki, boobuaka ni iango, ao taian aki kukurei
-
aroaro aika a kangaanga ibukin kaikawakia ataei n te utu
I nanon te kawai, ti taraa naba ana buoka te Uea ae reitinako. E katauraoi
-
kairiiri ni burabeti ao bon oin ana kaotioti temanna,
-
koroboki aika a tabu aika iai inanona kakabwaia aika a beritanaki ao berita aika a tabu,
-
tauan mwiin kateiriki ao rongorongon te utu,
-
bwaai ni mwakuri aika a boou ao kawai ni katauraoi ibukin kainnanoia,
-
rikiraken te konaa n rinanon rawawata,
-
te wanawana ao kaetieti ni katiaan beeku aika aki ataaki,
-
te Riaona (te bwai ni mwakuri ni buokiia ni kaeta kawain aia borau), ao
-
te kawakinaki ao te mano ibukia aia utu.
N ai aron ana utu Riaai, e na bon aki kona n ae e na aki reke kangaanga n ara borau ao ara mwakuri ibukina. E na teimatoa ni buokira te Tia Kamaiu n kawai aika a rangi n tamaroa. E reirei Nibwaai, “Te kawai ae eti bon te kakoaua iroun Kristo … marurungim, am iango, ma korakoram, ao tamneim ni kabanea” (2 Nephi 25:29). Ngkana ti rinea te onimaki iroun Iesu Kristo, nanorinano ni karekei Ana taeka, ao n ninikoria ni mwakuri, ti na kunea te kimwareirei, ao kakabwaia ibuakon kangaanga ake ti kaaitarai. I nanon waaki, ti kona ni karekea te nanomatoa bwa ti konaa ni kakororaoa are E tangiria bwa ti na karaoia (taraa 1 Nibwaai 3:7).
Aikai tabeua man kawai aika a mwaiti are e na reitinako ni buokira iai te Tia Kamaiu.
The Dawning of a Brighter Day, iroun Simon Dewey
E Anganiira Ana Reirei
E ataa “tokina man te moantai” Iesu Kristo (Aberaam 2:8). E “mwakena te kawai ao e kaira te kawai.”1 Ana reirei, ae ataaki n koroboki aika a tabu bwa ana reirei Kristo, bon te kawai ae ti riai ngaira ni kabane ni iriiria bwa ti aonga ni kamaiuaki.
Ti riai n reitinako ni kamwakura te onimaki iroun Iesu Kristo, rainannano ni katoatai, ni bwabetitoaki, karekea ana bwai n tituaraoi te Tamnei ae Raoiroi, karaoi ara berita aika a tabu, ao ni karaoa ara kabanea ni konaa n teimatoa n uaa te toki. Ao ni kaekaana, e berita nakoira bwa e na kabwarai ara bure, anganiira te kaantaninga, ao te maiu ae akea tokina. (Taraa 2 Nibwaai 31:2–20.)
Ni kawain te aonaaba ae kaokoro ao ni kamangongao, e katauraoa te kairi ae mataata ao n riai ni mwakuriaki ana reirei Kristo are ti kona n iriiria bwa ti aonga n toauanako te kawai ae eeti (taraa 2 Nibwaai 31: 21).
E Uota Nakoira te Rau
Rinanon Ana mwakuri ni kamaiu n anga karea, E ataia te Tia Kamaiu bwa aekakira te namakin n maroaa ao ni mwanuokinaki. E ataia raoi ni koaua bwa E na kanga n uota nakoira te karaunano. E taku, “A na tai rawawata nanomi” (Ioane 14:1) ao “N na bon aki kitaningkami: I a okiringkami” (Ioane 14:18).
E a tia ni berita te bwaintituaraoi ae te tia Karaunano te Tia Kamaiu, are te Tamnei ae Raoiroi, nakoia ake a kakoaua i Rouna. E taku Iesu, te Tia Karaunano “e na reireingkami bwaai ni kabane, ao e na kaururing i nanomi bwaai ni kabane” (Ioane 14:26).
