ព័ត៌មានក្នុងស្រុក
ដំណើរនៃការសាងសង់ព្រះវិហារបរិសុទ្ធរបស់យើង
ដំណើររបស់ពួកយើងមកកាន់ព្រះរាជាណាចក្រកម្ពុជា បានចាប់ផ្ដើមនៅក្នុងទីក្រុងណៅវូ រដ្ឋអិលលីណោយ កាលពីឆ្នាំ ១៨៤១ ។
កាលខ្ញុំនៅតូច ជីដូនរបស់ខ្ញុំ បានប្រាប់ខ្ញុំជាញឹកញាប់អំពីដំណើររឿងជីតាទួតរបស់ខ្ញុំ ឈ្មោះ វិល្លាម វិតមែន ។ គាត់រស់នៅក្នុងក្រុង រ៉ាម៉ូស រដ្ឋអិលលីណោយ ជាក្រុងតូចមួយនៅជិតទីក្រុងណៅវូ ។ យ៉ូសែប ស្ម៊ីធបានសុំឲ្យគាត់លក់ចម្ការរបស់គាត់ដើម្បីទិញកញ្ចក់សម្រាប់ព្រះវិហារបរិសុទ្ធណៅវូ ។
ជីដូនរបស់ខ្ញុំបាននិយាយថា បន្ទាប់ពីលោកតា វិល្លាម បានលក់ចម្ការរបស់គាត់ហើយ គាត់បានប្រគល់ប្រាក់ទៅឲ្យសាសនាចក្រ គាត់ក៏បានទទួលការប្រសិទ្ធពរមួយ ដែលប្រាប់ថា កូនចៅរបស់គាត់ នឹងជាអ្នកសាងសង់ព្រះវិហារបរិសុទ្ធ ។
ជីតារបស់ខ្ញុំ គឺជាអ្នកសាងសង់ផ្នែកបំពង់ទឹក ដែលធ្វើការឲ្យព្រះវិហារបរិសុទ្ធជាច្រើននៅក្នុងជីវិតរបស់គាត់ ។
កូនប្រុសរបស់លោកម្នាក់ បានទៅទីក្រុងឡូសអាន់ជើឡេស រដ្ឋកាលីហ្វូញ៉ា ហើយកូនប្រុសម្នាក់ទៀតរបស់គាត់ បានទៅប្រទេស នូវ ហ្សឺលែន ដើម្បីជួយសាងសង់ព្រះវិហារបរិសុទ្ធទាំងនោះ ។
បន្ទាប់មក នៅឆ្នាំ ១៩៨១ កូនប្រុសម្នាក់ទៀតរបស់លោក និងឪពុករបស់ខ្ញុំ បានទទួលកិច្ចសន្យាដើម្បីសាងសង់ព្រះវិហារបរិសុទ្ធនៅសាម័រ និងតុងហ្គា ក្នុងពេលដំណាលគ្នា ។
ស្វាមីរបស់ខ្ញុំ ខេន និងខ្ញុំបាននាំកូនតូចៗទាំងបួននាក់របស់យើង និងបងប្រុសខ្ញុំទៅកាន់ ភេសេហ្គា សាម័រ ដើម្បីសាងសង់ព្រះវិហារបរិសុទ្ធទាំងនោះ ។ ខណៈដែលយើងនៅទីនោះ កូនប្រុសទីប្រាំរបស់យើងបានកើតមក ។ ខេន បានធ្វើដំណើរទៅតុងហ្គាជាញឹកញាប់ ពីព្រោះគាត់ជាអ្នកគ្រប់គ្រងគម្រោងព្រះវិហារបរិសុទ្ធទាំងពីរនោះ ។
ព្រះវិហារបរិសុទ្ធទាំងនោះ គឺជាព្រះវិហារបរិសុទ្ធទី ២២ និងទី ២៣ នៅក្នុងសាសនាចក្រ ។ ហើយវាជាចំណែកនៃការចាប់ផ្ដើមនាំព្រះវិហារបរិសុទ្ធទៅកាន់តែជិតនឹងពួកបរិសុទ្ធ ។ នេះគឺជាពរជ័យដ៏ធំមួយចំពោះសមាជិកជាច្រើនក្នុងសាសនាចក្រ ដែលពុំអាចមានលទ្ធភាពធ្វើដំណើរផ្លូវឆ្ងាយទៅកាន់ប្រទេសនូវហ្សឺលែន និងហាវ៉ៃ ដើម្បីទទួលពរជ័យព្រះវិហារបរិសុទ្ធរបស់ពួកគេ ។
