Digital Lamang
Ang Balay sa Ginoo—Bag-ong mga Mensahe gikan sa mga Propeta, mga Apostoles, ug Ubang mga Lider sa Simbahan
Tan-awa kon unsa ang bag-ohay lang nga gitudlo sa mga lider sa Simbahan diha sa social media mahitungod sa templo.
Si Presidente Russell M. Nelson bag-ohay lang miawhag kanato nga “magpunting sa templo sa mga paagi nga wala pa ninyo mabuhat sukad.”1 Siya usab mitambag: “Palihog paggahin og panahon sa Ginoo diha sa Iyang balaan nga balay. Walay bisan unsa nga makapalig-on sa inyong espirituwal nga pundasyon sama sa pagserbisyo sa templo ug pagsimba sa templo.”2
Si Presidente Dallin H. Oaks, Unang Magtatambag sa Unang Kapngulohan, dugang nga mipasabot, “Ang Dios nagtinguha nga kitang tanan maningkamot sa Iyang kinatas-ang posible nga mga panalangin pinaagi sa pagtuman sa Iyang kinatas-ang mga sugo, mga pakigsaad, ug mga ordinansa, ang tanan niini ipahigayon diha sa Iyang balaan nga mga templo nga gitukod sa tibuok kalibotan.”3
Ngano nga ang templo mao man ang labing importante sa atong pagkadisipulo? Sama sa gitudlo ni Presidente Nelson: “Ang templo mao ang labing importante nga bahin sa pagpalig-on sa atong hugot nga pagtuo ug espirituwal nga kalig-on tungod kay ang Manluluwas ug ang Iyang doktrina mao ang sentro nga bahin sa templo. Ang tanan nga gitudlo sulod sa templo, pinaagi sa instruksiyon ug pinaagi sa Espiritu, makadugang sa atong pagsabot ni Jesukristo. Ang Iyang mahinungdanon nga mga ordinansa nagbugkos kanato ngadto Kaniya pinaagi sa sagrado nga mga pakigsaad sa pagkapari. Dayon, kon kita motuman sa atong mga pakigsaad, Siya motuga nato sa Iyang makaayo, makapalig-on nga gahom [tan-awa sa Doktrina ug mga Pakigsaad 109:15, 22]. Ug o, unsa kadako sa atong panginahanglan sa Iyang gahom sa mga adlaw nga umaabot.”4
Agi og dugang sa mga pakigpulong sa kinatibuk-ang komperensiya mahitungod sa templo, ang mga lider sa Simbahan mipakigbahin usab og mga mensahe mahitungod niini nga mga hilisgotan diha sa social media, lakip na ang mosunod:
Mousab sa Inyong Kinabuhi ug Mopanalangin sa Inyong mga Pamilya
“Ang matag templo nagbarog isip simbolo sa atong pagkamiyembro sa Simbahan, isip timaan sa atong hugot nga pagtuo sa kinabuhi human sa kamatayon, ug isip ang-ang ngadto sa mahangtorong himaya alang kanato ug sa atong pamilya.
“Ako mosaad kaninyo nga kon kamo mogahin og panahon nga maanaa sa templo kanunay, mousab kini sa inyong kinabuhi. Mopanalangin kini sa inyong mga pamilya, molig-on sa inyong pagtuo ug moabli sa mga bintana sa langit alang ninyo.”
Presidente Russell M. Nelson, Facebook, Ago. 14, 2022, facebook.com/russell.m.nelson.
Mokonektar Kanato Direkta ngadto sa Langitnong Amahan ug ni Jesukristo
“Ang atong mga templo mao ang labing balaan nga mga dapit dinhi sa yuta. Kini wala lamang maghiusa kanato isip mga pamilya apan nagkonektar kanato direkta ngadto sa atong Langitnong Amahan ug sa Iyang Anak, si Jesukristo.”
Presidente Russell M. Nelson, Facebook, Mar. 15, 2021, facebook.com/russell.m.nelson.
Molig-on sa mga Batan-on
“Sa akong hunahuna ang templo adunay dakong impluwensya diha sa pagtuo nga nagtubo taliwala sa kabatan-onan. Ang mga batan-on motakda sa ilang mga tumong nga magminyo sulod sa templo.
“Ug kon kamo maselyo isip mga pamilya, niana ang umaabot mag-anam og kahayag. Sa akong hunahuna lisod ang panahon sa umaabot, mao nga naghunahuna ko nga kana nga angkla sa hugot nga pagtuo diha ni Jesukristo ug ang templo isip Iyang balay ug ang tanang butang nga nahitabo niana nga templo nagpunting gayod kang Jesukristo. Maghunahuna ko nga ang templo adunay ingon niana nga epekto, ug makapalig-on kana sa mga batan-on. Panahon sa unos, palig-ona ang inyong kaugalingon diha sa bato sa Manluluwas. Kana ang makapalahutay ninyo sa unos.”
