Mwanangaia Am Bwaeoniia— Ni Koaua, Aongkoa E na Bon Karaoki Raoi
N riki bwa Aika Itiaki ni Boong aika Kaitira bon te bwaeoniia
Ngke te kairake n ataeinimwaane ngai, N tabetai I kakaraoai bwa aongkoa te tiambion n te takakaro ngai. I kakaraoai aongkoa bwa I kona ni kiba n te eea kanga te tubwairoo. I kakaraoai bwa aongkoa te aintoa ngai. I bon kukurei ma maiu, e ngae ngke rabwatau e tinauere, aki kona ni kiba, ao kanga tii teutana au atatai n te takakaro. Ma aongkoa kakaraoana bwa e kaunga. I kukurei ni kan kataneiaai te bwai ae kaokoro, riki ngkana bon man karioan au iango. I iangoia bwa anne bukina ae a mwaiti aomata n tangiria bwa aongkoa ngaiia.
Ni kaeineti bwa aongkoa, ngaira Aomata Aika Itiaki ni Boong ni Kaitira ti tatangiria n nakonako bwa bwaeoniia. Ti bainii kunikai ake a bainii bwaeoniia (n aroia). Aomata Aika Itiaki ni boong aikai a bainii ni koaua aron aia kunikai bwaeoniia ngkoa. A kooki aenika aika ai aron aenikaa ake a kooki bwaeoniia (aekaia nako). Aomata Aika Itiaki ni boong aikai a kooki aenika ae bon aekan aia aenika bwaeoniia ngkoa. Ti kang kanaia bwaeoniia are a kang (eng, tiaki aron kanaia) Ti karaoa te mwakuri korakora ae bubura bwa aongkoa ngaira bwaeoniia. Te bwai ae kamimii bwa ti bon aki tangiria bwa aongkoa ngaira. Ti a kaman bwaeoniia.
Beretitenti Thomas S. Monson e taku, “N riki bwa te Aomata ae Itiaki ni Boong Aika Kaitira bon te riki ni bwaeoniia, bwa kabwarabwaraan te bwaeoniia bon “temanna are e rimoa ni katauraoi ao ni kauka te kawai ibukiia tabeman bwa a na rimwii.’”1 Beretitenti Monson e reireiniira, man ana taeka ao ana mwakuri, ti na kanga n riki bwa bwaeoniia ni koaua:
“Ti toua mwiin mwanekaia Bwaeoniia aika kabanea n tamaroa—ao bon te Tia Kamaiu—are e nako n rimoa, ni kaota nakoira te kawai ae ti na toua.
“‘Nakomai, ao iriirai,’ E kakao.”2
“Nakomai … ao … iriirai. Taeka aika a bebete te oota iai a konaa ni buokiira n riki bwa bwaeoniia ni koaua.
Ti a noora te kibu n taeka aikai man iangoan te kawai ake tabeman bwaeoniia ni boong aikai ake a tiba ira nakonakon te titeiki ni bwaeoniia.
“Nakomai, ao Rimwiu”
Ti kaoaki n roko nakon Kristo. E taekinaki bwa ti riai ni mwaing man te tabo teuana nakon teuana. Taylor A. e ataa raoi nanon te taeka aei.
Taylor e bon wanawana, e on te kimwareirei, ao e on n te Tamnei, ma e na tawe n tuangko bwa taeka akanne aki kabwarabwara taekan ana uoua n ririki n nako. E a tia ni mwaing nakon te tabo ae kaokoro ngkai, n taua te aro ao marurung rabwatana. Bon te bwaeoniia!
“I tia n riki ni bwaeoniia ni maiu,” e taku, “ibukina I bon tiba rairaki n te tai ae aki maan. Ao mwanangau e bon tia ni kamiimi. I ti namwakina ai aron bwaninin te maiu ae boou. Ao ngke ti anaa te moan mwaneka ni mwanangara, a riki te naan kakai.”
E aki ti oota Taylor n te kakao n roko—e ata bukin oin te kakao. E taratara, “N ara aonaaba, ti aki katabeira ni kan ataia bwa ti kanga n roko ni mena ikai, e koaua? Ti bon katurua ara taratara iaon ara mwakuri ao bwaai aika boou, ao te rongorongo are e bon kakawaki irou imwina bon karimoaan Kristoi riki inanon maiura. Ti riai n tou mwin te katooto bwa tera are a karaoia bwaeoniia raoi—[a bon] a katurua aia taratara iroun Kristo.”