ហើយរឿងនោះវាបានចាប់ផ្ដើមឲ្យមានបទពិសោធន៍នៃការផ្លាស់ប្ដូរជីវិត ដែលមានទាំងឧបសគ្គ ភាពលំបាក និងភាពស្រស់ស្អាត ក្នុងការសាងសង់ព្រះវិហារបរិសុទ្ធសម្រាប់គ្រួសាររបស់ពួកយើង ។
នៅឆ្នាំ ២០០៣ ព្រះវិហារបរិសុទ្ធសាម័រ ត្រូវបានបំផ្លាញដោយភ្លើង ខណៈដែលកំពុងធ្វើការជួសជុលកែលម្អ ។ យើងក៏មានពរជ័យដើម្បីត្រឡប់ទៅកាន់សាម័រជាលើកទីពីរដើម្បីសាងសង់ព្រះវិហារបរិសុទ្ធនោះឡើងវិញ ។
ដូចដែលប្រធានណិលសុន បានប្រកាសឲ្យមានព្រះវិហាបរិសុទ្ធកាន់តែច្រើននៅលើសាកលោក នោះពួកយើងក៏បានពិចារណាធ្វើការដាក់ពាក្យបម្រើបេសកកម្មពេញម៉ោងជាអ្នកផ្សព្វផ្សាយសាសនារៀមច្បង ។ នៅក្នុងសន្និសិទខែមេសា ឆ្នាំ ២០១៩ ព្រះវិហារបរិសុទ្ធត្រូវបានប្រកាសនៅក្នុងអាមេរិកកាំងសាម័រ និងនីអៃហ្វុ តុងហ្គា ។ ពួកយើងក៏រំភើបចិត្តចំពោះព្រះវិហារបរិសុទ្ធទីពីរដែលត្រូវសាងសង់ឡើងនៅក្នុងជាតិសាសន៍លើកោះទាំងនេះ ។
ដោយសារតែបទពិសោធន៍នៃការសាង់សង់ព្រះវិហារបរិសុទ្ធរបស់យើងនៅក្នុងប្រទេសទាំងនេះ នោះពួកយើងក៏បាននិយាយទៅកាន់ការិយាល័យគម្រោងពិសេស និងព្រះវិហារបរិសុទ្ធរបស់សាសនាចក្រ អំពីការទៅបេសកកម្មនៅក្នុងប្រទេសមួយនៃប្រទេសទាំងនេះ ធ្វើការនៅទីតាំងព្រះវិហារបរិសុទ្ធ ។ ពួកគេបានប្រាប់ពួកយើងថា ពួកគេនឹងពិចារណាអំពីរឿងនេះ ពេលព្រះវិហារបរិសុទ្ធទាំងនេះទៅដល់ដំណាក់កាលនោះនៅក្នុងគម្រោងរបស់ពួកគេ ។ ដូច្នេះយើងគួរតែរង់ចាំបន្ដិចសិន ។
នៅជិតចុងឆ្នាំ ២០២១ ទាំងព្រះវិហារបរិសុទ្ធតុងហ្គា និងសាម័រ បានធ្វើពិធីសម្ភោធបើកការដ្ឋានសាងសង់ ។ ការិយាល័យគម្រោងពិសេស និងព្រះវិហារបរិសុទ្ធរបស់សាសនាចក្រ បានប្រាប់យើងថា ដោយសារតែកូវីត-១៩ នោះសមាជិកក្នុងមូលដ្ឋាន ត្រូវបានហៅឲ្យបម្រើជាអ្នកផ្សព្វផ្សាយសាសនាសម្រាប់ទីតាំងទាំងនោះហើយ ។ ពួកយើងមានការសោកស្ដាយ និងខកចិត្តណាស់ ។
ក្រោយមក ពួកយើងក៏បានសម្រេចចិត្តដាក់ពាក្យបម្រើបេសកកម្មនៅលើគេហទំព័រសាសនាចក្រ ។ ពួកយើងបានផ្ញើរអ៊ីម៉ែលទៅកាន់ការិយាល័យគម្រោងពិសេស និងព្រះវិហារបរិសុទ្ធរបស់សាសនាចក្រ ដោយប្រាប់ពួកគេអំពីអ្វីដែលយើងបានសម្រេចចិត្ត ។ នៅថ្ងៃបន្ទាប់ ពួកយើងក៏បានទទួលទូរសព្ទថា ពួកគេពិតជាចង់ឲ្យពួកយើងបម្រើនៅទីតាំងព្រះវិហារបរិសុទ្ធមួយ ហើយមានព្រះវិហារបរិសុទ្ធជាច្រើន ។
