Te Moan Tabati Bowi ni Kauntira

N te Moan Tabati ni katoa namwakaina, bowi n te kooram ao n te Bootaki n Aine aki raonaki ma te reirei ae karaoaki iroun te tia reirei. N onean mwiina, kooram n unimwaane ao beretitentii n te Bootaki n Aine ana kairi bowi ni kauntira. Inanon bowin kauntira n te moan Tabati, kooram n unimwaane ao te bootaki n aine ana uaia ni bootaki n reirei iaon taekan tabeia, reken aia tai, ao kakaewenako; reirei imarenaia man aia atatai aika nano ao bwaai ake a rinanona; ao ni bairei kawai ni karaoi iaon namakin ake a karekei man te Tamnei. A riai marooro aikai ni boboto iaon koroboki aika tabu aika kaineti ma aia reirei burabeti aika maiu.

Tiaki ni kabane bowi ni kauntira aika ana ti tebo. Aikai tabeua kairi ni buokiia beretitentii ni kaira te kauntira ae nakoraoi.

Imwain te bowi ni kauntira

Karaoia:

Kinai kainnano, taai, ao kakaewenako n te tabo.
Tataroakina rineakin atuun te reirei ae na maroroakinaki.
Kaoia kaain te kooram ke titita n te Bootaki n Aine bwa a na roko n tauraoi n tibwaua aia iango ao aia atatai.

Ko na aki:

Katauraoa te reirei.
Roko ma katokana ae onoti ke te babaire n aron karaoana n am iango.

N tain te bowi ni kauntira

Karaoia:

Kaoia membwa bwa ana tibwauai aia atatai ae a tia ni karekea ngke a iango ao ni babaire man aia bowi ake mai imwaina.
Kabwarabwara atuun te bowi ao kaungaia membwa bwa ana reitaki n reirei taekana, n ukoukori katokaia ao kairi man booki aika tabu, taeka mairouia burabeti, ao te Tamnei ae Raoiroi.
Babaire ao mwakuria te bwai ae maroroakinaki. A kona n ae babairei n te kurubu ke babaire ake a karaoi bon irouia n tatabemaniia.

Ko na aki:

Bwaina atiin te marooro.
Kataia n anai nanoia tabeman n am iango.
Maroroakin bwaai aika a tabu ke ni karabaaki taekaia.
Anga te reirei.
Kairoroia ni kabane n ira waakin te marooro.

Imwiin te bowi ni kauntira

Karaoia:

Rimwiin babaire ao mwakuri ake a tia ni karaoaki n tain te bowi ni kauntira.
Kakaai kawai ni kariniia naake aki kona n ira te bowi ibukin wewete ke bukina riki tabeua. Kariaia bwa ana atai babaire ake a tia ni karaoaki.
Anganiia membwa aia tai n tibwauai aia atatai ni bowi ake imwiina.

Atuun Reirei ibukin te Moan Tabati ni Boowi ni Kauntira

Iango ibukin atuun te reirei ae na maroakinaki man bowin te kauntira e kona n roko man aia bowi kain te beretitentii, bowi ni kauntira n te uoote, ana babaire te aono, iango aika a karekei mataniwi ngkana a ibuobuoki nakoia membwa, ao wirikiriki mairoun te Tamnei ae Raoiroi. Atuun reirei aika oti inano bon ti taian katautau. A kona mataniwi n atai kainnanoia tabeman ae a namakinna bwa ana taekinna.

Tera ae ti kona ni karaoia ni buokiia ake irarikira? (taraa Motiaea 23:18).
Ti na kanga ni karinani tabera man ae moan kakawaki?
Ti na kanga n tibwaua te euangkerio ma raoraora ao kain rarikira? (taraa Aramwa 17).
Ti na kanga ni kamanoira ao ara utu man bwaai n reitaki aika aki riai ao tamnei aika bubuaka?
Tera ae ti na karaoia n reireiniia ao ni kakorakoraia ara ataei ao kairake n ara uoote?
Ti na kanga ni katabeira riki nakon te mwakuri n rongorongon te utu ao te nebonebo n te tembora?
Ti na kanga ni karekea ana ibuobuoki te Uea ngkana ti ukoukori kaeka nakon ara titiraki n te euangkerio ao ni karaoa te atatai ae nano riki iaon te euangkerio?
Ti na kanga ni kakorakora ara koaua iroun te Uea ao Ana euangkerio ao ni buokiia ara utu bwa aonga ni kona ni bon waaki ma maiuia n tamnei?