Pagserbisyo diha sa Simbahan
Nag-inusarang Pagserbisyo didto sa Sarajevo
Ang tagsulat nagpuyo sa Rhineland-Palatinate, Germany.
Ma-Dominggo, mag-inusara ko magkanta, mag-ampo, ug maghatag og mga pakigpulong. Ang ubang mga miyembro magsugod ba kaha usab sa pagtambong sa miting?
Paghulagway pinaagi ni Mia Presyo/Shannon Kauban
Isip usa ka sakop sa German nga militar, kapin sa katunga sa 1999 nga didto ko sa Sarajevo, ang ulohan sa Bosnia ug Herzegovina. Miabut ang akong assignment sa military nga dunay dagkong mga hagit ug mga tag-as nga mga oras, apan kanunay akong mogahin og panahon aron motambong sa simbahan sa usa ka gamay nga chapel nga gigamit sa nagkalain-laing denominasyon diha sa kampo nga dunay 750 nga kapasidad.
Sa dihang miabut ko sa chapel usa ka Dominggo sa hapon, akong nakita nga gitrangkahan ang pultahan. Akong nahibaloan nga ang ubang mga miyembro sa Simbahan diha sa kampo mibalhin na. Nasagmuyo ko tungod kay ako nagdahum nga makasimba ug makaambit sa sakrament. Sa wala pa moadto sa Sarajevo, na-busy ko sa pagserbisyo isip presidente sa branch sa Germany ug regular nga makaambit sa sakrament.
Pipila ka semana ang milabay gitahasan ko sa pag-uban sa akong heneral sa pagbisita ngadto sa usa ka American division. Atol sa pagpaniudto, usa ka kapitan nga Amerikano nga nakakita nako nga nakig-istorya sa ubang mga sundalo nangutana kon ako usa ba ka miyembro sa Simbahan. Paghuman nga akong siyang gisultihan, iyang gihatag ang akong pangalan ug impormasyon sa pagkontak ngadto sa usa ka senior group lider sa Simbahan didto.
Sa wala madugay usa ka Brother Fisher ang mikontak nako. Human sa usa ka interbyu, siya mi-set apart nako isip usa ka group lider sa Simbahan sa Sarajevo uban sa tahas nga maghimo og usa ka grupo. (Ang grupo mao ang usa ka unit sa Simbahan sa mga base sa militar, sama sa usa ka branch.)
Gisugdan nako sa pagbutang og mga oras sa miting diha sa mga bulletin board ug nagpadala og mga imbitasyon, naglaum nga makakita og uban pang mga Santos sa Ulahing mga adlaw sa baraks sa militar didto sa Sarajevo. Sulod sa unang pipila ka semana, wala pay laing tawo ang mitambong. Mao nga ma-Dominggo, mag-inusara ko nga magkanta, mag-ampo, ug maghatag og mga pakigpulong. Nagsunod sa mga sumbanan sa Simbahan alang sa mga lider ug mga sakop sa militar, nakahimo ko og pagpanalangin ug pag-ambit sa sakrament kon walay ikaduha nga tighupot sa priesthood. Nakahatag kini kanako og dakong kalipay.
Ako nag-inusarang mipahigayon sa mga miting sa Iningles aron akong mapalambo ang akong mga kahanas sa pinulongan nga English. Ang unang pakigpulong nga akong gihatag mahitungod ni Joseph Smith. Walay usa nga makita diha sa kwarto, apan akong nabati ang presensya sa uban. Ang Espiritu Santo milig-on kanako ug mipadayag ngari kanako kon unsa ka importante nga masugdan ang buhat sa Ginoo niini nga dapit.
Pipila ka semana human nakong gipahigayon ang akong unang miting sa Dominggo, usa ka batan-ong sundalo nga Amerikana misulod sa chapel. Nabunyagan siya pipila pa lamang ka bulan ang milabay. Malipayon kaayo ko! Duha ka semana ang milabay, lain na usab nga sister ang miabut. Dayon duha ka brother ang miabut. Sa tabang sa Ginoo, ang Simbahan misugod sa pagtubo diha sa Sarajevo.
Karon ang Simbahan aduna nay usa ka branch sa Sarajevo. Samtang akong handumon ang akong panahon didto, makapamalandong ko sa dungog nga nahatag sa Ginoo kanako sa pagsebisyo sa usa ka espesyal nga paagi—nga usa ka tipik sa Iyang buhat ug sa pagkasayud nga “gikan sa gagmay nga mga butang magagikan ang mga dagko” (D&P 64: 33).