Fa’a’āpīra’a i ni’a i te hi’opo’ara’a o te buka hīmene

I te ’āva’e Tiunu 2018, ’ua fa’aarahia te hō’ē hi’opo’ara’a o te buka hīmene a te ’Ēkālesia ’e te buka hīmene ’a te mau tamari’i, ’e tae noa atu i te hō’ē anira’a i te fa’a’itera’a a te mau melo nō ni’a i te pehe mo’a ’e te hō’ē pi’ira’a i te mau melo ’ia tu’u mai i te mau hīmene, ’e te mau paraparau ta’a ’e. Fātata e 50 000 ta’ata tei pāhono i te hō’ē tuatāpapara’a mana’o nō ni’a i tā tātou mau pehe mo’a. ’Ua fa’a’ite ato’a mai te feiā tei pāhono mai i tō rātou mau mana’o nō ni’a i te mau hīmene nō te tahi atu mau ha’apa’ora’a ’o tē ferurihia ra e tu’u i roto.

Hau atu i te 16 000 pehe i fa’ataehia mai nā roto mai i te mau melo nō te rahira’a e 66 fenua. Tē hi’opo’ahia nei teie mau hīmene e rave rahi taime nā te hō’ē pupu melo ’aravihi nō te ao nei, ’e nā te tōmite hi’opo’a i te pū fa’aterera’a o te ’Ēkālesia.

Tē māuruuru nei te mau tōmite i te mau melo nā te ao ato’a nei nō te hōro’ara’a mai i tō rātou taime ’e te tāreni nō te tauturu ia vetahi ’ē ’ia ha’afātata mai i te Fa’aora nā roto i te mau pehe mo’a Tē hi’opo’a-maita’i-hia nei te mau mea ato’a i fa’ataehia mai, nō reira, ’ua mana’ohia ē, e roa’a mai te mau buka ’āpī i roto i te mau matahiti e rave rahi.