ពួកយើងមានការប្រជុំមួយជាមួយនឹងអ្នកគ្រប់គ្រងមួយចំនួនមកពីការិយាល័យគម្រោងពិសេស និងព្រះវិហារបរិសុទ្ធរបស់សាសនាចក្រ ។ អ្នកគ្រប់គ្រងគម្រោងបានប្រាប់ពួកយើងថា ពួកគេចង់ផ្ដល់អនុសាសន៍ឲ្យពួកយើងបម្រើនៅទីតាំងព្រះវិហារបរិសុទ្ធភ្នំពេញ ព្រះរាជាណាចក្រកម្ពុជា ។
ប្រហែលជាបួនខែក្រោយមក ពួកយើងត្រូវបានទទួលការញែកចេញដើម្បីធ្វើដំណើរមកកាន់ព្រះរាជាណាចក្រកម្ពុជា ។ វាជាការអស្ចារ្យណាស់ ដែលព្រះវរបិតាសួគ៌បានអត់ធ្មត់ កាលដែលទ្រង់រៀបចំមនុស្សឲ្យធ្វើកិច្ចការងាររបស់ទ្រង់ ។
អែលឌើរ ប៊យ ខេ ផាកកឺ បានរៀបរាប់អំពីរឿងប្រៀបធៀបមួយ ដែលមានឥទ្ធិពលទៅលើរបៀបដែលយើងធ្វើការនៅទីនេះក្នុងព្រះរាជាណាចក្រកម្ពុជា ។ លោកមានប្រសាសន៍ថា « បុរសពាណិជ្ជករម្នាក់ដើរស្វែងរកទិញគ្រឿងអលង្ការដ៏មានតម្លៃ ក៏បានជួបនឹងគុជដ៏ល្អឥតខ្ចោះនៅទីបំផុត » ។ គាត់មានជាងដ៏ល្អឯកឆ្លាក់ប្រអប់គ្រឿងអលង្ការដ៏ប្រណិតមួយ ហើយបានដាក់ចងបូរខ្សែពណ៌ខៀវដ៏ស្រស់ស្អាត ។ គាត់បានដាក់គុជដ៏មានតម្លៃរបស់គាត់តាំង ដើម្បីអ្នកផ្សេងទៀតអាចឃើញពីរតនៈសម្បត្តិរបស់គាត់ ។ គាត់បានចាំមើល កាលដែលមនុស្សបានមកមើលវា ។ រំពេចនោះគាត់បានបែរមុខចេញ ដោយទឹកមុខក្រៀមក្រំ ។ មនុស្សទាំងនោះគេសរសើរទៅលើប្រអប់ ពុំមែនកោតសរសើរគុជនោះទេ » ។
តាមរយៈបទពិសោធន៍ជាច្រើនឆ្នាំដែលយើងមានក្នុងការសាងសង់ព្រះវិហារបរិសុទ្ធ នោះជាញឹកញាប់ យើងបានមើលឃើញអគារ ប្រៀបដូចជាប្រអប់ ដែលអែលឌើរ ផាកកឺ បានពិពណ៌នានោះ ។ ជាញឹកញាប់ ការផ្ដោតរបស់យើង គឺមើលផ្ដោតទៅលើក្បូរក្បាច់ចម្លាក់ ការរចនា មកពីបង្អួចឆ្លាក់ដ៏ស្រស់ស្អាត និងគ្រប់ចំណុចលម្អិតនៃគ្រឿងសង្ហារឹម ។ ឥឡូវ យើងបានដឹងថា អគារព្រះវិហារបរិសុទ្ធ គឺពុំមែនជាប្រអប់នោះទេ ប៉ុន្តែវាគឺជាផ្នែកមួយនៃគុជនោះ វាជាចំណែកនៃបទពិសោធន៍របស់បងប្អូន កាលបងប្អូនធ្វើសេចក្ដីសញ្ញានានាក្នុងព្រះវិហារបរិសុទ្ធ ។
ដូច្នេះអ្វីដែលយើងកំពុងធ្វើនៅក្នុងព្រះរាជាណាចក្រកម្ពុជា គឺពុំមែនគ្រាន់តែជាការសាងសង់អគារព្រះវិហារបរិសុទ្ធមួយនោះទេ ។ យើងក៏នៅទីនេះដើម្បីជួយស្ថាបនាមនុស្សចូលព្រះវិហារបរិសុទ្ធផងដែរ ។
យើងត្រូវបានស្នើរសុំដោយប្រធានស្ដេកឲ្យបំពាក់បំប៉នដល់គណៈប្រធានយុវជនយុវនារី ដើម្បីពួកគេអាចជួយពង្រឹងកម្មវិធីយុវវ័យវួដនីមួយៗរបស់ពួកគេ ។ នោះវានឹងជួយដល់យុវវ័យខិតមកកាន់តែជិតនឹងព្រះគ្រីស្ទ ដើម្បីពួកគេនឹងត្រៀមខ្លួនជាស្រេចចូលព្រះវិហារបរិសុទ្ធ ។
