Unom ka Rason aron Magpabiling Malaomon alang sa Malipayong Kaminyoon

Ni Brittany Beattie

Mga Magasin sa Simbahan

Kita aduna sa tanang rason aron magpadayon sa pagpaningkamot ngadto sa mahangtorong kaminyoon ug pamilya.

Imahe

magtiayon nga nanglingkod sa sopa ug nagpahiyom sa usag usa

“Isip mga miyembro sa Ang Simbahan ni Jesukristo sa mga Santos sa Ulahing mga Adlaw,” mitudlo si Elder Richard J. Maynes sa dihang usa pa siya ka sakop sa Seventy, “kita nakasabot ug nagtuo sa mahangtoron nga kinaiyahan sa pamilya. Kini nga panabot ug pagtuo kinahanglang modasig kanato sa pagbuhat sa tanan kutob sa atong mahimo sa pag-establisar og Kristohanong panimalay.”¹ Unya unsay mahitabo kon kita:

makasinati og (sayop) nga isulti sa uban ngari nato nga ang kaminyoon ug pagkaginikanan kinaraan na sa katilingban karon,
nga magsugod sa pagduhaduha bahin sa malipayong kaminyoon tungod sa kasinatian sa atong kaugalingong pamilya o pamilya sa uban,
nga mawad-an og paglaom dihang ang mga panalangin sa kaminyoon o pagbaton og mga anak dili moabot sa higayon nga kita naglaom?

Sa matag usa niini nga mga sitwasyon, makasalig kita sa kanindot sa mga kamatuoran sa ebanghelyo mahitungod sa kaminyoon ug pamilya. Makapadayon kita sa pagpakita sa atong hugot nga pagtuo ngadto sa Langitnong Amahan ug ni Jesukristo samtang kita “molaom sa mga butang diin dili makita, diin mga tinuod” (Alma 32:21; tan-awa usab sa Ether 12:6). Makatukod kita og lig-ong pundasyon diha sa mahangtorong mga kamatuoran mahitungod sa pamilya nga makapabilin natong makatutok sa atong mahangtorong mga tumong ug panglantaw. Pananglitan, ikonsiderar ang kalig-on, katuyoan, ug paglaom nga mahimong moabot gikan sa pagtuon ug paghangop niining unom ka baroganan (uban sa lain pa).

Ang Pamilya Mao ang Labing Mahinungdanon sa Plano sa Dios sa Kaluwasan ug Kahimayaan

Ang labing mahinungdanon sa pamahayag sa pamilya mao ang mga kamatuoran nga “ang kaminyoon tali sa usa ka lalaki ug usa ka babaye gi-orden sa Dios ug ang pamilya mahinungdanon sa plano sa Tiglalang alang sa walay kataposan nga destinasyon sa Iyang mga anak.”² Daghang kasulatan ang nagpahinumdom kanato sa kaimportante sa mga lalaki ug mga babaye nga maselyo isip bana ug asawa (tan-awa, pananglitan, sa Genesis 2:18; 1 Mga Taga-Corinto 11:11; 4 Nephi 1:11; Moises 3:18). Sa kaulahian, “Ang yuta gilalang ug kini nga Simbahan gipahiuli aron ang pamilya maporma, mabugkos, ug mahimaya sa kahangtoran,”³ mitudlo si Presidente Russell M. Nelson.

Si Presidente Nelson mipakigbahin usab kon nganong ang pagselyo sa templo importante kaayo:

“Ang kaminyoon tali sa usa ka lalaki ug usa ka babaye sagrado—ug gi-orden sa Dios [tan-awa sa Doktrina ug mga Pakigsaad 49:15–17]. Ako usab nga gipamatud-an ang hiyas sa kaminyoon sa templo. Mao kini ang labing taas ug labing malungtaron nga matang sa kaminyoon nga ikahatag sa atong Tiglalang ngadto sa Iyang mga anak.

