Pagpangita ug Mahimong Tinuod nga mga Higala
Mga kabatan-onan gikan sa Oxford, England, mipakigbahin sa ilang mga hunahuna mahitungod sa tinuod nga panaghigalaay.
Mga paghulagway pinaagi ni Andrew Bosley
Gikan sa labing suod nga higala nga kamo aduna sukad nga singko anyos pa mo ngadto na sa bag-ong estudyante nga inyong nahimamat sa inyong klase sa math, importante nga dunay maayo nga mga higala. Ug sama sa giingon sa Alang sa Kalig-on sa mga Kabatan-onan: “Ang tanan nagkinahanglan og buotan ug tinuod nga mga higala. Sila mahimong dakong kalig-on ug panalangin nganha kaninyo” ([2011], 16).
Apan unsaon ninyo sa pagpangita ug pagpabilin sa buotan nga mga higala?
Among gipangutana ang mga kabatan-onan didto sa England mahitungod kon unsay kahulugan sa tinuod nga panaghigalaay ngadto kanila. Susiha ang pipila sa ilang mga istorya mahitungod sa ilang tinuod nga mga higala ug sa unsang paagi nga kadtong mga higala nakapalig-on kanila. Mahimong mabantayan ninyo nga ang inyong kaugalingong mga higala dako usab nga kalig-on nganha kaninyo.
Unsa ang nakahimo sa usa ka tawo nga buotan nga higala?
Aaron M.: Sa akong hunahuna kinahanglang magmadasigon kamo nga makakita sa inyong mga higala. Kinahanglang magpakabana kamo kanila ug kinahanglang mahibalo kamo nga sila nagpakabana kaninyo. Bation ninyo nga komportable nga makauban sila. Dili kamo mobati nga kinahanglan kamong molihok sama sa usa ka laing tawo kon makauban ninyo sila.
Leighton H.: Usa ka tawo nga mosuporta kaninyo ug mohupay kaninyo.
Maddy H.: Usa ka tawo nga imong masaligan.
Rachel P.: Sa akong hunahuna ang kasagaran sa unsay nakapahimo sa usa ka maayo nga higala mao ang pagbaton og usa ka tawo nga anaa alang kaninyo, kinsa nagsuporta kaninyo.
Emma F.: Ang akong labing suod nga higala kanunay nga anaa alang kanako ug mitabang kanako. Sa dihang mibiya ko sa high school aron motambong og homeschool, misugod siya sa pag-text kanako. Moingon siya, “Uy, kumusta na man ka? Kinahanglang manuroy ta.” Ug wala kaayo koy daghang higala nianang panahona, ug mao nga nahimo ming suod nga higala. Kanunay siyang mahibalo kon maguol ko. Sa laing bahin, wala ko masayud kon giunsa, mahibalo lang gyud siya.
Sa Unsang Paagi nga ang Inyong mga Higala Mosuporta Kaninyo?
Hannah P.: Duna koy mga higala nga moabut sa akong mga pasundayag sa akong show choir sa dihang apil pa ko niini.
Andrew S.: Ang akong higala nakatabang kaayo nako sa football.
Bella F.: Sa usa ka klase bahin sa relihiyon mibiyahe mi ngadto sa usa ka meetinghouse sa Simbahan, ug ang tanang misyonaryo anaa didto. Lingaw kaayo kadto. Ako naghunahuna usab nga usa kini ka maayo kaayong paagi sa pagpili kon kinsa ang akong maayo nga mga higala tungod kay makahibalo gyud ka kinsa ang mitahud sa mga relihiyon sa ubang mga tawo. Moingon sila sama sa, “Ah, dili diay ka mamalikas?” Ug moingon sila, “OK, maayo, dili ko mamalikas kon naa ka” ug mga butang nga ingon niana. Naghisgot mi mahitungod kon nganong dili mi moinum og kape ug uban pa, ug sila miingon, “OK, dili ta kinahanglang moadto sa mga tindahan og kape.” Matinahuron kaayo sila.
Emma B.: Ang akong mga higala okey ra kaayo nga makig-istorya mahitungod sa akong relihiyon ug moingon og mga butang sama sa, “Kahibalo ka, dili gyud ko kinahanglang motuo sa unsay imong gituohan, apan okey gyud ko nga mosabut aron makahibalo ko unsay imong nahibaloan ug unsay imong gituohan aron makatabang ko nga magpabilin kang lig-on.”
Calvin B.: Sukad ko mibalhin, wala gyud kaayo koy nakaila sa eskwelahan. Busa tanan nakong nailhan nga mga tawo diha sa simbahan. Kon kaming tanan anaa sa usa ka kalihokan sa kabatan-onan, buotan sila ngari nako.