Presidente Henry B. Eyring, Facebook, Ago. 17, 2022, facebook.com/henry.b.eyring.
Maselyo isip mga Pamilya alang sa Kahangtoran
“Walay laing mga gambalay [building] sa yuta—gani bisan ang labing matahom nga mga gambalay—ang nagbaton sa unsa ang anaa sa mga templo.
“Ang akong asawa, si Barbara, namatay hapit upat ka tuig na ang milabay. Apan tungod kay kami misulod sa balay sa Ginoo ug naselyo isip bana ug asawa pinaagi sa gahom sa pagkapari, kami gibugkos kauban sa among pito ka anak, 43 ka apo, ug pagka-Hunyo 5, 2022, 103 ka apo sa tuhod, hangtod sa kahangtoran. Pagkanindot nga butang ang templo! Ang kalipay mipuno sa akong kasingkasing tungod kay ang akong pamilya mahimong magkauban hangtod sa kahangtoran. Ug ang inyong pamilya mahimo usab.
“Kon kamo maanaa na sa akong pangedaron, kamo dili na kaayo interesado sa pagbaton og daghang kwarta o pagdrayb og mahalon nga sakyanan. Ang labing bililhon nga butang sa inyong kinabuhi mao ang inyong pamilya—dili lang ang inyong pamilya apan ang inyo usab nga pamilya sa kahangtoran.”
Presidente M. Russell Ballard, Facebook, Hulyo 6, 2022, facebook.com/mrussell.ballard.
Makadawat sa Gahom sa Pagkadiosnon
“Labaw pa kaysa kaniadto, kita nanginahanglan sa gahom ug kalig-on nga moabot pinaagi sa atong koneksiyon sa pakigsaad ngadto ni Ginoong Jesukristo.
“Kita dili moadto sa templo aron motago o moeskapo sa mga kadaotan sa kalibotan. Kondili, moadto kita sa templo aron makadawat sa gahom sa pagkadiosnon pinaagi sa mga ordinansa sa pagkapari nga makapahimo nato sa pag-atubang ug pagbuntog sa kalibotan.”
Elder David A. Bednar, Facebook, Mayo 23, 2022, facebook.com/davida.bednar.
Mahimong Bag-ong mga Nilalang diha ni Kristo
“Ang atong mga kasingkasing mausab pinaagi sa mga kamatuoran nga atong makat-onan diha sa templo mahitungod sa Dios ug ni Jesukristo—ug pinaagi sa gihimo nato nga mga saad nga mohigugma ug moserbisyo. Mas minos kitang motutok sa unsay atong gusto ug mas motutok sa pagpahiangay sa atong kabubut-on ngadto sa kabubut-on sa Dios. … Ang nag-unang katuyoan sa balay sa Ginoo mao ang pag-usab kanato ug mahimong bag-o nga mga linalang diha ni Kristo.
“Kasagaran sa kalibotan, ang kausaban gisulayan gikan sa gawas pasulod. Daghan ang nagtuo nga ang pag-usab sa mga kahimtang sa usa ka tawo mao ang labing maayo nga paagi sa pag-usab sa usa ka tawo.
“Ang Dios, hinuon, kasagaran nga nagtrabaho gikan sa sulod pagawas. Kon tugotan nato Siya, ang Dios makausab sa atong mga kasingkasing— ug dayon kita mapanalanginan og kapasidad ug kalig-on sa pag-usab sa atong mga kahimtang.
“Diha sa balaan nga mga templo, ang unsay atong makat-onan ug gisaad nga buhaton makapausab kanato gikan sa sulod pagawas, nga makapahimo kanato nga mahimong mas mapahinungoron nga mga disipulo ni Jesukristo.”
Elder David A. Bednar, Facebook, Abr. 19, 2022, facebook.com/davida.bednar.
Pagpangandam sa Pagsugat sa Dios
“Ang nag-unang mga panalangin sa mga templo sa Ang Simbahan ni Jesukristo sa mga Santos sa Ulahing mga Adlaw mao ang mga ordinansa sa kahimayaan. Ang pagtambong sa templo moandam nato sa pagsugat sa Dios.
Ang templo usa ka dapit usab nga kadangpan. Sa tibuok nakong kinabuhi nahimo kini nga usa ka dapit sa panagdait ug kalinaw sa usa ka kalibotan nga nagkaguliyang. Maanindot nga biyaan ang mga kabalaka sa kalibotan niining sagrado nga dapit.
