« ធនធានសម្រាប់យុវវ័យ និង កុមារ » លីអាហូណា ខែ កុម្ភៈ ឆ្នាំ ២០២៣ ។
សារលិខិត លីអាហូណា ប្រចាំ ខែ កុម្ភៈ ឆ្នាំ ២០២៣
ធនធានសម្រាប់យុវវ័យ និងកុមារ
ឪពុកម្តាយមានការទទួលខុសត្រូវជាចម្បងក្នុងការបង្រៀនដល់កូនៗរបស់ខ្លួនអំពីព្រះយេស៊ូវគ្រីស្ទ និងដំណឹងល្អរបស់ទ្រង់ ។ សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយមាន អង្គការ កម្មវិធី និងធនធានផ្សេងៗដើម្បីជួយឳពុកម្តាយនៅក្នុងកិច្ចខិតខំរបស់ពួកលោក ។ ឳពុកម្តាយ ថ្នាក់ដឹកនាំទាំងឡាយរបស់សាសនាចក្រ រួមជាមួយ និង មិត្តភក្តិអាចជួយកុមារ និងក្មេងៗទាំងអស់ចូលមករកព្រះគ្រីស្ទ ។
ថតរូបដោយ ប៊េន ចនសុន
អង្គការបឋមសិក្សា
អង្គការបឋមសិក្សាគឺជាអង្គការរបស់សាសនាចក្រសម្រាប់កុមារដែលមានអាយុចាប់ពី ១៨ ខែ ដល់ ១១ ឆ្នាំ ។ នៅក្នុងអង្គការបឋមសិក្សា កុមាររៀនអំពីព្រះយេស៊ូវគ្រីស្ទ និងដំណឹងល្អរបស់ទ្រង់ តាមរយៈមេរៀន តន្ត្រី និងសកម្មភាពនានា ។ អង្គការបឋមសិក្សាអាចជួយពួកគេឲ្យទទួលអារម្មណ៍នៃសេចក្ដីស្រឡាញ់របស់ព្រះចំពោះពួកគេបាន ។
កូរ៉ុមបព្វជិតភាពអើរ៉ុន និង ថ្នាក់យុវនារី
ចាប់ផ្តើមនៅខែមករា នៃឆ្នាំដែលពួកគេឈានដល់អាយុ ១២ ឆ្នាំ ពួកគេនិងផ្លាស់ពីអង្គការបឋមសិក្សាចូលទៅកូរ៉ុមបព្វជិតភាពអើរ៉ុន( សម្រាប់ក្មេងប្រុស ) ឬ ថ្នាក់យុវនារី ( សម្រាប់ក្មេងស្រី ) ។ នៅក្នុងកូរ៉ុម និងថ្នាក់របស់ពួកគេ យុវវ័យបន្តពង្រឹងទីបន្ទាល់របស់ពួកគេ និងបម្រើអ្នកដទៃ ។
កម្មវិធីកុមារ និងយុវវ័យ
នៅក្នុងយុវវ័យរបស់ទ្រង់ ព្រះយេស៊ូវគ្រីស្ទ « ប្រកបដោយប្រាជ្ញារឹតតែច្រើនឡើង ហើយជាទីគាប់ព្រះហឫទ័យដល់ព្រះ និងចិត្តមនុស្សផង » ( លូកា ២:៥២ ) ។ កម្មវិធីកុមារ និងយុវវ័យអាចជួយដល់សមាជិកនៃសាសនាចក្រក្មេងៗឲ្យធ្វើតាមគំរូរបស់ព្រះយេស៊ូវគ្រីស្ទ ។ ពួកគេរៀន និងរីកចម្រើននៅគ្រប់ផ្នែកនៃជីវិតរបស់ពួកគេ—ទាំងខាងវិញ្ញាណ ខាងសង្គម ខាងរូបកាយ និងខាងប្រាជ្ញា ។
ទស្សនាវដ្តីសាសនាចក្រ
ទស្សនាវដ្តីប្រិយមិត្ត ជាទស្សនាវដ្តីសាសនាចក្រសម្រាប់កុមារ ។ ដើម្បីកម្លាំងនៃយុវជន គឺជាទស្សនាវដ្ដីសម្រាប់តែយុវវ័យប៉ុណ្ណោះ ។ ទស្សនាវដ្ដីទាំងនេះរួមមានដំណើររឿង ការបង្រៀន និងសកម្មភាពនានា ដែលសរសេរជាពិសេសសម្រាប់កុមារ និងក្មេងជំទង់ ។
សៀវភៅណែនាំ ដើម្បីកម្លាំងនៃយុវជន
ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើសបង្រៀនយុវវ័យអំពីសេចក្តីពិតនៃដំណឹងល្អ ។ វាបង្រៀនពួកគេពីរបៀបធ្វើការសម្រេចចិត្តដែលនឹងជួយពួកគេដើរតាមព្រះយេស៊ូវគ្រីស្ទ ។ វាក៏រួមបញ្ចូលចម្លើយចំពោះសំណួរដែលយុវវ័យអាចមានអំពីរបៀបរស់នៅតាមដំណឹងល្អផងដែរ ។
បណ្ណាល័យដំណឹងល្អ
បណ្ណាល័យដំណឹងល្អមានធនធានឌីជីថលជាច្រើន រួមទាំងវីដេអូ តន្ត្រី ដំណើររឿងនៃព្រះគម្ពីរ និងសកម្មភាពនានា ។ វាក៏រួមបញ្ចូលធនធានដើម្បីជួយឳពុកម្តាយ និងថ្នាក់ដឹកនាំបង្រៀនគោលការណ៍ទាំងឡាយនៃដំណឹងល្អផងដែរ ។ ធនធានទាំងនេះមាននៅក្នុងបណ្ណាល័យដំណឹងល្អនៅលើគេហទំព័រ ChurchofJesusChrist.org និងនៅក្នុងកម្មវិធីបណ្ណាល័យដំណឹងល្អ ។
សន្និសីទ FSY
នៅក្នុងឆ្នាំដែលពួកគេចាប់ផ្តើមឈានដល់អាយុ ១៤ ឆ្នាំ នោះយុវវ័យត្រូវបានអញ្ជើញឲ្យចូលរួមសន្និសីទ ដើម្បីកម្លាំងនៃយុវជន ( FSY ) ។ ព្រឹត្តិការណ៍ទាំងនេះរួមមានសកម្មភាពនានា និងថ្នាក់រៀនដែលជួយពង្រឹងសេចក្តីជំនឿទៅលើព្រះយេស៊ូវគ្រីស្ទ និងជួយយុវជនឲ្យរីកចម្រើនខាងវិញ្ញាណ ខាងសង្គម ខាងរូបកាយ និងខាងប្រាជ្ញា ។
© ឆ្នាំ ២០២៣ ដោយ Intellectual Reserve, Inc. All rights reserved. បោះពុម្ពនៅ ស.រ.អា. ។ ការអនុម័តជាភាសាអង់គ្លេស ៖ ៦/១៩ ។ ការអនុម័តឲ្យបកប្រែ ៖ ៦/១៩ ។ ការបកប្រែនៃ Monthly Friend Message, February 2023 Language. 18910 258