’Ua fa’aarahia te mau tauira’a nō te fa’aterera’a

I roto i te ’āmuira’a rahi nō ’Ātopa 2020, ’ua fa’aarahia te hō’ē melo ’āpī nō te Peresidenira’a o te mau Hitu ’Ahuru, hō’ē Hui Mana Fa’atere Rahi Hitu ’Ahuru ’āpī, hō’ē melo ’āpī nō te ’Ēpisekōpora’a Fa’atere Rahi, ’e e maha Hitu Ahuru Area ’āpī.

’Ua pāturuhia ’o Elder Brent H. Nielson ’ei melo nō te Peresidenira’a o te mau Hitu ’Ahuru, i muri a’e i te ha’amāuruuru-ra’a-hia ’o Elder L. Whitney Clayton, tei hōro’ahia te ti’ara’a fa’atuha’ahia. Tē tāvini nei ’o Elder Patrick Kearon i teienei ’ei peresideni matahiapo nō te Hitu ’Ahuru, te ti’ara’a tei mauhia na e Elder Clayton.

’Ua pāturuhia ’o Elder Dean M. Davies ’ei Hui Mana Fa’atere Rahi Hitu ’Ahuru, i muri a’e i tōna ha’amāuruuru-ra’a-hia ’ei tauturu hō’ē i roto i te ’Ēpisekōpora’a Fa’atere Rahi. ’Ua pāturuhia te ’Ēpisekopo W. Christopher Waddell nō te mono ia Elder Davies ’ei tauturu mātāmua i roto i te ’Ēpisekōpora’a Fa’atere Rahi, ’e te ’Ēpisekopo L. Todd Budge, tei ha’amāuruuruhia ’ei Hui Mana Fa’atere Rahi Hitu ’Ahuru, ’ua pāturuhia ïa ’ei tauturu piti (te ti’ara’a i mauhia e te ’Ēpisekopo Waddell).

’Ua ha’amāuruuru-ato’a-hia ’o Elder Enrique Falabella ’e ’o Elder Richard J. Maynes ’ei Hitu Ahuru Hui Mana Fa’atere Rahi, ’e ’ua hōro’ahia te ti’ara’a fa’atuha’ahia.

E ’itehia te mau parau fa’ata’a nō ni’a ia rātou ha’amata i ni’a i teie ’api. Ua fa’aara-ato’a-hia te ha’amāuruurura’a e 47 Hitu Ahuru Area ’e te mau pi’ira’a ’o na Hitu Ahuru Area e maha (’a hi’o ’api 30).