Founga ʻe Fā ke Teuteu ai ki ʻEpeleli 2020

ʻE fakaʻilongaʻi ʻa e taʻu 2020 ko e fakamanatua ʻo e taʻu ʻe 200 ʻo e ʻUluaki Mata-Meʻa-Hā-Maí, ʻa ia naʻe hoko ʻi he faʻahitaʻu failau ʻo e 1820. Ko ia ai, ne fanongonongo ai ʻe Palesiteni Lāsolo M. Nalesoni ko e konifelenisi hono hoko ʻi ʻEpelelí “ʻe fakamanatua ai ʻa e ngaahi fakavaʻe moʻoni ʻo e ongoongolelei kuo fakafoki maí” (vakai, peesi 122).

Naʻá ne poupouʻi ʻa e mēmipa kotoa pē mo e fāmilí ke teuteu ki he “konifelenisi makehe” ko ʻení pea fokotuʻu ha ngaahi founga ʻe malava ke fai ai iá:

1. Toe lau ʻa e fakamatala ʻa Siosefa Sāmita ki he ʻUluaki Mata-Meʻa-Hā-Maí.

2. ʻI hoʻo ako ʻa e Haʻu, ʻo Muimui ʻIate Au ʻi he 2020, fakalaulauloto ki he ngaahi fehuʻi fekauʻaki mo e maʻu ʻa e ʻiló mo e ngaahi tāpuaki naʻe maʻu koeʻuhí ko e Tohi ʻa Molomoná.

3. Fakakaukau ke fakaʻaongaʻi ʻa e ngaahi vitiō foʻou ʻo e Tohi ʻa Molomoná ʻi he ako fakafoʻituitui mo fakafāmilí.

4. Fili hoʻo ngaahi fehuʻi pē ʻaʻau pea fokotuʻutuʻu hoʻo palani ke ke “fekumi fakamātoato ʻi he maama nāunauʻia ʻo hono Fakafoki Mai ʻo e Ongoongoleleí.”

Naʻe pehē ʻe Palesiteni Nalesoni, “ʻI hoʻo fai iá, he ʻikai ngata pē ʻi hono manatua fuoloa e konifelenisi lahi ʻi ʻEpelelí, ka ʻe fakangalongataʻa.”