Era Veiqaravi, Soqoni Vata, ka Veivakamacalataki na Marama

E rau a tuvanaka o Sister Jean B. Bingham, na Peresitedi Raraba ni iSoqosoqo ni Veivukei, kei Bonnie H. Cordon, na Peresitedi Raraba ni Goneyalewa, e vuqa na parokaramu ni Lotu ni nodra vukei na kawatamata raraba, me vakataka na wainigunu savasava, qaravi ni gone dramidrami, kei na cula ni itatarovi, vakakina na vuli ni Lotu kei na parokaramu ni vuli vola kei na wiliwili, ni rau bose vata kei ira na iliuliu ni veimatanitu ka ra qaravi ira na lewenilotu e Ghana, Nigeria, kei Ivory Coast (Côte d’Ivoire).

“Na inaki ni neitou veisiko o ya mera sotavi na Yalododonu, ka vakasalataki ira na marama, ka rogoca na veika era bolei kina, ka vakila na yalodra, ka vakaraitaka vei ira ni keitou lomani ira,” a kaya o Sister Bingham.

Era a lotu vata o Sister Bingham, Sister Cordon kei ira na daukaulotu ena Tabana ni Kaulotu e Ghana Accra West. Rau a laki sotavi ira talega e vica na lewenilotu ena nodra itikotiko. A vakaitavi o Sister Bingham ena dua na parokaramu vou ni vuli vola kei na wilika na ivolanikalou, era vakavulici kina na lewenivanua mera wilika ena gauna era vakavulici tiko kina ena kosipeli i Jisu Karisito. Rau a vakaitavi na marama oqo ena dua na vuli kaburaki ni veiliutaki e vakayacori tiko mai Accra, ka vakarogoi tiko yani ki na sivia e 100 na ivavakoso mai na Ra kei Aferika; ka rau sotava talega na wati Peresitedi kei Ghana kei Vunivola Tudei ni Minisitiri ni Veika ni Marama kei na Vukei ni Dravudravua ni Matanitu ni Vanua o Lagos mai Nigeria.

Ni oti na nodrau sotavi ira na marama mai Ivory Coast, a kaya o Sister Cordon, “E kurabuitaka na nodra vakabauta ka kila vinaka na Kalou, o cei o Koya kei na cava e rawa ni cakava o Koya ki na nodra bula.” A kaya o koya ni gauna e vakamacalataka tiko me na dua na valetabu e Abidjan, a tagi ena marau e dua na marama. “Keirau lesu ena rai vata tiko kei ira mai Aferika,” a kaya o Sister Cordon. “Keirau lesu ena yalo sa vakavoui.”

A solia yani o Sister Joy D. Jones, na Peresitedi Raraba ni Lalai, na ilavo a kumuni ena cakacaka ni Light the World ki na veivalenivolavola ni isoqosoqo ni loloma e Manhattan, New York, Amerika. “Eda rokova na iVakabula o Jisu Karisito ena noda veiqaravi,” e kaya o Sister Jones, ka raica na vinaka ni veika sa mai yaco “ena nodra sa kila na tamata na madigi kamica ni soli-ka.”

E Salt Lake City, Utah, Amerika, a laki solia o Sister Sharon Eubank, na iMatai ni Daunivakasala ena Mataveiliutaki Raraba ni iSoqosoqo ni Veivukei, e dua na ilavo a kumuni mai na “gacagaca ni soli-ka” ni Light the World ki na dua na baqe ni kakana, e dua na isoqosoqo ni loloma e vakarautaka na nodra qaravi na gonelalai, kei na dua na itikotiko ni senivalu. Oqo e dua ga na tiki ni $2.3 na milioni a kumuni mai na gacagaca o ya mai Arizona, New York, kei Utah, Amerika, kei Lodoni, Igiladi, kei Manila, Filipaini, ka veisoliyaki yani ki na veisoqosoqo ni loloma e vuravura raraba.