Makahimo Kita og Mas Maayo, Bahin 2: Pagpangita sa Inyong Dapit diha sa Simbahan ni Jesukristo
Ang tagsulat nagpuyo sa Utah, USA.
Ayaw itugot nga ang uban makapugong ninyo sa pagtagamtam sa mga panalangin sa pagka-miyembro sa Simbahan ni Kristo.
Human sa walo ka tuig nga wala mosimba, si Paulo (tanang mga pangalan giusab) nakadawat og tubag sa telepono gikan sa iyang bishop didto sa Brazil nga nangutana kon kumusta na siya. Si Paulo dugay nang gustong mobalik, apan ang mga kabalaka nakapugong niya sa pag-apil sa tanang kalihokan. Unsaon niya sa paglikay sa pagkomparar sa iyang kaugalingon, nga single gihapon, ngadto sa mga minyo nga duna nay mga anak? Makakita ba siya og mga higala sa simbahan sa kadugay na nga wala siya mosimba, kon makakita man siya, unsa may ilang hunahuna kaniya? Mabati pa ba niya ang Espiritu sama sa panahon sa iyang pagkakabig ug misyon o aduna kahay igong pagtuo sa pagdawat og mga calling?
Usa ka bulan human sa tawag sa telepono, si Paulo nagtan-aw ni Presidente Dieter F. Uchtdorf, Ikaduhang Magtatambag sa Unang Kapangulohan, nga mihatag og pakigpulong sa komperensya nga gitawag og, “Dali, Pakig-uban Kanamo.”1 “Naigo ko pag-ayo niana nga pakigpulong,” nahinumdom siya, ug sa pipila ka semana nakita niya ang iyang kaugalingon nga naglingkod sa parkinganan sa simbahan, nagkurog ug nag-ampo sa hilom alang sa kalig-on sa paggawas gikan sa sakyanan ug mosulod sa building.
“Dili perpekto ang tanan,” nahinumdom siya sa iyang unang tuig human mobalik. Dili sayon nga mahisama. Apan ang pagbati nga nakakonektar sa Manluluwas ug ang dakong tinguha sa rekomend sa templo nakatabang niya sa pagbuntog sa iyang mga kabalaka. Nagsugod siya og basa sa iyang mga kasulatan ug nag-ampo pag-usab. “Kon dili mohunong, makaangkon ka og kalig-on ug mabati ang panalangin sa Ginoo kanimo,” mitambag siya niadtong nakigbisog nga mobati nga gidawat. “Duna koy pagpamatuod nga kini ang Simbahan ni Kristo, apan anaa Kaniya nga ikaw makakita og tinuod nga nahisakop.”
Ang istorya ni Paulo nagrepresentar og daghang mga punto nga gihulagway sa mga lider sa Simbahan diha sa video series Unity in Diversity. Ang ilang mga mensahe nagtanyag og paglaum ug tambag niadtong kinsa wala mobati nga nahisakop. Usahay mobati kita nga nag-inusara bisan sa simbahan, apan, sumala sa gitudlo niini nga mga lider ug mga miyembro, adunay mga butang nga atong mabuhat sa pagtabang sa atong kaugalingon nga makalingkawas sa mga hagit sama sa pagkalahi o dili maayong tinagdan sa uban. Makalikay kita sa mga pagkomparar, sa pagpadayon nga walay kasiguroan, hibaloi nga ang pagbalik posible kanunay, ug labaw sa tanan, salig sa Manluluwas.
Likaye ang mga Pagkomparar: Kitang Tanan Mapanalanginan sa Katapusan
“Kon magsugod ka sa pagkomparar sa imong kaugalingon, sa usag usa, kini mosangpot ngadto sa pagkawala sa paglaum o kini mosangpot sa garbo. … Mga panalangin moabut diha-diha. Mga panalangin moabut dugay-dugay pa. Usahay ang mga panalangin giandam alang nato, nagtuo ko, human kita moagi sa tabil. … Sa katapusan, makasiguro kita nga ang saad sa kinabuhing dayon alang sa tanan.”