“Ang mga pagbati nga parehas ug ang panaghiusa mopatigbabaw sa templo. Ang tanan nagsinina og puti. Walay ebidensya sa bahandi, ranggo, o nahuman nga edukasyon; managsoon kitang tanan nga nagpaubos sa atong mga kaugalingon atubangan sa Dios.
“Ang pagkaadunay templo sa Ginoo… usa gayod ka talagsaong panalangin. Isip usa sa mga Apostoles sa Manluluwas, ako mopamatuod bahin sa ka balaan sa Manluluwas ug ubos sa direksyon sa Amahan Siya ang naggiya niining celestial nga buhat sa kaluwasan ug kahimayaan.”
Elder Quentin L. Cook, Facebook, Nob. 20, 2022, facebook.com/quentin.lcook.
Makabaton sa Tanang Balaanong mga Posibilidad nga Mahatag sa Dios
“Kon kita magmatinud-anon sa mga pakigsaad nga atong gihimo diha sa mga templo sa Ang Simbahan ni Jesukristo sa mga Santos sa Ulahing mga Adlaw, kita makabaton sa tanang balaanong mga posibilidad nga mahatag sa Dios.”
Elder D. Todd Christofferson, Facebook, Ago. 15, 2022, facebook.com/dtodd.christofferson.
Magtinguha og Kapahulayan ug Pagbag-o
“Bag-ohay lang mipakigbahin ko og pipila ka hunahuna ngadto sa mga estudyante … bahin sa kon sa unsang paagi nga ang usa ka pasalig sa pagtrabaho, nga usa gayod sa mahinungdanong baroganan sa ebanghelyo, mahimong negatibo kon dili balansehan sa pagpahulay ug pagbag-o o kon magpalabi niini diin mahimo kining usa ka matang sa relihiyon.
“Dayag sa atong kaugalingon nga kita nagkinahanglan og pisikal nga pagbag-o, apan ang igong paglingawlingaw aron makapahulay ug ang pagpamalandong mahinungdanon usab alang sa espirituhanong pagbag-o. Sa pagkatinuod, kon walay espirituhanong pagbag-o, ang espiritu mahimong ulipon sa lawas.
“Kita makakaplag og espirituhanong pagbag-o diha sa Igpapahulay ug usab diha sa templo, ang balay sa Ginoo. Sa atong paglakang pasulod sa templo, kita milakang pagawas sa kalibotan. Kita mokaon sa makapabaskog nga pan ug moinom ug lunsay nga tubig sa espirituhanong kalinaw. Usahay maghisgot kita bahin sa buhat sa templo, apan mahimo usab kita nga magshigot og pagpahulay sa templo.
“Ako moawhag ninyo nga magtinguha sa pagpahulay ug pagbag-o matag semana atol sa pagsimba sa Igpapahulay ug diha sa templo.”
Elder D. Todd Christofferson, Facebook, Hulyo 7, 2021, facebook.com/dtodd.christofferson.
Tugoti nga “ang Balay sa Ginoo” Motuhop sa Inyong Kalag
“Unsa ka mahimayaon ug malipayon nga kasinatian kadto nga mapahinungod ang Praia Cape Verde Temple. Pagduhaduha, pagkawalay paglaom, pagkawalay kaseguroan, ug mga hagit ang mahimong atubangon sa daghang lumulopyo sa Cape Verde, apan kini nga templo mahimong usa ka panalangin ug usa ka banwag ngadto sa tanan niana nga nasod miyembro man sa Simbahan ni Jesukristo o dili ang usa ka tawo.
“Ang templo mao gayod ang balay sa Ginoo. Tugoti nga kadto nga mga pulong hinayhinay nga motuhop sa inyong kalag. Kini Iyang balay.
“Ang mga templo mao ang nagsumpay sa langit ug sa yuta. Kini balaang mga dapit, sagradong mga luna, ug usa ka interseksiyon taliwala sa yuta ug kahangtoran.
“Siyempre, adunay mga hagit sa mortalidad. Apan uban sa atong hugot nga pagto diha ni Jesukristo, kita makapaabot sa kalipay sa atong mahangtorong kinabuhi. Kining balaan nga balay mahimong usa ka dapit sa pagdawat og pagpadayag ug usa ka dangpanan sa kalinaw. Ako nasayod nga ang Ginoo anaa niining bag-ong gipahinungod nga templo sulod sa mga bulan, mga tuig, ug mga dekada nga moabot.
Elder Neil L. Andersen, Facebook, Hunyo 20, 2022, facebook.com/neill.andersen.
