Mark L. Pace
Peresitedi Raraba ni Matawilivola ni Siga Tabu
Ena veivakatarogi sa tuvai tu me dua na veikacivii me veiqaravi vaka- Peresitedi Raraba vou ni Matawilivola ni Siga Tabu, a masu me solibula o Brother Mark L. Pace.
“Tamaqu Vakalomalagi, na cava ga ko ni solia vei au meu cakava, au na marau meu vakayacora,” a masulaka. “Mo ni kila niu sa soli au taucoko.”
E kaya o Brother Pace ni nona gagadre bibi ena nona veikacivi vou o ya me veivakalougatataki, veitokoni, ka vakayaloqaqataki ira na lewe ni Lotu. “Keitou vinakata me keitou solia na veika kece sa tu vei keitou,” a kaya o koya baleta na Mataveiliutaki Raraba vou ni Matawilivola ni Siga Tabu.
A sucu o Mark Leonard Pace enai 1 ni Janueri, 1957, mai Buenos Aires, Argentina, kivei Lorin Nelson kei Marylynn Haymore Pace. Ena gauna a dabe vakatulewa tiko kina o tamai Brother Pace ena Tabana ni Kaulotu e Argentina.
A sotava o Brother Pace o koya me na watina, o Anne Marie Langeland, ni rau se kalasi vata tiko ena ikarua ni itagede e Salt Lake City, Utah, Amerika. E muri, ni rau dui vuli ena koronivuli torocake duidui ena siti, rau a sota tale ena dua na itaviqaravi cokovata ni semineri. Rau a qai veivolavolai tiko ena vica na yabaki veitaravi ka tomani nona matavuvale o Anne ki Norway, ka laki dabe vakatulewa o tamana ena Tabana ni Kaulotu Norway Oslo, ena gauna a kaulotu tiko kina o Brother Pace ena Tabana ni Kaulotu e Spain Madrid. Rau a vakamau ena Valetabu e Salt Lake ena i ka 21 ni Noveba, 1978, ka rau itubutubu ni vitu na gone.
A qeretueti o Brother Pace ena koroi ni bejala ena bula vakailavo raraba mai na Univesiti e Utah ena 1980 kei na koroi cecere ni liutaki ni bisinisi mai na Harvard Business School ena 1982. Ni oti nona cakacaka vakalekaleka ena Price Waterhouse e New York City, a laki cakacaka ena Boyer Company e Salt Lake City, ka cakacaka ena vakatorocaketaki vakabisinisi na volitaki iyauqaqa mai na 1984 ki na 2012. Ni oti e tolu na yabaki ena vakailesilesi ni peresitedi ni Kaulotu e Spain Barcelona, a laki cakacaka ki na Gardner Company ena 2015, ena vakatorocaketaki ni iyauqaqa.
Ena gauna ni nona veikacivi vou, a veiqaravi tiko o Brother Pace vaka-Vitusagavulu ni iWasewase. Na nona veikacivi vaka-Lotu taumada e oka kina na daunivakasala ena mataveiliutaki ni iteki, lewe ni matabose e cake, bisopi, daunivakasala ena matabisopi, peresitedi ni kuoramu ni italatala qase, peresitedi ni cauravou ena tabanalevu, ka iLiuliu ni Sikauti.