E Katauraoa Nakoira ana Taeka te Atua
Rinanon ana euangkerio Iesu Kristo ae tia ni Kaokaki i nanon boong aikai, e a tia n anganiira koroboki aika a tabu ni kawai ao ni boong aikai, are i nanona ana taeka te Atua. E reirei Nibwaai bwa “ane e ongo nakon ana taeka te Atua, ao n taua ni kamatoa, … ao a na bon aki maamate” (1 Nibwaai 15:24).
Kanuaakim i aon ana taeka te Atua e uota te kamanoaki ao kairakira n rinanon ana tangira te Atua ae rangi ni korakora riki. Ana taeka e kaotamwaaka kawaira (taraa Taian Areru 119:105) ao “e na tua [nakoira] bwaai ni kabane are [ti] riai ni karaoia” (2 Nibwaai 32:3).
E Kairiira rinanoia Ana Toro—Burabeti ao Abotoro
E a tia Iesu Kristo ni weteia burabeti ao abotoro bwa a na buokira. Aia reirei ao aia angareirei bon ibukira ao ibukin ara bong. Ngkana ko kuneko bwa ko bua ke n bua am iango i nanon kawaim, ko kona ni kunea bwa e ibuobuoki ngkana ko iangoa raoi titiraki aika teniua aikai:
-
E kanga ni katauraoai te Uea rinanon aia taeka burabeti ao abotoro i bukin kataaki are I a tia ni kaaitarai?
-
Tera aia kakao burabeti ao abotoro nakoiu n te bong aei bwa N na tauraoi ibukin kangaanga aika a mena i mwaiu?
-
Tera ae I karaoia ngkai ni mwakurii kakao n aia taetae burabeti?
Man iangoan raoi titiraki aikai, ti kona ni kinaa kakawakin aia kairiiri burabeti ao abotoro. Ti kona n ongo riki bwanaan te Uea ao ni kunea ana buoka nakoira ae teimatoa. Ngkana ti rineia, ti kona ni kakauongo nakoia burabeti ao abotoro ao ni karekea te kairiiri, te tekeraoi, ao te kamanoaki n te kawai are e kairiira rikaaki nakon Tamara are i Karawa ao Natina, ae Iesu Kristo.
Unimwaane Tai i marenan maungan te Sierra Nevada i California i nanon 1988. E riki te karaki are e tibwaia n te Maunga ae Baden Powell n Maunga aika San Gabriel i California n 1984.
Kariaia n te tamnei iroun te tia korokaraki
Te Onimaki ni Waaki Nako
E moanna n nako nanou, ngke I bua, mariri, ao n tiku n ti ngai i aon te maunga are e onrake n te tinoo arei n ririki aika a bwakanako. N aki ataia bwa tera riki ae N na karaoia, I katorobubua i aon te tinoo are e bwaka arei ao n tataro nakon Tamau are i Karawa ibukin te buoka. I tibwaa rawawatau ao maakuu ma Ngaia ao ni bubutia bwa N na kuneaki ao ni kamaiuaki.
Ngke I a teirake man au tataro, a bwaka ni katobibiai tinoo, ao te rau ae moan te tamaroa, e kaotia n aroka. E bua te rau are I karekea arei ngke I a ongo te mwakaikai man aroka ake a kaan. A kaoti uoman ataeinimwaane ae a ikawai riki. A tia n roko i taberan te maunga, ao n aki ira te kawai, a iangoia bwa a na tikeera rikaaki man te maunga. N taabo ni kabane, a tikeera rikaaki nakon te tabo are I bon mena iai!
I tuangiia ae I bua, ngke a titirakinaki bwa tera ae I karaoia ikekei. A kairai, ao ti kaai n tikeera rikaaki nako naano i rarikin te maunga. I mwiina tia bootaki ni kabane ma kaain te kurubu.
Ngke ti waaki nako ni kawaira n onimaki, anga mai nanora, ao n teimatoa, ke ti kinaa aron te Tia Kamaiu n nakonako ma ngaira ao n mwamwakuri ni buokiira. Iesu Kristo bon te kawai, te koaua, ao te maiu. Ke e kairiira ara onimaki ni karekea te rau nakon ara iango ao te kimwareirei n ara borau.