Makasinati sa Maanindot nga mga Panalangin
“Dili igsapayan sa atong edad, ang mga templo makapanalangin sa atong kinabuhi sa maanindot nga mga paagi.”
Elder Gary E. Stevenson, Hulyo 24, 2022, facebook.com/stevenson.gary.e.
Mamalandong sa Kalinaw nga Moabot
“Ang arkitektura, art, color palette, ug ubang mga elemento sa desinyo [sa mga templo] mainampingong giplano nga naghunahuna sa lokal nga komunidad.
“Ang katahom ug kamaagnihon gihatagan og detalyadong pagtagad aron mahimo ang balay sa Ginoo. Kini nga mga detalye importante sama sa paagi nga ang katahom sa templo ni Solomon importante, apan kahon lamang kini sa mga alahas—dili mao ang mga alahas.
“Ang ‘perlas nga labing bililhon’ mao ang mga ordinansa, mga pakigsaad, mga saad, ug instruksiyon nga madawat didto. Mao kini ang kalipay ug kamaya nga gibati niadtong anaa sa duha ka habig sa tabil samtang modawat sila sa mga panalangin ug moduol ngadto ni Kristo.
“Ako modapit ninyo nga pamalandongan ang kalinaw nga moabot gikan sa pagsimba ug pagserbisyo sa templo.”
Elder Gary E. Stevenson, Sept. 14, 2021, facebook.com/stevenson.gary.e.
Magpaduol ngadto sa Dios ug sa Usag Usa
“Pinaagi sa sagrado nga mga pakigsaad nga atong gihimo sulod sa balay sa Ginoo, ang atong Manluluwas makatabang nga kita mapaduol ngadto sa Dios ug ngadto sa usag usa samtang atong ibugkos ang atong mga kasingkasing ngadto sa Kristohanon, hinatag ni Kristo nga puangod, pagpasaylo, ug kaluoy.”
Elder Gerrit W. Gong, Facebook, Dis. 5, 2022, facebook.com/gerritw.gong.
Mobiya sa Mingaw ug Awaaw nga Kalibotan
“Paggahin og daghang panahon uban sa Ginoo diha sa Iyang mga templo. Ang mga templo sa literal nga paagi mga balay sa Ginoo. Ug kon anaa kita didto, kita makabati og lahi nga impresyon nga gibiyaan nato ang mingaw ug awaaw nga kalibotan.”
Elder Ulisses Soares, Facebook, Dis. 8, 2022, facebook.com/soares.u.
Andamon ang mga Bata alang sa Balay sa Ginoo
“Si Tyrone usa ka 11 anyos nga taga-Harare, Zimbabwe, kinsa bag-ong miyembro sa Ang Simbahan ni Jesukristo sa mga Santos sa Ulahing mga Adlaw. Usa ka templo ang kasamtangang gitukod didto sa Harare, ug ang mga miyembro nangandam alang sa mga panalangin nga moabot gikan sa templo. Human sa usa ka leksiyon mahitungod sa mga templo diha sa Daang Tugon ug nagtan-aw niining kalihokan sa tingpamulak nga Higala sa Higala mahitungod sa mga panalangin sa templo, ang mga bata gihangyo sa paghimo og mga modelo sa templo gamit ang mga butang nga ilang makit-an. Ang gibasura nga buak nga mga brick ug mga bato, ang mga tumoy sa mga uhay sa tubo [sugarcane], ug usa ka piraso nga tubo [pipe] wala pa gayod sukad gitagad nga may mas balaang pagtahod ug sa mamugnaong paagi.
“Si Tyrone naghimo og usa ka nindot nga templo nga angayng ipakigbahin. Iyang gipakita ang iyang matahom nga modelo ngadto sa tanan diha sa simbahan, gipakita ang mga lawak, mga bintana, ug gani ang espesyal nga pulong ibabaw sa pultahan.
“Ganahan ko nga magtan-aw sa mga bata nga nagkat-on mahitungod sa mahangtorong mga panalangin nga anaa sa balay sa Ginoo. Kita makaandam nila pinaagi sa pagtudlo kanila mahitungod sa mga pakigsaad nga ilang himoon didto. Mahimo nilang sugdan karon ang pagpangandam aron magpabunyag alang sa ilang kaugalingong mga sakop sa pamilya, modawat sa pagtuga, ug maselyo alang sa karon ug sa kahangtoran. Kita makatudlo nila nga kon sila mosulod ug moserbisyo sa templo, mas hingpit nilang bation ang gahom sa Manluluwas diha sa ilang kinabuhi.”
Presidente Susan H. Porter, Facebook, Dis. 19, 2022, facebook.com/PrimaryPresident.