Opening Mesej
Yumi mas lukaotem, long evri wei we yu save mekem, blong harem Jisas Kraes we i stap toktok long yumi tru long paoa mo givhan blong Tabu Spirit.
Ol brata mo sista we mi lavem. Taem mifala i stap welkamem yufala long histri Epril 2020 jeneral konfrens ia blong Jos Ia blong Jisas Kraes blong Ol Lata-dei Sent, from ol risen we yufala i save, !mi stap stanap long fored blong wan emti rum!
!Mi no bin save, taem mi bin promesem yufala long Oktoba 2019 jeneral konfrens, se bae Epril konfrens ia i wan “memori” mo bae yumi “no save fogetem,” mi no bin save se, blong toktok long wan grup blong pipol we i no kasem 10, bae i mekem se konfrens ia i wan memori mo bae mi nao mi no save fogetem! Be yet, save ia se yufala i stap tekpat long lektronik wei, mo naesfala singsing blong kwaea blong “Evri Ting i Gud wetem Sol blong Mi,” i stap givim kamfot long sol blong mi.
Olsem we yufala i save, sapos yumi evriwan i no stap long jeneral konfrens ia, i from pat blong yumi blong stap olsem ol gudfala wol sitisen, mo blong mekem evri samting blong stopem KOVID-19 blong i go olbaot. Vaeres ia, i mekem bigfala samting raon long wol. Hem i jenisim ol Jos miting blong yumi, misinari seves, mo tempol wok blong sot taem,.
I nomata we tedei yumi no stap tugeta from wan strong rabis vaeres, be insaed long ol tes blong laef blong yumi wanwan, i gat moa bitim wol sik ia. Ol tes blong fiuja oli save kamaot from wan aksiden, wan disasta, o wan harem nogud we yumi no ting long hem.
?Olsem wanem yumi stap strong tru long ol kaen tes ia? Lod i bin talem long yumi: “Sapos yufala i rere, bae yufala i no fraet” 1 I tru. Long laef ia, yumi save storem kaekae, wota mo mane i stap. Be wanem i impoten semmak, i nid ia blong fulumap stoahaos blong spirit blong yumi, wetem fet, trutok mo testemoni.
Stamba samting we yumi stap lukaot long laef, hem i blong rere blong mitim Meka blong yumi. Yumi mekem hemia evri dei blong kam moa olsem Sevya blong yumi, Jisas Kraes. 2 Mo yumi stap mekem hemia, taem yumi stap sakem sin, mo taem Hem i klinim, hilim mo mekem yumi kam strong moa wetem paoa. Afta long hemia nomo bae yumi filim pis mo glad we i stap, iven long ol trabol taem. From hemia nao Lod i bin askem strong long yumi blong stanap long ol tabu ples, mo “no mas muv.” 3
Long yia ia, yumi makem 200 yia blong wan long ol taem we i moa impoten long histri blong wol—we i taem we God Papa, mo Pikinini blong Hem we Hem I Lavem Tumas, Jisas Kraes, i kamkamaot long Josef Smit. Long visen ia we i hapen wan taem ia nomo, God Papa i poenem Jisas Kraes mo talem: “Hem, Hem i Pikinini blong Mi we Mi Lavem Tumas. !Lisin gud long Hem!” 4
Tok ia we God i givim long Josef, i blong wanwan long yumi. Yumi mas lukaotem, long evri wei we yu save mekem, blong harem Jisas Kraes we i stap toktok long yumi tru long paoa mo givhan blong Tabu Spirit.
Stamba tingting blong konfrens ia mo evri nara jeneral konfrens i blong helpem yumi blong harem Hem. Mifala i bin prea, mo stap invaetem yufala blong prea, se Spirit blong Lod bae i stap wetem yumi, we i plante we i plante, blong yufala i save harem ol mesej we Sevya i gat, speseli blong yu—ol mesej we bae i tekem pis i kam long sol blong yu. Ol mesej we bae oli hilim harem nogud blong yu. Ol mesej we bae oli givim moa laet long maen blong yu. Ol mesej we bae oli helpem yu save wanem blong mekem taem yu stap muv fored tru long ol taem blong tingting i fasfas mo tes.
Mifala i prea se konfrens ia, bae i wan memori mo bae yufala i no save fogetem from ol mesej we bae yufala i harem, ol spesel anaonsmen we bae oli talem, mo ol eksperiens we bae oli invaetem yufala blong tekpat long hem.
Eksampol, long en blong Sandei moning sesen, bae mifala i singaotem wan wol tabu asembli, mo bae mi lidim yufala long tabu Hosana Singsing. Mifala i prea se hemia bae i wan haelaet long spirit, blong yufala, taem yumi talemaot, long wan taem long ful wol, bigfala tangkyu blong yumi long God Papa mo Pikinini blong Hem we Hem I Lavem Tumas, taem bae yumi presem Tufala long wei ia we i no gat wan moa olsem we i semmak.
Long tabu eksperiens ia, bae yumi yusum ol klin waet hankijif. Be sapos yu no gat wan, bae yu save sakem han blong yu nomo. Long en blong Hosana Singsing, kongregesen bae i joenem kwaea blong singsing “Spirit olsem Faea” long Inglis. 5
Ol dia brata mo sista. !Konfrens ia bae i nambawan tumas! Long yia ia, bae i spesel bitim evri taem from bae yumi lukluk nomo mo plante long Sevya mo gospel we Hem i bin putumbak. Ol moa impoten samting we bae i stap afta long histri konfrens ia, bae i we hat blong yumi i jenis, mo bae yumi statem wan longfala wokbaot blong ful laef blong stap lisin gud long Hem.
!Welkam long Epril 2020 jeneral konfrens! Mi save se God, Papa blong yumi long Heven, wetem Pikinini blong Hem, Jisas Kraes, oli save gud long yumi. Bae Tufala i stap wetem yumi long tufala glori dei ia taem yumi stap lukaot blong kam kolosap moa long Tufala, mo stap ona long Tufala. Long tabu nem blong Jisas Kraes, amen.