Emma F.: Sa bag-o pa kong mibalhin dinhi, wala kaayo koy daghang higala nga LDS tungod kay dili kaayo daghan ang mga batan-ong babaye sa among ward. Ang nahitabo duna koy usa nga naamiga atol sa convention sa kabatan-onan nga LDS, ug nakahimo kana sa tanang kalainan alang nako sa pag-apil sa mga kalihokan. Ug busa iya kong gipaila-ila sa iyang mga higala, ug sa katapusan duna na koy mga higala nga LDS, nga nakatabang.
Giunsa Ninyo sa Paghimo og mga Panaghigalaay?
William S.: Kon ang usa ka tawo moingon og hi, ug mahitabo nga mag-istoryahanay na mo, sa katapusan mahimo na mong managhigala.
James P.: Alang nako, kini ang paghimo og panaghigalaay pinaagi sa mga kalihokan. Sama sa dihang miadto ko sa Amerika sa usa ka holiday, miadto ko sa Brigham Young University soccer camp, ug wala koy kaila bisan usa didto. Ug dayon sa katapusan sa unang adlaw, ang tanan nakaila na sa akong ngalan. Maghimo lang og mga kalihokan ug maniudto o motabang sa usag usa.
Seth H.: Pareho og interes—interesado ka sa samang mga butang pareho sa laing tawo. Ang paghimo og dungan sa praktikal nga mga butang maoy paagi nga masugdan ninyo ang panaghigalaay.
Unsay nakahimo sa tinuod nga panaghigalaay nga lahi kay sa pagkainila?
Seth H.: Ang pakighigalaay personal, ang pagkainila dili personal. Sa atong eskwelahan kita may kalagmitan nga mogrupo sa mga tawo ngadto sa “inila nga mga tawo,” base sa ilang abilidad sa sports o tingali, alang sa mga lalaki, unsa ka daghan sa ilang nauyab. Apan naghunahuna ko nga makahimo gyud ka og daghang nindot nga mga panaghigalaay. Mao nga kon magbinuotan ka, morag inila na pud ka. Sa akong hunahuna ang mga tawo nga magpabilin nga inila sa labing dugay nga panahon mao kadtong maayo nga mga higala.
Emma B.: Sa akong hunahuna kini mao ang paagi sa imong pagtratar sa ubang tawo, kay nakaila ko og daghang inila nga mga tawo nga ngil-ad kaayo og kinaiya, ug dili kaayo sila maayong mga higala sa daghang tawo. Apan duna koy nailhan usab nga pipila ka inila kaayo nga mga tawo nga maayo ngadto sa tanan. Sa akong hunahuna usa kana ka dakong kalainan. Sa akong hunahuna kini ang kinaiya gyud nimo. Dili ka pwedeng maghunahuna sa mga tawo nga ubos kay kanimo—tungod kay sila dili ubos.
Isaac P.: Sa akong hunahuna kon ikaw dunay maayo nga mga higala, makighigala sila nimo bisan unsa pa ang gihunahuna sa uban bahin nimo. Mao kana ang inyong buhaton kon kamo managhigala.
Grace S.: Ang mga higala mag-inunungay gyud ug kasaligan.
Unsay Inyong Nakat-unan Gikan sa Tinuod nga mga Higala?
Aaron M.: Magmatinuoron sa inyong kaugalingon. Dili ka makaangkon og tinuod nga mga higala kon ikaw dili matinuoron sa imong kaugalingon. Kon dili sila ganahan sa imong mga sumbanan, nan dili gayud sila tinuod nimong higala ug dili gyud mosuporta nimo.
Isaac P.: Maminaw sa unsay ilang isulti. Kon mag-istorya sila, ayaw ibaliwala ang ilang gisulti. Mag-focus lang gyud nila ug mosuporta nila.
Emma B.: Usa ka butang nga buhaton sa maayo nga higala mao ang modapit kaninyo sa pagbuhat og mga butang. Bisan og mangutana lang kon kumusta na ka. Mangutana lang usab og ginagmay nga mga butang. Ang ginagmay nga mga butang mao ang mga butang nga importante.
James P.: Mahimo usab kamong medyo mas bukas, modapit sa mga tawo sa grupo sa inyong mga higala ug dayon makighimamat sa ubang mga higala. Mahimo gihapon kamong maayo nga higala.
Ang Usa ka Tinuod nga Higala …
Grace S.: Ang usa ka tinuod nga higala mao ang tawo nga nakaila ninyo.
Andrew S.: Ang usa ka tinuod nga higala mao ang tawo nga kanunay ninyong masaligan.
James P.: Sa akong hunahuna masinabtanon sila.
Leighton H.: Makasalig ka sa imong kaugalingon kon anaa sila.
Calvin B.: Ang usa ka tinuod nga higala mao ang mosuporta.