Koona ibukin te Titiraki
“N na kanga n ataia ngkana I a ikawai ni moana te aki mamatam?”
Ni bongin te Tabati n aki mamatam, ti taneiai ni waaki n aki amwarake ao n aki mooi ibukin uatai te tai n amwarake. Ti anga naba te mwane are e bane iai boon kanara ni buokiia aomata ake a kainnanoia. Anne e aranaki bwa te “angabwai n aki mamatam.” Inanon ara tai n aki mamatam, ti kona ni uring ara kakabwaia, ti tataro ibukiia aomata, ao n namakina kaaniara riki ma te Tama are i Karawa. Ko kona ni moana te aki mamatam ngkana ngkoe ao am karo kam namakinna bwa kam a tauraoi. Ngkana ko aki kona n aki mamatam ibukin te kaangaanga ni maurin rabwatam, ko kona n tii tataro ao n namakina te Tamnei ae Raoiroi n te tai are a aki mamatam iai ake tabeman.
I ataia I a bon tau ni moana karaoan te aki mamatam ngkana I namakinna bwa I kan karaoia, ao te Tamnei ae Raoiroi e tuangai bwa I karaoa te bwai ae eti. Ngke I moana karaoana, I karaoia ma te karaurau N te moan N na bae n aki mamatam teuana te tai n amwarake. Ngkanne N na bae ni kataia n aki mamatam ibukin uoua te tai n amwarake.
Anne D., ana ririki 9, Nevada, USA
Ko kona n tataro nakon te Tama are i Karawa n nooria ngkana ko riai ni moana am aki mamatam. I ataia bwa te Tama are i Karawa e kona ni kaekai am tataro.
Liam P., ana ririki 7, Utah, USA
E tamaroa te aki mamatam ngkana ko tangiria ni buokiia ni kakabwaiaia tabeman ao n namakina te Tamnei. E na riki bwa te tai ae tamaroa n aki mamatam imwiin bwabetitoakim.
Eddie O., ana ririki 9, California, USA
I bae n ataia I a bon tau ibukina I karekea te namakin mairoun te Tamnei ae Raoiroi n tuangai bwa bon te tai ae eti n aki mamatam. Ao ngkanne N na bae n titirakina tinau ao tamau ngkana e eti te namakin anne.
Brooklyn R., ana ririki 7, Auckland, New Zealand
Ngke I bwabetitoaki, I iangoia bwa I namakinna ae I a tauraoi ni karaoa au aki mamatam. I kona n tataro nakon te Tama are i Karawa ibukin Ana buoka ao ni bubutia bwa n ningai ao N na kanga ni moana karaoana.
Brian K., ana ririki 7, Washington, USA