O Malaga Faapaionia e Tolu o Onapo Nei
E alala le tusitala i Iuta, ISA.
E toatolu talavou matutua ua faasoa maia a latou tala o le auai i le Ekalesia ma fatuina se talatuu o le faatuatua mo i latou lava ma o latou aiga.
A o ou auauna atu i la’u misiona i Melepone, Ausetalia, sa ou i ai i se uarota sa faia mo tamaiti aoga faavaomalo. Ina ua latou aoao e uiga i paionia i le Aoga Sa, sa ou tomanatu i le mata’ina o i latou—sa toetoe lava o tagata liliu mai i latou uma, ma sa leai ma se tasi sa i ai se tuaa na asaina laufanua valevalenoa o Amerika i Matu.
O le mea na faateia ai, o le toatele o tamaiti aoga faavaomalo sa faagaeetiaina i tala na faasoaina. Sa ta’ua e nisi o i latou le auala na fesootai atu ai i latou i uluai Au Paia i se tulaga patino: e pei foi lava o paionia, o nei tamaiti aoga faavaomalo o ni tagata fou liliu mai ma sa faia ni osigataulaga e faatu ai le Ekalesia i eria na latou ola ae ai. Mo nisi o nei tagata o le ekalesia, a le toalaiti le Ekalesia ia pe sa leai foi i o latou nuu moni. O i latou o paionia o onapo nei, o loo mamanuina se talatuu faalelotu fou mo tupulaga o lumanai.
O ni aafiaga se tolu nei mai tagata liliu mai ua auai i tulaga o paionia o onapo nei.
Faamamaluina o Lo’u Aiga i ni Auala Fou
Nami Chan, Taoyuan, Taiuani
O lo’u aiga ma le toatele o le matou aiga lautele i Taiuani o tagata Puta (Buddhist). A o ou talavou, ou te manatua le fesoasoani ai e saunia taulaga mo tuaa ma atua e tele i le Tausaga Fou a Saina ma isi aso malolo. O se tumasani faaleaiga mo i matou, faapea ai foi ma se auala e faamanatu ai o matou tuaa ma aumai ai le filemu ma le manuia i lo’u aiga.
Ina ua auai nisi o lo’u aiga i se lotu Kerisiano tutoatasi, sa leai lava se aafiaga i lo’u aiga i le taimi muamua. Ae i le taimi o le aso faamanatu o le Ching Ming Festival, pe a outou tapuai i tuaa ma susunu mea manogi i o latou tuugamau, na mumusu o’u aiga Kerisiano e auai ai. Sa latou fai mai ua latou tuuto atu e mulimuli i Poloaiga e Sefulu, aemaise lava le “Aua ne’i e fai mo oe ni atua ese i o’u luma” (Esoto 20:3). Sa lei talanoaina lava e lo’u aiga nisi lava talitonuga muamua, ae talu mai lena aso, sa avea le FaaKerisiano ma faatusa o le faafanoga o tumasani i mata o lo’u aiga ma sa vaaia i se malamalama le lelei.
A o ou auai i se iunivesite, sa ou feiloai i ni faifeautalai Mamona i luga o le alatele. O le mea masani lava, ou te le fiafia i mea la te ta’u mai, ae o nisi o aafiaga sa saunia ai lo’u loto e talia le la savali. A o feiloai ai ma i laua, sa ou malie e tatalo ma faitau le Tusi a Mamona, ma sa ou amata atiaeina se molimau patino e uiga i mea sa aoaoina ai a’u. Ae, ona o lagona o o’u matua e tetee i le FaaKerisiano, sa ou le ta’uina ai ia i laua sa ou fia manao ina ia papatisoina. I le mavae ai o le tele o masina talu le feiloaiga muamua ma faifeautalai, sa i’u ai loa ina ou ta’uina i o’u matua lo’u manao ina ia papatisoina ma lo’u manao ia auauna atu i se misiona. Sa le fiafia i laua, ae sa ou iloa sa ou faia le filifiliga sa’o.
E leai ma ni o’u tuaa paionia, ae ou te lagona ua ou malamalama i lo latou ositaulaga. E faigata le lafoai o nisi tumasani ae faafeagai ma le itu tetee mai tagata o le aiga. E oo lava i lenei taimi, i le lima tausaga talu ona ou auai i le Ekalesia, i lea taimi na ou auauna ai i se misiona, e lei lagolagoina atoa lava e lo’u aiga la’u faaiuga, ae ua latou taliaina lava. O le auai i le Ekalesia ua faatagaina ai a’u e faamamalu lo’u aiga i ni auala fou, e ala i le faia o talafaasolopito o aiga ma le sailia o o’u tuua. O la’u molimau ia Iesu Keriso ma Lana Togiola ua fesoasoani ia te a’u i le foiaina o soo se feteenaiga matou te ono oo i ai ma lo’u aiga.