“Samtang ang kaluwasan maoy usa ka indibidwal nga butang, ang kahimayaan mao ang usa ka butang nga may kalabotan sa pamilya. Kadto lamang kinsa naminyo didto sa templo ug kansang kaminyoon gibugkos pinaagi sa Balaan nga Espiritu sa Saad magpadayon isip mga kapikas human sa kamatayon [tan-awa sa Doktrina ug mga Pakigsaad 76:53; 132:7] ug makadawat sa labing taas nga ang-ang sa celestial nga himaya o kahimayaan.”⁴

Samtang nagtinguha kita sa pag-angkon ug pagtahod sa celestial nga kaminyoon, kita nag-uswag diha sa atong mahangtorong mga tahas ug sa makapahimaya nga mga pakigsaad.

Kaminyoon Usa ka Panag-uban sa Dios

Ang kaminyoon paspas nga makabalhin gikan sa pagbati og hilabihan ka bug-at ngadto sa pagbati sama sa dakong pribilehiyo ug oportunidad kon kita mahinumdom nga dili lang kini bahin sa lalaki ug babaye nga magkaubang nagmalamposon. Kondili, nagtinguha usab sila nga maglamaposon diha sa panag-uban sa Langitnong Amahan. Sama sa gitudlo ni Presidente Nelson: “Aron mahimong takos alang sa kinabuhing dayon, kinahanglan gayod kitang mohimo og usa ka mahangtoron ug walay kataposan nga pakigsaad uban sa atong Langitnong Amahan [tan-awa sa Doktrina ug mga Pakigsaad 132:19]. Nagpasabot kini nga ang kaminyoon sa templo dili lamang tali sa bana ug asawa; naglakip kini og pakigkumbuya uban sa Dios [tan-awa sa Mateo 19:6].”⁵ Ug kon kita anaa sa pagpanag-uban sa Dios, kita mapanalanginan nga maka-akses sa Iyang gahom aron sa pagpanalangin sa atong mga paningkamot kon kita makigtambag uban Kaniya.

Sama sa gitudlo ni Elder Ulisses Soares sa Korum sa Napulog Duha ka Apostoles: “Pinaagi sa pagpaselyo diha sa templo, ang babaye ug ang lalaki mosulod sa balaang kapunongan sa kaminyoon diha sa bag-o ug mahangtorong pakigsaad. Pinaagi niini nga kapunongan sa pagkapari, hatagan sila og mahangtorong mga panalangin ug balaanong gahom sa paggiya sa mga kalihokan sa ilang pamilya samtang sila magpuyo sumala sa mga pakigsaad nga ilang gihimo. Gikan nianang higayona, sila mopadayon nga mosalig sa usag usa ug sa hingpit nga panag-uban sa Ginoo, labi na kalabot sa ilang matag balaanong gisangon nga mga responsibilidad sa pag-amuma ug pagdumala diha sa ilang pamilya.”⁶

Kaminyoon ug Pamilya Makahatag og Hilabihan nga mga Kalipay ug mga Panalangin

Ang mga propeta namulong sa daghang higayon mahitungod sa mga panalangin nga moabot pinaagi sa mga pagselyo sa templo ug mahangtorong mga pamilya. Sama pananglit, mahatag niini nga matang sa kaminyoon ug pamilya:

