“Duol kamo Kanako’: Ang Espirituhanon nga Pagpangaplag sa Atong Tibuok Kinabuhi,” Liahona, Agosto 2023.
“Duol kamo Kanako”: Ang Espirituhanon nga Pagpangaplag sa Atong Tibuok Kinabuhi
Ang pagkat-on sa pag-ila ug paghigugma ni Ginoong Jesukristo magpadayon sa inyong tibuok kinabuhi.
Christ Calling Peter and Andrew [Si Kristo nga Nagtawag ni Pedro ug Andres], ni James Taylor Harwood
Isip mga disipulo ni Ginoong Jesukristo, kita nagmaya sa Iyang pagdapit: “Duol kamo kanako.” Siya nagdapit kanato sa pagdala sa Iyang “yugo ug sundon [Siya]” (Mateo 11:28–29). Kini nagpasabot nga kita nagtuo Kaniya ug malipayon nga mohangop sa Iyang ngalan, sa Iyang mga pagtulon-an, ug sa Iyang mga sugo.
Kitang tanan mianhi sa yuta nga adunay lainlain nga mga talento ug mga hiyas, ug kitang tanan adunay talagsaon nga mga kasinatian sa kinabuhi. Apan alang kanatong tanan, ang paghimo ni Jesukristo nga mao ang kinatas-an nga prayoridad sa atong kinabuhi mao ang pagpangaplag sa atong tibuok kinabuhi. Pinaagi sa usa ka tibuok kinabuhi nga hugot nga pagtuo, pagtuon, pag-ampo, ug paghinulsol, kita mas makaila ug mohigugma pa gayod Kaniya.
Nagpuyo kita niini nga kalibotan nga puno sa mga hagit ug mga makabalda. Aron magpabilin ang atong pagtutok sa mahangtoron nga mga butang, aron magpuyo og kinabuhi nga adunay hugot nga pagtuo kang Jesukristo, ug aron makasinati og nagpadayon nga pagkakabig latas sa daghang dekada sa kinabuhi magkinahanglan sa atong kaisog ug pasalig, uban sa tabang gikan sa langit.
Pangita og Kalig-on diha sa mga Ordinansa ug mga Pakigsaad
Usa ka dako nga tabang gikan sa langit moabot pinaagi sa mga ordinansa ug mga pakigsaad sa templo nga mopabilin kanato nga “dili matarog, nakagamot, naestablisar, ug nalig-on”1 diha sa atong pagpangaplag nga moduol ngadto sa Manluluwas.
Si Presidente Russell M. Nelson mitudlo nga “ang pagsulod ngadto sa relasyon sa pakigsaad uban sa Dios nagbugkos nato ngadto Kaniya sa paagi nga makapahimo sa tanan mahitungod sa kinabuhi nga mas sayon.” Siya wala miingon nga ang paghimo og mga pakigsaad mohimo sa kinabuhi nga sayon, “apan ang pagpakigtambayayong sa Manluluwas nagpasabot nga kamo makagamit sa Iyang kusog ug matubsanon nga gahom.”2
Ang uban mahimong matingala kon nganong ang Ginoo nagsugo sa Iyang propeta sa pagtukod ug pagpahinungod og daghan kaayong templo sa tibuok yuta. Niining nagkasamok nga kalibotan, gikinahanglan ang kahilwasan ug ang mga pahinumdom sa atong mga ordinansa ug mga pakigsaad. Kini motabang kanato nga magpadayon sa unahan sa unsay gitawag nato karon nga dalan sa pakigsaad.
Si Presidente Nelson miingon: “Ang mga ordinansa sa templo ug ang mga pakigsaad nga inyong gihimo didto mahinungdanon sa pagpalig-on sa inyong kinabuhi, sa inyong kaminyoon ug pamilya, ug sa inyong abilidad sa pagbatok sa mga pag-atake sa kaaway. Ang inyong pagsimba sa templo … molig-on sa inyong pasalig nga magpabilin diha sa dalan sa pakigsaad.”3
Magpakabuhi nga Takos sa Espiritu Santo
Kanunay nakong gimahal kini nga mga pulong gikan ni Apostol Pablo nga gisulat hapit 2,000 ka tuig ang nakalabay apan tinuod gihapon kaayo karon:
“Walay bisan usa nga makasabot mahitungod sa Dios gawas sa Espiritu sa Dios.
