Pagtudlo sumala sa Pamaagi sa Manluluwas
Pagpalambo sa mga Pagpanaghisgot sa Pamilya
Ang tagsulat nagserbisyo karon isip presidente sa misyon sa Brazil Curitiba Mission.
Sa unsang paagi nga atong matabangan ang atong mga anak nga mas aktibo nga magkat-on sa ebanghelyo?
Kaniadto, ang akong asawa ug ako nabalaka sa gipakita nga kinaiya sa among pipila ka tin-edyer nga mga anak atol sa pagtuon sa kasulatan sa pamilya, sa mga family home evening, ug bisan sa among impromptu, nga one-on-one nga panag-istoryahanay kabahin sa ebanghelyo. Nakahimo ra sila og minimum nga sumbanan sa pagkat-on—pisikal nga presensya, panagsa nga eye-contact, ug usa ka pulong nga tubag—apan dili sila aktibo nga nagkat-on.
Nasayud kami nga aron sila makaangkon og lig-on nga pagpamatuod ug sa pagsinati og lawom, personal nga pagkakabig pinaagi sa gahum sa Espiritu Santo, kinahanglan nga mobuhat pa sila og dugang. Ang Manluluwas gusto nga ang Iyang mga disipulo dili lang maminaw sa Iyang mga pulong—gusto Siya nga buhaton nila ang Iyang mga pagtulun-an uban sa hugot nga pagtuo (tan-awa sa Pagtudlo sumala sa Pamaagi sa Manluluwas [2016], 30).
Usa ka gabii nakigsulti kami nila mahitungod sa among mga pagbati. Ang among tuyo mao ang pagtambag nila pinaagi sa panag-istorya nga giniyahan sa Espiritu. Hinoon, ang among panag-istorya, dali nga nahimong usa ka wali. Ang anak namong mga lalaki nakadungog sa among mensahe, apan ang ilang mga hunahuna ug kasingkasing nagpabilin nga wala maapektahi.
Kana nga kasinatian nakapasamok namo, mao nga ang akong asawa ug ako namalandong unsaon namo pagtabang ang among mga anak nga ganahan sa ilang pagkat-on sa ebanghelyo, magdasig nila sa paglihok imbis palihokon pinaagi sa among mga pagsulti ug mga wali. Ang among mga pangutana nakagiya namo sa paghimo og usa ka plano gikan sa pagsiksik sa mga kasulatan, sa mga pulong sa mga propeta sa ulahing mga adlaw, ug sa ubang mga kapanguhaan sa Simbahan kalabut sa pagtudlo ug pagkat-on. Ang among plano nga mabasa:
Naggiya sa Among mga Anak nga Tinguhaon ang Espiritu Santo sa mga Panaghisgot sa Pamilya
Pagpalambo og gugma ug pagtahud. Ang gugma mopahumok sa mga kasingkasing. Ang pagpadayag sa gugma makatabang sa pag-andam sa among mga anak alang sa impluwensya sa Espiritu Santo. Makaamuma usab kini sa ilang tinguha ug kaandam sa pag-apil sa aktibo, espirituhanon nga pagkat-on. Ang pagtahud sa among mga anak pinaagi sa pagpaminaw sa ilang mga hunahuna ug mga pagbati makatabang nila nga mas mobati nga luwas ug mas andam nga mopakigbahin unsay ilang gibati.
Pagtudlo pinaagi sa Espiritu. Ang pag-obserbar ug pagpaminaw pag-ayo sa atong mga anak makaandam nato sa pag-ila pinaagi sa Espiritu unsay sunod nga isulti, unsay ipangutana, o unsa nga imbitasyon ang ihatag nga mogiya nila sa pagtinguha sa impluwensya sa Espiritu Santo sa ilang pagkat-on.
Lig-unon ang matag panaghisgot pinaagi sa pulong sa Dios. Samtang ang pagpakigbahin sa atong kaugalingong hunahuna ug mga opinyon mahitungod sa ebanghelyo makatabang, ang mga kasulatan ug ang mga pulong sa mga propeta sa ulahing mga adlaw sa kasagaran makahatag og mas lawom, mas gamhanan nga koneksyon ngadto sa Espiritu (tan-awa sa D&P 84:45).
Himoa ang Manluluwas nga mao ang basehanan sa tanang mga panaghisgot nga sentro sa ebanghelyo. Ang kaimportante ug gahum moabut sa atong panaghisgot kon ang atong mga anak makasabut unsay atong gihisgutan kalabut sa Manluluwas ug sa Iyang Pag-ula, “ang pinakagamut sa doktrina sa Kristiyano” (Boyd K. Packer, “The Mediator,” Ensign, Mayo 1977, 56).
Pangutana og makadasig nga mga pangutana. Ang epektibo nga mga pangutana mogiya sa atong mga anak nga makasabut sa kamatuoran ug pagsabut sa direktang paagi gikan sa mga kasulatan ug mga pulong sa mga propeta uban sa tabang sa Espiritu. Unsay ilang makat-unan nianang paagiha mas dako og kahulugan ngadto nila kay sa atong pinakaklaro nga mga pagpasabut sa sama nga materyal.
Awhaga ang mga sakop sa pamilya sa pagpakigsulti. Kon ang atong mga anak mogamit sa ilang kaugalingong mga pulong sa pagpadayag sa unsay ilang nakita, gihunahuna, o gibati, nagimbitar sila sa Espiritu Santo sa pagtabang nila unsay isulti ug unsaon sa pagsulti niini. Kana nga proseso makatabang nila nga mas klaro nga makakita ug makasabut unsay gusto sa Ginoo nga ilang makat-unan ug bation.
Pagmapailubon! Ang Espiritu Santo motabang sa atong mga anak samtang sila mangita diha sa ilang mga hunahuna ug mga kasingkasing sa kamatuoran ug pagsabut. Kinahanglan nga atong batukan ang tintasyon sa pagputol sa ilang pagpangita pinaagi sa pagbalda nila sa atong personal nga mga opinyon ug sa atong gituohan nga mga solusyon.
Pagtudlo pinaagi sa ehemplo. Ang pagpaningkamot sa pagkat-on ug pagsunod sa ebanghelyo sa samang paagi nga atong gihangyo sa atong mga anak makatabang nato nga maangkon ang suporta ug giya sa Espiritu sa atong mga panaghisgot.
Samtang naningkamot kita sa pag-implemintar sa atong plano, nagkat-on kita nga ang pagdapit sa impluwensya sa Espiritu Santo sa atong mga panaghisgot sa pamilya magkinahanglan og praktis ug panahon. Apan magdumili kita nga mawad-an og paglaum o mohunong. Sa miaging gabii lang, ang among 10 anyos nga anak nga babaye, naaghat sa usa ka bersikulo gikan sa Basahon ni Mormon nga among gibasa isip pamilya, sinserong nangutana, “Unsaon ninyo sa pagkat-on pinaagi sa Espiritu Santo?” Mipahiyom ko. Nasayud ko nga duna mi padulngan!