—Elder Gary E. Stevenson sa Korum sa Napulog Duha ka mga Apostoles
Mibalhin si Rochell sa usa ka maayo nga balay sa abunda nga lugar didto sa kasadpan sa Estados Unidos human nakapuyo diha sa usa ka homeless shelter. Diborsyada ug nag-atiman og pipila ka mga bata, duha ang iyang trabaho, usahay tulo, aron makapasapar sa pagkaon ug sa abangan, ug nahimong dili kaayo aktibo, sukad sa iyang pagkakabig.
“Bisan og hapit tanan sa akong bag-o nga ward ingon og mas haruhay kay kanako,” matud niya, “mitabang sila nako ug gidawat ang akong sininaan. Ang tanan nagpakabana gayud.”
Bisan anaa ubos sa dakong pinansyal nga panginahanglan, si Rochelle wala masina sa uban sa ilang haruhay nga kahimtang. “Gusto ko nga adunay mas dakong kasiguradoan, apan wala ko naghinan-aw sa mga kabalayan sa akong mga silingan ug mibati nga gibiyaan ko sa Dios,” miingon siya. “Nabati nako nga nag-abay Siya kanako bisan sa akong dili maayo nga mga pagpili.”
Bisan ang schedule sa trabaho ni Rochelle nahimong usa ka hagit usahay, ang mga lider sa ward ug mga higala hingpit nga mitabang niya nga matuman ang pangandoy sa pagtambong sa templo. “Ang pag-adto sa templo kanunay nagtabang kanako nga magmapasalamaton kon unsa na kalayo ang akong naabut,” iyang naobserbahan. “Wala ko mabalaka nga ang uban murag nauna pa kanako.”
Si Rochelle miangkon nga siya ug ang iyang anak naglisud ug “dili hingpit nga LDS nga pamilya.” Apan iyang nabatyagan nga “ang tanan adunay mga problema ug walay pamilya nga hingpit gayud,” usa ka panglantaw nga nagluwas kaniya gikan sa paglantaw sa nakapalingkawas niya nga maghinan-aw sa uban imbis tutukan ang iyang relasyon sa Dios.
“Nakita sa akong anak nga mga babaye kon unsay kalainan nga nahimo sa ebanghelyo sa akong kinabuhi,” miingon siya. “Nabati usab nako ang kalainan ug busy ra kaayo ko sa trabaho, pamilya, ug Simbahan nga wala na koy panahon sa pagkompara. Malipayon lang kaayo ko nga anaa sa husto nga dalan.”
Pagpabilin nga Lig-on: Si Kristo Makausab Kaninyo
“Kining tawo nga tupad nako mibaliwala nako o gani gusto nga mopalayo … wala makausab sa reyalidad sa unsay gibati ni Kristo kanako ug sa mga akong mahimo diha kang Kristo. … Ang matag indibidwal kinahanglan nga makatino nga sila adunay luna sa gingharian sa Dios [ug sa] lawas ni Kristo, ug ang uban nga walay hunahuna o danghag o grabe pa dili makadili niana.”
—Elder D. Todd Christofferson sa Korum sa Napulog Duha ka mga Apostoles
Nagdako, si Matthew nagsimbahan sa gamay nga mga branch. Siya ug ang iyang asawa, usa ka kinabig gikan sa Ukraine, nagtubo nga naanad na sa daghang mga calling ug aktibong moapil sa internasyunal nga mga komunidad sa LDS apan mibalhin ngadto sa Estados Unidos. Dagko nga mga ward ug lahi nga mga oportunidad sa kultura maoy hinungdan nga sila mibati nga “wala kinahanglana ug walay katuyoan,” nahinumdom siya. “Ingon og dili kami angay. Gibati namo nga kami gibaliwala, kakulang sa mga kasinatian nga madasig ug relasyon sa uban sa Dominggo.”
Ang ilang kahimangod nahimo nang seryoso nga problema, human mobalhin ngadto sa laing siyudad, si Matthew ug ang iyang asawa nagpaabut nga duolon sa lokal nga lider sa priesthood kansang katuyoan sa pagduol mao ang paghangyo kanila sa pagkontrol sa ilang kiat nga bata atol sa sakrament miting. Nasakitan pag-ayo, naghunahuna si Matthew nga dili na gayud mobalik sa lokal nga meetinghouse. “Unsay nakapugong nako,” mipasabut siya, “mao ang akong pagpamatuod nga kini ang Simbahan sa Ginoo ug nga ang Manluluwas gusto nga ako mosimba. Ang pag-apil sa ebanghelyo adunay mga sangputanan labaw sa bisan masakit nga pagbati o personal nga panagbangi nga akong masugatan niini nga kinabuhi.