Mauaina o le Olioli mai le Talalelei
Harry Guan, Iuta, ISA
Sa ou ola a’e i Saina ma manatu ia te a’u o se Kerisiano, e ui i le mea moni e faapea sa ou lei alu lava i se lotu. Sa ou naunau i le Atua ma Iesu Keriso, ma sa ou mafaufau o le aoaoga faavae FaaKerisiano sa matua mafanafana lava.
Ina ua ou masii atu i le Iunaite Setete mo le kolisi, sa amata ona ou auai i se lotu Kerisiano tutoatasi. Ina ua mavae ni nai masina, sa ou faalogo e uiga i Le Ekalesia e Iesu Keriso o le Au Paia o Aso e Gata Ai mai nisi o uo o ē sa fuafua e auai i le Iunivesite o Polika Iaga. Sa ou fesili i ni nai tamaiti aoga i le lotu Kerisiano e uiga i le Au Paia o Aso e Gata Ai ma sa faateia ina ua latou lapataia ma le naunautai a’u ia taumamao ese mai le “Au Mamona.” Sa ou faalogo i le latou fautuaga i le taimi muamua, ae a o ou matamata i ala faaagafesootai pe tusa ma se vaiaso mulimuli ane, sa ou tau ai i se lauga a Elder Jeffrey R. Holland o le Korama a Aposetolo e Toasefululua. I lea lauga, na ia ta’ua ai o tagata o le Ekalesia e tatau ona faaaloalo i isi tapuaiga (tagai i le “Faith, Family, and Religious Freedom,” lds.org/prophets-and-apostles). A o ou faalogologo atu ia Elder Holland, sa ou lagona le mea lea ua ou iloaina nei o le Agaga ma filifili ai e manaomia ona ou aoao atili e uiga i le Ekalesia.
Sa i’u ina ou alu i le lotu ma mulimuli ane ai feiloai i faifeautalai. Sa ootia a’u i a la aoaoga, aemaise lava le ata o le faaolataga. Sa lei fiafia tele o’u matua ina ua ou filifili e papatisoina, ae sa laua taliaina ua lava lo’u matua e faia ai a’u lava ia faaiuga. Ina ua asiasi mai o’u matua matutua ia te a’u i Amerika i ni nai masina mulimuli ane, sa mafai ona ou aoaoina i laua e uiga i le talalelei. Sa la filifili uma ina ia papatisoina.
Ua aumai e le talalelei ia te a’u le tele o le olioli ma ua taitai atu ai a’u i le o le a avea ma a’u āvā. Ua tauia ai osigataulaga uma sa ao ona ou faia pe o le a faia.
Sauniaina o le Ala mo Tupulaga i le Lumanai
Brooke Kinikini, Hawaii, ISA
Sa ou auai i le Ekalesia ina ua 15 o’u tausaga, ae sa ou alu lava i le lotu ma atiaeina lo’u faatuatua ma le molimau talu ina ou tamaitiiti. E ui na o a’u le tagata o le ekalesia i lo’u aiga, ae sa alolofa a’u uo faamaoni ia te a’u ma taitai a’u e ala i a latou faataitaiga.
E le pei la o paionia anamua, sa ou le tau savali ma se taumafaiga tele e tulei se taavale tosolima e asaina laufanau valevalenoa aisā. O le mea moni, sa ou lei feagai ma le tele o ni faigata ina ua auai i le Ekalesia. Ae o le mea mautinoa, sa le toe fiauo mai nisi o a’u uo ma sa ao ona ou auai i le lotu na o a’u ma alu i le seminare na o a’u lava. Ae a ou mafaufau atu i le aafiaga na i ai ma faaauau ai i lo’u aiga, ou te iloa o se tasi lea o faaiuga aupito sili ua ou faia. O la’u faaiuga ina ia papatisoina, ina ia faamauina i le malumalu, ma ia tumau faamaoni i a’u feagaiga ua fatua’i ai se filifili o tuutuuga faifai pea o le a aafia lelei ai olaga o la’u fanau aulelei e toatolu, faapea ai foi ma tupulaga i le lumanai, ma faavavau.
O le avea ma se paionia e faatatau i le sauniaina o le ala mo isi. Ou te fiafia e manatu o se tasi o faamanuiaga e tele ua ou mauaina mo le avea ai ma se tagata faamaoni o le Ekalesia o le mafai lea ona ou fesoasoani e aumai isi ia Keriso. O se polokalama itiiti—e pei o le papatisoga o se teineitiiti 15 tausaga le matua i Maui, Hawaii, po o se tatalo faamaulalo a se tamaitiiti 14 tausaga le matua i se togavao—e mafai ona suia ai olaga o aiga i le tuanai, taimi nei, ma le lumanai.
O le faalagiga faaonapo nei o paionia ua le na o le faapolopoloina mo tagata liliu mai. A o tatou sailia e atiae se talatuu tumau o le faatuatua mo tupulaga i le lumanai, e mafai ona avea i tatou uma ma ni paionia.