Reirei n ana Kawai te Tia Kamaiu
Te Tia Reirei ae E Ibuobuoki ni Kamaiui Tamnei
Bukin ana reirei te tia Kamaiu e anga kawai n arona n angareirei. Iai kaokoron ara kaantaninga?
I kaotia bwa ngkana I iangoa aron ana kawai te Tia Kamaiu n angareirei, I kataia ni kabotoa iaon arona n angareirei. Tera ae e karaoia? Tera arona n reitaki ma aomata? Ae e bon ataaki, Bon ngaia aia mwatita taan reirei! Ma ngkana ti kan angareirei n ai arona, e kakaawaki bwa ti na ataia bwa bukin tera E angareirei. N tokina, anne “bukina” ti na karaoi ni kabane bitaki ibukira ao ibukiia naake ti reireiniia.
Ngke e reirei te Tia Kamaiu, Ana kantaninga e aki tii kanoa te tai ke ni kaunga ke n tibwaua te rongorongo n te mwaiti ae bubura. Bwaai ni kabane ake E karaoi—n ikotaki ma te angareirei—e nanonaki bwa e na kairiia tabeman nakon Tamana. Ana kantaninga ni kabane te Tia Kamaiu ao ana mition bwa e na kamaiuia natin Tamara are i Karawa (taraa 2 Nibwaai 26:24). Ngkana ti kataia n anga reirei n aron are E karaoia, ti kona n reiakinna ni kaungaaki man te nano are e kaunga nako iai.
N taekana teuana, n angareirei n ana kawai te Tia Kamaiu bon te riki bwa te tia reirei are ana kantaninga bwa e na kamaiui tamnei.
Te Nano ni Kan Kamaiuia Tabeman
Teuana te karaki ae I rangin n tatangiria man ana Boki Moomon bon karakinan natin te Uea Motiaea ni kiitana abanuean Nibwaite bwa e aonga ni katea abanuean te Atua ibuakoia Remwanaite. A katuka abanuean te aonaaba ibukin abanuean karawa. A kitan aia tabo are a rau ni kamanoaki iai ibuakoia Nibwaite ao n nako buakoia aia kairiribwai, te Reimwanaite, bwa a na “kamaiuia tamneia tabemwaang” (Aramwa 26:26).
Tera ae e kaungai nanoia ana toro te Uea aikai? “Bwa a aki kona moan ae e na iai tamnein te aomata temanna ae e na kamaiunaki; eng, e bon riki naba iangoan ae e na iai te tamnei ae e na reke irouna te kammaraki ae aki totoki bwa karikan mwaingingiia ma ruruia.” (Motiaea 28:3). Anne te kaunganano are a teimatoa iai inanon “kanganga aika mwaiti” (Aramwa 17:5, 14).
Te karaki aei e a tia n tainako ni kaungaai bwa N na iangoia, I karaoa te bwai are I kona ni uotiia tabeman nakon Kristo? E tau ae I karaoia iaon kamaiuan tamnei?
N riki bwa te Tia Reirei Ae Ibuobuoki ni Kamaiui Tamnei
Ngkana iai nanora ni kan reirei n aron are naba are e karaoia te Tia Kamaiu, reirein are aron are E reirei iai e na mataata riki nanona. E raka riki nakon are ti taian kawai, a tei bwa baeten ibukin te kan riki n ai Arona. Ngkai ti teimatoa ni karaoi iango aikai, n aron naba are a kunea tabeman n Teaching in the Savior’s Way, ti na bon aki tii angareirei riki n ai Arona ma n riki naba n ai Arona.
Moantaai n Ukoukora Karekean Kaotioti
N te aro bwa ti na ibuobuoki ni kamaiui tamnei, ti kainnanoa te kaotioti. Kaotioti a roko “teutana imwiin teutana, te reirei teuana imwiin teuana” (2 Nibwaaii 28:30)—ma anne e maan taina. Ngaia are ti moantaai ni katauraoi ao ti ukoukori kaotioti n angiin te tai.
Tangiriia Aomata
Te tangira e kona n riki bwa te kawai ae korakora are e kona te tia reirei ni kamaiui tamnei. E kona ni beebete n aron ataakin araia kain te kiraati, n titirakiniia bwa e uara aia wiiki, n tuangiia bwa e nakoraoi aia maroro are a anga, ke ni katekeraoia iaon aia kekeiaki ke are a tia ni karekea. Kaotan te nano ao te tangira e kauki nano ao ni bokiia naake ko reireiniia bwa a na karekea te Tamnei ae Raoiroi.
