2018
Mea na Faamamafa Mai mai le Konafesi Aoao Faaleafatausaga Lona 188
Novema 2018

Mea na Faamamafa Mai mai le Konafesi Aoao Faaleafatausaga Lona 188

Sa toe fofogaina mai foi ni suiga tetele i le konafesi aoao. E ui ua ese faasilasilaga i le taimi lenei, ae o faamoemoega i tua atu o i latou e tumau pea ona tutusa: Ua lagona e le perofeta a le Atua se naunautaiga e saunia i tatou mo le Toe Afio Mai Faalua o le Alii ma ua valaauliaina ai i tatou ia faamalosia lo tatou faatuatua i le Tama Faalelagi ma Lona Alo, o Iesu Keriso.

O nisi nei o nai valaaulia ma folafolaga taua ua faamamafaina mai e Peresitene Russell M. Nelson i le taimi o le konafesi.

Faapaiaina Atili o le Aiga

I lana malelega amata, sa fofogaina mai ai e Peresitene Nelson le manaomia o le faia o ni suiga i o tatou olaga ina ia avea o tatou aiga ma totonugalemu o le aoaoina o le talalelei. O le taimi lenei mo se Ekalesia e-faatotonugalemu-i-le-aiga, ma lagolagoina mea o loo tutupu i totonu o faletapuai o a tatou paranesi, uarota, ma siteki.”

  • Faitau e uiga i suiga ua fautuaina mai i le aiga ma fetuunaiga i le lotu lea e lagolagoina i latou (tagai i le itulau e 8).

  • Saili ni faamatalaga faaopoopo i le “Ua Fesoasoani Suiga e Faapaleni Aoaoga o le Talalelei i le Aiga ma i le Ekalesia” (itulau 117).

“Tuuese le Lalolagi”

Na valaaulia e Peresitene Nelson ia tuafafine i le sauniga aoao a tamaitai ia auai i le “faamoemoega silisili … i luga o le lalolagi i lenei vaitaimi.” Na Ia folafola mai, “E mafai ona tatou faia faatasi mea uma ua manaomia mai e lo tatou Tama Faalelagi tatou te faia e saunia ai le lalolagi mo le Afio Mai Faalua o [Iesu Keriso].”

  • Faitau i valaaulia e fa a Peresitene Nelson i tuafafine (tagai i le itulau e 68).

“Toefuatai le Igoa Sa’o o le Ekalesia a le Alii”

Na valaau mai Peresitene Nelson i tagata o le ekalesia ia ta’ua le Ekalesia a le Faaola i le igoa na tuuina atu i ai e le Faaola. “Ou te folafola atu afai o le a tatou faia le mea sili tatou te mafaia e toefuatai ai le igoa sa’o o le Ekalesia a le Alii, o le a liligi mai e Ia o le e ana le Ekalesia Lona mana i lalo ma faamanuiaga i luga o ulu o le Au Paia o Aso e Gata Ai, i auala tatou te lei vaaia lava.”

  • Faitau i faatonuga a Peresitene Nelson i le igoa o le Ekalesia (tagai i le itulau e 87).

“Ia i ai i totonu o Lona Maota Paia”

Na faaiu e Peresitene Nelson le konafesi i le fofogaina mai o malumalu fou e 12 ma se valaaulia ina ia “i ai soo i totonu o Lona maota paia.” Na ia saunoa mai, “Ou te folafola atu ia te outou o le a aumai e le Alii ni vavega ua Ia silafia tou te manaomiaina a o outou faia ni osigataulaga e auauna atu ma tapuai atu i totonu o Ona malumalu.”

  • Tagai po o fea o le a fausia ai malumalu na fofogaina mai (tagai i itulau e 113, 116).