KOVID-19: Ol Mesej blong Soem Rod, Hiling mo Hop
Ol memba oli testifae se oli bin luk han blong Lod, iven long taem blong ol taem blong jenis, wari mo lus.
Hem I Bin Stap Wetem Mi long Tetaem ia; Hem I Stap Wetem Mi Naoia
Taem mi bin sidaon long hom mo traem blong mekem wari blong mi i go daon from ol samting we oli stap go raon long wol, mi openem jenol blong mi olbaot, mo foldaon long ol toktok ia: “I gat plante filing blong fraet blong girap evri dei long wol ia, be wetem fet long ol tijing blong gospel, yumi save putum wan leg i go fored long narawan i go. … Fet, oltaem i winim fraet.”
Mi bin save se mi jes kasem wan strong revelesen blong miwan mo we Papa long Heven i bin givim long mi tru long jenol blong miwan bakegen, tru long wan samting we mi bin raetem plante yia i pas. Mi bin gat blesing wetem wan smol taem blong pis, mo save ia se Papa long Heven i bin stap wetem mi long tetaem ia, mo Hem i stap stret wetem mi naoia.
Danette Gray, Yuta, YSA
Tabu Spirit I Save Wok Onlaen
Mi bin filim insperesen blong holem seminari klas tru long ol vidio grup jat. Tu dei bifo taon blong mifala i go long kwarantin, klas blong mifala i bin gat fas onlaen lesen.
Sam long ol papa mo mama tu oli joenem klas blong mifala, wetem olgeta we oli no memba. Mi holemtaet wota blong ae blong mi taem mifala i bin stadi long Mosaea, Japta 2 tugeta. Mifala evriwan i bin filim Spirit taem mifala i bin stap lanem se, blong stap givim seves long ol narawan, i blong givim seves tu long God. Mi bin lanem plante abaot fasin blong kasem mo luksave revelesen we i blong miwan. Tabu Spirit bae i soemaot trutok blong gospel long plante defren wei. I nomata long wanem i stap hapen long wol, i no gat wan samting we i save stopem wok blong Papa long Heven blong sevem ol pikinini blong Hem blong stap progres.
Marites Pineda, Mindanao, Filipin
Mifala I No Mestem Wan Dei blong Seminari
Iven wetem evri samting we i bin hapen wetem koronavaeres, !mi mi hapi blong talem se mifala i no bin mestem wan dei blong seminari! Blong tijim klas blong mi ova long vidio jat i givim samfala jalenj, mo mi lavem blong luk ol papa mo mama mo ol yang brata mo sista oli lisin long storian blong mifala. Mi laekem se i mekem se i givim wan taem blong mekem samting oltaem long famli, mo speseli mi lavem se mifala i save gohed blong testifae long wanwan long mifala abaot Jisas Kraes mo lav we Hem i gat long mifala.
Mandi Crandell, Yigo, Guam
Givim Seves long Olgeta long Tugeta Saed blong Vel
Mi bin stap givim seves olsem wan senia sista misinari long Misuri Indipendens Misin taem we oli bin kanselem ol miting blong Jos, mo mifala i stap blong sarem mifalawan long ol haos blong mifala. Mifala i yusum ol fon mo ol kompiuta blong save toktok long ol memba mo blong go toktok long olgeta we mifala i stap wok wetem, we oli no bin stap kam long jos oltaem.
Blong kipim mifala i bisi, mi bin disaed blong mekem sam famli histri, iven we, blong samfala taem, i bin had blong mi faenem sam niu nem. Taem we mi bin go insaed long FamilySearch, mi faenem wan notis abaot wan rekod we i stap wet blong mi joenem long histri blong mi. Wan rekod ia, i lidim mi blong faenem samples 70 pipol long laen blong mi. Afta long faef dei, ol nem we oli gogohed blong kam i bin stop. Afta sam taem long dei ia, mifala i bin faenem se mifala evriwan i save gobak hom. Mi mi no harem gud blong aot, be mi bin filim blesing ia se mi bin save givim seves long famli long narasaed blong vel long taem ia we i had.
Kim Nielson, Oregon, YSA
Stap Mekem Pat blong Yumi blong Mekem Wok blong Lod I Gohed
Taem we ol misinari long eria blong mifala oli kasem toktok blong stap long haos, mifala i bin traem blong mekem pat blong mifala, mo invaetem wan fren blong lan abaot Jos. Ol misinari oli bin serem ol lesen blong olgeta ova long telefon wetem fren blong mifala. Mifala i bin filim paoa blong Spirit long hom blong mifala from teknoloji we yumi gat tedei. I bin gud tumas blong luk wok blong Lod we i stap gohed iven wetem evri jalenj we i stap long wol ia.
Elaina Reich, Wasington, YSA
Sevya I Harem Singsing blong Yumi
Mi givim seves olsem wan Jos seves misinari wetem Pathway Connect program long Kyiv Yukren Stek. Ol lida blong program ia oli disaed blong trenem mifala evriwan we i stap lidim ol kam tugeta fes tu fes, blong mekem se bae mifala i save gat ol kam tugeta ia onlaen nomo. Long nekis dei nomo, gavman i anaonsem kwarantin long Kyiv.