“Ang tinubdan sa atong labihan nga kalipay”⁷
Ang usa ka “hingpit nga katumanan sa … mga panalangin … hapit molapas sa atong mortal nga salabotan”⁸
“Ang mahinungdanon nga bahin sa pagpangandam alang sa kinabuhing dayon”⁹
“Dakong mga kalagmitan alang sa kalipay kay sa ubang mga pakigrelasyon”¹⁰
“Ang sinugdanan sa katilingban, ang tinubdan sa pagkamaayo, ug ang pundasyon sa mahangtorong himaya”¹¹
“Ang usa ka gibahanding gasa gikan sa langit”¹²
“Ang pinakanindot ug pinakatam-is nga emosyon sa tanan”¹³
“Ang labing importante nga trabaho sa Ginoo nga mabuhat gayod ninyo”¹⁴
“Ang pinakabahandi sa yuta ug sa langit”¹⁵
“Ang kinadak-ang mga panalangin”¹⁶
“Ang labing importanting hinungdan sa atong kinabuhi. … Kon atong igahin ang atong kaugalingon niini nga hinungdan, molambo ang matag aspeto sa atong kinabuhi ug mamahimong ehemplo ug kahayag sa tanang tawo sa yuta, isip katawhan ug isip simbahan.”¹⁷
“Ang usa ka sagrado nga pribilehiyo nga motudlo [kanila] nga mahimong mas mahisama sa Dios”¹⁸
“Ang tinubdan sa atong mahangtorong pag-uswag ug kalipay ug sa pagmando sa atong Langitnong Amahan”¹⁹
“Ang usa ka mahigugmaon, mahangtoron, ug hingpit nga relasyon”²⁰
“Ang usa ka tinubdan sa walay sama nga katagbawan, gani hingpit nga kalipay”²¹
“Ang talagsaong panalangin sa mga anak ug sa kalipay nga ilang madalit kanato niining kinabuhia ug sa kahangtoran”²²
“Ang usa ka tinuod ug patas nga panag-uban”²³
“Ang pagkahiusa nga gitudlo sa Manluluwas”²⁴
“Ang dugang nga kalipay diha sa atong panaw ngadto sa kinabuhing dayon”²⁵
“Ang atong kapasidad sa pagserbisyo sa usag usa ug uban sa usag usa molambo gayod”²⁶
Ang mahimong “hilabihan ka malipayon sa kahangtoran ”²⁷
“Ang mas dakong kalipay ug katumanan diha sa pagkamortal”²⁸
“Ang usa sa balaanong mga kalipay sa kinabuhi.”²⁹
Ang usa ka “magantihon” ug “talagsaon” nga kasinatian³⁰
Nga magiyahan sa “Ginoo … sa tanan [nga]… makapatubo nga kasinatian nga magkauban”³¹
“Ang usa ka sulundon nga kahimtang alang sa pagbuntog sa bisan unsa nga kalagmitan sa pagkahakog o paghunahuna sa kaugalingon”³²
“Ang oportunidad alang sa labing nindot nga kasinatan sa gugma ug pagpangandam alang sa mabungahong kinabuhi”³³
“Ang ideyal nga kahimtang diin sila makatuman sa ilang mga pakigsaad ngadto sa Dios”³⁴
“Ang kaaway … dili gayod makabaton og gahom sa pagpahuyang sa pundasyon sa ilang mahangtorong panag-uban”³⁵
“Ang usa ka perlas nga bililhon kaayo, usa ka bahandi nga dili mapalit”³⁶
“Ang usa ka dalan nga balaanong giandam. … Walay laing relasyon nga makahatag og dakong kalipay, momugna og kaayo, o dakong personal nga kalamboan”³⁷
“Ang tinuod nga kalipay niining kinabuhia ug sa kahangtoran”³⁸

4. Ang Mga Pamilya Maghatag sa Labing Maayo nga Kahimtang alang sa Kalamposan

Dili lamang nga ang kaminyoon tali sa usa ka lalaki ug babaye maghatag og mahangtorong paglambo, apan maghatag usab kini og labing maayo nga kahimtang sa pagpadako sa mga anak ug pagpanalangin sa mga katilingban. Si Elder D. Todd Christofferson sa Korum sa Napulog Duha ka Apostoles mitudlo: “Ang pamilya nga gitukod diha sa kaminyoon sa lalaki ug babaye nagsangkap sa labing maayo nga kahimtang aron ang plano sa Dios molambo—ang kahimtang alang sa pagkahimugso sa mga anak, nga moabot diha sa kaputli ug kainosente gikan sa Dios, ug ang palibot alang sa pagkat-on ug pagpangandam nga ilang gikinahanglan sa malamposon nga mortal nga kinabuhi ug kinabuhing dayon sa kalibotan nga moabot. Ang labing minos nga gidaghanon sa mga pamilya nga gitukod sa ingon nga kaminyoon importante aron ang mga katilingban matunhay ug molambo. Mao kana kon nganong ang mga komunidad ug kanasoran miawhag ug nanalipod sa kaminyoon ug sa pamilya isip dunay pribilehiyo nga mga institusyon. Dili lang kini bahin sa gugma ug kalipay sa mga hamtong.”³⁹

Si Presidente M. Russell Ballard, Akting nga Presidente sa Korum sa Napulog Duha ka Apostoles, mitudlo usab:

“Kon ang mga tawo mohimo sa pamilya ug relihiyosong mga pasalig ngadto sa mga baroganan sa ebanghelyo, magsugod sila sa pagkahimong mas malamboon sa espiritwal ug sa temporal usab.