Ang mga sitwasyon sa Simbahan makahimo nato usahay nga mobati nga nag-inusara, gibaliwala, ug wala kinahanglana, usa ka sirkumstansya nga dili ra sa mga Santos sa Ulahing mga Adlaw. Usa ka katoliko nga magsusulat nga si David Mills mihulagway sa hagit nga giatubang sa mga mosimba sa pagsagol niadtong kinsa “mas dato o mas pobre, kapin kon kulang mas edukado kaninyo. Tingali sila lahi og kaliwat o grupo o edad kay kaninyo.” Mahimong dili kita mopili ni bisan kinsa nila alang sa atong nagkalain-laing social networks, mipasabut siya. Hinoon, ang relihiyoso nga pasalig naglakip sa pagsagol sa mga tawo nga dili nato pilion ug “mohatag sa pipila ka mga dapit nga nahibilin nga ingon og usa ka komunidad kay sa usa ka network. … Kinahanglang makat-on kamo sa paghigugma niining mga tawhana, o bisan man lang magpakita og gugma, bisag dili ninyo gusto.”2 Ang pagsalig sa Dios kon dili ninyo ma-block o ma-unfollow ang mga tawo sa inyong relihiyoso nga komunidad sa kasagaran mao lamang ang paagi sa pagbuntog sa hagit.
Nakita ni Matthew kini nga pagsalig nga importante nga magpabilin nga aktibo sa Simbahan. “Ang bugtong butang nga maoy nakapadayon nako mao ang akong pagpamatuod ni Kristo,” mipasabut siya “Ang ebanghelyo mas importante kay ni bisan kinsa kanato. Si Kristo nakakita unsay dili nato makita, nakahibalo unsay atong dangatan, ug makatrabaho sa tanang mga tawo.”
Si Jasmin, usa ka miyembro sa habagatang Estados Unidos, miadmiter nga “Naglisud ko nga makabaton og maayong relasyon sa usa ka sister sa akong ward kinsa manghilabut sa akong kinabuhi, ug kana gitugutan nako nga mahilayo ko.” Apan sa dihang ang problema sa iyang gamay nga anak nga lalaki mas dako kay sa walay kasiguroan kon unsay kahimtang sa pagbalik, nasayud si Jasmin nga panahon na nga “dili motugot nga ang opinyon sa uban bahin nako mopalayo nako gikan ni Kristo—bisan gibati man nako o wala nga dunay usa ka tawo sa ward nga nakaminus nako.”
Nagtigum siya og igong kaisug sa pagpanimpalad bisan sa grabe nga unos usa ka Dominggo diin ang iyang gamay nga pamilya sa wala madugay mibati nga gidawat sa mga higala kinsa makatabang kanila nga motubo diha sa Simbahan ni Jesukristo. “Nagbasol ko nga mibiya,” miingon siya. “Apan mapasalamaton ko nga wala mohunong ug nga ako nagpadayon sa pagpaningkamot, tungod kay ang ebanghelyo dili bahin sa uban—o bisan gani nako—bahin kini sa akong Manluluwas.”
Lakaw ngadto sa Kangitngit: Ang Kahayag Mosunod
“Ang kinaiyanhon nga lalaki ug ang kinaiyanhon nga babaye moingon, ‘Dili mahitabo nga ako molakaw [ug] mopadulong ngadto sa kangitngit hangtud ang kahayag mosunod ug makakita ko asa ko paingon. Ang kinahanglanon mao nga kita molihok, magpaabut nga kon kita molihok, kita mapanalanginan og mas dako nga pagsabut.”
—Elder David A. Bednar sa Korum sa Napulog Duha ka mga Apostoles
Usahay lisud alang sa bag-ong mga miyembro nga magpabilin nga mogamut sa ebanghelyo kon sila walay kompleto nga kasiguroan unsay umaabut. Ang pagkat-on niini nga aspeto sa hugot nga pagtuo, alang ni Mei-Hsin, usa ka asawa sa Taiwan, naglakip sa pahimangno sa ebanghelyo sa pagdala og mga anak ngadto sa kalibutan, usa ka mahagiton nga lakang tungod kay “daghan sa akong kultura ang usa ray anak o duna hinooy binuhi nga hayop,” obserbar niya. Ang matag pagmabdos nagkinahanglan nga siya magbaton og hugot nga pagtuo sa paghimo sa wala mahibaloi ug ibaliwala usahay ang grabe nga pagpanaway gikan sa mga kabanay ug sa kultura.