ប្រធានបេសកកម្ម បានសុំឲ្យពួកយើងទៅសួរសុខទុក្ខសមាជិកមិនសូវសកម្ម នៅក្នុងវួដដែលពួកយើងចូលរួម ។ នៅពេលពួកយើងទៅសួរសុខទុក្ខពួកគេជាមួយនឹងថ្នាក់ដឹកនាំវួដ ពួកយើងពុំគ្រាន់តែអញ្ជើញអ្នកដែលយើងទៅសួរសុខទុក្ខមកកាន់តែជិតព្រះគ្រីស្ទប៉ុណ្ណោះទេ ប៉ុន្តែពួកយើងជួយដល់ថ្នាក់ដឹកនាំវួដឲ្យយល់កាន់តែល្អប្រសើរអំពីពរជ័យនានាដែលកើតមានមកពីការផ្ដល់ការងារបម្រើទៅកាន់សមាជិកនៅក្នុងវួដរបស់ពួកគេផងដែរ ។ នោះវានឹងជួយពួកគេឲ្យត្រៀមខ្លួនជាស្រេចដើម្បីចូលព្រះវិហារបរិសុទ្ធ ។
យើងក៏និយាយទៅកាន់បុគ្គលម្នាក់ៗដែលយើងជួប ធ្វើការជាមួយនឹងអ្នកផ្សព្វផ្សាយសាសនាវ័យក្មេង និងជួនកាលផ្ដល់បទបង្ហាញជាមួយនឹងគោលដៅក្នុងការអញ្ជើញសមាជិកឲ្យមកកាន់តែខិតជិតព្រះយេស៊ូវគ្រីស្ទ ដើម្បីពួកគេនឹងរៀបចំខ្លួនបានកាន់តែល្អប្រសើរចូលក្នុងព្រះវិហារបរិសុទ្ធ នៅពេលដែលត្រូវបានឧទ្ទិសឆ្លងរួច ។
យើងក៏មានពរដើម្បីធ្វើការជាមួយនឹងប៊ីស្សព ដូ វីរៈ ផងដែរ ។ គាត់គឺជាអ្នកគ្រប់គ្រងទីតាំងការដ្ឋានព្រះវិហារបរិសុទ្ធសម្រាប់សាសនាចក្រ ។
យើងអធិស្ឋានជាមួយកម្មករធ្វើការនៅទីតាំងព្រះវិហារបរិសុទ្ធជារៀងរាល់ថ្ងៃក្នុងមួយសប្ដាហ៍ៗ ។ យើងអធិស្ឋានជាភាសាអង់គ្លេសចំនួនបួនថ្ងៃក្នុងមួយអាទិត្យ ។ កម្មករជាច្រើនពុំនិយាយភាសាយើងទេ ប៉ុន្តែយើងជឿថាព្រះវិញ្ញាណនឹងបង្រៀនពួកគេអំពីអ្វីដែលពួកគេចាំបាច់ត្រូវដឹង ។
យើងពុំអាចប្រាប់ព័ត៌មានសំខាន់ទៅសាធារណជនអំពីទីតាំងព្រះវិហារបរិសុទ្ធទេ ប៉ុន្តែមានបន្ទប់មួយដែលកម្មករអាចមក ហើយរៀនអំពីគោលបំណងនៃព្រះវិហារបរិសុទ្ធ—ថាអគារដែលពួកគាត់កំពុងធ្វើការសាងសង់នេះ គឺខុសពីអគារផ្សេងៗទៀតនៅក្នុងព្រះរាជាណាចក្រកម្ពុជា ។ អគារនេះគឺជាដំណាក់របស់ព្រះអម្ចាស់ ។
យើងប្រាស្រ័យទាក់ទងជាមួយនឹងកម្មករនៅទីតាំងនោះជាទៀងទាត់ ហើយថតរូបពួកគាត់ដើម្បីដាក់តាំងនៅលើជញ្ជាំង « អ្នកធ្វើការដ៏អស្ចារ្យរបស់យើង » ដែលនៅខាងក្រៅបន្ទប់ព័ត៌មានអំពីព្រះវិហារបរិសុទ្ធ ។
ពួកយើងស្រឡាញ់មនុស្សដែលយើងធ្វើការជាមួយ ហើយរៀនមកពីពួកគាត់ជារៀងរាល់ថ្ងៃ ។