Rimwiu ti bon kaoaki naba n rimwin Kristo. N tain nakonakon te bwaeoniia, Ethan G. e karekea korakoan ana atatai n te iango aei. N tabetai I aki namwakina te marurung raoi (rabwatau ao kakamwakuriu) n nakonako, e kakoaua. Ma I a ataia bwa bwaeoniia a bon namakina naba te aro anne.”
Ethan e aki toki n titiraki bukin tera bwaeoniia ngkoa a kukurei ni karaoa te bwai ae a tia ni karaoia. E taku, N na kaman aki konaa (ngke bon ngai te bwaeoniia ngkoa) Ma ngke I iangoa taekan anne, I rau n ataia bwa ibukina a tangira te Tia Kamaiu, ao iai aia kantaninga a na konaa n riki n tamaroa Irouna. I kan kataa naba anne.”
Imwain ae e ira Ethan te nakonako, e wareka taekaia bwaeoniia mai mwaina, e namwakina reitakina ma ngaiia, ao e kaungaaki man aia onimaki n irira Iesu Kristo. Ao tera ae karaoia Ethan ngkai? E a katauraoia imwain karekean te wewete ni beku bwa te mitinare ae bwanin-ana tai. Ongotaeka nakon ana reirei Beretitenti Monson, e a tauraoi ni kaotia nakoia tabeman te kawai n rimwi.
Tera ae Tina Riai ni Karaoia? Antai ae ti na rimwiina? Te Tia Kamaiu e tuangiira: “Nakomai, ao irirai” (Luke 18:22; kairana ma katuruturuana). Ngke Harmony e kitana mweengana n ira te nakonako, inanon ana taneiai e noora mwaakan ana kairiiri bain te Uea. E ataia bwa e bon Ririmwina.
Harmony e waaki n ira nakonakon ana katabetabe ana titeiki n te kawai ae kaokoro ma kawai tabeua. N ana ririki ae 15 e reiakinna bwa iai iaon kunna te aekaki kaentia ae aki bati n nonoraki. E aki reke irina n nakonako n ana titeiki. “I bon nanokawaki,” e uringa.
Imwiin aua te ririki, ngke ana titeiki e katanoata te nakonako teuana riki, Harmony e toki te kaentia mairouna. Ma n te ririki 19, e iangoia e aki konaa n reke nakona. Ngkanne e karekea weteana n iri n aron kataben te tia kairiiri. E taku, “E bon nano au koaua nakoiu bwa te Uea e ataira bwa antai ngaira, ao E atai kukurein nanora, ao ngkana bwa a eti ao raoiroi, E na kakabwaiaiira.”
Harmony e anga te atuaiti are e na buokiira ngkana ti taneiai ni kataaki: “Nakoimi ngakami ake kam ikakorakora, N na taekinna bwa katine iroun te Uea. N taainako E kukurei ni buokiiko. E tangiriira, ao E aki kona ni kabwakaira Ti kainanoia ni bubuti Nakoina buokara, ao E na buokiira iaon mwanangara ni bwaeoniia.
Ko kona n Riki ni Bwaeoniia
Ngkana ko tuai n ira aia nakonako bwaeoniia, ko bon kona n riki ni bwaeoniia. Ko aki kunikaina te bonneti ke kooka te aenika. Ko ti kainanoa n ririmwin Iesu Kristo, n aroia bwaeoniia ngkoa. Ni karaoan aei, ko na riki, n aron ae taku Beretitenti Monson, “temanna are e rimoa ni katauraoi ao ni kauka te kawai ibukiia tabeman bwa a na iria.
Ngkana e reke am tai n ira te nakonako ni bwaeoniia, kukurei iai! Ao ngkana e toki ao ko katuka am aenika ibuki, kateimatoa am koaua ae reke iroum inanon nakonako. Uotia rikaaki ma ngkoe te koaua anne nakon (mweengam).
Boni ngkoe te maiu-ae koaua, bwaeoniia-boong aikai Ma te Bwaeoniia ae te kabanea n tamaroa—te Tia Kamaiu—n aron am tia kairi, ko na koaua nakon te tokanikai!