Katauraoi n Reirei n Iangoa are a Kainnanoia Taan Reiakinaki
Te tia reirei ae buoka kamaiuan tamnei e kabanea ana iango iaoia taan reiakinaki. Ngkai ti rinanon bwaai n reirei, ti tarai aika a rang kainnanoi riki, tiaki kainnanora. Ti mwaninga bwa ti na kanga ni kabongana tain te kiraati ao n taraia riki bwa ko na kanga n anaa nanoia ao aia iango taan kan reiakinaki. Ti aki tii iangoa te bwai ae ti na taekinna ao ni karaoia, ma te bwai are a na taekinna taan reiakinaki ao te bwai are e na karaoia. Ti tangiriia bwa a na tibwai aia iango ibukina bwa e karekea te katiteuanaaki, kauki nanoia, ao e buokiia ni kabongana aia onimaki.
Kateimatoa Am Maroro iaon te Reirei
A tataneiai taan reirei n tarai nakoraoi man mwaitiia taan roko ake a karekei, ma anne bon ti teuana te bwai are a rinanona. Ngkana ara kiraati e mwaiti riki te tibwatibwa ma e karako te reirei, ti a karekea ngkanne te bwai are e aranna Unimwaane Jeffrey R. Holland man te Kooram n Abotoro are Tengaun ma Uoman bwa te “theological Twinkie.” Ti a tia ni katauraoa te bwai ae kangkang, ma ti kabwaka ni karikirakeia kain ara kiraati ni mwaakan te reirei ae teimatoa.
E reirei te Burabeti Iotebwa Timiti, “te aomata e waekoa ni kamaiuaki nakon are e reke irouna te wanawana.”1 Ti riai ni buokiia naake ti reireiniia ni karekea kakaawakin te aekaki n ataibwai are—ana reirei Iesu Kristo
Ngkana ngaira ma kain ara kiraati ti tibwa ara iango ao ara namakin, ti riai n tainako ni kairekerekei ma koroboki aika a tabu ao nakon aia taeka ara burabeti ni boong aika kaitira. N te tai aei, te Tari Tad R. Callister, Beretitenti ni Kabuta n te Reirei n Tabati, e reirei: “Te tia reirei ae tamaroa e teimatoa ni kataia ni kaira ana kiraati nakon te tua. Te katoto, te tia reirei e kona ni kangai, ‘Te bwai are ko tibwauaia e kauringai n te koroboki ae tabu.’ Ke, ‘Tera te koaua n te euangkerio are ti reiakinna n te taeka are ti a tia n ongo?’ Ke, ‘Iai ae e kan kaota ana koaua ni mwaakan te koaua are ti a tia ni maroroakinna?’”2
Kaoa te Tamnei ae Raoiroi bwa e na Kakoaua
Te tia reirei ae ibuobuoki ni kamaui tamnei e ata te bwai are ti taekinna ao e karaoi ma nanona ni kan kaoa te Tamnei ae Raoiroi nako nanon maiuia tabeman. Te Tamnei ae Raoiroi bon te tia reirei. Teuana taben te Tamnei ae Raoiroi bwa e na kakoaua raoi te koaua, riki iaon taekan te Tama ao te Nati. Ngaia are ngkana ti reirei taekan te Tama are i Karawa ao Iesu Kristo ao Aia euangkerio, ti kaoa te Tamnei ae Raoiroi bwa e na kakoaua nakoia kain te kiraati. Nakon are a kona ni butimwaaia, Mwaakana e na kakorakorai aia koaua ao e na bita nanoia. Ana kakoaua e korakora riki nakon ana konabwai n noorakina.3
Kaoia Taan Reiakinaki bwa A na Mwakuriia Ibon I Rouia
I mena n te Reirei n Tabati are te tia reirei e titirakiniia kain ana kiraati bwa a na tibwaua te bwai ae nano irouia ngkai a wareki tibwangaia ibukin te wiiki man koroboki aika a tabu ao a kanga ni karaoia inanon maiuia. Aio are e a karokoira nakon te maroro ae korakora iaon iango ao kukune ake a karekei i bon I rouia. Bon te bwai ae kakaraoaki ibukin te tia reirei bwa e na karin nakon te maroro aei reirei ake e a tia ni katauraoi bwa e na reirei iaona. Tera raoi te bwai are e anaaki riki iai nanou bon arona ni kabotoi koaua ao ni kaungaia kain ana kiraati bwa a na namakina mwaakan ana taeka te Atua i bon i rouia.
Ara kouru ngaira taan reirei tiaki ti karekean te atatai ae korakora n te kiraati ke ni kanoa te tai ke n anga te reirei ae tamaroa. Te kouru ni koaua bwa ti na nakonako ma tabeman ni kawaira n oki rikaaki nakon Tamara are i Karawa ao Iesu Kristo. Ara kouru bwa ti na riki bwa taan reirei ake a buoka kamaiuaia tamnei.