Mi laekem janis blong kam tugeta blong mekem Pathway Connect. Mo mi laekem janis blong kam tugeta blong wosip mo singsing tugeta long hom long ol Sandei. Mi mi glad long stret save ia se, long ples we i gat tu o tri man i kam tugeta long hem, long nem blong Hem, Hem tu i stap long ples ia. I no gat wan i save se mifala i stap long kwarantin go kasem wetaem long Kyiv, be mifala i save se Sevya bae i harem ol singsing blong mifala.
Kateryna Serdyuk, Kyiv, Yukren
“Hem i Taem blong Tekem Famli blong Yu I Kambak”
Taem ol nius oli stat blong tokbaot KOVID-19, mi filim se oli mekem samting ia i go bigwan tumas. Afta, taem ol dei oli stap pas i go, mi stat blong mi no filim gud mo mi fraet abaot fiuja blong wol.
Wan moning, mi no save gobak slip, mo mi stap tingting hevi se, evri samting ia oli wanem. Afta, pis i kam. Spirit i tijim mi se Lod i bin givim wan presen long mi. “Hem i taem blong yu tekem famli blong yu i kambak,” Hem i talem.
Laef i save go bisi. Wol sik ia i givim wan janis long famli blong mifala blong lukluk nomo long wanem i impoten: gospel blong Jisas Kraes. Mi save draonem sam long ol posen paoa blong wol ia, mo lukluk nomo blong tijim ol pikinini blong mi blong lukluk i go long Kraes. Papa blong yumi long Heven i gat tingting long yumi oltaem. Mi filim hemia i moa bitim oltaem.
Mary Ostler, Nebraska, YSA
Lod I bin Mekem Yumi Rere from Hemia
Taem we long fas taem oli talem long mi se ol kam tugeta long Jos bae oli stop blong smol taem, mi bin harem nogud smol. Be naoia, mi save luk olsem wanem Lod i bin mekem yumi rere from hemia tru long ol profet blong Hem. Gospel stadi we i hapen long hom we i senta, i save helpem yumi tru long ol taem ia blong tes. Mi talem tangkyu tumas se mi save tekem mo kakae sakramen yet long ol Sandei mo save harem ol toktok blong ol profet. I givim kamfot blong save se, kasem taem we bae yumi kam tugeta long wan ples, bae yumi save filim semfala Spirit ia nomo.
Emma van As, Gauteng, Saot Afrika
Oli Bin Tijim Yumi Olsem Wanem blong Wosip
Taem we hasban blong mi mo mi i bin tekpat long odinens blong sakramen long hom blong mifala blong fas taem, mi bin filim Spirit i strong tumas we mi gat trabol blong singsing long hym we mifala i bin jusum. Long kolosap 70 yia we mifala i stap go long ol wosip seves, mi no tingbaot se mi stap laekem mo talem tangkyu bigwan blong ol blesing we mifala i bin kasem tru long membasip mo tekpat blong mifala long Jos Ia blong Jisas Kraes Ia blong Ol Lata-dei Sent.
Oli bin tijim yumi olsem wanem blong wosip, mo huia blong stap wosip long hem. Yes, yumi misim blong mit wetem ol narafala Sent mo bae yumi hapi blong gobak long ‘nomol’ laef kwiktaem, be mi mi glad from ol lesen we yumi stap lanem i stap taem we yumi stap folem kaonsel blong profet long wosip long hom se i senta mo Jos i sapotem.
Susan Preator, Montana, YSA
Stap Faenem Pis mo Yuniti
Blong gat haos naet i wan samting we boe blong mi mo mi i wet from evri wik. Mifala i stap gat ol memba, ol fren, mo ol misinari oli kam long haos plante taem. Afta, ol samting oli jenis bigwan from wol sik ia. Naoia, yumi gat haos naet wetem ol fren tru long telefon. Tru long ol taem we mifala i bin stap tugeta, mifala i bin save mekem plante samting we i bin tekem mifala i kam kolosap.
Mi mi talem tangkyu from wan dia profet, we i bin invaetem yumi evriwan blong livim kakae. Plante long yumi i bin save filim paoa blong yuniti mo pis tru long eksperiens ia. Long ol taem olsem, pis we yumi nidim i kam long Sevya Jisas Kraes.
Roshene McKenzie, Kingston, Jamaeka
God I Stap Kontrol
Mi bin statem misin blong mi jes tu mo haf manis i pas. Oli bin givim wok long mi blong givim seves long Hermosilo, Meksiko. Evri dei, mi bin gat janis blong mit wetem ol gudfala pipol we oli bin rere blong akseptem gospel ia we i kambak. Mi bin filim se hemia i jes stat blong mekem stamba tingting blong mi taem KOVID-19 i bin stopem misin blong mi.
I mekem mi harem nogud blong livim ol pipol ia we mi lavem tumas, be tu, mi bin filim bigfala pis mo sekiuriti from se mi save se God i stap kontrolem ol samting. Mi talem tangkyu we yumi gat wan profet mo Ol Aposol blong soem rod long yumi long tis taem. Olsem plante misinari long wol, mi mi gat tras se hemia bae i no en blong misin blong mi. I no longtaem, bae mi save help bakegen blong mekem wok blong Lod i go fored mo gohed blong stap wan tul long han blong Hem blong tekem moa sol i kam blong oli sakem sin.
Carolina Roman, Pueto Riko