“Ug, siyempre, ang tibuok katilingban malig-on kon ang mga pamilya magkalig-on. Ang mga pasalig sa pamilya ug sa hiyas maoy nag-una nga hinungdan. Hapit tanang uban pang butang mao ang epekto. Kon ang magtiayon magminyo ug mohimo’g mga pasalig sa usag-usa, mas dako ang kahigayonan sa mas malamboong panginabuhi. Kon ang mga anak natawo sulod sa kaminyoon ug dunay mama ug papa, ang ilang kahigayonan sa kalamposan mosulbong. Kon ang pamilya magtinabangay, ang kasilinganan ug komunidad molambo, ang ekonomiya mouswag, ang programa sa gobyerno sa pagtabang sa mga kabos dili na kaayo kinahanglanon.”⁴⁰

5. Makausab Kita sa mga Naandan sa Pamilya

Bisan kon kamo gikan sa usa ka panimalay nga ang gugma ug panag-uyon dili mao ang basehan sa kaminyoon, hinumdomi nga makamugna kamo og nakasentro kang Kristo nga kahimtang diha sa inyong panimalay. Si Elder Christofferson mitudlo nga “mamahimo kamong henerasyon, tingali ang una sa inyong pamilya, diin ang balaanong mga sumbanan nga giorden sa Dios alang sa mga pamilya tinuoray nga mamugna ug mopanalangin sa tanan nga nagsunod ninyo nga mga kaliwatan.”⁴¹

Ug sama sa mga tambag diha sa Alang sa Kalig-on sa mga Kabatan-onan: Usa ka Giya sa Paghimo og mga Pagpili: Hinumdomi nga “ang inyong Manluluwas nasayod sa inyong sitwasyon, ug Siya nahigugma kaninyo. Pagmapailobon, padayon sa pagsunod sa mga sugo sa Dios, ug pagmahimong usa ka maayo nga ehemplo ngadto sa inyong pamilya. Pag-ugmad og mga relasyon diha sa inyong pamilya sa ward. Pangandam karon sa pag-ugmad og inyong kaugalingon nga pamilya nga gipasikad sa mga pagtulon-an ni Jesukristo.”⁴²

Makakuha kita og dakong kahupayan pinaagi sa pagkahibalo nga ang Ginoo mogiya nato sa atong matarong nga mga tinguha alang sa lig-ong kaminyoon ug Siya mohatag og mga kapanguhaan ug kalig-on nga atong gikinahanglan aron makamugna og “kalipay diha sa kinabuhi sa pamilya,”⁴³ bisan kon dili kini maoy atong nasinati sa miagi.

6. Makasalig Kita sa Gisaad nga mga Panalangin nga Moabot

Bisan niadtong mga naningkamot alang sa mahangtorong pamilya, dili tanan ang makadawat niana nga panalangin niini nga kinabuhi. Apan makakuha kita og kahupayan niini nga saad gikan ni Presidente Nelson, diin ang baroganan gitudlo usab sa daghan pang mga propeta: “Nakita nako nga daghang hingkod nga miyembro sa Simbahan mga dili minyo. Dili tungod kay ila kining sayop, nag-inusara silang miatubang sa mga pagsulay sa kinabuhi. Mopahinumdom ko kanatong tanan, nga sa kaugalingong pamaagi ug panahon sa Ginoo, walay panalangin nga pagapugngan sa Iyang matinud-anong mga Santos.”⁴⁴

Samtang maghulat kita sa Ginoo alang niana nga mga panalangin, kita “magmalipayon sa pagbuhat sa tanan nga mga butang nga ubos sa atong gahom” ug unya “magmalinawon” ug“ makasaksi sa kaluwasan sa Dios, ug sa iyang mga bukton nga ipadayag” (Doktrina ug mga Pakigsaad 123:17). Ug makapangandam kita sa pagdawat sa labing mahinungdanong panalangin nga ihatag kanato—kahimayaan sa kinabuhi nga moabot.