Sa kasagaran, ang pagpadayon magkinahanglan sa pagbuhat sa wala mahibaloi, nga mahimong makahadlok niadtong bag-o sa tinuhoan. Nagkinahanglan kini nga magpalambo og pagsalig nga ang Ginoo motabang kanila sa pagsubay sa dalan. Dunay kabalaka ug walay kasiguroan, si Elder Bednar misiguro, usa kini ka normal nga bahin sa atong pagkat-on ug proseso sa pagtubo, apan usahay ang atong mga lakang ngadto sa wala mahibaloi—naglakip man kini sa paghimo og pamilya o pagbalik sa pag-apil sa Simbahan—mahimong mahagiton tungod kay ang saksi moabut human sa pagsulay sa atong hugot nga pagtuo (tan-awa sa Ether 12:6). Si Mei-Hsin ug ang iyang bana nakadawat sa maong saksi human maghimo og pamilya. “Malipayon ug mapasalamaton kaayo mi sa among mga anak,” miingon siya. “Nakat-on mi sa pagpuyo nga magdaginot, sa pagtabang ug paghigugma sa usag usa. Mapasalamaton mi nga midala nila dinhi sa kalibutan.”
Sa kasagaran, ang unang mga lakang mao ang pinakalisud. “Ang unang higayon nga kami [milakaw ngadto sa kangitngit],” sumala ni Elder Bednar, “dili pagduha-duha, apan adunay gamay nga walay kasiguroan, gani gamay nga kahadlok, nga medyo normal ra.” Samtang ang proseso sa pagpadayon dili tanan hapsay (“dili perpekto nga saykol nga dili mabalda,” mipasabut siya), sa hinay-hinay kita molambo “pagtulun-an human sa laing pagtulun-an,” uban sa atong hugot nga pagtuo nga magkadako.
Ang pagpadayon nagkinahanglan og praktis, tambag ni Lazare sa Georgia, usa ka kinabig sa nasud nga utlanan sa Russia ug Europe. Ang pagkat-on sa pagsalig sa LDS nga mga higala mao ang iyang unang lakang, pagkahuman miuyon siya nga modawat og panalangin sa priesthood. “Dayon makapadayon ko sa mga panaghisgutan sa misyonaryo,” mipasabut siya. Sa dihang ang hugot nga pagtuo ni Lazare kang Jesukristo midako, “Gihimo nako ang dakong lakang sa pagpabunyag bisan og dili 100 ka porsyento nga sigurado ko. Ang Ginoo mihatag nako og kaisug sa matag higayon, ug ako mapasalamaton karon nga akong gibuhat.”
Ayaw og Hunong
“Ang mga tawo kinsa naghunahuna nga sila nakasala og dako o layo na kaayo o dugay na kaayong nawala ug ingon og dili na makabalik: Ang akong deklarasyon mao nga walay usa nga mahulog ubos pa sa pagsanag sa kahayag ni Kristo. Dili kini posible.”
—Elder Jeffrey R. Holland sa Korum sa Napulog Duha ka mga Apostoles
Nagtubo sa usa ka mahalaron nga LDS nga pamilya sa Utah, USA, mibati si Brian nga ang Simbahan dili alang kaniya. “Ganahan ko og pantasya nga mga dula, mga salida, ug rock music,” miingon siya, “dili Scouts, mga kasulatan, seminary, ug mga sport.” Sa dihang nakabiya na siya sa ilaha, mibalhin siya ngadto sa usa ka apartment ug “mibuhat sa pamaagi sa kalibutan, lakip sa sex ug drugas.” Human sa igong gidugayon sa unsay gitawag ni Brian nga “pagkinabuhi nga mapatuyangon ug pag-eksperimento,” naglisud na siya sa kwarta ug gidawat siya pag-usab sa iyang mga ginikanan, bisan og wala siya mobalik ngadto sa simbahan.
