Lokal nga mga panid
Kwarenta ka Tuig nga Kasaysayan sa Philippines Missionary Training Center
Gikan sa panahon nga opisyal kining gitukod niadtong 1961, ang Filipino nga mga miyembro sa Ang Simbahan ni Jesukristo sa mga Santos sa Ulahing mga Adlaw kinsa gitawag isip mga misyonaryo nga direktang miadto sa mga misyon nga sila nadistino nga walay pagbansay sa MTC.
Diha sa pagpadayag, ang Ginoo miingon: “Ayaw pagtinguha sa pagpahayag sa akong pulong, apan unaha ang pagbaton sa akong pulong, ug unya ang imong dila makasulti; unya, kon ikaw magtinguha, ikaw makabaton sa akong Espiritu ug sa akong pulong, oo, ang gahom sa Dios ngadto sa pagkabig sa mga tawo”. Uban niini nga hunahuna, ang Kaigsoonan mibati og kadasig sa pagtukod og usa ka Missionary Training Center sa Pilipinas.
Niadtong 1983, usa ka Missionary Training Center alang sa Pilipinas giablihan diha sa usa ka giabangan nga balay sa 17 La Salle Street, Northeast Greenhills sa San Juan, Metro Manila, uban sa unang klase sa pagbansay sa misyonaryo nga gipahigayon niadtong Oktubre 3 alang sa usa ka nag-una nga grupo sa desisayis ka elder ug napulo ka mga sister. Ang unang mga direktor sa MTC mao sila si Bernard van Wagenen ug iyang asawa, uban ni Anita Bombita, Regina Dagal, Bernadeth Bernal, Dionisio Quiliza, ug Rafael Osumo isip ang unang mga magtutudlo. Ang kasikbit nga balay diha sa samang kalsada giabangan usab sugod Nobiyembre 8, 1985 aron sa paghatag og dugang nga espasyo alang sa nagkadako nga gidaghanon sa mga misyonaryo.
Niadtong 1989, duha ka magtiayon, sila si Ramon ug Annabelle Mariano, ug Carmelino ug Alicia Cawit, nahimong ang unang Filipino nga mga magtiayon nga Senior nga Misyonaryo nga motambong sa MTC. Niadtong 1985, ang Simbahan mipalit sa yuta sa atbang sa kalsada gikan sa templo aron tukoran sa mga pasilidad sa Simbahan. Niadtong Disyembre 1990, duha ka seremonya sa groundbreaking ang gipahigayon, usa alang sa gambalay sa administrasyon ug ang lain alang sa Missionary Training Center. Pagka 1992, ang Missionary Training Center nakompleto ug gipahinungod niadtong Septiyembre 20 nianang tuiga pinaagi ni Elder Vaughn J. Featherstone sa Seventy, uban ni J. Weston Daw ug sa iyang asawa nga nagserbisyo isip Presidente sa MTC.
Ang MTC makaakomodar hangtod sa otsenta ka misyonaryo, nagserbisyo sa 13 ka misyon sa Pilipinas ug 10 ka langyaw nga mga misyon. Samtang ang Simbahan nagpadayon sa pagtubo sa tibuok rehiyon sa Asia-Pacific, adunay panginahanglan sa pagpadayon nga pagpadako sa mga pasilidad sa MTC. Niadtong Hunyo 22, 2007, gibugwal ang yuta alang sa usa ka gipalapad nga MTC. Gikan sa kanhi nga kapasidad niini nga 80 ka higdaanan, ang bag-ong MTC karon makapaigo na hangtod sa 144 ka mga misyonaryo gikan sa Pilipinas ug sa silingan nga mga nasod sa Asya. Dinasig sa sugo sa Ginoo sa pagdala sa ebanghelyo ngadto sa tanang kanasoran, napulo ka poste sa bandila gipabarog sa pagpakayab sa mga bandila sa mga nasod nga gialagaran sa gipalapdan nga MTC, nga mao, ang Pilipinas, Cambodia, Hong Kong, India, Indonesia, Mongolia, Pakistan, Sri Lanka, Taiwan, ug Thailand.
