Mataupu Faavae mo le Auaunaga

Aapa Atu ma le Agaalofa

A o e mulimuli i le faataitaiga a le Faaola o le agaalofa, o le a e iloa ai e mafai ona e faia se eseesega i olaga o isi.

Christ healing the blind

O Lou Faatuatua ua Faaatoatoaina Ai Oe [Your Faith Has Made You Whole], saunia e Jorge Cocco

O le agaalofa o le nofouta lea i mafatiaga o isi faatasi ai ma se manao ia faamāmā pe tuuitiitia. O se feagaiga e mulimuli i le Faaola o se feagaiga lea o le agaalofa e “tauave avega a le tasi” (Mosaea 18:8). O se tofiga e vaavaaia isi o se avanoa lea e auauna atu ai e pei ona faia e le Alii: faatasi ai ma le “[alofa] ma ia faatatau” (Iuta 1:22). Na poloai mai le Alii, “Ia agalelei ma alofa o le tasi i le tasi” (Sakaria 7:9).

O Le Agaalofa o le Faaola

Sa avea le agaalofa ma se uunaiga malosi i le galuega a le Faaola (tagai i le pa tulimanu: “O Se Faaola Agaalofa”). O lona agaalofa mo Ona uso a tagata na mafua ai Lona aapa atu ia i latou o siomiaina o Ia i le tele o taimi. O le iloaina o mea e manaomia ma manaoga o tagata, sa mafai ai ona Ia faamanuiaina i latou ma aoao atu i latou i auala ia na sili ona taua ia i latou. O le finagalo o le Faaola e sii ae i tatou i luga ae o o tatou mafatiaga na taitai atu ai i le galuega tupito o le agaalofa: o Lana Togiola mo agasala ma mafatiaga o tagata.

O lona gafatia e tali atu i manaoga o tagata o se mea lea e mafai ona tatou taumafai i ai ao tatou auauna atu. A o tatou ola amiotonu ma faalogo i musumusuga a le Agaga, o le a musuiaina i tatou ina ia aapa atu i ni auala anoa.

O La Tatou Feagaiga o le Agaalofa

E finagalo le Tama Faalelagi i Lana fanau ina ia agaalofa (tagai 1 Korinito 12:25–27). Ina ia avea ma soo moni, e tatau ona tatou atiinaeina ma faaali atu le agaalofa i isi, aemaise lava i na manaoga (MF&F 52:40).

O le tauave i o tatou luga o le suafa o Iesu Keriso e ala i la tatou feagaiga o le papatisoga, ua tatou molimau atu ai ua tatou naunau e faatino le agalelei. Na aoao mai Peresitene Henry B. Eyring, Fesoasoani Lua i le Au Peresitene Sili, o le meaalofa o le Agaga Paia e fesoasoani ia i tatou e faia lena mea: “O oe o se tagata o le feagaiga o le Ekalesia a Iesu Keriso. …

“O le mafuaaga lena e te maua ai se lagona o le fia manao ia fesoasoani atu i se tagata o loo tauivi e agai i luma a o mamafatu i se avega o le faanoanoa ma faigata. Na e folafola atu o le a e fesoasoani i le Alii ia faamāmāina a latou avega ma ia faamafanafanaina. Ua uma ona tuuina atu ia te oe le mana e fesoasoani ai e faamāmāina na avega pe a e mauaina le meaalofa o le Agaga Paia.”¹

Mo se faataitaiga, o se tuafafine i Rusia sa i ai se tulaga faigata o le aiga lea na taofia mai ai o ia mai le auai i le lotu mo le silia ma le tausaga. Sa aapa atu ma le agaalofa se isi tuafafine i le paranesi i Aso Sa uma i le valaau atu ia te ia e tau atu i ai lauga, lesona, valaauga o misiona, pepe fananau, ma isi talafou o le paranesi. Ina ua foia le tulaga faaleaiga o le tuafafine lea sa nofo i le fale, sa ia lagona le pei sa avea lava o ia ma se vaega o le paranesi ona o valaau faalevaiaso a lana uo.

Faamatalaga

1. Henry B. Eyring, “O Le Faamafanafana,” Liahona, Me 2015, 20.

E Fa Fautuaga mo le Atiinaeina o le Agaalofa

the good Samaritan

Alu ma Faia Foi Faapena [Go and Do Likewise: The Good Samaritan], saunia e Jorge Cocco

E ui o le agaalofa e masani lava ona faateleina pe a mavae ona tatou tofo i o tatou foi tofotofoga, e i ai ni mea e mafai ona tatou faia i le asō e atiinae ai le agaalofa. Mafaufau i ni auala e mafai ona e faaaoga ai nei mataupu faavae e fa.

• Tatalo mo lena mea. A o e ole atu i le Tama Faalelagi, o le a Ia tatalaina lou loto, ma “o le a e maua se lagona faamaoni o le manatu alofa mo le soifua manuia faavavau ma le fiafia o isi tagata” (Tala’i La’u Talalelei: O Se Taiala mo le Galuega Faafaifeautalai [2004], 126; tagai foi Moronae 7:48).

• Faataitai i ai. E mafai ona e faaalia le agaalofa e ala i le faalogo atu ma ia malamalama. Tuu oe i o latou tulaga ma mafaufau pe faapei o latou lagona. Afai e talafeagai i le tulaga ma le taimi, e mafai ona e ofo atu e faaitiitia o latou tiga, mafatiaga, po o faanoanoaga.

• Mulimuli i musumusuga. E mafai ona faaali mai e le Alii ia i tatou auala e faaalia ai le agaalofa lea atonu tatou te lei iloaina e i tatou lava. A e lagonaina se uunaiga mai le Agaga e fesoasoani atu i isi, aua le faatuai le faatinoina.

• Ia avea ma se uo patino. O le faaalia o le agaalofa e mafai ona faigofie e pei o le faaali atu o se fiafia moni i olaga o tagata. Aoao ia lelei le faalogo (tagai i le “Mataupu Faavae mo le Auaunaga: E Lima Mea e Fai e Tagata e Faalogo Lelei,” Liahona, Iuni 2018, 6–9). O le a faateleina lou alofa mo i latou, ma o le a faigofie atu ona iloaina auala e faaalia ai lena alofa.

Agaalofa

1. Tatalo

2. Faataitai

3. Uunaiga

4. Faauoga

O Se Faaola Agaalofa

Mafaufau e suesue nisi o mau nei e vaai ai pe na faapefea e le agaalofa o Iesu Keriso ona uunaia o Ia e faamalolo, faamanuia, ma aoao atu i latou o e na siomiaina o Ia i le taimi o Lana galuega: Mataio 9:35–38; 14:14; 18:27, 33; 20:30–34; Mareko 1:40–42; 5:19; 6:30–42; 9:22; Luka 7:13; 10:33; 15:20.

O mataupu faavae o le auaunaga ua faamoemoeina e fesoasoani ia i tatou e aoao e fetausia’i ai le tasi ma le isi—ae aua ne’i faasoaina atu o se savali. A o tatou iloaina i latou tatou te auauna atu i ai, o le a uunaia i tatou e le Agaga Paia ia iloa po o le a le savali latou te ono manaomiaina e faaopoopo atu i la tatou tausiga ma le agaalofa.