ពួកយើងកត់ត្រាអំពីអ្វីដែលកើតឡើងអំឡុងពេលធ្វើការសាងសង់នេះ ។ ពួកយើងថតរូបយ៉ាងច្រើនជារៀងរាល់សប្ដាហ៍ ដើម្បីទុកជាឯកសារនូវផ្នែកជាក់លាក់អំពីកិច្ចការ កាលដែលវាកំពុងដំណើរការ ។ យើងថតរូបអំពីអ្វីៗដែលមានចំណាប់អារម្មណ៍ជាទូទៅនៅក្នុងការសាងសង់នេះ ។ ពួកយើងកត់ត្រាអំពីបទពិសោធន៍ជាពិសេស ដែលបង្ហាញអំពីព្រះហស្តរបស់ព្រះនៅក្នុងកិច្ចការ និងនៅក្នុងជីវិតរបស់យើង ។ ពួកយើងកំពុងប្រមូលផ្ដុំដំណើររឿងរបស់អ្នកដែលមានតួនាទីក្នុងផ្នែកមួយនៃប្រវត្តិសាស្ត្រសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយនៅក្នុងព្រះរាជាណាចក្រកម្ពុជា ។
នៅពេលការសាងសង់ត្រូវបញ្ចប់ នោះព្រះវិហារបរិសុទ្ធគឺត្រូវឧទ្ទិសឆ្លង ហើយសមាជិកសាសនាសចក្របានរៀបចំខ្លួនសម្រាប់ព្រះវិហារបរិសុទ្ធនេះ បន្ទាប់មកព្រះវិហារបរិសុទ្ធនេះនឹងក្លាយជាពរជ័យមួយចំពោះប្រទេសកម្ពុជា និងមនុស្សទាំងអស់ដែលរស់នៅទីនេះ ។
ព្រះវិហារបរិសុទ្ធនឹងជាពរជ័យដ៏ពិសេសចំពោះសមាជិកនៃសាសនាចក្រ ។ ប្រធានណិលសុន បានមានប្រសាសន៍ថា « ពិធីបរិសុទ្ធនៃព្រះវិហារបរិសុទ្ធ និងសេចក្ដីសញ្ញានានា ដែលអ្នកបានធ្វើនៅទីនោះ គឺជាគន្លឹះដើម្បីពង្រឹងដល់ជីវិតរបស់អ្នក អាពាហ៍ពិពាហ៍ និងគ្រួសាររបស់អញនក ហើយអ្នកមានលទ្ធភាពដើម្បីតស៊ូនឹងការវាយប្រហាររបស់មារសត្រូវ ។ ការថ្វាយបង្គំនៅក្នុងព្រះវិហារបរិសុទ្ធរបស់អ្នក និងការបម្រើរបស់អ្នកនៅទីនោះសម្រាប់ជីដូនជីតារបស់អ្នកនឹងប្រទានពរដល់អ្នកនូវវិវរណៈផ្ទាល់ខ្លួន និងភាពសុខសាន្ដកាន់តែច្រើន ហើយវានឹងពង្រឹងដល់ការតាំងចិត្តរបស់អ្នកដើម្បីស្ថិតនៅលើផ្លូវនៃសេចក្ដីសញ្ញា » ។
ពួកយើងថ្លែងទីបន្ទាល់ជាមួយនឹងប្រធានណិលសុនថា « ពេលមានការឧទ្ទិសឆ្លងព្រះវិហារបរិសុទ្ធថ្មីនីមួយៗ នោះមានព្រះចេស្ដារបស់ព្រះបន្ថែមទៀតកើតមាននៅក្នុងពិភពលោកនេះដើម្បីពង្រឹងយើង និងទប់ទល់រាល់កម្លាំងដ៏ខ្លាំងរបស់មារសត្រូវ » ។
ពួកយើងមានពរណាស់ដើម្បីមកនៅក្នុងព្រះរាជាណាចក្រកម្ពុជា ហើយធ្វើការនៅក្នុងទីតាំងព្រះវិហារបរិសុទ្ធជារៀងរាល់ថ្ងៃ ។ ពួកយើងស្រឡាញ់ព្រះយេស៊ូវគ្រីស្ទ ។ ពួកយើងស្រឡាញ់ព្រះវិហារបរិសុទ្ធ និងរៀបបដែលព្រះវិហារបរិសុទ្ធប្រទានពរដល់ពួកយើង គ្រួសាររបស់យើង និងមនុស្សគ្រប់រូបដែលនៅជុំវិញយើង៕