Ang gipalapdan nga MTC gipahinungod niadtong Mayo 20, 2012, pinaagi ni kanhi Elder Russell M. Nelson sa Korum sa Napulog Duha ka Apostoles. Sa wala pa ang pagpahinungod, kami isip mga Lider sa Misyon sa Philippines Quezon City Mission gihangyo sa Kapangulohan sa Area nga ang among mga missionaryo mao ang mo-host sa Open House sa MTC sulod sa usa ka semana, sa dili pa ang pagpahinungod. Walay mga misyonaryo sa MTC atol nianang semanaha sa MTC. Kapin sa 5,000 ka mga kabatan-onan gikan sa Metro Manila nga area ang miabot ug mibisita sa bag-ong giayo nga MTC nianang semanaha.
Ang katukma sa pagpahinungod sa bag-o nga MTC nagmatuod nga gibuligan sa kahitas-an tungod kay atol sa ika-182 mga Matag Tunga sa Tuig nga Kinatibuk-ang Komperensiya sa Simbahan, si Presidente Thomas S. Monson mipahibalo sa pagpaubos sa gikinahanglan nga edad alang sa misyonaryo nga pagserbisyo. Sa tibuok Simbahan, ang kalalakin-an karon makasugod na sa pagserbisyo sa edad nga dise-otso ug ang kababayen-an sa edad nga dise-nuebe.
Niadtong 1974, si Presidente Spencer W. Kimball nanglantaw sa panahon nga ang mga Santos nga Filipino mobarog ug modala sa ebanghelyo ngadto sa ilang kaugalingong katawhan. Siya miingon “Kita kinahanglan mogamit sa ilang kaugalingong batan-ong kalalakin-an isip mga misyonaryo,” Sa anam-anam nga paagi, ang pangandoy ni Presidente Kimball natinuod samtang nagkadaghan ang batan-ong Filipino nga “anaa sa pag-alagad sa Dios” diha sa umahan nga hilabihan na ka “puti ug andam na pag-ani”. Gikan sa 2012 hangtod sa 2014, ang gidaghanon sa full-time nga mga misyonaryo sa Pilipinas misaka gikan sa 2,380 ngadto sa 4,482. Mapagarbohon, ang 2,383 niadto mga Filipino.
Niadtong 2017, unom lang ka adlaw human sa paghimo sa ika-100 nga stake sa Pilipinas, si Elder Neil L. Andersen sa Korum sa Napulog Duha ka Apostoles mipahinungod og usa ka gipalapdan pa nga MTC. Duha ka bag-o nga mga bilding ang nadugang ngadto sa lima ka bilding nga campus, giduble ang kapasidad gikan sa 144 ngadto sa 280 ka mga misyonaryo. Si Elder Andersen miingon, “Ang kamot sa Ginoo anaa sa buhat nga atong gipahinungod karon, ug atong makita ang talagsaon ug kahibulongan nga mga butang gikan niini nga mga sinugdanan,” si Elder Andersen mitagna. “Ang Pilipinas ug kini nga MTC moserbisyo og daghan sa Asia. Mga pinulongan itudlo dinhi. Ang katawhan moanhi dinhi sa mas dakong gidaghanon.”
Ang bag-o nga mga pagpang-ayo motugot na karon alang sa kapin 300 ka mga misyonaryo nga mopuyo dinhi. Sa kasamtangan 13 ka mga pinulongan ang gitudlo diha sa MTC.
Samtang Ang Simbahan ni Jesukristo sa mga Santos sa Ulahing mga Adlaw mokatap sa tibuok yuta agig katumanan sa gipanagna, ang Philippines Missionary Training Center nagpadayon sa pagtuman sa sagrado nga mandato niini sa pag-andam sa kalalakin-an ug kababayen-an sa pagsangyaw sa gipahiuli nga ebanghelyo ngadto sa “matag nasod, kaliwatan, pinulongan, ug katawhan”.
Samtang kita manglantaw ngadto sa Ikaduha nga Pag-anhi sa Manluluwas, hinaot ang Philippines MTC makatuman sa katuyoan hangtod, sama sa gipamahayag ni Propeta Joseph Smith nga, ang ebanghelyo “makasulod sa matag yuta, makabisita sa matag dapit, molukop sa matag nasod, ug makasulti sa matag dunggan hangtod nga ang katuyoan sa Dios matuman, ug ang Halangdong Jehova moingon nga ang buhat nahuman na.”