Rongorongo ni Kakawari n Reirei
Ba A Aonga n Riki n Teuana
Tataromwaaka ni kamatebwaia te bwai n reirei aei ao n ukoria bwa ko aonga n ataia bwa tera ae ko na tibwaia. E kanga ataakin oin bukin te bootaki n aine ni katauraoiia natin te Atua aine ibukin kakabwaia n te maiu ae akea tokina?
“Iesu e karekea te katiteuanaaki ae kororaoi ma te Tama n anga Ngaia, n te iriko ao n te tamnei, nakon ana kantaninga te Tama,” e reirei Unimwaane D. Todd Christofferson man te Kooram n Abotoro n te Tengaun ma Uoman.
“… Ni koauana ti na aki riki n teuana ma te Atua ao Kristo ni karokoa are ti karaoa Aia kantaninga ao nanoia ao ni kakukureia nanora ae korakora. N aron te aantaeka e aki kona ni karekeaki n te bongina, ma rinanon te Tamnei ae Tabu, te Uea e na reireiniira ngkana arona bwa ti tauraoi, ni waaki n te tai, e na koaua taekinana bwa E mena inanora ngkai e mena te Tama i Nanona.”1
Linda K. Burton, te Beretitenti ni Kabuta n te Bootaki n Aine, e reirei bwa ti na kanga ni mwakuri nakon te katiteuanaaki aei: “Karaoan ao kawakinan ara berita aika tabu bon kabwarabwaraan ara anganano n riki n ai aron te Tia Kamaiu. Te keiaki mwaaka ae kororaoi bon te anua ae tamaroa ni kaotaki inanon tabeua kibun te anene n taromauri ae mamate te nano iai: ‘N na nako n are ko bon tuangai. … N na bon tataekina am taeka. … N na riki bwa am bwai ngai.’”2
E kauringiira Unimwaane Christofferson bwa “ngkai ti kataia ni katoabong ao ni katoa wiiki n tou mwiin bannan Kristo, tamneira e na taekina raoi te kariaiakaki ao te mwaaka n moana kauarekea aroia aomata ake a taneiai ni kakaraoia, buakanan kauarekean, ao kaangaangan te kaririaki e na toki.”3
Neill F. Marriott, te Kauoman ni Kauntira n te Beretitentii ni Kabuta n te Bootaki n Ataeinaine, e kaota ana koaua ibukin kakabwaia n te kekeiaki mwaaka ni kaboraoa ara kantaninga ma ana kantaninga te Atua: “I a tia n ikakorakora ni kararoaan tangiran te maiu n rabwata ni karekean bwain te aonaaba n au kawai, n tokina n ataakina bwa au anga e bon rang karako, tiatianaki, ao e rinano nakon ana kawai Iesu Kristo. ‘[Ana kawai Tamara are i Karawa] bon te kairiira nakon te kakukurei n te maiu aei ao te maiu ae akea tokina n te aonaaba ae e na roko’”4 Ti na kekeiaki mwaaka n nanorinano n riki n teuana ma Tamara are i Karawa ao Natina, Iesu Kristo.
Rakan riki Booki aika Tabu ao Rongorongoia
Ioane 17:20–21; I-Ebeto 4:13; Doctrine ao Covenants 38:27; reliefsociety.lds.org
Onimaki Utu Buoka