Elder Brent H. Nielson
Peresidenira’a nō te Hitu ’Ahuru
Te hō’ē o te mau ha’api’ira’a faufa’a rahi tā Elder Brent H. Nielson i ha’api’i mai i muri a’e i tō te hō’ē melo o te ’utuāfare fa’aru’era’a i te ’Ēkālesia e rave rahi matahiti maori rā, e hina’aro te mau tamari’i ato’a a te Atua i te here o te Fa’aora ’e i te mana fa’aora o tāna Tāra’ehara.
’A tuatāpapa ai ’oia i te Luka 15 ’e tōna ’utuāfare i teie taime, ’ua fa’aro’o ’o Elder Nielson i te parabole nō te tamaiti puhura i roto i te hō’ē rāve’a ’āpī.
« Nō te tahi mau tumu, i mātau noa na vau i te fa’aau ia’u i te tamaiti tei fa’aea i te fare. I taua po’ipo’i ra, ’ua ’ite a’era vau ē, i roto i te tahi mau hi’ora’a, ’o vau te tamaiti puhura » tē nā reira ra ’oia. « ’Ua ’ere tātou pā’āto’a i te ha’amaita’i a te Atua ra (’a hi’o i te Roma 3:23). E hina’aro tātou pā’āto’a i te Tāra’ehara o te Fa’aora nō te fa’aora ia tātou. ’Ua mo’e tātou pā’āto’a, ’e ’ua titauhia ’ia itehia mai. »1
’Ua paturuhia ’o Elder Brent Hatch Nielson ’ei melo nō te Peresidenira’a o te mau Hitu ’Ahuru i te 3 nō ’Ātopa 2020, i muri mai i te ha’amāuruurura’a ’o Elder L. Whitney Clayton, tei hōro’ahia te ti’ara’a fa’atuha’ahia.
’Ua fānauhia ’o Elder Nielson i Burley, Idaho, i te fenua Marite, i te 8 nō Tītema 1954. ’Ei taure’are’a, ’ua tāvini ’oia i tāna misiōni rave tāmau i Finland. ’Ua fa’aipoipo ’oia ia Marcia Ann Bradford i te ’āva’e tiunu 1978 i roto i te hiero nō Roto Miti. E ono tamari’i tā rāua.
’Ua fāri’i ’o Elder Nielson i te hō’ē parau tū’ite anoihi na roto i te reo Peretane mai roto mai i te fare ha’api’ira’a tuatoru Brigham Young i te matahiti 1978. I te matahiti 1981 ’ua fāri’i ’oia i te hō’ē parau tū’ite taote i te fare ha’api’ira’a teitei nō Utaha. I muri iho ’ua rave ’oia i te ’ohipa ’ei pāruru ’e ’ei ’āpiti i roto i te hō’ē piha tōro’a nō te ture i Twin Falls, Idaho, i te fenua Marite, fātata e 30 matahiti.
’Ua tāvini ’o Elder Nielson ’ei tauturu i roto i te area nō Patifita ’e te area nō te fenua Philipino ’e ’ei peresideni ārea nō te rea nō te fenua Philipino. Mai te matahiti 2015 ē tae atu i te matahiti 2020, ’ua tāvini ’oia ’ei ti’a fa’atere nō te tuha’a fa’atere misiōnare.
Hou tōna pi’ira’a ’ei Hui Mana Fa’atere Rahi Hitu ’Ahuru i te ’āva’e ’Ēperēra 2009, ’ua tāvini ’oia ’ei peresideni nō te feiā ’āpī tamāroa nō te paroisa, ’ei ’ēpisekōpo, ’ei melo ’āpo’ora’a teitei, ’ei tauturu i roto i te peresidenira’a titi, ’ei peresideni titi, ’e ’ei Hitu ’Ahuru ārea roto i te ’ārea nō Idaho.