Mensahe sa Area
Jesus Christ, the Center of our Lives for this Christmas Season
Ang panahon sa Pasko usa ka panahon sa pagpamalandong sa mga panalangin nga atong nadawat gikan sa usa ka mahigugmaon nga Amahan sa Langit ug sa gugma gikan sa atong Manluluwas nga si Jesukristo. Atol niini nga panahon, atong madungog ang mga daygon sa Pasko nga motabang kanato sa paghinumdom sa unsay gibuhat sa atong Manluluwas alang kanato ug motabang kanato sa pagsaulog sa Iyang pagkatawo, kinabuhi, Pag-ula, ug Pagkabanhaw. Ang Iyang kinabuhi ug Pag-ula mao ang labing maayo nga mga gasa nga gihatag sa Amahan sa Langit kanato: “Kay gihigugma pag-ayo sa Dios ang kalibotan ug tungod niini gihatag niya ang iyang bugtong Anak”1.
Matag panahon sa Pasko, pipila ka Pilipino nga mga panimalay gidayan-dayanan og porma og bituon nga mga lantern nga nailhan isip parol, gikan sa Katsila nga pulong nga farol nga nagpasabot og “lantern” o “lampara”.
Tungod kay nagdako sa probinsiya sa Pampanga, kanunay kong nadani sa dako nga lantern o parol sa Pasko nga ilado ang probinsiya. Kining higante nga mga parol puno sa hayag nga mga kolor nga adunay makuti nga mga desinyo, nagpakita sa hayag ug matahom nga kombinasyon sa mga 5,000 ka bombilya nga gibutang sulod sa parol pinaagi sa hanas nga mga artesano.
Alang kanato, unsay gipasabot sa parol atol sa Pasko?
Kon subayon nato ang kasaysayan sa parol, mobalik kini atol sa panahon sa Katsila dinhi sa Pilipinas, sa dihang ang mga Espanyol midala sa Kristiyanismo ngadto sa mga isla. Ang mga parol sa sinugdanan gigamit sa pagdan-ag sa agianan paingon sa simbahan sa nahauna nga mga adlaw. Ang parol nagdan-ag sa agianan alang sa daghang magpapanaw.
Kita, isip mga sumusunod ni Kristo, kinahanglang modan-ag usab sa agianan alang sa uban. Atong mabasa diha sa Mateo 5:15-16 nga mahimo kitang kahayag ngadto sa uban pinaagi sa Kristohanon nga ehemplo kay kon “ang mga tawo … magdagkot og suga aron ibutang ibabaw sa tongtonganan…kini magaiwag kanilang tanan nga anaa sa sulod sa balay”. Dugang pa, kini nagtudlo kanato nga ang kahayag o ehemplo nga atong ipakita ngadto sa uban aron “makita nila ang inyong mga maayong buhat ug dayegon” ang atong Amahan nga anaa sa langit.
Kita mamahimong sama sa usa ka parol. Si Kristo mamahimong mao ang kahayag sa sulod. Sa samang paagi nga ang mga Espanyol migamit sa parol isip instrumento sa paggiya sa uban ngadto sa mga pultahan sa sagrado nga mga dapit, mao nga kita mamahimong mga instrumento sa mga kamot sa Langitnong Amahan aron sa paggunit sa kahayag ni Kristo alang niadtong kinsa anaa sa kangitngit. Uban sa atong tabang, ang mga tawo sa atong palibot mahimong magiyahan paingon ngadto sa sagrado nga mga dapit diin mabati nila ang gugma sa Manluluwas nga si Jesukristo.
Unsaon nato sa paggunit sa kahayag ni Kristo aron sa paggiya sa uban paingon sa dalan sa pakigsaad?
Si Presidente Russell M. Nelson namulong bahin sa pagkahimong mga instrumento diha sa kamot sa Dios. Siya mitudlo “Ako adunay lig-on nga pagtuo nga ang pag-ampo alang niadtong nanginahanglan makapahimuot sa Dios; sa pagkatinuod, Siya nagsugo kanato nga modangop ngadto Kaniya ug mag-ampo alang sa uban! Apan, kini ang akong kaugalingong personal nga kasinatian nga kon mohangyo ko sa Dios og direksiyon pinaagi sa pag-ampo sa unsay akong mabuhat aron sa pagtabang sa pagpangalagad, pagbayaw, paghigugma, ug pagsuporta niadtong nanginahanglan, Siya motubag niini nga mga pag-ampo og piho ug yano nga mga butang nga akong mabuhat gayod aron sa pagpanalangin og usa sa Iyang mga anak.”