“Apan kita nakadawat … sa Espiritu nga gikan sa Dios, aron kita makasabot sa mga butang nga gihatag sa Dios kanato.
“Ug kini … gitudlo sa Espiritu. …
“Ang tawo nga kalibotanon dili modawat sa mga butang sa Espiritu sa Dios, kay alang kaniya kini mga binuang, ug siya dili makahimo pagsabot niini tungod kay kini matugkad lamang sa espirituhanon nga paagi” (1 Mga Taga-Corinto 2:11–14).
Ang espirituhanon nga mga kamatuoran ug giya gikan sa Espiritu Santo dili hingpit nga mahulagway sa mga pulong. Kini mao ang “lalom nga mga butang sa Dios” (bersikulo 10), nga “gitagana … alang kanila nga nahigugma kaniya” (bersikulo 9).
Samtang atong madawat ang gasa sa Espiritu Santo atol sa bunyag, kita kinahanglang maningkamot nga magpakabuhi nga takos sa kanunay nga impluwensiya niini pinaagi sa pagbantay sa unsay atong gibuhat, sa unsay atong gisulti, ug kang kinsa atong gipakigbahin ang atong panahon. Sa pagbuhat sa ingon, ang espirituhanon nga kahayag mas segurado nga moabot sa atong mga kalag, magtugot kanato nga “dili [mag-agad] diha sa kaalam sa mga tawo kondili diha sa gahom sa Dios” (bersikulo 5).
Si Presidente Nelson mitambag kanato sa pagpili “sa paglikay gikan sa bisan unsa nga makapabugaw sa Espiritu”4 ug sa “paghimo sa espiritwal nga buhat nga maoy gikinahanglan aron sa pagtagamtam sa gasa sa Espiritu Santo ug mas kanunay ug mas klaro nga pagpaminaw sa tingog sa Espiritu.”5
Hinumdomi ang Espirituhanon nga mga Kasinatian
Sa dihang gihandom ni Pablo ang iyang gamhanan nga pagkakabig samtang nagbiyahe paingon ngadto sa Damasco, siya miingon, “Mikalit pagdan-ag libot kanako ang usa ka masanag nga kahayag gikan sa langit” (Mga Buhat 22:6)—hayag kaayo nga siya nabuta—ug siya nakadungog sa tingog sa Ginoo.
Makapatingala, kadtong mga kauban ni Pablo nakakita usab sa kahayag apan wala makadungog sa tingog (tan-awa sa Mga Buhat 22:9). Nganong wala man? Sila ba mituo kang Pablo, o sila misulay ba sa pagkombinser kaniya nga iyang gihanduraw ang kasinatian?
Human sa espesyal nga espirituhanon nga mga kasinatian, ang uban mahimong mangutana, “Nabati ba gayod nako kana?” o “Gihanduraw lang ba nako kini?” Apan kadtong kinsa mga maalamon, sama ni Pablo, dili makalimot o mobaliwala sa espirituhanon nga mga kasinatian. Sila mohinumdom niini ug ipabilin kining duol sa ilang panumdoman.
Sa katuigan human sa Unang Panan-awon, si Propeta Joseph Smith miatubang og kanunay nga pagsupak ug pagpanggukod, apan mipadayon siya sa maisogong pagpamatuod nga ang Amahan ug ang Anak mipakita kaniya. “Ako nasayod niini,” miingon si Joseph, “ug ako nasayod nga ang Dios nasayod niini, ug ako dili makalimod niini” (Joseph Smith—Kasaysayan 1:25).
Si Joseph wala gayod makalimot o milimod sa iyang espirituhanon nga mga kasinatian. Gihinumdoman niya kini sa tibuok niyang kinabuhi. Sa lisod nga mga panahon, handomon niya kadto nga mga higayon aron sa pagseguro kaniya og usab sa gugma sa Dios ug sa pagpalig-on kaniya sa buhat nga gihatag sa Ginoo kaniya nga himoon.
Tingali kita dili gayod makakita og langitnon nga panan-awon o pisikal nga makadungog sa tingog sa Ginoo, apan moabot gayod ang espirituhanon nga mga kasinatian. Kinahanglan hinumdoman nato kini. Kini nagpalig-on kanato sa atong pagpangaplag nga moduol ngadto kang Kristo, ug ang atong pagkakabig magpadayon.
