O le Fautuaga sa Ou Le’i Fia Faalogo I Ai
Taofia le igoa
Porto Alegre, Pasila
Atapue mai le Getty Images
Ina ua ma filifili ma lo’u toalua e amata le maua lava pisinisi, sa faigata lava le uluai tolu tausaga. Sa ma le maua se tupe mama ma pa’u atu ai i aitalafu. Sa ma galulue malolosi, ae o faafitauli le mafaufauina sa avea ai lena taimi ma taimi sili ona faigata o o ma olaga.
Sa oo ina faateleina le leaga ina ua oti lo’u tina faaletulafono i le aso na mavae ai le Kerisimasi ma i se vaiaso mulimuli ane, i le Afiafi a o lumanai ai le Tausaga Fou, sa matua ou ma’i lava. I lea taimi, sa leai ma se ma tupe, sa le toe i ai foi se ma taavale, ae o le mea sili ona leaga o mea uma, sa le toe maua le ma inisiua o le soifua maloloina.
Mulimuli ane, sa maua a’u i se ituaiga matautia o le kanesa sa atiaeina e le itiiti ifo ma le lima tausaga. Sa ogaoga lava ma na manaomia vave ai se taotoga. Sa utiuti lo’u taimi, ma sa leai se ma tupe mo le tausiga faafomai taugata sa ou manaomia.
Sa matou feiloai ma le ma epikopo ma talosaga i ai mo se fesoasoani. Sa ma faamalamalama atu i ai o lenei mea o se tulaga moni lava tau i le ola ma le oti. Sa popole le epikopo, ae sa ia ta’u mai ia i maua na ia lagona le uunaiga e faatalitali teisi lava a o lei tuuina maia se fesoasoaniga sei vaai pe i ai se isi auala e ono matala mai ia i maua. Sa ia faamautinoa mai afai e lava lo ma faatuatua, o le a saunia e le Alii se auala mo a’u e maua ai se fesoasoaniga sa ou manaomia.
O le taimi muamua, o le tali a le epikopo sa ou ita ma tiga ai. Sa ou lagona ua la tuulafoa’ia uma ma le Alii a’u. Ae sa i ai sa’u molimau o le talalelei, ma sa ou talitonu sa valaauina e le Atua le epikopo. E ui i lo’u lototiga, ae sa ou tatalo ina ia fesoasoani mai le Tama Faalelagi ia te a’u ia faaauau pea ona alofa atu, faaaloalo, ma lagolago lo’u epikopo. Ina ua ou tatalo mo lenei mea, sa faamafanafanaina a’u ma lagona o le a fesoasoani mai le Alii ia te a’u i se auala.
Sa ma agai i luma ma lo’u toalua i le faatuatua, ma sa ou mauaina suesuega faafomai sa manaomia ma faatulagaina ai lo’u taotoga, e ui i le leai o se ma tupe. O le aso a o lumanai ai lo’u taotoga, sa ma faatau ese atu ai le ma pisinisi mo se tau lelei lava, lea na mafai ai ona ma totogia uma a’u pili o le falemai.
Ua i’u nei ina manino mai le mafuaaga sa faatuai ai ona fesoasoani mai lo’u epikopo. Sa ia galue i musumusuga ina ia mafai ai mo a’u ona mauaina se aafiaga taua faaleagaga. O lena aafiaga na aoaoina a’u e faalagolago i le Faaola, e tusa lava pe foliga mai e tofotofoina ma taufaamatau le ala. Ou te faafetai mo le fautuaga sa ou le’i fia faalogo ai mai lo’u epikopo. Ua ou iloa nei o le Atua o se Atua o vavega ma Na te le tuulafoaiina lava i tatou.