“Ako modapit kaninyo sa pagkonsiderar kon sa unsang paagi ang inyong mga hunahuna ug mga pag-ampo mahimong usa ka paagi alang sa Dios sa pagdasig ug pagdirekta kaninyo paingon ngadto sa mga buhat sa kamabination, kaluoy, ug pagkamanggihatagon. Hunahuna kon unsa ka dako nga kaayohan ang inyong mabuhat sa kalibotan—ug sa inyong kaugalingon nga pamilya, eskwelahan, ug trabahoan. Samtang magtinguha kita nga mahimong Iyang makaayo ug makatabang nga mga kamot, segurado nga atong mahimaya ang Ginoo.”2
Segurado, kita adunay daghang oportunidad niining panahon sa Pasko ug sa tibuok tuig nga mahimong usa ka instrumento alang sa Dios sa pagpakita og kamabination, gugma nga putli, kaluoy, kapasayloan, ug gugma alang sa uban. Sama sa parol, samtang sundon nato ang mga ehemplo sa atong Manluluwas, gihimo nato ang kahayag ni Jesukristo nga mao ang atong sentro. Mamahimo Siyang sentro sa atong mga kinabuhi, magdasig sa tanan nga atong buhaton ug kon kinsa kita. Niining panahon sa Pasko, hinaot nga pilion nato nga ibutang Siya sa sentro sa atong mga kinabuhi ug magpadayon nga ipabilin Siya sa atong mga kinabuhi latas sa mga katuigan nga moabot.
Ang atong Manluluwas nga si Jesukristo nagpakita og daghang ehemplo sa gugma ug kaluoy alang sa uban. Nakat-onan nato nga gibuhi ni Jesukristo ang anak nga lalaki sa biyuda sa Nain gikan sa patay. Mibiyahe Siya og layo gikan sa Capernaum apan sa dihang nakita sa Ginoo ang biyuda Siya naluoy kaniya ug misulti “Ayaw paghilak”. Ug gisultihan niya ang batan-ong lalaki nga ‘bangon’.3 Ang babaye nga hisakpan nga nanapaw gidala sa atubangan ni Kristo diin mipakita Siya og ehemplo sa kapasayloan ug kamabination. Atol kadto niining panahona nga ang atong Manluluwas mitudlo kanato “Ako mao ang kahayag sa kalibotan. Ang mosunod kanako dili na gayod maglakaw diha sa kangitngit kondili makabaton hinuon sa kahayag sa kinabuhi.”4 Siya sa pagkatinuod mao ang kahayag sa kalibotan, ug uban sa Iyang tabang kita mamahimong usa ka kahayag ngadto sa uban.
Adunay daghang ehemplo sa atong kinabuhi nga nagpakita og Kristohanon nga mga hiyas ug gugma alang sa uban. Sa dihang bata pa ang among mga anak, ang among bishop mihangyo nga magdala ko sa sakramento ngadto sa usa ka sister nga ginganlan og Irma kinsa nagpuyo diha sa usa ka senior assisted living institution. Sama sa mga tawo kinsa anaa sa kangitngit, siya walay kapasidad nga regular nga makadawat sa kahayag sa Manluluwas pinaagi sa pag-ambit sa sakramento. Isip usa ka pamilya, dad-on namo ngadto kaniya ang pan ug tubig sa sakramento matag Dominggo. Ang among mga anak mopataas sa kahayag ni Kristo pinaagi sa pagpakigbahin sa ilang pagpamatuod o mga leksiyon nga ilang nakat-onan gikan sa ilang mga klase ug sa panagtigom alang sa sakramento. Gikan niini nga kasinatian among nakat-onan ang mahitungod sa kaluoy ug Kristohanon nga gugma.
Hinaot nga ang atong maayo nga mga buhat modan-ag sa agianan alang sa uban, sama sa usa ka parol, ngadto kang Jesukristo kinsa mao ang sentro sa atong mga kinabuhi niining panahon sa Pasko.
Ang ebanghelyo ni Jesukristo mao ang gasa sa Manluluwas kanato. Siya mianhi niini nga kalibotan aron sa pagbuhat sa kabubut-on sa Iyang Amahan tungod ang Amahan mipadala Kaniya aron Iyang madala ang tanang tawo ngadto Kaniya. Mamahimo kamong usa ka instrumento alang sa Dios pinaagi sa pagkahimong Kristohanon. Hinaot nga ang matag usa kanato mogahin og panahon sa pagpamalandong sa pagkatawo sa atong Manluluwas nga si Jesukristo ug sa Iyang imbitasyon alang kanato nga moduol ngadto Kaniya. Tutokan nato ang atong Manluluwas nga si Jesukristo isip ang sentro sa atong kinabuhi niining Panahon sa Pasko.