Pilia ang Hugot nga Pagtuo
Isip usa ka presidente sa misyon, kon ang mga misyonaryo moduol ug mosulti kanako nga lisod ang mga butang, kasagaran ipakigbahin nako kanila ang mga kalisod ni Apostol Pablo ug unsa ang atong makat-onan gikan sa iyang mga pagsulay.
Si Pablo nagsulti kanato nga kalima ka higayon siya gilapdosan ug katulo gibunalan. Gibato siya kausa ug nakasinati og tulo ka pagkalunod sa barko (tan-awa sa 2 Mga Taga-Corinto 11:24–25). Sa iyang mga panaw, si Pablo miatubang og “mga katalagman sa baha, sa mga tulisan,” ug “sa mga isigka-Judio ug sa mga dili Judio,” ug gani sa “dili matuod nga kaigsoonan.” Siya giabog sa mga siyudad, gibilanggo, ug miantos og “[ka]hago … ug [ka]budlay,” “[ka]gutom ug [ka]uhaw,” ug “[walay] kapasilongan o bisti” (2 Mga Taga-Corinto 11:26–27).
Pipila lang ka tawo ang makasinati og mga pagsulay nga ingon ka grabe sama sa kang Pablo, apan kitang tanan makasinati og mga pagsulay. Walay usa nga dili makasinati niini. Ug kasagaran moabot ang mga pagsulay sa panahon nga wala nato kini damha. Giunsa ni Pablo paglahutay latas sa “mga kasamok,” “mga kakulian,” “[mga] [ka]samok,” ug “[mga] [ka]hago”? (2 Mga Taga-Corinto 6:4–5). Si Pablo “bisan may kaguol, malipayon gihapon,” ug “kabos … apan [nakabaton sa] daghang … espirituhanong butang” (2 Mga Taga-Corinto 6:10), tungod kay siya mipili sa hugot nga pagtuo kang Jesukristo.
Dili kaayo lisod nga mopili sa hugot nga pagtuo kang Jesukristo kon gibati nato nga nalagsik sa espirituhanon nga paagi, apan kita usab kinahanglan nga mopili sa hugot nga pagtuo kon mahimong lisod ang kinabuhi. Atong makaplagan nga ang Manluluwas dili magbarog sa kataposan sa atong pagpangaplag ug yanong maghulat kanato nga moduol ngadto Kaniya. Hinuon, Siya mobarog tupad kanato ug motudlo sa dalan. Sa pagkatinuod, Siya mao ang dalan (tan-awa sa Juan 14:6). Si Presidente Nelson miingon, “Ang Manluluwas motabang nato sa pagbuntog sa mga tintasyon niini nga kalibotan pinaagi sa pagpanalangin nato og mas dako nga gugma nga putli, kamapainubsanon, kamanggihatagon, kamabination, disiplina sa kaugalingon, kalinaw, ug kapahulayan.”6
Ang Iyang Mga Saad Matuman
Mapasalamaton ko alang sa akong segurado nga kahibalo nga si Jesus mao ang Kristo. Siya ang atong Manluluwas, atong Manunubos, atong minahal nga Higala, ug atong Manlalaban. Sa tibuok nakong kinabuhi, nagkadako ang akong pagbati sa Iyang gugma ug sa katinuod nga Siya buhi. Ako magpamatuod nga ang pagkaila ug paghigugma Kaniya usa ka sagrado nga kahigayonan sa mortalidad.
Kon kita moduol ngadto ni Jesukristo, Siya nagsaad kanato og kapasayloan sa atong mga sala, usa ka “bag-ong kinabuhi” (Mga Taga-Roma 6:4), ug “pahulay alang sa [atong] mga kalag” (Mateo 11:29). Sa kataposan, Siya nagsaad kanato og kinabuhing dayon uban Kaniya, sa Iyang Amahan, sa Iyang mapahinungoron nga mga disipulo, ug sa atong matarong nga mga sakop sa pamilya sa kahangtoran.
Sa usa ka umaabot nga adlaw, kita moluhod diha sa Iyang tiilan. Nianang adlawa ang atong mga kalag magmaya sa dihang Siya motuman sa tanan Niyang mga saad ngadto niadtong kinsa miduol ngadto Kaniya uban sa “hingpit nga katuyoan sa kasingkasing” (3 Nephi 18:32), milambo sa ilang gugma alang Kaniya, ug nagtinguha sa pagbati sa Iyang balaanong presensya sa tibuok nilang mga kinabuhi.
Kini mahimong ang labing balaan, labing mahinungdanon nga higayon sa atong espirituhanon nga panaw!