Ang pagkatawo sa usa ka igsoong babaye nakapahinuklog ni Brian sa iyang mga pamaagi. Sa dihang una niya siyang gikugos, nahinumdom siya, “Nasayud ko nga siya dili lang laing tawo.” Medyo nagduha-duha, mitambong siya sa panalangin sa bata, ug sa dihang ang sakrament giduol kaniya, “Gipalabay nako kini nga wala moambit, apan kabahin sa akong kaugalingon mibati og espirituhanong kagutom niini.”
Naningkamot nga masabtan kining nagkalahi nga mga pagbati, si Brian nagsugod sa paghimo og journal. “Dugay kong natulog usa niana ka gabii nga nagsulat sa akong espirituhanong problema,” miingon siya, “ug nasinati nako ang akong unang espirituhanong kasinatian, bisan og dili habig sa maayo.” Gibati niya ang gahum sa dautan, kasilag, kasuko nga naningkamot sa pagbuntog sa iyang kalag. “Human niana,” mipasabut siya, “nasayud ko nga nagkinahanglan ko sa Ginoo.” Apan tungod kay dugay na kaayong nagpalayo, naghunahuna si Brian, “Takus ba ako sa Iyang tabang ug proteksyon?” Nakapangutana usab siya kon makahimo pa ba siya sa pag-ambit pag-usab sa sakrament.
Ang dalan pabalik lisud. Ang paghunong sa sigarilyo dili sayon, pagkumpisal ngadto sa bishop nagkinahanglan og kaisug, ug ang pagbiya sa daang mga higala ug mga kalihokan lisud. Ang iyang pamilya, girlfriend, ug bishop ang tanan misuporta kaniya, apan nadiskobrehan ni Brian ang tinubdan sa iyang kusog diha ni Jesukristo.
“Akong nakaplagan nga ang Ginoo gusto nga motabang kanako,” nahinumdom siya. “Bag-ong mga oportunidad ang naabli sa pagpuli sa akong daang mga kalihokan. Kon maningkamot ko pag-ayo sa pagsunod sa ebanghelyo, mas miklaro ang akong dalan.” Sa dihang misalig si Brian sa Ginoo ug nadiskobrehan ang Iyang pagkaandam sa pagpasaylo ug paghatag og kaayohan, mas adunay kahulugan ang sakrament alang kaniya ug nakatabang sa pagdala kaniya nga mas mahiduol ngadto sa Manluluwas. “Samtang ako miambit sa pan ug tubig dito sa simbahan isip usa ka bata gatusan ka higayon, sa katapusan gibati na nako nga nakaambit sa sakrament sa unang higayon.”
Walay Usa nga Makapuli sa Imong Dapit
Ang pagkanaog gikan sa sakyanan ug pagsulod sa simbahan, pagduol ngadto sa ubang mga miyembro, pagbuntog sa masakit nga mga sitwasyon, pagsunod sa ebanghelyo nga walay kompleto nga kasiguroan unsay umaabut, ug pagkumpisal sa mga sala—kitang tanan naglakaw sa malisud ug walay siguro nga mga dalan sa atong pagpadulong ngadto sa kahoy sa kinabuhi (tan-awa sa 1 Nephi 8).
Ang atong personal nga pasalig sa pagsunod sa Manluluwas importante alang sa luwas nga pag-abut. Samtang ang pag-awhag, gugma, ug pagdawat gikan sa isig ka miyembro ug mga lider sa Simbahan importante, matag usa kanato mag-atubang og mga panahon nga kita kinahanglang andam sa pagsunod sa Manluluwas, bisan kon kita mobati nga nag-inusara sa paghimo niini.
Pagpangita sa Inyong Dapit diha sa Simbahan ni Jesukristo. Ayaw pagkomparar, tuguti nga si Kristo mousab kaninyo, pagpakita og hugot nga pagtuo nga mahatagan og ganti, ug hibaloi nga dili pa gayud ulahi ang pagbalik. “Busa, kon kamo mopadayon sa unahan, magbusog sa pulong ni Kristo, ug molahutay hangtud sa katapusan, tan-awa, sa ingon miingon ang Amahan: Kamo makabaton og kinabuhi nga dayon” (2 Nephi 31:20).