Pagmaisugon ug Pakigbahin!
Ni Elder Paul B. Pieper
Sa Seventy
Nagpuyo ang among pamilya sa daghang mga lugar sa tibuok kalibutan. Nakahimamat mi og daghang lain-laing mga tawo ug daghang mga kahigayunan sa pagpakigbahin sa ebanghelyo. Ang among mga anak nakapanalangin sa uban pinaagi sa pagpakigbahin sa ilang pagpamatuod.
Sa gagmay pa ang among mga anak nagpuyo kami sa nasud sa Kazakhstan. Walay mga misyonaryo didto nianang higayuna. Kon ang mga higala o mga silingan gusto nga maminaw sa ebanghelyo, kami ang mga misyonaryo!
Ang among anak nga babaye nga si Marné mipakigbahin sa ebanghelyo uban sa iyang higala nga si Alyona. Nakahukom si Alyona nga magpabunyag uban sa pagtugot sa iyang inahan, kinsa nabunyagan sa wala madugay uban sa iyang manghud. Karong bag-o si Alyona naminyo sa usa ka matarung nga lalaki didto sa Manhattan New York Temple, ug si Marné tua sad didto! Nalipay kaayo siya nga nakatabang siya sa iyang higala nga makat-on mahitungod ni Jesukristo.
Sa dihang nagpuyo kami sa Virginia, USA, ang among anak nga lalaki nga si Chris diha sa Primary. Usa sa mga higala ni Chris ug ang pamilya niini nagsugod sa pagpakigkita sa mga misyonaryo. Mitabang si Chris sa pagtudlo sa pamilya. Nangandam siya sa dili pa ang matag leksyon ug mitabang sa pagtubag sa ilang mga pangutana. Nakahukom ang pamilya nga magpabunyag. Human niana, wala na mabalaka si Chris kon siya magmisyon na. Nasayud siya nga mahimo niya kini!
Laing higayon dunay usa ka tawo nga miabut aron motrabaho sa among balay. Nagpasalamat ang akong asawa sa dihang nahuman na siya. “Gusto mi nga mohatag nimo og regalo,” miingon siya. Gihatagan niya siya og kopya sa Basahon ni Mormon.
Nasuko ang tawo. Wala siya makasabut unsay among gituohan. Nagtuo siya nga wala mi magtuo ni Jesukristo.
Si Chris maisugon ug mipakigbahin sa iyang pagpamatuod ngadto sa tawo. Miingon si Chris nga siya miyembro sa Ang Simbahan ni Jesukristo sa mga Santos sa Ulahing mga Adlaw. Miingon siya nga nagtuo siya ni Jesus.
Daghang mga anak sa Langitnong Amahan wala makahibalo sa ebanghelyo. Ang uban wala makahibalo nga nagtuo kita ni Jesus. Kining mga tawhana nagkinahanglan og usa ka tawo nga buotan ug makigsulti kanila. Mahimo kitang maisugon ug mopakigbahin sa atong pagpamatuod. Makatabang kita sa uban nga makat-on mahitungod ni Jesukristo!