Ua Taialaina e Peresitene Nelson le Ala
Ua fautuauina i tatou taitoatasi e Peresitene Russell M. Nelson ina ia agalelei atili, avea faapei o Keriso, ma faaleagaga ao tatou auauna atu i isi, ma ua ia setiina se faataitaiga o le uiga o lena mea i le ala ua ia auauna atu ai talu mai le konafesi aoao ua tuanai.
I se taimi faatoa mavae atu le konafesi aoao ia Aperila 2018, na malaga ai Peresitene Nelson faatasi ma lona faletua, o Wendy, ma Elder Jeffrey R. Holland o le Korama a Aposetolo e Toasefululua ma lona faletua, o Patricia, i Egelani, Isaraelu, Kenya, Zimbabwe, Initia, Taialani, Saina, ma Hawaii, ISA.
I malaga na sosoo ai, sa feiloai ai Peresitene Nelson ma tagata o le ekalesia, faifeautalai, taitai, ma uo o le Ekalesia i Kanata i sisifo, tutotonu, ma sasae; Seattle, Uosigitone, ISA; ma Ripapelika Tominiko—lea na umi se taimi na ia saunoa atu ai i le faaSipaniolo, o se uluai taimi lea ua tuuina atu ai e se Peresitene o le Ekalesia se lauga lautele i se gagana e ese mai le faaPeretania.
I sauniga ma i faeasaite, na aoao atu ai Peresitene Nelson e uiga i le igoa sa’o o le Ekalesia; faasoa atu le talalelei ma isi; faatauaina o le Tusi a Mamona; pe faapefea i le ola ai i le talalelei ona avea ma olaga sili atu ona lelei; pe faapefea ona avea le ala a Keriso ma auala o le olioli ma le fiafia, i le taimi nei ma i le faavavau; tatalo; aveaina o fale po o aiga o se malutaga mo le fanau; faaaogaina o le faitalia e faatoilalo ai faaosoosoga ma mulimuli i le Faaola; tausia o isi; ma saunia mo ma le mauaina o faamanuiaga lea e oo mai i le malumalu.
Na saunoa foi Peresitene ma Sister Nelson i se faigalotu mo le autalavou i le lalolagi atoa i le aso 3 Iuni, 2018, lea na saunoa ai Peresitene Nelson faapea ua mauaina e le autalavou o loo auai i le “autau a le Alii” ma fesoasoani e faapotopoto Isaraelu le avanoa e avea ai ma se “vaega o se mea sili ona tele, se mea sili ona maoae, mea sili ona malualii!” Na ia uunaia le autalavou ina ia o ese mai le faalagolago faifaipea i luga o ala faasalalau faaagafesootai, ositaulaga sina taimi i le Alii, fai se iloiloga maeaea o le olaga faatasi ai ma le Alii, tatalo i aso taitasi ina ia maua e fanau uma a le Atua le talalelei, ma avea ma se malamalama i le lalolagi.